Maan e uka aɲinsifuɛ mun naan be si Zoova

1. ?Wafa sɛ yɛ Zezi kleli kɛ ɔ ti aunnvuɛ sifuɛ ɔ?

¹ Kɛ Zezi i wie cɛn’n mantannin koko’n, ɔ ɔli Zeriko. Kɛ ɔ́ sɛ́ i sin’n, aɲinsifuɛ nɲɔn mɔ be titi atin nuan lɛ’n be kpan flɛli i, be seli i kɛ: “Nannan [...] si ye aunnvuɛ yo e ye!” Blɛ sɔ’n nun’n, nn Zezi i akunndan’n w’a sanngan. Afin ɔ su bu ɲrɛnnɛn nga ɔ́ wá wún i’n i akunndan. Ɔ nin i sɔ ngba’n, ɔ jrannin, kpɛkun ɔ flɛli be naan w’a yo be juejue. (Mat. 20:29-34) ?Wafa sɛ yɛ e kwla nian Zezi i ajalɛ’n su ɔ?

2. ?Wafa sɛ yɛ e kwla bo jasin fɛ’n e kle aɲinsifuɛ kun ɔn?

² Maan e uka be: Sɛ e wun aɲinsifuɛ kun naan ɔ mian ukalɛ wun’n, maan e bo e dunman e kle i, kpɛkun e se i kɛ e kunndɛ kɛ é úkɛ i. Kɛ mɔ sran wie’m be yo aɲinsifuɛ’m be finfin’n ti’n, i klikli nun’n ɔ kwla sisi i bo naan w’a kplin su. Sanngɛ sɛ e kle i kɛ i ndɛ lo e sakpa’n, ɔ kwla klpin su kɛ e ukɛ i. Asa ekun’n, maan ɔ tran e klun kɛ sran wie’m be wunman ase kpa, yɛ wie’m be wunman ase mlɔnmlɔn. Ɔ maan wafa nga sran’n i tukpacɛ’n fa ti’n, i su yɛ ɔ fata kɛ e nian e ukɛ i ɔ. Kɛ e ko wie i uka’n, e kwla se i kɛ e kle sran’m be Biblu’n nun like. Sɛ e ɲɛn i wun atin’n, maan e kanngan Biblu’n nun ndɛ mma kun nun e kle i. Ɔ kwla yo Jue Mun 146:8 annzɛ Ezai 35:5, 6. Aɲinsifuɛ wie’m be suannin aɲinsifuɛ’m be fluwa’m be nun kannganlɛ. Ɔ maan sɛ e to be nun kun’n, e kwla usɛ i kɛ: “?A kunndɛ kɛ á ɲán fluwa kun mɔ aɲinsifuɛ’m be kwla kannngan nun m’ɔ kwla uka wɔ naan w’a wun Biblu’n nun ndɛ’n i wlɛ’n?” E ɛntɛnɛti adrɛsi jw.org su’n, be kanngannin fluwa wie’m be nun. Ɔ maan sɛ ɔ le ordinatɛli’n, e kwla kle i wafa ng’ɔ kwla ɲan fluwa sɔ mun wie’n. I kpa bɔbɔ’n, ɔ kwla fa fluwa wie mɔ aɲinsifuɛ’m be kwla kanngan nun’n sie i i ɔrdinatɛli’n nun. Be flɛ fluwa wafa sɔ mun kɛ format RTF.—Nian kuku nga be flɛ i “Like nga e kwla yo’n.”

3. ?E jasin bowlɛ’n nun lɔ’n, wafa sɛ yɛ e kwla kunndɛ aɲinsifuɛ mun ɔn?

³ Maan e kunndɛ aɲinsifuɛ mun: Kɛ é bó jasin fɛ’n awlowlo’m be nun’n, e toman aɲinsifuɛ mun titi. Afin be tukpacɛ ti’n be nun kpanngban be kloman kɛ be nin sran nga be simɛn i’n, bé kókó yalɛ. I sɔ’n ti’n, ɔ fata kɛ e mian e ɲin kpa e “kunndɛ” aɲinsifuɛ mun naan e bo jasin fɛ’n e kle be. (Mat. 10:11) ?E junman su lɔ’n, annzɛ e suklu lɔ’n, e si sran kun m’ɔ ti aɲinsifuɛ ɔ? Sɛ ɔ ti sɔ’n, maan e fa ajalɛ naan e nin sran sɔ’n e koko yalɛ. Kusu sɛ aɲinsifuɛ’m be suklu kun o e jasin fɛ’n bowlɛ’n nun’n, e kwla fa aɲinsifuɛ’m be fluwa wie e man suklu sɔ’n i su kpɛn’n kɛ ɔ fa sie i be fluwa siewlɛ’n nun. ?Amun si sran kun mɔ i osufuɛ kun ti aɲinsifuɛ ɔ? ?Annzɛ anuannzɛ nga be nian aɲinsifuɛ’m be lika’n i wie o amun jasin fɛ’n bowlɛ’n nun lɔ? Sɛ ɔ ti sɔ’n, amun se aɲinsifuɛ’n i osufuɛ sɔ’n, annzɛ anuannzɛ sɔ’n i sunianfuɛ’n, annzɛ sran ng’ɔ sɔ sran’m be nun lɔ’n kɛ amun ti Zoova i Lalofuɛ. Naan Zoova i Lalofuɛ’m be kunndɛ kpa kɛ bé úka aɲinsifuɛ mun. Yɛ an se i kɛ, amun kunndɛ kɛ amún fá fluwa kun m’ɔ ti aɲinsifuɛ’m be liɛ’n, annzɛ e fluwa wie mɔ be kanngannin be nun’n fá mɛ́n i. E ɛntɛnɛti adrɛsi jw.org i su video kun « Sans elle, je serais perdu » kan aɲinsifuɛ kun mɔ Biblu’n nga aɲinsifuɛ’m be kwla kanngan nun’n, i nun kannganlɛ’n yoli i ye’n i ndɛ. Amun kwla bo video sɔ’n kle sran’n. Sɛ amun kan sa ti mɔ amun bali’n i ndɛ trele’n, be kwla man amun atin kɛ amun nin aɲinsifuɛ’m be koko yalɛ.

4. ?Ngue yɛ Zanɛti i su ndɛ’n kle e ɔ?

⁴ Be flɛ aniaan bla kun kɛ Zanɛti. Ɔ ti aɲinsifuɛ. Cɛn kun’n, ɔ ko niannin aɲinsifuɛ wie’m be osu. Kpɛkun ɔ nin talua kun be kokoli yalɛ. Zanɛti seli talua’n kɛ: “Like nga Zezi wá yó mán aɲinsifuɛ mun cɛn wie lele’n, ɔ yili i nglo. Yɛle kɛ ɔ yoli aɲinsifuɛ’m be juejue’n.” I sin’n, ɔ kanngannin Sa Nglo Yilɛ 21:3, 4 nun kleli talua’n. Yɛ ɔ kannin like nga Ɲanmiɛn Sielɛ’n wá yó naan ndɛ sɔ’n w’a kpɛn su’n i ndɛ. Ndɛ sɔ’n boli talua’n i nuan dan. Ɔ seli kɛ: “Sran kun m’ɔ ti aɲinsifuɛ kɛ min sa’n nin a kanman ndɛ kɛ nga sa nin a kleman min le. Be nga be wun ase’n be nun sunman be bu i kɛ, sɛ sran kun ti aɲinsifuɛ’n ɔ fin sa tɛ wie mɔ i bɔbɔ annzɛ i nannan’m be yoli’n.” Zanɛti fali fluwa Biblu’n kle’n mɛnnin i. Dɔ nga su’n, ɔ kle i Biblu’n nun like kpɛ nɲɔn le mɔcuɛ kwlaa nun.

5. ?Sɛ e kle aɲinsifuɛ’m be kɛ be ndɛ lo e’n, wafa sɛ yɛ i bo’n kwla gua ɔ?

⁵ Ɔ ti su kɛ e kwlá yoman sran’m be juejue kɛ nga Zezi fa yoli’n sa. Sanngɛ e kwla uka be mɔ mɛn nga i min’n sacili be akunndan’n naan be wun Ɲanmiɛn Ndɛ’n i wlɛ kpa. Sran sɔ’m be nun wie’m be ti aɲinsifuɛ. (2 Kor. 4:4) Kɛ Zezi ɔli Zeriko m’ɔ́ sɛ́ i sin’n, ɔ yoli sran nɲɔn be juejue, afin be yoli i annvɔ. (Mat. 20:34) Ɔ maan aɲinsifuɛ’m be ndɛ loli Zezi. E kusu, sɛ be ndɛ lo e wie’n, e kwla uka be nun wie mun naan be si Zoova.

Like nga e kwla yo’n

Maan e kan ndɛ’n e kle aɲinsifuɛ’n bɔbɔ. Nán e ijɔ kekle. Afin kannzɛ aɲinsifuɛ’m be wunman e’n, sanngɛ be ti ndɛ nga e kan’n.
Maan e mɛn i atin naan ɔ tra e sa’n nun. Maan e dun i ɲrun mmua kan. I liɛ’n, sɛ like wie m’ɔ kwla tɛnndɛn i ja’n nun o akpɔ’n su’n, é kán kle i.
Sɛ e waan é klé i like wie’n, e kwla se i kɛ “nian.” Afin kannzɛ be wunman ase’n, sanngɛ wafa nga ninnge’m be fa ti’n, be kwla bu i akunndan be wun i wlɛ.
Kɛ an koko yalɛ’n, an tran lika bliin wie nun. Aɲinsifuɛ’m be kloman lika ng’ɔ ti woyowoyo’n. Afin kɛ mɔ be wunman sa ti mɔ lika’n ti sɔ’n, srɛ kwla kun be.
Sɛ amun su jaso kan’n, amun bo su kle i. Afin sɛ ɔ siman kɛ amun a jaso’n, i ngunmin kwla ijɔ amun sin.
Sɛ ɔ tranman amun jasin fɛ’n bowlɛ’n nun lɔ naan Ɲanmiɛn Ndɛ’n ti i cinnjin’n, amun klɛ i su ndɛ fluwa Veuillez suivre l’intérêt (S-43) su, kpɛkun amun fa man amun asɔnun’n i fluwa klɛfuɛ’n.