Maan e fa e wun e mantan aniaan nga be si jasin fɛ’n i bo kpa’n
E kwlakwla e klo aniaan nga be si jasin fɛ’n i bo kpa’n. Be nun wie’m be boli Zoova i sulɛ bo wa cɛ. Yɛ be wie be liɛ’n ɔ nin cɛman sɔ liɛ. Blɛ kasiɛn nga nun’n, wafa nga Zezi tinngɛ asɔnun’n mɔ jasin fɛ’n i bolɛ’n kɔ i ɲrun’n, aniaan sɔ’m be fa be ɲin sieli su. (Mat. 28:19, 20) Jasin fɛ’n i bolɛ’n nun’n, ninnge wie’m be tanndannin be ɲrun. Sanngɛ “Nyanmiɛn b’ɔ kwla like kwlaa yo’n” ɔ jrannin be sin. (2 Kor. 4:7) Aniaan sɔ’m be si like kpanngban. Sɛ e man be atin’n, bé klé e like nga be si i’n be klunklo su. (Jue. 71:18) I sɔ’n ti’n, maan e fa e wun e mantan be naan be uka e. ?Wafa sɛ yɛ e kwla yo i sɔ ɔ?
Jasin fɛ’n i bolɛ’n nun: Kɛ ɔ ko yo naan aniaan nga be boli jasin fɛ’n i bolɛ bo ɔ nin a cɛman’n be sa w’a tɔ junman sɔ’n nun’n, ɔ fata kɛ be kle be ajalɛ wie mun. Sɛ be nian be nga be si jasin fɛ’n i bo kpa’n be ajalɛ’n su’n, i sɔ’n úka be kpa. (An nian blɔfuɛ nun Sasafuɛ tranwlɛ’n, afuɛ 2015 Fevrie i le 15, i bue 16 § 2 su’n nun.) ?Kɛ e nin aniaan sɔ mun e bo jasin fɛ’n, wafa sɛ yɛ ɔ uka e ɔ?
Sɛ e ɲɛn i wun atin’n, maan e nin aniaan nga be si jasin fɛ’n i bo kpa’n, e bo jasin fɛ’n likawlɛ. Sɛ aniaan sɔ’n ti fɔlɛfuɛ’n, cɛn kunngun e kwla fa e Biblu’n nun like suanfuɛ kun e kɔ i awlo lɔ. Kpɛkun, e nin i e kle Biblu’n nun like suanfuɛ’n i like likawlɛ. I sin’n, like nga e kwla yo naan y’a si like kle kpa’n, maan e usa aniaan’n.
Maan e nin be e su Ɲanmiɛn awlo lɔ: Maan e nin aniaan sɔ mun e yo ninnge wie mun likawlɛ. I liɛ’n e si be kpa. I wie yɛle kɛ, kɛ é sú Ɲanmiɛn awlo lɔ’n, e kwla yia be nun kun. Sɛ aniaan sɔ’n ti fɔlɛfuɛ’n e kwla kɔ i awlo lɔ naan e nin i y’a su Ɲanmiɛn likawlɛ. E kwla usɛ i kɛ: ?Wafa sɛ yɛ a sili ndɛ nanwlɛ’n niɔn? ?Mmlusuɛ benin yɛ a ɲɛnnin i ɔ? ?Kɛ a boli jasin fɛ’n i bolɛ bo e asɔnun’n nun lele m’ɔ́ fá jú andɛ’n, wafa sɛ yɛ junman sɔ’n ɔli i ɲrun ɔn? ?Zoova i sulɛ’n nun’n, ninnge benin mun yɛ be mannin ɔ aklunjuɛ dan ɔn?
Jasin fɛ’n i bolɛ’n nun’n, nán like ngba yɛ aniaan sɔ’m be si i yo ɔ. Ɔ le kun nin i like liɛ m’ɔ si i yo kpa ɔ. (Rɔm. 12:6-8) Asa ekun’n, aniaan sɔ’m be nun wie’m b’a yo kpɛnngbɛn. Ɔ maan wie liɛ’n, be kwlá ɲanman blɛ kpanngban naan e nin be y’a koko yalɛ. Ɔ nin i sɔ ngba’n, kɛ mɔ aniaan sɔ mun be boli Zoova i sulɛ bo w’a cɛ’n ti’n, be kwla kle e like kpanngban.