2 | “Fɔnvɔlɛ mɔ Ɲanmiɛn Ndɛ’n fɔnvɔ e’n”

BIBLU’N SE KƐ: “Ndɛ nga be klɛli be laa’n, be klɛli be naan e si sa. I liɛ’n, e awlɛn mɔ e tra nin fɔnvɔlɛ mɔ Ɲanmiɛn Ndɛ’n fɔnvɔ e’n ti’n, é ɲán like é fá e wla é gúa su.”—RƆMUNFUƐ MUN 15:4.

Like nga ndɛ sɔ’n kle e’n

Kɛ akunndan tɛtɛ’m be ba e ti nun’n, Biblu’n nun ndɛ wie’m be kwla man e wunmiɛn naan y’a kpalo be. Asa’n, Biblu’n kle kɛ ɔ cɛ kan’n, ninnge nga be sanngan e akunndan’n bé wíe.

Wafa nga ndɛ sɔ’n kwla uka e’n

Sa kekle’m be tɔ e kwlakwla e su blɛ wie nun. Sanngɛ be nga be ti nun sanngan’n annzɛ be koko dan’n be liɛ’n be wunman be wun fɛ blɛ kwlaa nun. ?Wafa sɛ yɛ Biblu’n kwla uka be-ɔ?

Kɛ akunndan tɛtɛ’m be ba e ti nun’n, Biblu’n man e afɔtuɛ kpakpa wie mɔ be kwla uka e naan y’a kpalo akunndan sɔ mun naan y’a bu akunndan kpa-ɔ. (Filipufuɛ Mun 4:8) Asa’n, ɔ kwla fɔnvɔ e yɛ ɔ kwla uka e naan e wla w’a gua ase, naan y’a faman ajalɛ tɛ.—Jue Mun 94:18, 19.
Biblu’n kwla uka e naan y’a bumɛn i kɛ e nunman sran nun.—Liki 12:6, 7.
Biblu’n nun ndɛ mma sunman be kle kɛ nán e ngunmin yɛ e wo-ɔ. Asa’n be kle kɛ Ɲanmiɛn m’ɔ ti e Yifuɛ’n wun e wun sa’n i wlɛ.—Jue Mun 34:18; 1 Zan 3:19, 20.
Biblu’n se kɛ Ɲanmiɛn wá núnnún ninnge kwlaa nga be yo maan e bu akunndan tɛtɛ mun’n. (Ezai 65:17; Sa Nglo Yilɛ 21:4) Kɛ sa wie’m be ti’n, e akunndan’n sanngan’n, ndɛ mma sɔ’m be kwla man e wunmiɛn naan y’a jran kekle.

Wafa nga Biblu’n uka e’n Zesika

Kɛ min ti nun’n sanngannin’n wafa nga min wun yoli min’n

“I nun mɔ n le afuɛ 25, ɔ ju wie’n min wla bo min wun tratra su, n fa ya ndɛndɛ, n faman min wun n mantanman sran kpɛkun n bu min wun fɔ dan. Kɛ n ɔli dɔɔtrɔ’n be seli min kɛ ti nun w’a sanngan. Akunndan tɛtɛ’m be ba min ti nun kpɛ sunman yɛ n bu sa nga be juli laa mɔ be yo min ya’n be akunndan tikatika. Dɔɔtrɔ’m be ukali min naan m’an wun i wlɛ kɛ sa tɛtɛ nga be juli min su’n be akunndan mɔ n bu i trilili’n, i ti yɛ tukpacɛ sɔ’n ɲannin min-ɔn. Be mannin min ayre. Sanngɛ ɔ fata kɛ n yo ninnge wie mun ekun naan m’an buman akunndan tɛtɛ sɔ’m be kun.”

Wafa nga Biblu’n uka min’n

“Kɛ min akunndan’n ko sanngan dan’n, min klun titi min, min wla bo min wun dan yɛ n kwlá lafiman. Wie liɛ kɔnguɛ’n, n bu akunndan tɛtɛ mun sa trilili. Jue Mun 94:19 wla e fanngan kɛ kɛ e akunndan’n sanngan’n, Ɲanmiɛn kwla fɔnvɔ e yɛ ɔ kwla yo maan e wla gua ase. Ɔ maan n fa min Biblu’n nin fluwa kun mɔ n klɛli Biblu’n nun ndɛ nga be wla min fanngan’n i nun’n n sie i min ti bo lɛ titi. Kɛ n la mɔ n kwlá lafiman’n, n kanngan Biblu’n nun ndɛ mma wie’m be nun. Ɔ maan Ɲanmiɛn Ndɛ’n fɔnvɔ min.

“Biblu’n wla e fanngan kɛ e kpalo akunndan nga be nin Ɲanmiɛn i su ndɛ nga e si i’n be kɔman likawlɛ. Laa’n, n bu i kɛ n nunman sran nun, sran fi kloman min yɛ n kwlá yoman like kpa wie fi. Sanngɛ n ma wunnin i wlɛ kɛ ndɛ sɔ’m be nin ndɛ nga Biblu’n kan’n be kɔman likawlɛ. Biblu’n se kɛ Ɲanmiɛn ti Siɛ kpa kun. Ɔ klo e tinuntinun yɛ ɔ si e aunnvɔɛ. Blɛblɛblɛ m’an buman akunndan tɛtɛ’m be kun, sanngɛ akunndan kpakpa mun yɛ n ma buli be-ɔ. Min wun akunndan nga Ɲanmiɛn bu’n, i wie yɛ n ma miannin min ɲin n buli-ɔ. I sɔ’n ukali min kpa naan m’an yaci min bɔbɔ min wun akunndan tɛ bulɛ.

“Min ɲin o blɛ mɔ e akunndan’n su sannganman kun’n yɛ e su buman akunndan tɛtɛ’m be kun’n i sin kpa. Kɛ n si kɛ e ɲrun lɔ’n, sran’m be ti nun su sannganman kun’n, i sɔ’n uka min naan m’an jran min su sa’m be ɲrun kekle. Asa’n, i sɔ’n uka min naan m’an fa min wla m’an guɛ i like kpa kun su.”