Maan e bo jasin fɛ’n e kle “sran wafa’n kwlaa”
1. ?Ngue ti yɛ e kwla se kɛ jasin bofuɛ nga i sa w’a tɔ junman’n nun’n, ɔ ti kɛ ajuin difuɛ kpa kun sa ɔ?
1 Ajuin difuɛ kpa’n, i sa nun junman dilɛ ninnge’m be sɔnnin, yɛ ɔ si be nun junman di. Kɛ ɔ́ dí i junman’n kɔ́’n, sɛ ose o, sɛ soma annzɛ like uflɛ yɛ ɔ́ fá o, ɔ wun i wlɛ. I kunngba’n, ninnge nga be uka e naan y’a kwla di e jasin fɛ’n bolɛ junman’n, be sɔnnin. Be nun wie yɛle e fluwa pɛplɛɛplɛ mun. Ɔ le kun nin i nun ndɛ. Be yili be kɛ e fa bo jasin fɛ’n e kle “sran wafa’n kwlaa.” (1 Kor. 9:22) Ɲanmiɛn Sielɛ Blɛ junman fluwa nga i afiɛn fluwa’n kan be nun wie’m be ndɛ. Asa ekun’n, be nga be ti yɛ be yili be’n, ɔ kan be ndɛ, kpɛkun wafa nga e kwla fa man’n, ɔ kɛn i ndɛ wie.
2. ?Wafa sɛ yɛ e kwla fa e fluwa pɛplɛɛplɛ mun e bo jasin fɛ ɔ?
2 Wafa nga ɔ fata kɛ e fa man sran mun’n: Kɛ ajuin difuɛ’n yí like’n, ɔ ju wie’n ɔ fa ose, ɔ ju wie kusu ɔ, ɔ fa soma yɛ ɔ fa yi ɔ. Ɔ maan, like nga ɔ ko fa naan like nga ɔ́ yí’n, w’a yo kpa’n, yɛ ɔ fa ɔ. I kunngba’n, sɛ e wun i kɛ fluwa pɛplɛpɛ kun i nun ndɛ’n kwla yo sran kun i ye’n, maan e fɛ i sɔ fluwa’n e mɛn i. Kannzɛ bɔbɔ nán fluwa sɔ’n yɛ e fa man sran mun anglo sɔ nun’n, maan e fa mɛn i. I wie yɛle kɛ sɛ fluwa Biblu’n kle yɛ be waan e fa man’n, naan kusu sran’n timan Klistfuɛ, yɛ Biblu’n nun ndɛ’n lomɛn i’n, e kwla fa e fluwa pɛplɛɛplɛ’m be nun kun m’ɔ kwla yo i fɛ’n, e mɛn i. I sin’n, maan e yo naan i konvi’n sɔ Ɲanmiɛn ndɛ’n ka naan y’a fɛ i ɲin y’a sie i fluwa Biblu’n kle su.
3. ?Ngue ti yɛ ɔ fata kɛ e si wafa nga é fá e fluwa mun é dí junman’n niɔn?
3 Biblu’n nun’n, be yi be nga be si be junman’n i di kpa’n, be aɛ. (Nya. 22:29) Andɛ kusu’n, junman fi timan cinnjin traman “Nyanmiɛn i jasin fɛ’n” bolɛ junman’n. (Rɔm. 15:16) I ti’n, sɛ e waan é yó “junman difuɛ bɔ ɲannzuɛn kunmɛn i i junman’n ti’n,” maan e mian e ɲin naan fluwa fanunfanun nga e fa bo jasin fɛ’n, e fa be e di junman kpa.—2 Tim. 2:15.