Maan e fa fluwa Biblu’n kle i nun ndɛ akpasua mun e di junman kpa

Kɛ like suanfuɛ’n, ɔ́ sí like nga Biblu’n kle i sakpasakpa m’ɔ́ nánti su’n, nn i ɲin tí Ɲanmiɛn i sulɛ’n nun, nn ɔ́ yí nzuɛn kpakpa’m be nglo. (Jue. 1:​1-3) E kwla fa fluwa Biblu’n kle i nun ndɛ akpasua mun e ukɛ i naan w’a wɔ i ɲrun kpa.

Kosan nga be fa fiti ndɛ tre’m be su’n: Ndɛ tre kwlaa i bo bobolɛ nun’n, kosan wie’m be o lɛ. Be tɛli be su ndre tre’n nun. E kwla kanngan kosan sɔ’m be nun naan like suanfuɛ’n i ɲin tran like nga é wá súan’n i sin. Annzɛ kusu e kwla fa be e usa like suanfuɛ’n naan ɔ tɛ be su kpe kan. Sɛ w’a tɛman be su klanman’n, nán blɛ sɔ’n nun yɛ ɔ fata kɛ e se i kɛ ɔ timan su ɔ. Ndɛ ng’ɔ kannin’n ɔ́ úka e naan y’a si ndɛ ng’ɔ fata kɛ e yiyi nun kpa’n.​—Nya. 16:23; 18:13.

Ndɛ’m be bo tulɛ lika: Sɛ like suanfuɛ’n wun like nga e su suan’n i wlɛ naan ɔ lafi su’n, e kwla wlɛ i fanngan kɛ sɛ ɔ yo’n, maan i ngunmin kanngan ndɛ’m be bo tulɛ lika ng’ɔ nin ndɛ’n be kɔ likawlɛ’n i nun. Kɛ é wá súan like cɛn uflɛ’n, e kwla fa blɛ kan e usɛ i kosan e nian sɛ ɔ wunnin ndɛ ng’ɔ kanngannin’n i wlɛ kpa o. Sanngɛ, sɛ e wun kɛ sɛ e nin i e kanngan nun likawlɛ’n yɛ ɔ́ yó i ye’n, kɛ é súan like’n e kwla fa blɛ kan e kɛnngɛn i kwlaa annzɛ i bue nun. Kɛ é kánngan ndɛ kpɔlɛ’m be nun’n, e kwla fa kosan wie mun mɔ e dun mmua e buli be akunndan’n, e usɛ i.

I nun flanlɛ kuku’n: Kosan nga be fa fiti ndɛ tre kun su’n, ndɛ tre’n i awieliɛ lɔ’n, be tɛli be su kuku kun nun. E nin like suanfuɛ’n e kwla koko kuku sɔ’n i su yalɛ. I liɛ’n, sɛ ɔ wunnin ndɛ cinnjin’m be wlɛ naan ɔ kwla yiyi be nun’n, e wun i wlɛ. Maan e nin i e kanngan ndɛ ɲanman nga be klɛli be lɛ’n, ɔ nin Biblu’n nun ndɛ mma’m be nun. I sin’n, maan e se i kɛ ɔ fa Biblu’n nun ndɛ mma mun kle kɛ ndɛ ɲanman sɔ’m be ti nanwlɛ.​—Yol. 17:​2, 3.