?Amun kwla yia sran uflɛ?

Asɔnun kpanngban nun’n, jasin bofuɛ kpanngban be kwlá boman jasin fɛ’n juejue su, afin be ti tukpacifuɛ annzɛ kusu b’a yo kpɛnngbɛn. (2 Kor. 4:16) ?Amun kwla yia aniaan sɔ’m be nun wie mun naan amun a ko kle sran kun i Biblu’n nun like? Sɛ ɔ kwlá tumɛn i bo’n, amun kwla fa Biblu’n nun like suanfuɛ’n be kɔ i awlo lɔ. Wie liɛ’n, e nin jasin bofuɛ kun m’ɔ ti cɛcɛwafuɛ’n e nuan kwla sɛ su kɛ é bó jasin fɛ’n likawlɛ. Atrɛkpa’n, e nin i e kwla bo jasin fɛ’n awlo nɲɔn kun nun, annzɛ e kwla ko nian sran kun annzɛ sran nɲɔn osu. Aniaan nga be ti kpɛnngbɛn’n be nun sunman be si jasin fɛ’n i bo kpa. Ɔ maan sɛ e nin be e bo jasin likawlɛ’n, nán be ngunmin yɛ ɔ́ yó be ye ɔ. E bɔbɔ é ɲán su ye wie. (Rɔm. 1:12) Asa ekun’n, e klun mɔ e tu e klo e niaan mun kɛ ngalɛ’n sa’n, Zoova yrá su.​—Nya. 19:17; 1 Zan 3:17, 18.