Maan e fa video mun e kle Biblu’n nun like suanfuɛ’m be like

Sɛ e kle sran kun i Biblu’n nun like’n, foto, video annzɛ desɛn nga e fa kle i’n, be kwla ukɛ i naan w’a wun ndɛ nga e kan’n i wlɛ. I sɔ’n yó maan i wla kpɛ́n ninnge ng’ɔ suannin be’n, be su. Zoova m’ɔ ti Like Klefuɛ Dan’n fa e ɲin sie i ninnge nga be bo sin yia e’n, be su. Ɔ yo sɔ naan ɔ́ klé e ajalɛ cinnjin wie mun. (Bo 15:5; Ze 18:1-6) I wafa kunngba’n, yɛ Zezi m’ɔ ti e like klefuɛ dan wie’n yoli-ɔ. (Mt 18:2-6; 22:19-21) Koko nun wa’n, like ng’ɔ ukali sran’m be kpa jasin fɛ’n i bolɛ’n nun’n, yɛle video mun. ?Kɛ a nin sran’m bé súan Biblu’n nun like’n, a fa video mun di junman kpa?

Be yili video blu mɔ be kwla uka e naan e nin sran mun y’a suan fluwa Jasin fɛ kpa kun fin Ɲanmiɛn! i nun like. Fluwa sɔ’n nun kosan nga be klɛli be ble tuun kpa’n, wie liɛ’n, be nin video’m be flɛlɛ’n be ti kun. Fluwa sɔ’n wo e ɛntɛnɛti adrɛsi jw.org su wie. Lɔ’n, fluwa sɔ’n i nun like suanlɛ wie’m be nun’n, video wie’m be o lɛ m’ɔ fata kɛ e bo-ɔ. Asa ekun’n video uflɛ wie’m be o e ninnge nga e fa kle sran’m be Biblu’n nun like titi’n, be nun.

?A nin Biblu’n nun like suanfuɛ kun be suan like kun mɔ atrɛkpa’n, i wlɛ wunlɛ ti kekle mɛn i-ɔ? ?Annzɛ kusu sa kekle kun wo ɔ like suanfuɛ’n su? Sɛ ɔ ti sɔ’n, fa e video nga be o jw.org® su nin JW televiziɔn® su’n, be nun kun m’ɔ kwla ukɛ i’n, fa kle i. A nin ɔ like suanfuɛ’n be kwla niɛn i likawlɛ kpɛkun an koko su yalɛ.

Anglo kwlaa nun’n, be yi video uflɛuflɛ wie mun. Kɛ á nían be’n, bu wafa nga a kwla fa kle sran’m be Biblu’n nun like’n, i akunndan.