Fluwa’n nun kannganfuɛ’m be kosan mun

?Ngue ti yɛ 2 Samiɛl 21:7-9 se kɛ Davidi ‘sili Mefibosɛti i aunnvuɛ’ kpɛkun ndɛ mma kunngba’n se kɛ ɔ yili Mefibosɛti mannin kɛ be kun i-ɔ?

Be nga be usa kosan sɔ’n, kpɛ sunman’n be faman be ɲin be siemɛn i sa sɔ’n su kpa ti-ɔ. Ndɛ mma sɔ’m be nun’n, be kan sran nɲɔn be ndɛ. Be sran nɲɔn sɔ’m be suan Mefibosɛti. Sɛ e fa e ɲin e sie i sa sɔ’n su kpa’n, é wún ninnge wie’m be wlɛ.

Saili m’ɔ ti Izraɛli famiɛn’n, ɔ wuli ba yasua nso nin ba bla nɲɔn. I wa kpɛnngbɛn’n suan Zonatan. I sin’n, Saili nin i soman Rizpa be wuli ba yasua kun ekun. Be flɛ i kɛ Mefibosɛti. Zonatan kusu wa wuli ba yasua kun. Yɛ ɔ flɛli i kɛ Mefibosɛti wie. Ɔ maan Famiɛn Saili i wa kun suan Mefibosɛti kpɛkun i anunman kun suan Mefibosɛti wie.

Blɛ wie nun’n, Famiɛn Saili wa kpɔli Gabaɔnfuɛ mɔ be tran Izraɛli nvle’n nun’n yɛ ɔ kunndɛli kɛ ɔ́ núnnún be. I kpa bɔbɔ’n, ɔ kunnin be nun sran kaka kpa. Like ng’ɔ yoli i lɛ’n timan kpa mlɔnmlɔn. ?Ngue ti-ɔ? Afin Zozie blɛ su’n, Izraɛli kpɛnngbɛn’m be tali Gabaɔnfuɛ’m be nda kɛ be su kunman be wie. Ɔ maan Izraɛlifuɛ mun nin Gabaɔnfuɛ’m be trali aenguɛ.—Zoz. 9:3-27.

Lele m’ɔ́ fá jú Famiɛn Saili blɛ su’n, nn be te di aenguɛ sɔ’n su. Sanngɛ Saili liɛ’n w’a diman aenguɛ sɔ’n su wie. Ɔ kunndɛli kɛ ɔ́ núnnún be. Ajalɛ sɔ m’ɔ fali’n ti’n, ‘ɔ nin i awlofuɛ’m be kunnin sran kaka kpa.’ (2 Sam. 21:1) I sin’n, Davidi wa kacili Izraɛli famiɛn. Cɛn kun’n, Gabaɔnfuɛ nga be ɲannin be ti’n, be ko toli i yɛ be kannin sa tɛ nga Saili yoli’n i ndɛ kleli i. Davidi usali be like ng’ɔ fata kɛ ɔ yo naan sa tɛ sɔ’n w’a jaso be mɛn’n su naan Zoova w’a yra be su’n. Kɛ ɔ yoli sɔ’n, Gabaɔnfuɛ’m b’a kunndɛman kɛ be man be sika. Sanngɛ be seli i kɛ ɔ fa Saili mɔ ‘i waan ɔ́ núnnún be’n’ i wa nso man be naan be kun be wie. (Kal. 35:30, 31) Davidi kplinnin su.—2 Sam. 21:2-6.

Kɛ ɔ́ yó sɔ’n nn Saili nin Zonatan b’a wu. Alɛ nun yɛ be wuli-ɔ. Sanngɛ Zonatan i wa Mefibosɛti liɛ’n, ɔ te o lɛ. Mefibosɛti ti bubuwafuɛ afin i kaan nun’n sa yaya yoli i. Kusu kɛ i nannan kún Gabaɔnfuɛ mun’n, w’a fɛmɛn i wun w’a wlaman nun wie. Asa ekun’n, Davidi nin i si Zonatan be trali aenguɛ. Ɔ maan Mefibosɛti ɲannin aenguɛ sɔ’n i su ye. (1 Sam. 18:1; 20:42) Ɲanmiɛn Ndɛ’n se kɛ: “Famiɛn [Davidi] sili Sail i anunman Mefibɔsɛti b’ɔ ti Zonatan i wa’n i aunnvuɛ nda bɔ David nin Zonatan be fali Anannganman i dunman be tali be wiengu’n ti.”—2 Sam. 21:7.

Davidi fali like nga Gabaɔnfuɛ’m be srɛli i’n mannin be. Ɔ fali Saili i wa yasua nɲɔn m’ɔ kun suan Mefibosɛti’n, ɔ nin i anunman nnun fa mannin be. (2 Sam. 21:8, 9) I sɔ mɔ Davidi yoli’n ti’n, Gabaɔnfuɛ’m be wie ndɛ’n jasoli be mɛn’n su.

Nán ndɛ ngbɛn yɛle ndɛ sɔ’n. Ɲanmiɛn mmla’n se weiin kɛ: ‘Sɛ siɛ kun yo sa’n, ɔ fataman kɛ be kun i wa’n i ti.” (Mml. 24:16) Ɔ maan sɛ ɔ ti kɛ Saili i wa nɲɔn nin i anunman nnun sɔ’m b’a yoman like fi’n, nn Zoova w’a kplinman su kɛ be kun be. Asa’n, mmla’n se ekun kɛ: “Sran ng’ɔ yo sa tɛ’n, i bɔbɔ yɛ ɔ fata kɛ be kun i-ɔ.” Ɔ maan kɛ ɔ́ jú mɔ bé kún Saili i wa nɲɔn nin i anunman nnun sɔ mun’n, nn be nin Saili be bo yoli kun yɛ be kunnin Gabaɔnfuɛ mun-ɔn. Ɔ maan be bɔbɔ be sa tɛ liɛ nga be yoli’n i nuan like yɛ be ɲɛnnin i-ɔ.

Sa sɔ’n kle kɛ sɛ sran kun yo sa tɛ naan i waan sran mun yɛ be suli i bo ti yɛ ɔ yoli sɔ’n, be su seman kɛ w’a yoman like fi. I sɔ’n ti yɛ Ɲanmiɛn Ndɛ’n wla e su nun kpa kɛ e ‘bu atin nga e fa su’n i akunndan’ niɔn.—Nya. 4:24-27; Efɛ. 5:15.