E junman dilɛ ninnge mun
1. ?Ngue ti yɛ be kwla fa Klistfuɛ’m be sunnzun ajuin difuɛ ɔ?
1 Ajuin difuɛ’m be ninnge nga be fa di junman’n be sɔnnin. Be fa ninnge sɔ’m be nun wie’m be di junman cɛn kwlakwla. Be ninnge wie’m be o lɛ kusu’n, nán cɛn ngba yɛ be fa di junman ɔn. Ninnge nga be fa di junman titi’n, be fa sie be junman dilɛ pata’n nun. Yɛ be si be nun junman di kpa. Biblu’n wla Klistfuɛ’m be tinuntinun be fanngan kɛ be wla be wun ase be bo jasin fɛ’n, naan be yo “junman difuɛ mɔ nyannzuɛn kun-mɛn i i junman’n ti.” (2 Tim. 2:15) ?E junman dilɛ ninnge’m be nun cinnjin kpafuɛ’n yɛle benin? Yɛle Biblu’n. I yɛ e fa uka sran mun naan b’a kaci Zezi i sɔnnzɔnfuɛ ɔ. (Mat. 28:19, 20) I sɔ’n ti’n, ɔ fata kɛ e mian e ɲin naan kɛ é ‘kán ndɛ nanwlɛ’n y’a kpɛmɛn i wun.’ E junman dilɛ ninnge wie’m be o lɛ ekun’n, e fa be e di junman titi. Ɔ maan, ɔ fata kɛ e kwlakwla e si be nun junman di kpa. I liɛ’n, e kwla fa uka sran mun naan b’a si ndɛ nanwlɛ’n.—Nya. 22:29.
2. ?Fluwa benin mun yɛ e fa kle sran’m be Biblu’n nun like ɔ?
2 Ninnge nga e fa be e di junman titi’n: ?Ninnge sɔ mun yɛle benin? Like cinnjin kpafuɛ nga e fa kle sran’m be Biblu’n nun like’n, yɛle fluwa ?Ngue like yɛ Biblu’n kle i sakpasakpa ɔ? Kɛ sran kun ko wie fluwa sɔ’n i nun like suan’n, e fa e fluwa ‘Maan e yo sa nga e yo ɔ e si kɛ Ɲanmiɛn klo e’n’ e kle i like naan ɔ wun wafa nga ɔ kwla nanti Biblu’n nun mmla’m be su’n i wlɛ. Ɔ maan, ɔ fata kɛ e fa fluwa nɲɔn sɔ mun e di junman kpa. E kwla fa fluwa wie mun ekun e kle sran’m be Biblu’n nun like. Be nun kun yɛle fluwa Jasin fɛ kpa kun fin Ɲanmiɛn! Sɛ e to sran kun m’ɔ siman kanngan’n, annzɛ kusu sɛ fluwa nga anuannzɛ’n yili be i aniɛn’n nun’n b’a sɔman’n, e kwla fa fluwa Amun tie Ɲanmiɛn ndɛ’n, annzɛ Amun tie Ɲanmiɛn ndɛ’n naan amun a ɲan nguan tititi e kle i like. Asa ekun’n, e kwla fa e fluwa ?Wan mun yɛ be yo Zoova i klun sa’n andɛ ɔ? e uka sran mun naan b’a si Zoova i anuannzɛ’n. E video’m be kwla uka sran mun naan b’a kaci Zezi i sɔnnzɔnfuɛ. I wie yɛle ?Ngue ti yɛ Biblu’n nun like suanlɛ’n ti cinnjin ɔn?, annzɛ ?Ngue yɛ be yo i Ɲanmiɛn Sielɛ Sua’n nun lɔ ɔ? Ɔ fata kɛ e fa video sɔ mun e di junman kpa.
3. ?Ngue yɛ Ɲanmiɛn Sielɛ Blɛ juman fluwa’n i nun ndɛ wie’m bé wá úka e naan y’a yo ɔ?
3 Ɲanmiɛn Sielɛ Blɛ juman fluwa nga bé wá fíte e ɲrun lɔ’n, be nun ndɛ wie’m bé wá úka e naan y’a wun wafa nga e kwla fa fluwa sɔ mun e kle sran’m be like kpa’n i wlɛ. Maan e mian e ɲin e fa fluwa sɔ mun e di junman kpa. I sɔ yolɛ nun’n, maan e ɲin tran ndɛ yɛ mɔ Biblu’n kan su. Ɔ se kɛ: “Nian ɔ bɔbɔ ɔ wun su ɔ nin ninnge bɔ a kle’n su kpa, afin sɛ a yo sɔ tititi’n, á dé ɔ bɔbɔ nin be nga be ti ɔ ndɛ’n.”—1 Tim. 4:16.