Like nga a kwla yo naan w’a kanngan Biblu’n nun cɛn kwlakwla’n

Cɛn kwlakwla’n, e le ninnge kpanngban e yo. ?Ɔ maan kɛ ɔ yo naan a kanngan Biblu’n nun cɛn kwlakwla’n, ɔ ti kekle man wɔ? (Zoz. 1:8) Sɛ ɔ ti sɔ’n, a kwla yo nga nian:

• Yo naan ninnge wie’m be kpɛn ɔ wla. Sie dɔ kun ɔ pɔɔtablu’n nun naan sɛ dɔ sɔ’n ju’n ɔ pɔɔtablu’n tɛ. I liɛ’n, ɔ wla kpɛ́n su kɛ ɔ Biblu’n nun kannganlɛ dɔ’n w’a ju.

• Fa ɔ Biblu’n sie i lika kun mɔ a kwla wun i ndɛndɛ’n nun. Sɛ Biblu ng’ɔ o fluwa su’n wie yɛ a le i’n, fa sie i lika kun mɔ a kwla wun i cɛn kwlakwla’n nun.—Mml. 11:18.

• Bo Biblu nga be kanngannin nun’n tie. Kɛ á dí ɔ junman mun cɛn kwlakwla’n, a kwla bo tie. Niɛn kun mɔ be flɛ i Tara m’ɔ ti titi atin bofuɛ’n, ɔ di junman kɔnguɛ. Ɔ seli kɛ: “Kɛ ń dí awlo’n nun junman mun’n, n bo Biblu nga be kanngannin nun’n n tie. I sɔ’n uka min naan m’an kanngan Biblu’n nun cɛn kwlakwla.”

• Nán ɔ sa sin bubu wɔ. Sɛ sa wie ti’n w’a kwla kannganman Biblu’n nun blɛ nga a kleli’n nun’n, ɔ li mian ɔ ɲin kanngan nun kan ka naan w’a la. Sɛ w’a kwlá kannganman ndɛ mma kpanngban nun bɔbɔ’n, naan sanngɛ a yo sɔ cɛn kwlakwla’n, á ɲán su ye.—1 Piɛ. 2:2.