LIKE NGA KLISIFUƐ’M BE YO’N

**Fa fluwa A kwla di aklunjɔɛ tititi! bo jasin fɛ’n**

E le fluwa uflɛuflɛ kun ɔ nin fluwa pɛplɛpɛ uflɛuflɛ kun. Nanwlɛ, e wun blibli e kɛ é fá fluwa sɔ mun é klé sran’m be Biblu’n nun like! É srɛ́ Zoova kɛ ɔ yra e ɲin mɔ e mian e uka sran kpanngban naan be kaci Zezi i sɔnnzɔnfuɛ’n su. (Mt 28:18-20; 1Ko 3:6-9) ?Wafa sɛ yɛ e kwla fa fluwa uflɛuflɛ sɔ mun e di junman-ɔn?

Wafa nga é fá fluwa A kwla di aklunjɔɛ tititi! é klé sran’m be like’n ɔ nin laa liɛ’n timan kun. I ti’n kɛ amún síesíe amun wun annzɛ kɛ amún klé sran’m be Biblu’n nun like’n amun nian ajalɛ nga’m be su.a

Kanngan ndɛ kpɔlɛ’m be kwlaa be nun, yɛ an koko kosan’m be su yalɛ.
Kanngan Biblu’n nun ndɛ nga be klɛli be wun lɛ kɛ “An kanngan nun” be nun, yɛ uka sran nga a kle i like’n naan ɔ wun wafa nga ɔ kwla nian su nanti’n.
Bo video mun yɛ an koko kosan’m be su yalɛ.
Kɛ an bo ndɛ tre kun i nun like suanlɛ bo’n mian ɔ ɲin naan an guɛ i bo.

Jasin fɛ bolɛ’n nun’n, dun mmua fa sran’n i ɲin sie i fluwa pɛplɛpɛ’n su. I liɛ’n sɛ Ɲanmiɛn ndɛ’n ti sran’n i cinnjin annzɛ ɔ timɛn i cinnjin’n á wún i wlɛ. (Nian kuku nga be flɛ i kɛ “Wafa nga e kwla fa fluwa pɛplɛpɛ A kwla di aklunjɔɛ tititi! e man sran’n kpɛ klikli nga e to i’n” m’ɔ o i bue 16 su’n.) Sɛ an wie fluwa pɛplɛpɛ’n nun like suan naan ɔ kunndɛ kɛ ɔ́ sí nun ekun’n, fa fluwa kun’n mɛn i naan an bo i bo i like suanlɛ 4 su’n su. Sɛ a nin sran kun be suan like fluwa Biblu’n kle nun annzɛ fluwa Ɲanmiɛn klo e’n nun’n, siɛn’n an suan like fluwa A kwla di aklunjɔɛ tititi! nun. Kpɛkun i bue nga kɛ a niɛn i sa’n, sɛ an bo i bo lɛ ɔ ti kpa’n, an bo i bo lɛ.

Aniaan bian’n nin yi’n be nin bian’n be su suan fluwa “A kwla di aklunjɔɛ tititi!”i nun like bian’n i awlo lɔ.

AN NIAN VIDEO NGA BE FLƐ I KƐ MO NIN BIBLU’N NUN LIKE SUANLƐ’N I BO BOLƐ. I SIN’N, AN TƐ KOSAN NGA’M BE SU:

?Ngue yɛ like suanfuɛ’m bé wá súɛn i fluwa uflɛuflɛ’n nun-ɔn?
?Ngue ti yɛ ɔ fata kɛ a fa video nga kle be nga blɛ li yɛ be su suan Biblu’n nun like’n niɔn?
?Kɛ amún súan like kɔ́’n ninnge benin mun yɛ a kwla se like suanfuɛ’n kɛ ɔ miɛn i ɲin yo be-ɔ? (Nian kuku nga be flɛ i kɛ “Akpasua kwlaa nun’n ninnge cinnjin ng’ɔ fata kɛ like suanfuɛ’n fɛ i ɲin sie su’n ɔ nin like ng’ɔ fata kɛ ɔ yo’n” m’ɔ o i bue 16 su’n.)

a NDƐ NANNDOLIƐ: Kɛ amún súan like’n, kannzɛ bɔbɔ ɔ nunman nun kɛ san fii an koko ndɛ akpasua nga be flɛ i kɛ “Ndɛ wie mun ekun” i su yalɛ’n, sanngɛ kɛ á síesíe ɔ wun, fa blɛ naan kanngan nun kpa yɛ nian video mun. I liɛ’n, á wún like trele ng’ɔ kwla yo like suanfuɛ’n i fɛ’n ɔ nin wafa ng’ɔ kwla ukɛ i’n i wlɛ. Fluwa ng’ɔ o ajulisu mannzin’m be su’n i liɛ’n video mun nin ninnge uflɛ wie’m be o nun.

AKPASUA KWLAA NUN’N NINNGE CINNJIN NG’Ɔ FATA KƐ LIKE SUANFUƐ’N FƐ I ƝIN SIE SU’N Ɔ NIN LIKE NG’Ɔ FATA KƐ Ɔ YO’N
	LIKE SUANLƐ MUN	NDƐ CINNJIN MUN	LIKE NG’Ɔ FATA KƐ LIKE SUANFUƐ’N YO’N
1	01-12	Ɔ kan wafa nga Biblu’n kwla uka e nin like nga e kwla yo naan y’a si e Yifuɛ’n.	Wla like suanfuɛ’n i fanngan kɛ ɔ kanngan Biblu’n nun, ɔ siesie i wun naan amun a suan Biblu’n nun like yɛ ɔ tran aɲia’m be bo.
2	13-33	Ɔ fa e ɲin sie i like nga Ɲanmiɛn yoli mannin e’n ɔ nin wafa ng’ɔ kunndɛ kɛ e su i’n be su.	Wla like suanfuɛ’n i fanngan kɛ ɔ kan like ng’ɔ suan’n i ndɛ kle i wiengu mun yɛ ɔ kaci jasin bofuɛ nga be nian yomɛn i batɛmun’n.
3	34-47	Ɔ fa e ɲin sie i like nga Ɲanmiɛn kunndɛ kɛ i sufuɛ’m be yo’n su.	Wla like suanfuɛ’n i fanngan naan srɛlɛ nun’n ɔ fɛ i wun man Zoova naan kusu be yo i batɛmun.
4	48-60	Ɔ fa e ɲin sie i like ng’ɔ fata kɛ e yo naan Ɲanmiɛn w’a klo e titi’n i su.	Wafa nga like suanfuɛ kwla wun like ng’ɔ ti kpa’n nin ng’ɔ ti tɛ’n be ngbaciɛ’n kle i yɛ wlɛ i fanngan naan ɔ wɔ i ɲrun Ɲanmiɛn sulɛ’n nun.