3 | Be nga Biblu’n kan be ndɛ’n be su ndɛ’n kwla uka e

BIBLU’N SE KƐ...Yasua nin bla wie mɔ be ‘ti sran kɛ e sa’n’ be suli Ɲanmiɛn lele guɛli i ti nin i bo.—ZAKI 5:17.

Like nga ndɛ sɔ’n kle e’n

Biblu’n kan sran wie mɔ sa fanunfanun tɔli be su’n be ndɛ. Kɛ é kánngan be su ndɛ’n nun’n, e kwla wun kɛ sa nga be tɔ e su’n, be tɔli be nun wie’m be su wie.

Wafa nga ndɛ sɔ’n kwla uka e’n

E kwlakwla e kunndɛ kɛ e wiengu’m be wun wafa nga e wun yo e’n i wlɛ. I li kɛ e ti nun sanngan’n yɛ e kunndɛ sɔ kpa’n niɔn. Kɛ e kanngan be nga Biblu’n kan be ndɛ’n be su ndɛ’n nun’n, e kwla wun sran wie mɔ be wun yoli be kɛ e sa annzɛ be buli akunndan kɛ e sa’n. Ɔ maan kɛ e akunndan’n sanngan mɔ e bu akunndan tɛtɛ mun’n, e wun i wlɛ kɛ nán e ngunmin yɛ e wun yo e sɔ-ɔ. I sɔ’n yo maan e bumɛn i kɛ e ngunmin yɛ e wo-ɔ.

Biblu’n kan sran wie mɔ be wla boli be wun mɔ be buli i kɛ be leman ukafuɛ’n be ndɛ. ?W’a se ɔ wun le kɛ ‘nguan nun tranlɛ’n w’a flan min’? Moizi nin Eli nin Davidi be wun yoli be sɔ wie.—Kalɛ 11:14; 1 Famiɛn Mun 19:4; Jue Mun 55:4.
Biblu’n kan bla kun m’ɔ suan Anin’n i ndɛ. Ɔ se kɛ ‘i wla boli i wun dan’ afin ɔ kwlá wuman ba. Asa’n, i wla’n yo i finfin cɛn kwlakwla.—1 Samiɛli 1:6, 10.
Biblu’n kan bian kun m’ɔ suan Zɔbu’n i ndɛ. Sa nga be tɔ e su’n be tɔli i su wie. Kannzɛ bɔbɔ ɔ lafi Ɲanmiɛn su kpa’n, sanngɛ blɛ wie nun’n i wla boli i wun dan ti’n, ɔ seli kɛ: “Min nguan’n w’a bɔn min bue nun. N kloman kɛ ń ká nguan nun kun.”—Zɔbu 7:16.

Sɛ e wun wafa nga sran sɔ’m be yoli naan b’a wun be su sa’m be trawlɛ’n, i sɔ’n úka e naan e kusu y’a wun e su sa’m be trawlɛ wie.

Wafa nga Biblu’n uka e’n Kevɛn

Kɛ min ti nun tukpacɛ’n (trouble bipolaire) kle min yalɛ’n

“Kɛ ń má ɲán afuɛ 50, dɔɔtrɔ’m be wunnin i kɛ tukpacɛ tɛ kun o min wun. Tukpacɛ sɔ’n ti’n, ɔ ju wie’n min wun fa min feke dan, kpɛkun i sin’n, min wla bo min wun tratra su. I sɔ’n ti’n, ɔ ju wie’n ɔ yo min kɛ n kwla wun sa kwlaa nga be tɔ min su’n, be trawlɛ. Sanngɛ blɛ uflɛ nun’n, ɔ yo min kɛ sɛ n wu’n ɔ flunman.”

Wafa nga Biblu’n uka min’n

“Sran kun mɔ Biblu’n kɛn i ndɛ mɔ i su ndɛ’n ti kɛ min liɛ’n sa’n, yɛle akoto Piɛli. I fɔnlɛ’m be ti’n, ɔ buli i kɛ ɔ nunman sran nun. Sanngɛ Piɛli w’a buman akunndan tɛ sɔ’n sa trilili. Ɔ fɛli i wun mantannin be nga i ndɛ lo be’n. Kɛ min tukpacɛ’n ko ba’n, ninnge nga n kwlá yoman be’n be ti’n, ɔ yo min kɛ n nunman sran nun sa. Ɔ maan kɛ Piɛli sa’n, n mian min ɲin n fa min wun n mantan be nga be kwla uka min naan m’an jran kekle’n.

“Sran kun mɔ Biblu’n kɛn i ndɛ mɔ i su ndɛ’n wla min fanngan kpa’n yɛle Famiɛn Davidi. Blɛ wie nun’n, sa nga be tɔli i su’n ti’n i akunndan’n sanngannin dan. Yɛ sa tɛ ng’ɔ yoli be laa’n ti’n i akunndan’n buli i fɔ. Min su sa’n ti kɛ i liɛ’n sa. Afin ɔ ju wie’n, n yo like wie annzɛ n kan ndɛ wie mɔ i sin’n, be yo min ya dan-ɔn. Ndɛ nga Davidi kannin m’ɔ o Jue Mun 51 nun’n ɔ wla min fanngan kpa. I ndɛ mma 3 nun’n, Davidi seli kɛ: ‘N bɔbɔ n si min sa tɛ mun, yɛ min sa tɛ’n sinsin min ɲin su titi.’ Kɛ min sa sin bubu min’n, kɛ min wun yo min sɔ wie-ɔ. Blɛ sɔ’n nun’n, kɛ ɔ yo naan m’an bu min wun sran’n, ɔ ti kekle. Sanngɛ ndɛ mma 10 nun’n, Davidi seli kɛ: ‘Ee Ɲanmiɛn, man min awlɛn kun m’ɔ ti sanwun’n, yɛ fa akunndan uflɛ wla min nun, akunndan ng’ɔ timan nɲɔnnɲɔn’n.’ N srɛ Ɲanmiɛn kɛ ngalɛ’n sa wie naan ɔ uka min naan n bu min wun akunndan kpa. Asa’n, ndɛ mma 17 wla min fanngan dan. Ɔ se kɛ: ‘Ee Ɲanmiɛn, sran nga i awlɛn w’a kpɔtɔ i klun’n, mɔ i akunndan w’a sanngan’n, a su yimɛn i blo.’

“Kɛ n fa min ɲin n sie i sran sɔ mɔ Biblu’n kan be ndɛ’n ɔ nin like nga Ɲanmiɛn yo man min dɔ nga su’n be su’n, i sɔ’n man min wunmiɛn. Ɔ maan n kwla fa min ɲin n sie i ninnge nga é ɲán be e ɲrun lɔ’n be su. Kɛ ɔ ko yo sɔ’n, n lafi Biblu’n nun ndɛ’n su. Yɛ i sɔ’n uka min naan m’an jran kekle titi.”