?Ngue ti yɛ be kanngannin e fluwa wie’m be nun ɔn?

1. ?Like uflɛ benin yɛ e le i mɔ e kwla ɲɛn i su ye ɔ?

¹ Fɔnvɔlɛ ndɛ nanwlɛ nga be o jw.org su’n, sran kaka be klo be nun kannganlɛ. (Aku. 12:​10) Sanngɛ, be kanngannin e fluwa wie’m be nun be sieli i jw.org su. ?Amun a fa di junman le? Fluwa sɔ mun mɔ be kanngannin be nun ti’n, be kwla tie ndɛ kpanngban e ɛntɛnɛti lika’n su. ?Wafa sɛ yɛ e kwla fa e fluwa’m be nun kannganlɛ sɔ mun e yo e wun sa ye ɔ?

2. Be kanngannin e fluwa wie’m be nun. ?Wafa sɛ yɛ e bɔbɔ nin e awlofuɛ mun e kwla fa di junman ɔn?

² E ngunmin annzɛ e nin e awlofuɛ mun e kwla fa suan like: Be kanngannin Biblu’n, nin periodiki mun, ɔ nin fluwa wie’m be nun. Kɛ é kɔ́ lika’n, annzɛ é dí junman wie mun’n, e kwla e tie wie. Sɛ e yo sɔ’n, é klé kɛ e fa e blɛ’n, e yo like ng’ɔ yo sa ye’n. (Efɛ. 5:​15, 16) Kɛ e nin e awlofuɛ mun é sú Ɲanmiɛn’n, e kwla tie fluwa’m be nun kannganlɛ’n. Kɛ é tíe’n, e kwla fa fluwa’n bɔbɔ ba’n e nian nun. Sɛ e ngunmin é súan Biblu’n nun like naan e tie e fluwa’m be nun kannganlɛ’n, i sɔ’n úka e kpa. I li sɛ e waan é sí kanngan kpa’n annzɛ é súan aniɛn uflɛ’n yɛ ɔ́ úka e kpa’n niɔn.

3. ?E jasin bowlɛ nun lɔ’n, wan mun yɛ be kwla ɲan e fluwa’m be nun kannganlɛ’n i su ye?

³ E kwla fa bo jasin fɛ’n: E jasin bowlɛ nun’n, be nga be waan be ɲanman be ti naan b’a kanngan e fluwa’m be nun’n, be kwla kunndɛ kɛ bé tíe e fluwa’m be nun kannganlɛ’n. Asa kusu’n, e kwla to sran wie mun mɔ be kan aniɛn uflɛ ɔ. Sɛ be tie Ɲanmiɛn Sielɛ’n i ndɛ’n be “bɔbɔ [be] aniɛn’n” nun’n, be kwla sɔ jasin fɛ’n nun klanman. (Yol. 2:​6-8) Nvle wie’m be nun’n, sran’m be klo ndɛ tielɛ tra kannganlɛ. I wie yɛle Sinua’m be mɛn’n nun lɔ’n, be nga be kan Mɔngu aniɛn’n be liɛ’n. Be kan be ndɛ cinnjin’m be kle be mma mun, be mma’m be fa sie be klun kpa naan b’a kan kle be liɛ mun. Sran ble’m be nvle kpanngban nun’n, sran’m be klo ndɛ tielɛ tra fluwa nun kannganlɛ.

4. ?Kɛ mɔ e klo kɛ é úka e jasin bowlɛ nun lɔfuɛ mun’n, kosan benin mun yɛ e kwla fa usa e wun ɔn?

⁴ E kwla usa e wun kɛ: ?Sɛ n to sran kun naan e fluwa nga be kanngannin be nun’n i aniɛn nun’n, m bo kan n kle i’n, ɔ su yomɛn i ye? ?Sɛ n fa wie n ko man e jasin bowlɛ nun lɔfuɛ kun ɛntɛnɛti su’n, ɔ su yomɛn i ye? ?Sɛ n fa fluwa nga be kanngannin nun’n i CD, ɔ nin fluwa bɔbɔ ba’n m man sran nga Ɲanmiɛn ndɛ’n lo i’n, ɔ timan kpa? E fluwa, nin fluwa pɛplɛpɛ, nin periodiki, nin fluwa nɲa nga be kanngan be nun’n, sɛ e fa be nun kannganlɛ’n i kwlaa e man sran kun’n, e kwla klɛ i e rapɔru’n su. Be kanngannin e fluwa wie’m be nun naan e fa suan like awlo lɔ yɛ e fa lua Ɲanmiɛn Sielɛ’n i su ndɛ nanwlɛ’n.​—1 Kor. 3:6.