Blɛ kekle nun’n e wun kwla jɔ e fɔuun

1. (1) ?“Aunjɔɛ nga Ɲanmiɛn man’n” fin ngue? (2) ?Kɛ e ɲɛn i sɔ aunjɔɛ liɛ’n, i su ye benin yɛ e ɲɛn i-ɔ? (Filipufuɛ Mun 4:6, 7)

AUNJƆƐ kun o lɛ’n, mɛn’n nunfuɛ’m be simɛn i kaan sa. Aunjɔɛ sɔ’n yɛle “aunjɔɛ nga Ɲanmiɛn man’n.” Aunjɔɛ sɔ’n fin e nin Ɲanmiɛn e afiɛn m’ɔ mantan mɔ i ti e wla gua ase’n. Kɛ e ɲɛn i sɔ aunjɔɛ liɛ’n, e di alaje. (An kanngan Filipufuɛ Mun 4:6, 7 nun.) Asa’n, e nin be nga be klo Ɲanmiɛn’n e tra janvuɛ kpa. Kpɛkun e nin “Ɲanmiɛn m’ɔ yo maan sran di fɔundi’n” e afiɛn sɛ. (1 Tes. 5:23) Kɛ e si Ɲanmiɛn’n, mɔ e lafi i su yɛ e ɲin yi i’n, kannzɛ bɔbɔ sa wie kle e yalɛ’n sanngɛ e wla gua ase.

2. ?Ngue yɛ ɔ kle kɛ e kwla ɲan aunjɔɛ nga Ɲanmiɛn man’n niɔn?

² ?Kɛ sa kekle kɛ tukpacɛ m’ɔ sa ndɛndɛ sa’n tru lika’n nun’n, annzɛ sanvuɛsa wie ju’n, annzɛ kusu lika’n sanngan’n annzɛ be kle e yalɛ’n, e kwla ɲan aunjɔɛ nga Ɲanmiɛn man’n sakpa? I yo, kɛ sa sɔ’m be ju’n, srɛ kwla kun e. Sanngɛ Zezi seli i sɔnnzɔnfuɛ’m be kɛ: “Nán amun wla bo. Nán srɛ kun amun.” (Zan 14:27) Aniaan wie’m be fali Zezi i afɔtuɛ sɔ’n su. Ɔ maan kɛ sa kekle fanunfanun tɔli be su’n, Zoova fanngan nun’n be wun jɔli be kpa fɔuun.

KƐ TUKPACƐ NGA BE SA NDƐNDƐ’N BE TRU LIKA’N NUN’N

3. ?Kɛ tukpacɛ m’ɔ sa ndɛndɛ’n tru lika’n nun’n, wafa sɛ yɛ sran’m be wun yo be-ɔ?

³ Kɛ tukpacɛ m’ɔ sa ndɛndɛ’n tru lika’n nun’n, sran’m be kwlá yoman ninnge mun kɛ laa’n sa kun. I wie yɛle koronavirisi blɛ nun liɛ’n. Kɛ be usali sran wie mun tukpacɛ sɔ’n i su ndɛ’n, be nun sunman be waan blɛ sɔ’n nun’n be lafiman klanman. Blɛ sɔ’n nun’n, sran sunman be wla bo be wun, wie’m be ti nun sanngan, wie’m be nɔn nzan dan annzɛ ayrɛ tɛtɛ mun. Asa’n, sran wie’m be yo be wiengu tɛtɛ awlo lɔ. Wie’m be liɛ’n, be kunndɛ kɛ bé kún be wun bɔbɔ. ?Sɛ tukpacɛ m’ɔ sa ndɛndɛ’n wie tru kan a tran lɛ’n, á yó sɛ naan w’a ɲan aunjɔɛ nga Ɲanmiɛn man’n, naan ɔ wla w’a boman ɔ wun?

4. ?Ngue ti yɛ e kwla se kɛ mɛn’n i awieliɛ blɛ’n i su ndɛ nga Zezi kannin’n ti’n e wla kwla gua ase-ɔ?

⁴ Zezi seli kɛ mɛn’n i awieliɛ blɛ nun’n ‘kɛ é wá ti i kɛ tukpacɛ m’ɔ sa ndɛndɛ’n w’a tru lika kun nun’n, é tí ekun-ɔn w’a ju lika uflɛ.’ (Lik. 21:11) ?Ngue ti yɛ e kwla se kɛ i sɔ ndɛ liɛ mɔ e si i’n ti’n e wla kwla gua ase-ɔ? Yɛle kɛ, kɛ i sɔ sa’n ju’n ɔ boman e nuan. Afin e wun i wlɛ kɛ ndɛ nga Zezi kannin’n yɛ ɔ su kpɛn su-ɔ. I sɔ’n ti’n, e kunndɛ kɛ é nánti ndɛ yɛ mɔ Zezi kan kleli be nga bé wá trán mɛn’n i awieliɛ blɛ nun’n i su. Ɔ seli kɛ: “Amun nian amun wun su, nán srɛ kun amun.”—Mat. 24:6.

5. (1) ?Kɛ nga Filipufuɛ Mun 4:8, 9 fa kan’n sa’n, kɛ tukpacɛ m’ɔ sa ndɛndɛ’n tru lika’n nun’n, kɛ é srɛ́ Ɲanmiɛn’n ngue ndɛ yɛ e kwla kan-ɔn? (2) ?Wafa sɛ yɛ Biblu nga be kanngannin nun’n i tielɛ’n kwla uka e-ɔ?

⁵ Kɛ tukpacɛ m’ɔ sa ndɛndɛ’n tru lika’n nun’n, i sɔ’n kwla bo e wla kpɛkun srɛ kwla kun e. I sɔ sa’n juli aniaan bla kun m’ɔ suan Dezi’nb i su’n. Kɛ koronavirisi’n kunnin i tɔntɔn nin i niaan kun m’ɔ nin i be ti ngawangawa’n nin dɔɔtrɔ bian ng’ɔ yo be ayre’n, srɛ kunnin i kpa. Afin ɔ buli i kɛ ɔ́ wá ɲán tukpacɛ sɔ’n wie naan ɔ́ fá sɛ́ i manmin mɔ w’a yo oke’n. Asa ekun’n, ɔ buli i kɛ i junman’n wá fí i sa naan ɔ su kwlá toman aliɛ kun. Annzɛ ɔ su kwlá tuaman be sua’n i kalɛ kun. Ɔ maan ɔ buli ninnge sɔ’m be akunndan lele ti’n, ɔ la kɔnguɛ-ɔ ɔ lafiman. Sanngɛ Dezi i wla wa guali ase. ?Ngue ti-ɔ? Ɔ srɛli Zoova kɛ ɔ ukɛ i naan i wla gua ase naan ɔ bu akunndan kpa. (An kanngan Filipufuɛ Mun 4:8, 9 nun.) Asa’n, ɔ tieli Biblu’n nun ndɛ nga be kanngannin’n. Kɛ ɔ yo sɔ’n, ɔ ti kɛ Zoova “su kan ndɛ” kle i sa. Ɔ seli kɛ: “Kɛ n tie aniaan nga be kanngan fluwa’n nun’n be nɛn’n min wla gua ase. Kpɛkun n wun i wlɛ kɛ min ndɛ lo Zoova.”—Jue. 94:19.

6. ?Wafa sɛ yɛ e ngunmin e Biblu’n nun like suanlɛ’n nin aɲia’m be bo kɔlɛ’n kwla uka e-ɔ?

⁶ Kɛ tukpacɛ m’ɔ sa ndɛndɛ’n tru lika kun’n, wafa nga e yo ninnge mun’n ɔ kaci. Sanngɛ nɛ́n i sɔ’n ti’n e yaci e ngunmin e Biblu’n nun like suanlɛ annzɛ e yaci aɲia’m be bo kɔlɛ. Kannzɛ sa o aniaan wie’m be su’n, sanngɛ be su Zoova juejue su titi. Be kannin be nun wie’m be ndɛ e fluwa nin e video’m be nun. (1 Piɛ. 5:9) Kɛ e tran aɲia’m be bo’n, e ɲin tran Biblu’n nun ndɛ wie mɔ be kwla wla e fanngan’n be su. Asa ekun’n aɲia’m be bo’n, e niaan’m be kwla wla e fanngan yɛ e kusu e kwla wla be fanngan wie. (Rɔm. 1:11, 12) Kɛ e bu wafa nga Zoova suan aniaan nga tukpacɛ’n kle be yalɛ’n annzɛ be wla bo be wun annzɛ ɔ yo be kɛ be ngunmin yɛ be o’n be bo’n i akunndan’n, e lafi Zoova su kpa yɛ e lafi su kɛ ɔ́ súan e bo wie.

7. ?Ngue yɛ akoto Zan i su ndɛ’n kle e-ɔ?

⁷ Maan e yo like kwlaa nga e kwla yo naan e nin aniaan mun y’a koko yalɛ titi’n. Kɛ tukpacɛ m’ɔ sa ndɛndɛ’n tru lika’n nun’n, e kwlá faman e fa e wun e mantan e wiengu Klisifuɛ’m be kɛ laa’n sa kun. Blɛ sɔ’n nun’n e wun kwla yo e kɛ akoto Zan liɛ’n sa. Blɛ wie nun’n, ɔ kunndɛli kɛ ɔ́ kó wún i janvuɛ Gaisi i wun. (3 Zan 13, 14) Sanngɛ ɔ wunnin i wlɛ kɛ ɔ kwlá kɔmɛn i wun lɔ blɛ sɔ’n nun. Ɔ maan ɔ klɛli i fluwa. Sɛ e kwlá ko nianman aniaan’m be osu’n, e kwla flɛ be telefɔnun nun annzɛ e flɛ be video nun annzɛ e klɛ be mesazi. Sɛ e usa e niaan’m be osu titi’n, ɔ su yoman e kɛ e ngunmin yɛ e wo-ɔ kpɛkun e wla gúa ase. Sɛ e wla bo e wun’n, maan e kan kle asɔnun kpɛnngbɛn mun yɛ e sɔ afɔtuɛ nga bé wá mán e’n nun.—Eza. 32:1, 2.

KƐ SANVUƐSA’M BE TƆ E SU’N

8. ?Wafa sɛ yɛ sanvuɛsa wie kwla yo maan e wun su jɔman e kun-ɔn?

⁸ Sɛ nzue’n tɔ naan ɔ di lika nga e tran lɛ’n, annzɛ sin’n yra lika’n, annzɛ asiɛ’n keje’n e wla kwla bo e wun cɛ kpa. Asa’n, sɛ e awlɛn su sran kun wu annzɛ e sa nun ninnge wie’m be fi e sa’n, e awlɛn kwla kpɛ e klun annzɛ e kwla bu i kɛ e liɛ w’a wie annzɛ e kwla fa ya. I sɔ’n kleman kɛ e klo aɲanbeun ninnge mun annzɛ e lafiman Ɲanmiɛn su kpa. Kɛ sa sɔ’m be tɔ e su’n, sran wie’m be kwla bu i kɛ e wla wá bó e wun naan e su faman ajalɛ kpa. (Zɔb. 1:11) Kannzɛ sa nga be o e su’n be ti sɛ ti sɛ’n, sanngɛ e wun kwla jɔ e fɔuun. ?Wafa sɛ?

9. ?Sanvuɛsa’m be su ndɛ benin yɛ Zezi kannin m’ɔ uka e naan y’a siesie wun y’a sie-ɔ?

⁹ Nán e wla fi ndɛ nga Zezi kannin’n su. Kannzɛ mɛn’n nun sran wie’m be bu i kɛ sanvuɛsa’m be su tɔman be su wie le’n, sanngɛ e liɛ’n e si kɛ sa sɔ’m bé wá sɔ́n trá laa’n yɛ be nun wie’m be kwla tɔ e su wie. Zezi seli i sɔnnzɔnfuɛ’m be kɛ ka naan mɛn’n w’a wie’n, “asiɛ’n wá kéje dan kpa lika fanunfanun nun” yɛ sanvuɛsa wie mun ekun bé wá jú. (Lik. 21:11) Ɔ seli ekun kɛ ‘mmla mɔ sran sunman be su diman su kun’n ti’n,’ sran kunlɛ nin nzaje sa mun nin kakawlonga sa mun bé wá sɔ́n. (Mat. 24:12) Zezi w’a seman kɛ sa sɔ’m bé wá jú be nga be suman Zoova’n be ngunmin be su. I kpa bɔbɔ’n, sa sɔ’m be juli Zoova i sufuɛ kpa wie’m be su. (Eza. 57:1; 2 Kor. 11:25) Zoova su yiman atrɛ sasaman e sanvuɛsa’m be kwlaa be lika. Sanngɛ ɔ́ úka e naan e wla gua ase naan e wun jɔ e kpa fɔuun.

10. ?Ngue ti yɛ e kwla se kɛ kɛ e siesie e wun e sie ka naan sanvuɛsa wie w’a ju’n, i sɔ’n kle kɛ e lafi Ɲanmiɛn su-ɔ? (Ɲanndra Mun 22:3)

¹⁰ Sɛ e dun mmua e siesie e wun e sie’n, blɛ kekle nun’n e wla gúa ase. ?Sanngɛ e wun siesielɛ sɔ’n kle kɛ e lafiman Zoova su? Nɛ́n i sɔ mlɔnmlɔn-ɔn. I kpa bɔbɔ’n, kɛ e siesie e wun e sie’n i sɔ’n kle kɛ e lafi su kɛ Zoova kwla nian e lika. ?Wafa sɛ? Ɲanmiɛn Ndɛ’n wla e fanngan kɛ e dun mmua siesie e wun e sie ka naan sanvuɛsa wie w’a ju. (An kanngan Ɲanndra Mun 22:3 nun.) I sɔ’n ti’n, Zoova i anuannzɛ’n sin e fluwa mun nin aɲia mun nin jasin’m be lika ɔ kpɛn e wla titi kɛ ɔ fata kɛ e siesie e wun e sie ka naan sa wie w’a ju.c ?Sanngɛ é lá Zoova su? Sɛ e waan é klé kɛ e lafi i su’n, ɔ fata kɛ e fa afɔtuɛ’m be su dɔ nga su ka naan sanvuɛsa wie w’a ju.

11. ?Ngue yɛ Maagarɛti i su ndɛ’n kle e-ɔ?

¹¹ Maan e kan aniaan bla kun mɔ be flɛ i kɛ Maagarɛti’n, i ndɛ kan. Kɛ sin tɔli be asa’n su lɔ’n, be seli be kɛ be tu lɔ. Kɛ mɔ sran kpanngban kpa be fali atin’n blɛ kunngba’n nun’n ti’n, atin’n tanninnin. Sin wunsrɛn’n dunnin lika’n nun tritritri. Ɔ maan Maagarɛti kɛli i loto’n nun lɛ cɛli kpa. Sanngɛ kɛ mɔ aniaan bla’n siesieli i wun sieli’n ti’n, ɔ kwla fin nun fiteli. Afin kɛ ɔ kɔ́’n, ɔ fali be lika’n nun lɔ atin’m be desɛn m’ɔ o fluwa su’n ɔ sieli i sa su naan ɔ́ wún atin ng’ɔ kwla fɛ i ndɛndɛ’n. Asa’n, ɔ sinnin atin sɔ’m be su laa naan ɔ́ wún atin ng’ɔ fata kɛ ɔ fɛ i blɛ kekle nun’n. Kɛ m’ɔ dun mmua siesieli i wun sieli ti’n ɔ kwla ɲɛnnin i ti.

12. ?Ngue ti yɛ ɔ fata kɛ e fa ajalɛ nga be kle e’n su-ɔ?

¹² Kɛ ɔ ko yo naan awa’n w’a sasa e annzɛ lika’n w’a yoman sukusuku’n, ɔ kwla se e kɛ nán e fite blɛ wie nun annzɛ e tu e tranwlɛ’n nun e wɔ lika uflɛ annzɛ e yo like uflɛ. Sanngɛ ndɛ sɔ’m be su nantilɛ’n nun’n, sran wie’m be sisi be bo annzɛ be tu cɛn’n sie. Afin be kunndɛman kɛ bé kpɔ́ci be bo ninnge mun. ?Blɛ sɔ’n nun’n, ngue yɛ Klisifuɛ’m be yo-ɔ? Biblu’n se e kɛ: “E Min’n ti’n, maan amun ɲin yi be kwlaa nga klɔ sran’m be sieli be kpɛn’n. Sɛ famiɛn-o, maan amun ɲin yi i, afin ɔ ti amun su kpɛn. Sɛ famiɛn’n i janunfuɛ mun-o, maan amun ɲin yi be.” (1 Piɛ. 2:13, 14) Zoova i anuannzɛ’n kle e ajalɛ wie mun naan y’a ɲan e ti. Asa’n, be se e kpɛ sunman kɛ e fa e telefɔnun nimielo’n e man asɔnun kpɛnngbɛn mun. I liɛ’n, blɛ kekle nun’n bé kwlá flɛ́ e. ?I sɔ yɛ amun yo-ɔ? Asa ekun’n, be kwla kle e lika nga sɛ sa wie tɔ’n ɔ fata kɛ e kwlaa e ti yia lɛ’n. Annzɛ be kwla se e kɛ e tu kan e tran lɛ’n. Annzɛ kusu be kwla kle e like ng’ɔ fata kɛ e yo naan y’a ɲan ninnge wie mun’n. Wie liɛ’n, be kwla kle e blɛ nga i nun yɛ ɔ fata kɛ e uka sran mun nin wafa ng’ɔ fata kɛ e uka be’n. Sɛ e faman ajalɛ sɔ’m be su’n, sa kwla ɲan e annzɛ e dunman nun ti’n sa kwla ɲan asɔnun kpɛnngbɛn mun. Nán e wla fi su kɛ aniaan kpa sɔ’m be nian e su. (Ebr. 13:17) Maagarɛti seli kɛ: “N wun i wlɛ kpa kɛ ajalɛ nga asɔnun kpɛnngbɛn mun nin anuannzɛ’n be kle e be su falɛ’n ti yɛ n ɲannin min ti-ɔ.”

13. ?Ngue ti yɛ Klisifuɛ nga be wanndili’n be wla guali ase yɛ be klun jɔli titi-ɔ?

¹³ Kɛ sanvuɛsa ju’n annzɛ alɛ tɔ’n annzɛ kusu lika’n sanngan’n, aniaan wie’m be tu ko tran lika uflɛ. Kɛ be ju lɔ’n, be yo like kwlaa nga be kwla yo’n naan b’a faman be ɲin b’a siemɛn i be su sa’n i su. Asa’n, be fa be wun be wlɛ i Ɲanmiɛn junman dilɛ’n nun. I lɛ nun’n, be yo kɛ Klisifuɛ klikli’m be sa. Yɛle kɛ kɛ be kleli be yalɛ mɔ be wanndili’n, kɛ bé kɔ́’n “nn bé kán Ɲanmiɛn ndɛ’n bé klé sran mun.” (Yol. 8:4) Jasin fɛ bolɛ’n ti’n, b’a faman be ɲin b’a siemɛn i be su sa’n su, sanngɛ be fali be ɲin sieli i Ɲanmiɛn i famiɛn dilɛ’n su. Ɔ maan, be wla guali ase titi yɛ be klun jɔli.

KƐ BE KLE E YALƐ’N

14. ?Wafa sɛ yɛ yalɛ klelɛ’n kwla yo maan e klun su jɔman kun-ɔn?

¹⁴ Kɛ be kle e yalɛ’n, ninnge kpanngban mɔ be kwla yo maan e wla gua ase’n be kwla fi e sa. Kɛ e ɲan atin e yo aɲia mun likawlɛ’n, annzɛ e bo jasin fɛ’n annzɛ e yo ninnge wie mɔ srɛ kunman e kɛ bé wá trá e bé wlá e bisua’n, i sɔ’n yo e fɛ. Sɛ e kwlá ɲanman atin e yoman ninnge sɔ’m be kun’n, srɛ kwla kun e yɛ sa nga bé wá jú i sin’n ti’n e wla guaman ase. Sɛ e wun yo e sɔ kusu’n, ɔ ti su. Sanngɛ ɔ fata kɛ e nian e wun su. Afin Zezi seli kɛ yalɛ klelɛ’n ti’n i sɔnnzɔnfuɛ’m be nun wie’m bé wá kpɔ́nzɔ. (Zan 16:1, 2) ?Ɔ maan kɛ be kle e yalɛ’n, é yó se naan e klun w’a jɔ?

15. ?Ngue ti yɛ sɛ be kle e yalɛ’n, ɔ fataman kɛ srɛ kun e-ɔ? (Zan 15:20; 16:33)

¹⁵ Ɲanmiɛn Ndɛ’n se e kɛ: “Sran kwlaa ng’ɔ kunndɛ kɛ ɔ́ tú i klun ɔ́ sú Ɲanmiɛn naan ɔ nin Klisi Zezi bé nánti’n, bé klé i ɲrɛnnɛn wie.” (2 Tim. 3:12) Be flɛ aniaan bian kun kɛ Andrei. Kɛ be tanninnin be Zoova sulɛ be nvle’n nun lɔ’n, ndɛ nga Zezi kannin’n i su falɛ yoli kekle kpa i sa nun. Ɔ seli i wun kɛ: “Zoova i sufuɛ’m be sɔnnin e nvle’n nun dan. ?Awa’n kwla tra e ngba wla e bisua?” Akunndan sɔ mɔ Andrei buli’n ti’n i wla w’a guaman ase kun. I kpa bɔbɔ’n srɛ yɛ ɔ kun i siɛn’n niɔn. Sanngɛ aniaan wie’m be liɛ’n, be fali sa sɔ’n wlɛli i Zoova sa nun yɛ b’a seman be wun kɛ be su traman be le. Be wunnin i wlɛ kɛ be kwla tra be sanngɛ be wla w’a boman be wun kɛ Andrei sa. I sɔ’n ti’n, Andrei fali ajalɛ kɛ ɔ́ yó kɛ be sa. Ɔ maan ɔ wa fɛli i wla guɛli i Zoova su kpa trali laa’n. Kɛ ɔ yoli sɔ’n, i wun jɔli i. Yɛ kannzɛ lika’n ti kekle’n, ɔ dili aklunjɔɛ. Sa sɔ’n kwla ju e su wie. I yo, Zezi seli kɛ bé wá klé e yalɛ sɔ. Sanngɛ ɔ seli ekun kɛ blɛ kekle sɔ’n nun’n, e kwla su Zoova kpa titi.—An kanngan Zan 15:20; 16:33 nun.

16. ?Kɛ be kle e yalɛ’n ajalɛ benin wie mun yɛ ɔ fata kɛ e nanti be su-ɔ?

¹⁶ Sɛ be tannin e Zoova sulɛ’n annzɛ be se kɛ nán e yo ninnge wie mun Zoova i sulɛ’n nun kun’n, Betɛli’n annzɛ asɔnun kpɛnngbɛn’m be kwla kle e ajalɛ wie mun. Kɛ ɔ ko yo naan b’a sasa e annzɛ y’a ɲan Ɲanmiɛn sulɛ ninnge mun titi’n annzɛ y’a bo jasin fɛ’n y’a wɔ e ɲrun titi’n, i ti yɛ be fa ajalɛ sɔ mun-ɔn. Ɔ maan kannzɛ e wunman ajalɛ sɔ’m be wlɛ kpa bɔbɔ’n, sanngɛ maan e mian e ɲin e nanti be su. (Zak. 3:17) Asa ekun’n, ɔ fataman kɛ e kan e niaan’m be su ndɛ annzɛ e asɔnun’n nun ndɛ mun e kle sran nga be leman atin be siman ndɛ sɔ mun’n le.—Aku. 3:7.

17. ?Kɛ akoto mun sa’n ngue yɛ y’a fua kpa kɛ é yó-ɔ?

¹⁷ Like klikli nga ti yɛ Satan kle Ɲanmiɛn i sufuɛ’m be yalɛ’n, yɛle kɛ be ‘kan Zezi i ndɛ.’ (Ngl. 12:17) Nán e yaci Satan nin i minniɛn’m be lɛ naan be wla e srɛ. Sɛ be kle e yalɛ naan ɔ nin i sɔ’n ngba’n e bo jasin fɛ’n yɛ e kle sran’m be like’n, e wla gúa ase yɛ é dí aklunjɔɛ. Klisifuɛ klikli’m be blɛ su’n, Zifu’m be kpɛnngbɛn’m be seli akoto’m be kɛ nán be bo jasin fɛ’n kun. Sanngɛ akoto’m b’a kplinman su, be ɲin yili Ɲanmiɛn titi. Be boli jasin fɛ’n titi. Ɔ maan be klun jɔli. (Yol. 5:27-29, 41, 42) E kusu sɛ be tannin e ninnge wie’m be yolɛ’n naan e waan é bó jasin fɛ’n maan e yo i ngwlɛlɛ su. (Mat. 10:16) Sɛ e yo e liɛ nga e kwlɛ i yo’n, e klun jɔ́. Afin e yoli like ng’ɔ jɔ Zoova i klun’n kpɛkun e kannin ndɛ ng’ɔ man nguan’n kleli sran mun.

“ƝANMIƐN M’Ɔ YO MAAN SRAN DI FƆUNDI’N, Ɔ NIN AMUN TRÁN”

18. ?Sran ng’ɔ man aunjɔɛ’n i kpafuɛ’n i su ndɛ benin yɛ ɔ fataman kɛ e wla fi su-ɔ?

¹⁸ Maan e lafi su kɛ blɛ kekle nun’n, e wun kwla jɔ e. Blɛ sɔ’n nun’n, nán e wla fi su kɛ aunjɔɛ nga e miɛn i wun’n, yɛle ng’ɔ fin Ɲanmiɛn mɔ Zoova kunngba cɛ yɛ ɔ kwla man’n. Kɛ tukpacɛ m’ɔ sa ndɛndɛ’n tru lika’n nun’n, annzɛ e tɔ tukpacɛ’n annzɛ be kle e yalɛ’n, maan e fa e wla kwlaa e guɛ i su. Asa’n, nán e kpɔci i anuannzɛ’n le. Yɛ e fa e ɲin e sie i ninnge kpakpa nga é wá ɲán be e ɲrun lɔ’n be su. Sɛ e yo sɔ’n, ‘Ɲanmiɛn m’ɔ yo maan sran di fɔundi’n, ɔ nin e trán.’ (Fip. 4:9) Like suanlɛ nga i sin liɛ’n nun’n, é wá kán like nga e kwla yo e fa uka aniaan nga be kle be yalɛ’n naan b’a ɲan aunjɔɛ ng’ɔ fin Ɲanmiɛn’n i ndɛ.