Famiɛn nɲɔn mɔ be kpli kwlalɛ mɛn’n i awieliɛ blɛ’n nun’n
Famiɛn nɲɔn mɔ be kpli kwlalɛ mɛn’n i awieliɛ blɛ’n nun’n Ɲanmiɛn nuan ijɔfuɛ’m be ndɛ nga be kannin mɔ e boli wie’m be su kuku nga nun’n, be nun wie’m be juli blɛ kunngba’n nun. Be ngba be kle kɛ e o mɛn’n i “awieliɛ blɛ’n” nun.—Dan. 12:4.
Biblu’n nun ndɛ mma mun: Ngl. 11:7; 12:13, 17; 13:1-8, 12
Ndɛ nga Ɲanmiɛn kannin’n: ‘Nnɛn wlɛfuɛ’n’ sie sran mun i afuɛ 3.000 tra su yɛ. Mɛn’n i awieliɛ blɛ nun’n, be boli nnɛn’n i ti nso su’n i fɛ yaya kpa. I sin’n, i kannin’n wa wuli. Ɔ maan “asiɛ’n sufuɛ’m be kwlaa” be suli nnɛn’n i su. Satan sin nnɛn’n i lika naan ɔ nin ‘Ɲanmiɛn i sran’m b’a kun alɛ.’
I su kpɛnlɛ’n: Kɛ nzue dan’n tɔli m’ɔ kpɛli’n, famiɛn wie mɔ be kloman Zoova’n, be wa sieli sran mun. Kɛ afuɛ 3.000 tra su sinnin’n, Angle m’ɔ ti awa sɔ’m be nun kun’n w’a ɲanman kwlalɛ kɛ laa’n sa kun. I sɔ’n juli Alɛ Dan Klikli’n nun. Sanngɛ kɛ ɔ nin Etazinin be bo wa yoli kun’n, ɔ wa ɲannin kwlalɛ ekun. Mɛn’n i awieliɛ blɛ nun’n, Satan maan mɛn’n nun awa’m be kle Ɲanmiɛn i sufuɛ’m be yalɛ.
Biblu’n nun ndɛ mma’n: Dan. 11:25-45
Ndɛ nga Ɲanmiɛn kannin’n: Mɛn’n i awieliɛ blɛ nun’n, famiɛn ng’ɔ o nglo lɔ’n ɔ nin famiɛn ng’ɔ o ngua lɔ’n bé wá kplí kwlalɛ’n.
I su kpɛnlɛ’n: Alemaɲin fali alɛ wlali Angle nin Amlɛnkɛn’m be sin. Afuɛ 1945 nun’n, Iniɔn Sovietiki’n nin be nga be suɛn i bo’n, be yoli famiɛn ng’ɔ o nglo lɔ’n. Sanngɛ afuɛ 1991 nun’n, Iniɔn Sovietiki’n tɔli. Ɔ maan Risi nin be nga be suɛn i bo’n be yɛ be wa yoli famiɛn ng’ɔ o nglo lɔ’n niɔn.
Biblu’n nun ndɛ mma mun: Eza. 61:1; Mal. 3:1; Lik. 4:18
Ndɛ nga Ɲanmiɛn kannin’n: Ka naan Zoova w’a sie Mesi’n i famiɛn’n, ɔ sunmɛnnin i “ndolo bofuɛ’n” kɛ ‘ɔ wa bo i ɲrun atin.’ ‘Ndolo bofuɛ sɔ’n’ kusu ‘boli jasin fɛ’n kleli yalɛfuɛ mun.’
I su kpɛnlɛ’n: Kɛ afuɛ 1870 juli’n, aniaan bian Risɛli nin i wiengu’m be wlali be wun ase be suannin Biblu’n nun like kpa naan bé wún like ng’ɔ kle sakpasakpa’n. Kɛ afuɛ 1881 juli’n, be wa wunnin i wlɛ kɛ ɔ ti cinnjin kɛ Ɲanmiɛn i sufuɛ’m be bo jasin fɛ’n. I sɔ’n ti’n, be yoli maan sran’m be kwla kanngannin ndɛ “Recherchons 1 000 prédicateurs” yɛ “Oints pour prêcher,” be nun.
Biblu’n nun ndɛ mma mun: Mat. 13:24-30, 36-43
Ndɛ nga Ɲanmiɛn kannin’n: Bian kun luali ble i fie’n nun. I sin’n, i kpɔfuɛ kun wa luali ijre tɛ i fie sɔ’n nun. Kɛ be nɲɔn’n be fifili’n, ijre tɛ’n katali ble’n su. Kɛ ble’n i kpɛlɛ blɛ’n juli’n, be tutuli ijre tɛ’n be wɔli nun, kpɛkun be tiantiannin ble’n i nuan.
I su kpɛnlɛ’n: Kɛ afuɛ 1870 juli’n, be wa wunnin ngbaciɛ ng’ɔ o Klisifuɛ kpa mun ɔ nin be nga be tɔn be wun suɛn kɛ be ti Klisifuɛ’n be afiɛn. Ɔ maan mɛn’n i awieliɛ blɛ nun’n, Ɲanmiɛn yoli maan Klisifuɛ kpa’m be jasoli be nga be tɔn be wun suɛn kɛ be ti Klisifuɛ’n be afiɛn mlɔnmlɔn.
Biblu’n nun ndɛ mma mun: Dan. 2:31-33, 41-43
Ndɛ nga Ɲanmiɛn kannin’n: Be fali ninnge fanunfanun yɛ be fa yoli like sunman waka sran nga Daniɛli wunnin i’n niɔn. I ja mma’m be bue kun ti ufa, yɛ bue kun ti blalɛ.
I su kpɛnlɛ’n: Ufa’n ti sran nga Angle nin Amlɛnkɛn’m be sie be’n, be nzɔliɛ. Sran sɔ’m be jaso awa sɔ’m be wun. Ɔ maan sran sɔ’m be ti’n, awa sɔ’m be kwlalɛ mɔ be le i’n i su kpɛ.
Biblu’n nun ndɛ mma mun: Mat. 13:30; 24:14, 45; 28:19, 20
Ndɛ nga Ɲanmiɛn kannin’n: Bé tíantían “ble’n” i nuan “tanngannin’n” nun. Yɛ ‘junman difuɛ nanwlɛfuɛ m’ɔ si ngwlɛlɛ’n,’ ɔ́ nían “sran’m” be lika. Bé bó “Ɲanmiɛn i Famiɛn dilɛ’n i jasin fɛ’n mɛn wunmuan’n nun.”
I su kpɛnlɛ’n: Afuɛ 1919 nun’n, be seli junman difuɛ nanwlɛfuɛ m’ɔ si ngwlɛlɛ’n kɛ ɔ nian Ɲanmiɛn i sufuɛ’m be lika. Kɛ ɔ fɛ i lɛ’n, Biblu’n nun like suanfuɛ’m be wa wlali be wun ase be boli jasin fɛ’n i kpa. Andɛ’n, Zoova i Lalofuɛ’m be bo jasin fɛ’n nvle 200 tra su nun. Kpɛkun be yi fluwa aniɛn 1.000 tra su nun.
Biblu’n nun ndɛ mma mun: Dan. 12:11; Ngl. 13:11, 14, 15
Ndɛ nga Ɲanmiɛn kannin’n: Nnɛn kun m’ɔ le wɛ nɲɔn’n “ɔ seli asiɛ’n sufuɛ’m be kɛ be yo nnɛn mɔ be fali tokofi be finnin i’n, m’ɔ ɲannin nguan ekun’n, i wunsu kun.” Yɛ ‘ɔ fitali nnɛn’n i wunsu nga be yoli’n i su naan ɔ ɲan nguan.’
I su kpɛnlɛ’n: Angle nin Amlɛnkɛn’m be bo yoli kun be kpɛli anuannzɛ nga be flɛ i kɛ Société des Nations i ba. I sin’n, nvle uflɛ wie’m be wa wluli anuannzɛ sɔ’n nun. Afuɛ 1926 nun lele afuɛ 1933 nun’n, famiɛn ng’ɔ o nglo lɔ’n wluli anuannzɛ sɔ’n nun. Kɛ ɔ yoli sɔ’n, sran’m be buli i kɛ anuannzɛ sɔ’n wá yó maan fɔundi trán asiɛ’n su. I sin’n kɛ be kpɛli ONU i ba’n be buli i kɛ ɔ kwla yo sɔ wie. Kusu nn Ɲanmiɛn i Famiɛn Dilɛ’n i kunngba cɛ yɛ ɔ kwla yo maan fɔundi tran asiɛ’n su-ɔ.
Biblu’n nun ndɛ mma’n: Dan. 8:23, 24
Ndɛ nga Ɲanmiɛn kannin’n: Famiɛn tutrefuɛ kun m’ɔ ti gblɛ kpɛfuɛ dan kpa’n “ɔ́ wá sáci ninnge mun kpa.”
I su kpɛnlɛ’n: Angle nin Amlɛnkɛn’m be bo yoli kun be kunnin sran kpanngban kpa yɛ be yoli abɔlɛ sa sunman. I wie yɛle kɛ Alɛ Dan Nɲɔn Su’n nun’n, Amlɛnkɛn’m be fali bɔnbu dandan nɲɔn be yili i nvle kun m’ɔ ti be nin Angle’m be kpɔfuɛ’n i su. Bɔnbu sɔ’m be kunnin sran kaka trali bɔnbu uflɛ.
Biblu’n nun ndɛ mma mun: Dan. 11:31; Ngl. 17:3, 7-11
Ndɛ nga Ɲanmiɛn kannin’n: “Nnɛn ɔkwlɛ bioun” m’ɔ le wɛ blu’n ɔ fin kunman dan mɔ be simɛn i bo’n nun, yɛ “ɔ ti famiɛn’m be mɔcuɛ su’n.” Daniɛl fluwa’n kan famiɛn sɔ’n i ndɛ se kɛ ‘ɔ ti tete like m’ɔ saci like’n.’
I su kpɛnlɛ’n: Kɛ bé kún Alɛ Dan Nɲɔn su’n, anuannzɛ nga be flɛ i kɛ Société des Nations ɔ tɔli. Kɛ alɛ’n wieli’n, be kpɛli anuannzɛ nga be flɛ i kɛ ONU i ba. Sran’m be yili anuannzɛ sɔ’n i ayɛ kɛ nga be fa yili Société des Nations i ayɛ’n sa. Kusu nn Ɲanmiɛn i Famiɛn Dilɛ’n i kunngba cɛ yɛ ɔ fata kɛ be yi i ayɛ-ɔ. Asa’n anuannzɛ sɔ’n wá fá alɛ wlá Ɲanmiɛn sulɛ wafawafa kwlaa be sin.
Biblu’n nun ndɛ mma mun: 1 Tes. 5:3; Ngl. 17:16
Ndɛ nga Ɲanmiɛn kannin’n: Nvlenvle’m bé wá sé kɛ: “E su di fɔundi, srɛ kunman e kun!” Kpɛkun ‘nnɛn’n i wɛ blu’n’ nin “nnɛn’n” bé wá kpɔ́ “tekle bla’n,” kpɛkun bé núnnún i. I sin’n, bé wá núnnún nvlenvle sɔ mun.
I su kpɛnlɛ’n: Nvlenvle’m bé wá sé kɛ b’a yo maan sran’m be su di fɔundi, naan srɛ kunman be kun. I sin’n, nvlenvle nga be suan ONU i bo’n, bé wá núnnún Ɲanmiɛn sulɛ wafawafa kwlaa nga be timan su’n be anuannzɛ mun. Kɛ be ko yo sɔ’n, nn ɲrɛnnɛn dan’n w’a bo i bo. Kɛ Zezi wá núnnún Satan i mɛn’n Aamagedɔn alɛ nun’n, yɛ ɲrɛnnɛn dan’n wíe-ɔ.
Biblu’n nun ndɛ mma mun: Eze. 38:11, 14-17; Mat. 24:31
Ndɛ nga Ɲanmiɛn kannin’n: Gɔgu wá fá alɛ wlá Ɲanmiɛn i sufuɛ’m be sin. I sin’n, anzi’m bé wá yíayía ‘Ɲanmiɛn i sran mun.’
I su kpɛnlɛ’n: Famiɛn ng’ɔ o nglo lɔ’n ɔ nin famiɛn onga’m be bo wá yó kun bé fá alɛ wlá Ɲanmiɛn i sufuɛ’m be sin. I sin’n, be nga be kpali be sieli be ngunmin’n mɔ be te o asiɛ’n su wa’n be ti wá yía ɲanmiɛn su lɔ.
Biblu’n nun ndɛ mma mun: Eze. 38:18-23; Dan. 2:34, 35, 44, 45; Ngl. 6:2; 16:14, 16; 17:14; 19:20
Ndɛ nga Ɲanmiɛn kannin’n: ‘Sran ng’ɔ ti nnɛn kpanngɔ ufue’n su’n ɔ kwlali’ Gɔgu nin i sonja mun. Kpɛkun be toli “nnɛn’n” be yili i “sin dan m’ɔ jue kpa’n, i nun.” Yɛ yɔbuɛ kun nunnunnin like sunman waka sran’n.
I su kpɛnlɛ’n: Zezi m’ɔ ti Ɲanmiɛn i Famiɛn Diwlɛ’n nun famiɛn’n wá dé Ɲanmiɛn i sufuɛ mun. Zezi nin sran 144.000 nin anzi’m bé wá núnnún nvlenvle nga bé wá fá alɛ wlá Ɲanmiɛn i sufuɛ’m be sin’n. I lɛ nun yɛ Satan i mɛn’n, ɔ́ wíe-ɔ.