E Wla kpɛnlɛ cɛn i blɛ nun’n, maan e nian Zoova nin Zezi be liɛ’n su
1. ?E Wla kpɛnlɛ cɛn’n i blɛ’n nun, ngue yɛ Zoova i Lalofuɛ’m be tu be klun be yo ɔ?
1 Zoova tu i klun di junman klolɛ su. Kɛ Ezai 9:6 kán ninnge nga Ɲanmiɛn i Sielɛ’n wá yó mán sran mun’n i ndɛ’n, ɔ seli kɛ: “Anannganman m’ɔ sie mɛn wunmuan’n i klolɛ’n ti sa ng’ɔ́ wá yó’n yɛ ɔ o lɛ ɔ.” Kɛ Zezi bali asiɛ’n su wa’n, i kusu tuli i klun dili Ɲanmiɛn i junman’n klolɛ su. (Zn 2:13-17; 4:34) Afuɛ kwlaa nun’n, e Wla kpɛnlɛ cɛn’n i blɛ’n nun, aniaan kpanngban be nian Zoova nin Zezi be liɛ’n su. Yɛle kɛ be tu be klun be uka junman nga be di i jasin fɛ i bolɛ’n nun’n su. ?Afuɛ nga nun’n, amún yó sɔ wie?
2. ?Marsi i le 7 su’n, junman benin yɛ é tú e klun é dí ɔ?
2 Sran’m be yialɛ’n: É bó sran’m be yialɛ bo Marsi i le 7 su. Maan e siesie e wun kpa ikisa naan y’a kwla yia sran kpanngban. Aniaan’m bé mían be ɲin kpa naan be sa w’a kwla yia be jasin fɛ bowlɛ wunmuan’n. Kɛ é yía sran mun’n, nán maan e wla fi be nga e nin be suan Biblu’n nun like’n, nin be nga Ɲanmiɛn Ndɛ’n lo be mɔ e ko nian be osu’n, nin be nga e nin be e di junman’n, ɔ nin e osufuɛ mun, yɛ e janvuɛ suklu ba’m be su. I sɔ yolɛ’n nun’n, e kwla fa sran’m be yialɛ fluwa’n e man be trele. Annzɛ e kwla fa be ɲin e sie i sran’m be yialɛ fluwa ng’ɔ o e ɛntɛnɛti lika’n nun’n i su.
3. ?Marsi nin Avrili anglo’n nun’n, wafa sɛ yɛ e kwla uka junman nga e di i jasin fɛ bolɛ’n nun’n su ɔ?
3 Cɛn kunngun atin bolɛ junman’n: Sɛ e waan é klé kɛ e tu e klun e di Ɲanmiɛn i junman’n, e kwla uka junman nga e di i jasin fɛ bolɛ’n nun’n su. Marsi nin Avrili anglo’n nun’n, aniaan kpanngban kpa be kwla yo cɛn kunngun atin bofuɛ. Afin blɛ sɔ’n nun’n, cɛn kunngun atin bofuɛ’m be kwla di dɔ 30 jasin fɛ bolɛ’n nun. I sɔ’n ti’n, kɛ amún sú Ɲanmiɛn awlo lɔ’n, annzɛ kɛ amun ngunmin amún súan Biblu’n nun like’n, like nga amun kwla yo naan amun a yo cɛn kunngun atin bofuɛ’n, amun fa wlɛ i srɛlɛ’n nun. (Nya 15:22) Sɛ amun tu amun klun an yia sran mun’n, i sɔ’n klé aniaan’m be ajalɛ kpa. Sɛ amun siesie amun wun naan amun a bo jasin fɛ’n i kpa w’a tra laa’n, i sɔ’n klé kɛ amun nian Zezi i liɛ’n su.—Mr 6:31-34.
4. ?Sɛ e tu e klun e di junman kɛ Zoova nin Zezi sa’n, i su ye benin yɛ é ɲɛ́n i ɔ?
4 Sɛ e Wla kpɛnlɛ cɛn i blɛ’n nun’n e nian Zoova nin Zezi be liɛ’n su’n, é ɲán su ye dan. Yɛle kɛ é kwlá bó jasin’n é klé sran kpanngban. Yɛ é klun jɔ́. Afin i sɔ’n klé kɛ e tu e klun e su Zoova yɛ e cɛ sran like. (Yo 20:35) Like cinnjin kpafuɛ nga é ɲɛ́n i’n, yɛle kɛ Ɲanmiɛn nin i Wa’n bé klun jɔ́ e wun.