LIKE SUANLƐ 52
Blɛ kekle nun’n, maan e uka e wiengu mun
“Be nga be sa mian ukalɛ wun’n, nán yo be awɛn, sɛ a kwla uka be’n, uka be.”—ƝAN. 3:27.
JUE 103 Sran nga be mannin be like kɛ be yo’n
I SU FITILƐa
1. ?Kpɛ sunman’n, wafa sɛ yɛ Zoova tɛ i sufuɛ’m be srɛlɛ’n su-ɔ?
?A SI kɛ Zoova kwla fa wɔ tɛ i sufuɛ kun i srɛlɛ’n su? Sɛ a ti asɔnun kpɛnngbɛn annzɛ asɔnunfuɛ’m be ukafuɛ annzɛ atin bofuɛ annzɛ jasin bofuɛ’n, a kwla uka aniaan mun. Sɛ a ti gbanflɛn-o, talua-o, kpɛnngbɛn-o, yasua-o, bla-o, Zoova kwla sin ɔ lika uka aniaan mun. Kɛ sran kun m’ɔ klo Zoova’n kpan flɛ i kɛ ɔ ukɛ i’n, kpɛ sunman’n Zoova sin asɔnun kpɛnngbɛn mun nin i sufuɛ onga’m be lika wla sran sɔ’n i “fanngan kpa.” (Kol. 4:11) Kɛ Zoova fa e uka e niaan mun’n, i sɔ’n yo e fɛ dan. Kɛ tukpacɛ m’ɔ sa ndɛndɛ’n tru lika’n nun’n, annzɛ sanvuɛsa wie ju’n, annzɛ be kle e niaan’m be yalɛ’n yɛ e kwla uka be kpa’n niɔn.
KƐ TUKPACƐ M’Ɔ SA NDƐNDƐ’N TRU LIKA’N NUN’N
2. ?Kɛ tukpacɛ m’ɔ sa ndɛndɛ’n tru lika’n nun’n, ngue ti yɛ e niaan’m be ukalɛ’n kwla yo kekle man e-ɔ?
2 Kɛ tukpacɛ m’ɔ sa ndɛndɛ’n tru lika’n nun’n, e wiengu’m be ukalɛ kwla yo kekle man e. I wie yɛle kɛ tukpacɛ ti’n e kwlá ko nianman e janvuɛ’m be osu. Asa’n, e kwlá yiaman be nga be sa nun yoman fɛ’n e awlo lɔ. Wie liɛ kusu sɛ tukpacɛ’n sali e awlofuɛ wie mun’n, e wiengu’m be ukalɛ’n kwla yo kekle man e. Ɔ nin i sɔ’n ngba’n, kɛ e mian e ɲin e uka e niaan mun’n Zoova i klun jɔ. (Ɲan. 3:27; 19:17) ?Ɔ maan ngue yɛ e kwla yo-ɔ?
3. ?Ajalɛ kpa benin yɛ Dezi i asɔnun’n nun asɔnun kpɛnngbɛn’m be kle e-ɔ? (Zeremin 23:4)
3 Like nga asɔnun kpɛnngbɛn’m be kwla yo’n. Sɛ a ti asɔnun kpɛnngbɛn’n, bu like nga a kwla yo naan w’a uka aniaan’m be kpa’n i akunndan. (An kanngan Zeremin 23:4 nun.) Aniaan bla Dezi mɔ e kɛnnin i ndɛ like suanlɛ ng’ɔ sinnin lɛ’n nun’n ɔ seli kɛ: “Laa’n, e nin min jasin fɛ bolɛ akpasua’n i nun asɔnun kpɛnngbɛn mun e boli jasin fɛ’n likawlɛ kpɛkun e yoli ninnge wie mun likawlɛ wie.”b I sɔ mɔ be yoli ti’n, kɛ koronavirisi’n fali lika’n mɔ aniaan bla’n i osufuɛ’m be wuli’n, i ukalɛ w’a yoman kekle be sa nun.
4. (1) ?Ngue ti yɛ asɔnun kpɛnngbɛn’m be kwla ukali Dezi-ɔ? (2) ?Ngue yɛ i sɔ’n kle e-ɔ?
4 Dezi seli kɛ: “Kɛ mɔ n si kɛ asɔnun kpɛnngbɛn’m be ti min janvuɛ ti’n, n kannin min klun ndɛ’n, nin sa ng’ɔ o min su’n kleli be. I sɔ yolɛ’n w’a yoman kekle min sa nun.” ?Ngue yɛ i sɔ’n kle asɔnun kpɛnngbɛn mun-ɔn? Amun kle kɛ aniaan’m be ndɛ lo amun kwlaa naan blɛ kekle’n w’a ju. Amun nin be tra janvuɛ. Sɛ tukpacɛ m’ɔ sa ndɛndɛ’n tru lika’n nun naan amun kwlá kɔman aniaan’m be awlo lɔ’n, amun fɛ i wun ajalɛ uflɛ. Dezi seli ekun kɛ: “Cɛn ba kun nun’n, asɔnun kpɛnngbɛn fanunfanun be flɛ min annzɛ be blɛ min mesazi. Be kanngan Biblu’n nun ndɛ mma wie’m be nun be kle min. Kannzɛ n si ndɛ mma sɔ’m be kpa’n, sanngɛ be wlali min fanngan kpa.”
5. (1) ?Ngue yɛ asɔnun kpɛnngbɛn’m be kwla yo naan b’a si ninnge nga aniaan’m be sa mian be wun’n niɔn? (2) ?Wafa sɛ yɛ be kwla uka be-ɔ?
5 Asɔnun kpɛnngbɛn mun, sɛ amun kunndɛ kɛ amún sí ninnge nga aniaan’m be sa mian be wun’n, amun usa be trele. Sanngɛ amun yo i sɔ ngwlɛlɛ su. (Ɲan. 20:5) ?I wie yelɛ kɛ be sa mian aliɛ annzɛ ayre annzɛ ninnge uflɛ wie’m be wun? ?Be junman’n kwla fi be sa annzɛ be leman sika naan b’a tua be sua’n i kalɛ? ?Ɔ fata kɛ be uka be naan b’a si like nga be kwla yo naan awa’n w’a uka be’n? Aniaan’m be fali ninnge wie’m be mannin Dezi. Sanngɛ kɛ asɔnun kpɛnngbɛn’m be kleli kɛ be klo i’n, mɔ be fali Biblu’n be wlɛli i fanngan’n, i sɔ’n ukɛli i kpa ekun. Dezi seli kɛ: “Asɔnun kpɛnngbɛn’m be nin min srɛli Ɲanmiɛn. Min wla kpɛnman ndɛ kwlaa nga be kannin’n su, sanngɛ wafa nga min wun yoli min blɛ sɔ’n nun’n, min wla w’a fiman su. Ɔ ti kɛ nn Zoova su se min kɛ nán min ngunmin yɛ n wo sa.”—Eza. 41:10, 13.
Kɛ aniaan ng’ɔ su tinngɛ aɲia’n ɔ ti ndɛ fɛfɛ nga aniaan nga be bali aɲia’n i bo’n ɔ nin aniaan ng’ɔ kpinndinman m’ɔ o ɛntɛnɛti su’n be kan’n, i sɔ’n yo i fɛ. (An nian ndɛ kpɔlɛ 6 nun.)
6. ?Ngue yɛ e ngba e kwla yo e fa uka aniaan mun-ɔn? (Nian foto’n.)
6 Like nga e kwlakwla e kwla yo’n. E si kɛ aniaan’m be lika nianlɛ’n nun’n, asɔnun kpɛnngbɛn mun yɛ ɔ fata kɛ be fɛ i nun ta’n niɔn. Sanngɛ Zoova kunndɛ kɛ e kwlakwla e wla e niaan’m be fanngan yɛ e uka be. (Gal. 6:10) Sɛ aniaan wie kpinndinman naan e yo like kan fa mɛn i’n, i sɔ’n wlɛ́ i fanngan kpa. Ba kanngan’m be kwla klɛ ndɛ wie annzɛ be yi desɛn be fa mɛn i. Gbanflɛn annzɛ talua’m be kusu be kwla ko di aniaan bla wie i gua’n annzɛ be yo like uflɛ be mɛn i. Aniaan wie’m be kwla tɔn like kan be fa ko man aniaan ng’ɔ kpinndinman’n. Sanngɛ kɛ tukpacɛ m’ɔ sa ndɛndɛ’n tru lika’n nun’n, be kwlaa nga be o asɔnun’n nun’n be mian ukalɛ wun. Ɔ maan kɛ aɲia’n wie’n, e kwla fa blɛ kan e nin aniaan mun e koko yalɛ annzɛ e flɛ be ɛntɛnɛti su. Ɔ fata kɛ e wla asɔnun kpɛnngbɛn’m be fanngan wie. Aniaan wie’m be klɛ asɔnun kpɛnngbɛn’m be fluwa fa yo be mo. Afin kɛ tukpacɛ m’ɔ sa ndɛndɛ’n tru lika’n nun’n, aniaan’m be lika nianlɛ ti’n be ɲanman be ti kaan sa. Maan e kwlakwla ‘e fɔnvɔ e wiengu titi, yɛ e wla e wiengu fanngan titi.’—1 Tes. 5:11.
KƐ SANVUƐSA JU LIKA KUN’N
7. ?Kɛ sanvuɛsa wie ju lika kun’n, ngue sa yɛ ɔ kwla ju-ɔ?
7 Kɛ sanvuɛsa ju lika kun’n, sran’m be ninnge kwlaa kwla fi be sa. Ɔ kwla yo be bo ninnge mun nin be sua mun. Asa’n, be awlɛn su sran wie kwla wu. Sa sɔ’n kwla ju e niaan’m be su wie. ?Blɛ sɔ’n nun’n, ngue yɛ e kwla yo fa uka be-ɔ?
8. ?Ngue yɛ asɔnun kpɛnngbɛn mun nin awlobo kpɛn’m be kwla yo ka naan sanvuɛsa wie w’a ju-ɔ?
8 Like nga asɔnun kpɛnngbɛn’m be kwla yo’n. Asɔnun kpɛnngbɛn mun, amun uka aniaan mun naan be siesie be wun be sie ka naan sanvuɛsa’n w’a ju. Amun yo naan aniaan’m be si like nga be kwla yo naan blɛ kekle nun’n b’a ɲan be ti’n, annzɛ b’a kwla flɛ amun’n. Maagarɛti mɔ e kɛnnin i ndɛ like suanlɛ ng’ɔ sinnin lɛ’n nun’n, ɔ seli kɛ: “Asɔnun kpɛnngbɛn’m be kannin ninnge ng’ɔ fata kɛ e fa e ɲin e sie su’n be ndɛ kleli e. Be seli e kɛ e nian e wun su naan sin m’ɔ di lika’n i blɛ’n nin-a sinman. Be waan sɛ awa’n se kɛ e wanndi’n, maan e wanndi. Yɛ sɛ awa’n w’a seman sɔ bɔbɔ naan sin’n su didi ba e asa liɛ’n su lɔ’n, maan e wanndi ndɛndɛ.” Ndɛ nga be kannin’n yoli aniaan’m be ye kpa. Afin kɛ lemɔcuɛ nnun sinnin’n, sin dan kpa kun tɔli be asa’n su lɔ. Awlobo kpɛn mun, kɛ amún sú Ɲanmiɛn awlo lɔ’n amun koko like nga blɛ kekle nun’n amun tinuntinun amun kwla yo’n i su yalɛ. Sɛ amun nin amun mma’m be siesie be wun kpa’n, sɛ sanvuɛsa wie ju’n amun wla su boman amun wun.
9. ?Kwlaa naan sanvuɛsa kun w’a ju’n, yɛ kɛ ɔ ko sin’n wafa sɛ yɛ asɔnun kpɛnngbɛn’m be kwla di junman likawlɛ-ɔ?
9 Sɛ a ti jasin fɛ bolɛ akpasua kun i sunianfuɛ’n, nán minndɛ kɛ sanvuɛsa wie ju ka naan w’a kunndɛ aniaan nga be o ɔ akpasua liɛ’n nun’n be nimielo kpafuɛ’n. Klɛ be kwlaa be dunman nin be nimielo’n sie ɔ sa su yɛ nian sɛ be nimielo sɔ’m be te sin-o. I liɛ’n, sɛ sanvuɛsa wie ju’n, a kwla flɛ be tinuntinun naan w’a uka be. Yɛ sɛ sanvuɛsa wie ju’n, bo su kle asɔnun kpɛnngbɛn’m be lika siesiefuɛ’n ndɛndɛ naan i kusu bo su kle akpasua sunianfuɛ’n. Sɛ amun mian amun ɲin di junman likawlɛ’n, amún úka aniaan’m be kpa. Kɛ sin’n dili lika m’ɔ wieli’n, akpasua sunianfuɛ ng’ɔ nian asɔnun nga Maagarɛti o nun’n i osu’n, ɔ kali be wun lɛ lele dɔ 36, w’a lafiman. Ɔ ukali asɔnun kpɛnngbɛn mun maan be niannin aniaan 450 mɔ be tuli be awlo’m be nun’n be lika. (2 Kor. 11:27) Be yoli maan aniaan kwlaa nga be mian lawlɛ wun’n be ɲannin lawlɛ.
10. ?Ngue ti yɛ ɔ fata kɛ asɔnun kpɛnngbɛn’m be tu be klun be di be junman’n i kpa-ɔ? (Zan 21:15)
10 Ɔ fata kɛ asɔnun kpɛnngbɛn’m be fa Ɲanmiɛn Ndɛ’n be wla be nga be wla w’a bo be wun’n be fanngan. (1 Piɛ. 5:2) Kɛ sanvuɛsa wie ju’n, ɔ fata kɛ be yo naan aniaan’m be wun fa be feke, yɛ be ɲan aliɛ nin tralɛ nin sua. Kɛ sa sɔ’n ko sin m’ɔ cɛ kpa bɔbɔ’n, aniaan’m be te mian ukalɛ wun. (An kanngan Zan 21:15 nun.) Be flɛ aniaan bian kun kɛ Arɔldu yɛ ɔ ti Betɛli kun i komite’n nunfuɛ. Kɛ ɔ niannin aniaan kpanngban mɔ sanvuɛsa ɲannin be’n be lika’n ɔ seli kɛ: “Kɛ ɔ ko yo naan aniaan’m b’a wun be wun fɛ ekun’n, i sɔ’n fa blɛ. Kɛ ɔ́ yó kɔ́’n, be wla kwla fi be wu kan. Sanngɛ sa wie’m be o lɛ’n be wla fiman su. I wie yɛle be awlɛn su sran nga be wuli’n nin be ninnge kpakpa nga be mlinnin’n annzɛ sa yaya m’ɔ to fuannin be’n. Sa sɔ’m be ti’n be wla kwla bo be wun tikatika. Sanngɛ klɔ sran mɔ be ti’n i ti yɛ be wun yo be sɔ-ɔ, nán kɛ be lafiman Ɲanmiɛn su ti-ɔ.”
11. ?Ngue yɛ ɔ fata kɛ awlobo’m be yo i titi-ɔ?
11 Biblu’n se kɛ: “Be nga be su sun’n, maan amun nin be sun.” (Rɔm. 12:15) Ndɛ sɔ’n ti asɔnun kpɛnngbɛn’m be cinnjin kpa. Ɔ fata kɛ asɔnun kpɛnngbɛn’m be yo naan aniaan nga sanvuɛsa juli be su’n be si kɛ Zoova nin aniaan’m be klo be. Asa’n, ɔ fata kɛ be uka awlobo mun naan be su Ɲanmiɛn titi. Yɛ be uka be naan be srɛ Ɲanmiɛn, be suan Biblu’n nun like, be tran aɲia’m be bo yɛ be bo jasin fɛ’n titi. Asa ekun’n, be kwla be wla siɛ nin niɛn’m be fanngan kɛ be uka be mma mun naan be fa be ɲin be sie i ninnge nga be kwlá saciman’n be su. Siɛ nin niɛn mun, maan amun yo naan amun mma’m be si kɛ Zoova yó be janvuɛ titi yɛ ɔ́ úka be titi. Yɛ amun kle be kɛ be nin aniaan nga be o mɛn wunmuan’n nun’n be ti awlobo kunngba nunfuɛ, naan be kunndɛ kɛ bé úka be.—1 Piɛ. 2:17.
?Sɛ sanvuɛsa wie ju amun asa’n su lɔ’n, a kwla ko uka ɔ wiengu mun? (An nian ndɛ kpɔlɛ 12 nun.)e
12. ?Ngue yɛ e kwlakwla e kwla yo naan y’a uka aniaan nga sanvuɛsa juli be su’n niɔn? (Nian foto’n.)
12 Like nga e kwlakwla e kwla yo’n. Sɛ sanvuɛsa wie ju e wun koko lɛ’n, e kwla usa asɔnun kpɛnngbɛn mun wafa nga e kwla uka aniaan mun’n. E kwla sike be nga sanvuɛsa ɲannin be’n annzɛ aniaan nga be bali be nga sanvuɛsa ɲannin be’n be ukalɛ’n. Asa’n, e kwla man aniaan’m be aliɛ annzɛ ninnge nga be sa mian be wun’n. Kannzɛ lika nga sanvuɛsa juli’n wo mmua bɔbɔ’n, e kwla uka aniaan nga be o lɔ’n. Yɛle kɛ e kwla srɛ Ɲanmiɛn e man be. (2 Kor.1:8-11) Asa kusu’n, e kwla man e sa ti like e fa suan junman nga aniaan’m be di i mɛn wunmuan’n nun’n i bo. (2 Kor. 8:2-5) Sɛ e le i wun alaje naan e kwla tu ajalɛ e ko uka aniaan mun’n, maan e usa asɔnun kpɛnngbɛn mun naan be kle e like ng’ɔ fata kɛ e yo’n. Sɛ be kplin su kɛ e ko uka aniaan mun’n, bé wá klé e like naan y’a wun wafa nga e kwla uka be kpa’n.
KƐ BE KLE ANIAAN’M BE YALƐ’N
13. ?Sa benin yɛ ɔ kwla ju aniaan nga be o nvle nga be tanninnin e jasin fɛ bolɛ’n nun’n be su-ɔ?
13 Nvle nga be tanninnin e jasin fɛ bolɛ’n nun’n, lika’n kwla yo kekle kpa aniaan’m be su, yalɛ mɔ be kle be’n ti. I wie yɛle kɛ be kwla mian sika wun, be kwla tɔ tukpacɛ yɛ be awlɛn su sran wie kwla wu. Sanngɛ kɛ mɔ be tanninnin e jasin fɛ bolɛ’n ti’n, asɔnun kpɛnngbɛn’m be kwlá nianman aniaan sɔ’m be osu. Yɛ be kwlá kokoman yalɛ kpa naan b’a wla be fanngan. I sɔ sa’n wie juli Andrei mɔ e kɛnnin i ndɛ like suanlɛ’n ng’ɔ sinnin lɛ’n nun’n i su. Aniaan bla kun m’ɔ o i jasin fɛ bolɛ akpasua’n nun’n i sa miannin sika wun kpa. Aniaan bla’n yoli asidan yɛ ɔ fata kɛ be yo i opele kpɛ sunman. Ɔ maan ɔ kwlá diman junman. Kannzɛ bɔbɔ be seli aniaan’m be kɛ nán be yo ninnge wie mun kun’n naan koronavirisi o lɛ’n, sanngɛ be miannin be ɲin be ukali aniaan bla’n. Zoova si like nga aniaan bla’n miɛn i wun’n, yɛ ɔ sinnin aniaan’m be lika ukɛli i.
14. ?Wafa sɛ yɛ asɔnun kpɛnngbɛn’m be kwla kle kɛ be lafi Zoova su-ɔ?
14 Like nga asɔnun kpɛnngbɛn’m be kwla yo’n. Andrei srɛli Ɲanmiɛn kpɛkun ɔ yoli i liɛ ng’ɔ kwlɛ i yo’n. ?Wafa sɛ yɛ Zoova tɛli i su-ɔ? Zoova yoli maan aniaan wie’m be ko ukali aniaan bla’n. Wie’m be ko sunmɛnnin i dɔɔtrɔ. Wie’m be mɛnnin i sika kan. Zoova ukali be maan be yoli like nga be kwla yo’n. Yɛ ɔ yoli maan be klun mɔ be tuli be ukali aniaan bla’n w’a kaman ngbɛn. (Ebr. 13:16) Asɔnun kpɛnngbɛn mun, sɛ amun bɔbɔ amun kwlá yoman ninnge wie mun’n, amun se aniaan mun naan be uka amun. (Zer. 36:5, 6) I kwlaa yoli-o, maan amun kle kɛ amun lafi Zoova su. Sɛ amun yo sɔ’n, ɔ́ úka amun naan amun a nian aniaan’m be lika.
15. ?Yalɛ klelɛ blɛ’n nun’n, é yó sɛ naan e nin e niaan mun e afiɛn w’a mantan kpa titi?
15 Like nga e kwlakwla e kwla yo’n. Kɛ awa’n tannin e jasin fɛ bolɛ’n, aniaan’m be kwla siesie jasin bofuɛ mun akpasuaakpasua kannganngan. Ɔ maan ɔ fata kɛ e yo naan e nin e akpasua’n nunfuɛ mun e di anuansɛ. Nán e wla fi su kɛ Satan yɛ ɔ ti e kpɔfuɛ’n niɔn, nán e niaan mun-ɔn. I sɔ’n ti’n, maan e blu sa nga be yo e’n su. Yɛ sɛ ndɛ wie o lɛ’n, maan e siesie i ndɛndɛ. (Ɲan. 19:11; Efɛ. 4:26) Asa’n, nán maan e sisi e bo naan y’a uka e wiengu. (Tit. 3:14) Kɛ aniaan’m be ukali aniaan bla nga i sa miannin’n, i jasin fɛ bolɛ akpasua’n nunfuɛ’m be kwlaa be ɲannin su ye. Afin be afiɛn wa mantannin kpa yɛ be kacili kɛ awlobo kunngba nunfuɛ sa.—Jue. 133:1.
16. ?Kɛ nga Kolɔsufuɛ Mun 4:3, 18 fa kan’n sa’n, wafa sɛ yɛ e kwla uka aniaan nga be kle be yalɛ’n niɔn?
16 Awa’n tanninnin e niaan akpi kpanngban kpa be ninnge wie’m be yolɛ Zoova i sulɛ’n nun. Ɔ nin i sɔ’n ngba’n be su Zoova titi. Be wlali be nun wie’m be bisua Ɲanmiɛn su mɔ be lafi’n ti. E kwla srɛ Ɲanmiɛn e man aniaan sɔ mun nin be osufuɛ mun. Aniaan wie’m be suan e niaan nga be wlali be bisua’n be bo, kusu nn be si kɛ be kwla tra be wie. Asa’n be wla aniaan nga be o bisua be fanngan naan be lafi Zoova su titi. Kpɛkun be ko man be ninnge nga be sa miɛn i wun’n yɛ be kpli be ti jɔlɛ difuɛ’m be ja su. E kwla srɛ Ɲanmiɛn e man aniaan nga be di junman sɔ mun wie.c (An kanngan Kolɔsufuɛ Mun 4:3, 18 nun.) Nán e wla fi su le kɛ kɛ e srɛ Ɲanmiɛn e man aniaan kwlaa sɔ mun’n i sɔ’n uka be kpa.—2 Tes. 3:1, 2; 1 Tim. 2:1, 2.
?Kwlaa naan yalɛ klelɛ blɛ’n w’a ju’n, wafa sɛ yɛ amun kwla uka amun awlofuɛ mun naan b’a buabua be wun b’a sie-ɔ? (An nian ndɛ kpɔlɛ 17 nun.)
17. ?Wafa sɛ yɛ dɔ nga su’n e kwla buabua e wun e sie-ɔ?
17 Dɔ nga su bɔbɔ’n, a nin ɔ awlofuɛ mun amun kwla buabua amun wun be sie kwlaa naan yalɛ klelɛ’n w’a bo i bo’n. (Yol. 14:22) Nán amun se kɛ amún bú sa yaya kwlaa nga be kwla ju’n be akunndan. Sanngɛ amun yo naan amun nin Zoova amun afiɛn mantan kpa yɛ amun uka amun mma mun naan be yo sɔ wie. Sɛ amun wla bo amun wun’n, amun kan kle Ɲanmiɛn. (Jue. 62:7, 8) Maan a nin ɔ awlofuɛ mun amun koko sa kwlaa nga ti yɛ amun kwla lafi Ɲanmiɛn su’n i su yalɛ.d Kɛ amun uka amun mma mun ka naan sanvuɛsa wie w’a ju’n, i sɔ’n yo be ye kpa. I wafa kunngba’n, sɛ amun uka be naan be buabua be wun be sie ka naan yalɛ klelɛ’n w’a ju’n, i sɔ’n yó maan bé láfi Zoova su yɛ be wla gúa ase.
18. ?Sa benin yɛ ɔ́ wá jú e ɲrun lɔ-ɔ?
18 ‘Aunjɔɛ nga Ɲanmiɛn man’n’ ɔ yo maan e wla gua ase. (Fip. 4:6, 7) Dɔ nga su bɔbɔ’n, kannzɛ tukpacɛ wie tru lika’n nun’n annzɛ sanvuɛsa wie ju annzɛ be kle e yalɛ’n, Zoova yó maan e wla guá ase. Asa’n ɔ fa asɔnun kpɛnngbɛn mun nian e lika. Asa ekun’n, ɔ wla e kwlakwla e fanngan kɛ maan e uka e wiengu. Dɔ nga su mɔ lika’n ti fɔun kan’n, maan e buabua e wun e sie. I liɛ’n, kɛ ‘ɲrɛnnɛn’n wá yó dan’n’ é kwlá jrán kekle. (Mat. 24:21) Blɛ sɔ’n nun’n, like kwlaa nga e kwla yo naan e wla w’a gua ase’n maan e yo yɛ e uka e wiengu mun naan be yo sɔ wie. Kɛ blɛ sɔ’n ko sin’n, e su wunman ɲrɛnnɛn kun. Like nga Zoova sunnzunnin i klɔ sran’m be lika’n ɔ́ kpɛ́n su. Yɛle kɛ fɔ su sran’m be nun kun, yɛ bé dí aunjɔɛ’n i kpafuɛ’n tititi.—Eza. 26:3, 4.
JUE 109 Maan e tu e klun e klo sran
a Kpɛ sunman’n, Zoova fɛ i sufuɛ mun fa uka be nga sa kekle o be su’n. E kusu ɔ kwla sin e lika wla aniaan’m be fanngan wie. Like suanlɛ nga nun’n, é wá kán wafa nga e kwla uka e wiengu mun blɛ kekle nun’n i ndɛ.
b E kacili sran wie’m be dunman’n.
c Betɛli’n annzɛ e anuannzɛ’n i bo bia’n su lɔfuɛ’m be kwlá faman lɛtri nga e klɛ be’n be ko manman e niaan nga be o bisua’n.
d Nian like suanlɛ nga be flɛ i kɛ “Maan e siesie e wun dɔ nga su naan y’a kwla jran yalɛ klelɛ’n i ɲrun kekle” nun. Ɔ o afuɛ 2019, Zuie Sasafuɛ Tranwlɛ’n nun.
e FOTO’N I SU NDƐ: Aniaan bian kun nin i yi be su fa aliɛ be man awlobo kun i nunfuɛ mɔ sanvuɛsa wie ti’n be tran tannin sua bo’n.