Maan e fa e ɛntɛnɛti adrɛsi’n e bo jasin fɛ’n: Kaci Zoova i janvuɛ

Be siesieli e ɛntɛnɛti adrɛsi’n i nun ndɛ mun akpasuaakpasua. Be nun kun kan like nga Biblu’n kle’n i ndɛ (La Bible et vous). Ndɛ akpasua sɔ’n i bue kun o lɛ’n, ɔ ti bakanngan’m be liɛ (Deviens l’ami de Jéhovah). ?Amun a fa bo jasin fɛ’n i le? Sɛ amun nin sran kun be suan Biblu’n nun like naan ɔ le ba’n, amun fa kle i. I sɔ’n kwla yo maan siɛ annzɛ niɛn sɔ’n kwla kunndɛ kɛ ɔ́ sí ninnge kpanngban ekun e ɛntɛnɛti adrɛsi’n su.

Kɛ é fá e fluwa Sielɛ Blɛ’n i nganniɛn 38 su liɛ’n é fá mán sran mun’n, aniaan bian kun ko toli bla kun. Kɛ ɔ fali fluwa nɲa’n mɛnnin i cɛ’n, bla’n kali lɛ boli i nun kannganlɛ bo. Bla sɔ’n le ba kpanngban. Be kusu be kunndɛli kɛ bé sí fluwa nɲa’n i nun ndɛ’n wie. Aniaan’n nin be kokoli su yalɛ. Kpɛkun ɔ fali e ɛntɛnɛti adrɛsi m’ɔ o fluwa nɲa’n i sin’n fa kleli be. Kɛ m’ɔ wunnin kɛ ndɛ’n yoli bla’n i fɛ’n ti’n, ɔ fɛli i selilɛli’n, kpɛkun ɔ boli video m’ɔ kan bakan nga be flɛ i Kalɛbu i ndɛ’n kleli be.

Aniaan bla kun liɛ’n, ɔ kannin e ɛntɛnɛti adrɛsi’n i ndɛ kleli bla kun m’ɔ nin i be di junman likawlɛ. Ɔ seli i kɛ ndɛ nga be o lɔ’n be kwla yo awlobo’m be ye. Bla sɔ’n nin i mma’m be ko niannin ninnge nga be o e ɛntɛnɛti adrɛsi’n su’n. Kɛ i osu cɛli kan’n, ɔ seli aniaan bla’n kɛ i mma’m be si jue nga be flɛ i “Kan Ɲanmiɛn Ndɛ’n” i to. Jue sɔ’n wo ndɛ akpasua ng’ɔ ti bakanngan’m be liɛ’n nun wie.

E ɛntɛnɛti adrɛsi jw.org i akpasua sɔ’n, maan e si i nun ndɛ’n i kpa. I liɛ’n, e kwla fa video nin jue annzɛ ninnge uflɛ mɔ be o lɔ’n, e sie be e selilɛli’n nun. Ɔ maan e kwla fa ninnge sɔ mun e bo jasin fɛ’n. Nanwlɛ, e ɛntɛnɛti adrɛsi’n i nun ninnge’m be uka e maan e di e Min’n i junman’n i kpa!​—Yol. 20:19.