LIKE NGA KLISIFUƐ’M BE YO’N
Maan e si jasin fɛ’n i bo kpa tra laa: E bo jasin fɛ’n e kle aɲinsifuɛ mun
?NGUE TI YƐ Ɔ TI CINNJIN-ƆN?: Aɲinsifuɛ sunman be liɛ’n, kɛ ɔ yo naan be nin sran nga be siman be’n be koko yalɛ’n ɔ timan pɔpɔ. I sɔ’n ti’n, ɔ fata kɛ e suan wafa nga e kwla bo jasin fɛ’n e kle i sɔfuɛ mun’n. Aɲinsifuɛ’m be ndɛ lo Zoova. (Sau 19:14) E kwla nian Zoova i ajalɛ’n su. Yɛle kɛ e uka aɲinsifuɛ mun naan be nin Zoova be kaci janvuɛ.
?WAFA SƐ YƐ É YÓ I SƆ-Ɔ?:
Maan e “kunndɛ” aɲinsifuɛ mun. (Mt 10:11) ?An si sran kun mɔ i osufuɛ kun ti aɲinsifuɛ-ɔ? ?Annzɛ amun asa’n su lɔ’n, suklu wie annzɛ lika uflɛ wie mɔ i nun aɲinsifuɛ’m be klo kɛ bé kánngan e fluwa nga be ti aɲinsifuɛ’m be liɛ’n be nun-ɔn?
Maan e kle be kɛ be ndɛ lo e. Sɛ amun tra be janvuɛ naan amun kle be kɛ be ndɛ lo amun’n, srɛ su kunman be kɛ be nin amun koko yalɛ. Amun asa’n su lɔ’n, ndɛ ng’ɔ kwla lo be’n an jran be su be nin be koko yalɛ.
Maan e uka be naan be si Zoova. Anuannzɛ’n yili ninnge fanunfanun naan e fa uka aɲinsifuɛ mun annzɛ be nga be wunman ase kpa’n. I ti’n, ɔ fata kɛ e usa be like nga be klo kɛ e fa man be’n. Ɔ fata kɛ junman sunianfuɛ’n ko wun aniaan ng’ɔ nian fluwa’m be su’n i wun naan ɔ nian sɛ aɲinsifuɛ’m be fluwa nga aniaan’m be wlali be bo’n yɛ ɔ klɛli-o.