Kɛ é bó jasin fɛ’n nán maan e saci e blɛ’n
Afuɛ 2014 nun’n, Zoova i Lalofuɛ’m be fali dɔ 1.945.487.604 be boli jasin fɛ’n. I sɔ’n kle weiin kɛ be kunndɛ kɛ bé tú be klun bé dí Zoova i junman’n titi. (Jue. 110:3; 1 Kor. 15:58) Kɛ mɔ ‘e ɲrun a ka koko’n’ ti’n, ɔ ti cinnjin kpa kɛ e fa blɛ kan nga e le i’n, e uka sran kpanngban kpa ekun.—1 Kor. 7:29.
Kɛ ɔ ko yo naan jasin fɛ’n i bolɛ’n nun’n, y’a saciman e blɛ’n, ɔ fata kɛ e fa ngwlɛlɛ e nanti. Wienun ɔn, e fa dɔ kun annzɛ dɔ kpanngban e bo jasin fɛ’n. Sanngɛ e ɲanman sran. ?Sɛ ɔ ti sɔ’n, ajalɛ benin yɛ e kwla fa naan y’a to sran kpanngban ɔn? E kwla fa ajalɛ fanunfanun. É wá kán ajalɛ sɔ’m be nun wie’m be ndɛ. I liɛ’n, sɛ é kwlá sé’n, ‘acɔliɛ nga e to’n, ɔ su to fuanman.’—1 Kor. 9:26.
Awloawlo’m be nun: I afuɛ kpanngban yɛ, nglɛmun’n, awloawlo’m be nun yɛ e bo jasin fɛ’n i bolɛ’n bo ɔ. Sanngɛ nglɛmun’n, sran kpanngban be di junman. Ɔ maan, e kwlá toman be awlo. Sɛ ɔ ti sɔ’n, e kwla fa ajalɛ kɛ é bó jasin fɛ’n awloawlo’m be nun nnɔsua wia nun, annzɛ nnɔsua flɔlɔ. Afin blɛ sɔ’n nun’n, sran’m be o awlo. Kpɛkun nglɛmun’n, e kwla bo jasin fɛ’n aata diwlɛ’m be nun, annzɛ akpɔ’m be nuan. I liɛ’n, e junman’n kwla ba nvlɛ.
Nzra nun: E jasin bowlɛ’n nun’n, lika nga sran kpanngban sin lɛ’n, yɛ ɔ fata kɛ be sie tabli nin kakaklolo nga be fa bo jasin fɛ’n niɔn. (An nian fluwa Ɲanmiɛn Sielɛ Blɛ junman afuɛ 2013, Zuie anglo’n i bue 5 su’n nun.) Sanngɛ, sɛ aniaan’m be fa tabli annzɛ kakaklolo be sie i lika kun nun naan i sin’n, be sie i nzɔliɛ kɛ sran kpanngban be sinman lɛ kun’n, asɔnun kpɛnngbɛn’m be kwla fa ajalɛ kɛ be fa sie i lika uflɛ.
Sran’m be osu nianlɛ ɔ nin Biblu’n nun like klelɛ: Sɛ e sie i nzɔliɛ kɛ blɛ wie nun e toman sran mun awlo’n, e kwla siesie e wun e fɛ i sɔ blɛ’n e nian sran’m be osu. I wie yɛle kɛ, sɛ e wun kɛ e kwla to sran mun awlo Fue cɛn nglɛmun’n, e kwla ko nian be nga e kle be Biblu’n nun like’n be osu nnɔsua wia nun, annzɛ nnɔsua flɔlɔ. Asa ekun’n, jasin bofuɛ’m be nuan kwla sɛ su kɛ bé kó nían be nga be kle be Biblu’n nun like m’ɔ be tran akpasua kunngba’n nun’n, be osu blɛ trele kun nun.
Ɔ ti su kɛ, kɛ e bo jasin fɛ’n, sɛ e to sran mun o, sɛ e toman be o, e klɛ dɔ nga e dili’n e rapɔru’n su. Sanngɛ, kɛ e bo jasin fɛ’n m’ɔ ba nvlɛ’n yɛ e klun jɔ dan ɔn. I sɔ’n ti’n, sɛ e bo jasin fɛ’n blɛ wie nun naan e toman sran mun’n, e kwla fa ajalɛ uflɛ. Maan e srɛ Zoova m’ɔ ti ‘fie’n i fuɛ’n’ kɛ ɔ uka e, naan jasin fɛ’n i bolɛ’n nun’n, y’a saciman e blɛ’n!—Mat. 9:38.