4 | Biblu’n nun afɔtuɛ’m be kwla uka e

Like nga ndɛ sɔ’n kle e’n

Kannzɛ Biblu’n timan ayre yolɛ fluwa’n, sanngɛ i nun ndɛ’n kwla uka e kpa. Ɔ kwla uka sran nga i ti nun w’a sanngan’n naan w’a wun i su sa’m be trawlɛ. Maan e kan Biblu’n nun ndɛ mma sɔ’m be nun wie’m be ndɛ:

Wafa nga ndɛ sɔ’n kwla uka e’n

“Be nga be ti juejue’n be mianman ayre yofuɛ wun, sanngɛ be nga be kpinndinman’n, be yɛ be miɛn i wun-ɔn.”—MATIE 9:12.

Biblu’n kle kɛ ɔ ju wie’n, ɔ fata kɛ e ko wun dɔɔtrɔ’m be wun naan be yo e ayre. Sran kpanngban mɔ be ti nun sanngannin’n, be kunndɛli tukpacɛ sɔ’n i su ndɛ nanwlɛ wie mun, kpɛkun be ko wunnin dɔɔtrɔ’m be wun. I sɔ yolɛ’n ukali be kpa.

“Be wun kpinngbinlɛ’n ɔ yo sa ye.”—1 TIMOTE 4:8

Sɛ e ti nun sanngan naan e fa blɛ e yo ninnge wie mun’n, i sɔ’n kwla uka e naan y’a yo juejue. I wie yɛle kɛ maan e kpinngbin e wun titi, e di like kpa, yɛ e lafi kpa.

“Be klun m’ɔ ti jɔwa’n ɔ ti ayre kpa, sanngɛ kɛ be wla bo be wun’n be wunmiɛn’n wie.”—ƝANNDRA MUN 17:22.

Maan e kanngan Biblu’n nun ndɛ wie mɔ be wla fanngan’n be nun. Yɛ maan e fa ninnge wie mɔ e si kɛ e kwla yo be’n e sie e ɲrun kɛ é yó be. Sɛ e yo sɔ’n, é dí aklunjɔɛ. Sɛ e fa e ɲin e sie i ninnge nga be ti kpa’n be su’n, naan e lafi su kɛ e ɲrun lɔ’n yó kpa’n, i sɔ’n úka e naan y’a jran e su sa’m be ɲrun kekle.

“Ngwlɛlɛ’n ti be nga be si be jranwlɛ’n be liɛ.”—ƝANNDRA MUN 11:2.

Ɔ ju wie’n, e kwlá yoman ninnge kwlaa nga e kunndɛ kɛ é yó’n. Sɛ ɔ ti sɔ’n, maan e kplin su kɛ e wiengu’m be uka e. Amun janvuɛ mun nin amun osufuɛ’m be kunndɛ kɛ bé úka amun. Sanngɛ atrɛkpa’n, be siman like trele ng’ɔ fata kɛ be yo’n. Ɔ maan amun kan like nga amun kunndɛ kɛ be yo man amun’n kle be. Sanngɛ nán amun se amun wun kɛ bé wá yó like kwlaa mán amun. Kannzɛ like nga be yo’n ti kaan sa bɔbɔ’n maan amun kle be kɛ amun si ye.

Wafa nga Biblu’n nun ndɛ’n kwla uka be nga be ti nun w’a sanngan’n

Nikɔlua mɔ tukpacɛ tɛ kun (trouble bipolaire) kleli i yalɛ’n seli kɛ: “Blɛ wie nun’n, n sieli i nzɔliɛ kɛ min wun kpɛman min kpa. Ɔ maan n ko wunnin dɔɔtrɔ bla kun wun. Ɔ kannin like ng’ɔ kle min yalɛ’n i ndɛ kleli min. I sɔ’n ukali min naan m’an wun sa trele ng’ɔ o min su’n i wlɛ. Ɔ maan n kwla wunnin ayre trele nga n kwla yo naan m’an yo juejue’n.”

Piɛli mɔ i akunndan’n sanngan dan’n, ɔ seli kɛ: “N sieli i nzɔliɛ kɛ kɛ min nin min yi e kanngan Biblu’n nun nglɛmun kwlakwla’n, i sɔ’n uka min naan m’an bu akunndan kpa. Yɛ kɛ cɛn wie’n min akunndan’n sanngan’n, Biblu’n nun ndɛ mma trele kun kpɛn min klun. Kpɛkun i sɔ’n wla min fanngan kpa.

Bla kun su suan Zio. Tukpacɛ ng’ɔ kle i yalɛ’n ti’n, ɔ ju wie’n ɔ di aliɛ sinnzin su. Ɔ seli kɛ: “Kɛ ɔ ko yo naan m’an kan sa ng’ɔ o min su’n i ndɛ m’an kle sran’n, ɲannzuɛn kun min. Sanngɛ min janvuɛ kun mɔ e nin i e afiɛn mantan kpa’n sieli i su min nuan bo. Kpɛkun ɔ kleli kɛ ɔ wun min su sa’n i wlɛ. Ɔ ukali min naan m’an wun min wun fɛ, naan w’a yoman min kɛ min ngunmin yɛ n wo-ɔ.”

Be flɛ bian kun kɛ Timote. Tukpacɛ ng’ɔ o i su’n ti’n ɔ yoman ninnge mun ngwlɛlɛ su. Ɔ seli kɛ: “Biblu’n uka min naan m’an yo ninnge mun ngwlɛlɛ su. Ɔ kwla yo junman dilɛ nun annzɛ wunmiɛn lolɛ nun. Ngwlɛlɛ ndɛ nga be o nun’n, be uka min naan m’an wun tukpacɛ ng’ɔ kle min yalɛ’n i trawlɛ.”