Ɲanmiɛn nuan ijɔfuɛ’m be ndɛ nga be kannin’n i su ye nga e ɲɛn i’n

1. ?Ngue yɛ ɔ kwla uka e naan y’a klo Ɲanmiɛn nuan ijɔfuɛ’m be ndɛ’m be su like suanlɛ-ɔ?

ANIAAN bian kun mɔ be flɛ i kɛ Bɛnin’n, ɔ seli kɛ: “N klo Ɲanmiɛn nuan ijɔfuɛ’m be ndɛ nga be kannin’n i su like suanlɛ kpa.” ?Yɛ ɔli? ?A klo i sɔ yolɛ wie? ?Annzɛ ɔ ɲrun’n Ɲanmiɛn nuan ijɔfuɛ’m be ndɛ’m be wlɛ wunlɛ ti kekle dan? Atrɛkpa’n, a bu i kɛ Ɲanmiɛn nuan ijɔfuɛ’m be ndɛ’m be su like suanlɛ yoman fɛ. Sanngɛ sɛ a si like nga ti yɛ Zoova maan be klɛli ndɛ sɔ mun i nuan Ndɛ’n nun’n, atrɛkpa’n á kló be su like suanlɛ.

2. ?Ngue yɛ é wá kɛ́n i ndɛ like suanlɛ nga nun-ɔn?

² Like suanlɛ nga nun’n, é wá kán like nga ti yɛ ɔ fata kɛ e suan Ɲanmiɛn nuan ijɔfuɛ’m be ndɛ’m be su like’n i ndɛ. Asa’n, é wá kán wafa nga e kwla suan be su like’n i ndɛ. I sin’n, é wá kán ndɛ nɲɔn mɔ Ɲanmiɛn nuan ijɔfuɛ Daniɛli kannin’n nin i su ye nga e kwla ɲɛn i’n dɔ nga su’n be ndɛ wie.

LIKE NGA TI YƐ Ɔ FATA KƐ E SUAN ƝANMIƐN NUAN IJƆFUƐ’M BE NDƐ NGA BE KANNIN’N I SU LIKE’N

3. ?Sɛ e waan é wún Ɲanmiɛn nuan ijɔfuɛ’m be ndɛ’m be wlɛ’n, ngue yɛ ɔ fata kɛ e yo-ɔ?

³ Sɛ e wunman Ɲanmiɛn nuan ijɔfuɛ’m be ndɛ’m be nun kun i wlɛ’n, ɔ fata kɛ e kunndɛ ukalɛ. Maan e fa sa kun e yiyi nun. Wienun-ɔn, a su kɔ lika kun mɔ a siman lɔ kpa’n i nun. Sanngɛ ɔ janvuɛ nga a nin i be su kɔ’n ɔ si lɔ kpa. Ɔ si lika nga amun wo’n yɛ ɔ si atin’m be kpa. Nanwlɛ, kɛ a si kɛ a nin ɔ janvuɛ sɔ’n yɛ be su kɔ lika sɔ’n nun’n, i sɔ’n yo wɔ fɛ. I wafa kunngba’n, Zoova ti kɛ e janvuɛ sɔ’n sa. Ɔ si e ɲrun lɔ sa’m be kpa. Ɔ maan sɛ e waan é wún Ɲanmiɛn nuan ijɔfuɛ’m be ndɛ’m be wlɛ’n, ɔ fata kɛ e se Zoova kɛ ɔ uka e.—Dan. 2:28; 2 Piɛ. 1:19, 20.

4. ?Ngue ti yɛ Zoova maan i nuan ijɔfuɛ’m be kannin e ɲrun lɔ sa’m be ndɛ-ɔ? (Zeremin 29:11) (An nian foto’n wie.)

⁴ Siɛ nin niɛn’m be kunndɛ kɛ be mma’m be liɛ yo ye. I kunngba’n yɛle Zoova liɛ’n. Ɔ kunndɛ kɛ e di aklunjɔɛ. (An kanngan Zeremin 29:11 nun.) Sanngɛ like nga Siɛ nin niɛn fi kwlá yoman’n, Zoova liɛ’n ɔ kwla yo. Yɛle kɛ ɔ kwla kan sa nga bé wá jú e ɲrun lɔ’n be ndɛ. Ɔ yoli maan i nuan ijɔfuɛ’m be kannin sa nga bé wá jú e ɲrun lɔ’n be ndɛ. I sɔ’n m’ɔ yoli ti’n, e si sa sɔ mun ka naan b’a kpɛn su. (Eza. 46:10) Ɲanmiɛn nuan ijɔfuɛ’m be ndɛ nga be o Biblu’n nun’n, be ti like kpa kun mɔ e Si m’ɔ o ɲanmiɛn lɔ’n fa cɛli e-ɔ. ?Sanngɛ ngue ti e kwla lafi su kɛ Ɲanmiɛn nuan ijɔfuɛ’m be ndɛ’m bé kpɛ́n su sakpa-ɔ?

5. ?Ngue yɛ Masi i su ndɛ’n kle gbanflɛn nin talua mun-ɔn?

⁵ Kpɛ sunman’n, gbanflɛn nin talua nga be su Zoova’n, be nin be nga be kloman Ɲanmiɛn ndɛ’n mlɔnmlɔn’n yɛ be wo-ɔ. Ɔ ju wie’n, ndɛ nga be kan’n nin be ayeliɛ’n be kwla yo maan gbanflɛn nin talua sɔ’m be akunndan’n yo nɲɔnnɲɔn. I sɔ sa’n juli aniaan bian kun mɔ be flɛ i kɛ Masi’n i su. Ɔ seli kɛ: “Min gbanflɛn nun’n min akunndan’n wa yoli nɲɔnnɲɔn. N seli min wun kɛ atrɛkpa’n nán Zoova i Lalofuɛ mun yɛ be ti Ɲanmiɛn sufuɛ kpafuɛ mun-ɔn, kɛ nga be min si nin min nin be kan kleli min’n sa. Asa’n n usali min wun sɛ Biblu’n fin Ɲanmiɛn sakpa-o.” ?Ngue yɛ Masi i si nin i nin be yoli-ɔ? Aniaan bian’n bɔbɔ seli kɛ: “N si kɛ be wla boli be wun, sanngɛ b’a kpankpanman min su.” Masi i si nin i nin be fali Biblu’n be tɛli i kosan’m be su. Sanngɛ Masi bɔbɔ yoli like kun. Ɔ seli kɛ: “N ma suannin Ɲanmiɛn nuan ijɔfuɛ’m be ndɛ’m be su like kpa. Yɛ e nin min wiengu gbanflɛn nin talua mun e kokoli like nga n suannin’n i su yalɛ.” ?Kɛ Masi yoli sɔ’n wafa sɛ yɛ i bo’n guali-ɔ? Masi bɔbɔ tɛli su kɛ: “I sɔ mɔ n yoli ti’n, n ma lafili su kɛ Biblu’n fin Ɲanmiɛn sakpa.”

6. (1) ?Sɛ e akunndan’n yo nɲɔnnɲɔn Biblu’n nun ndɛ’n su’n, ngue yɛ ɔ fata kɛ e yo-ɔ? (2) ?Ngue ti-ɔ?

⁶ Ɔ kusu kɛ Masi sa’n, sɛ a lafiman su kpa kɛ Biblu’n nun ndɛ’n ti nanwlɛ’n, nán ɔ sa sin bubu wɔ. Sanngɛ ɔ fata kɛ a yo ninnge wie mun. E kwla fa sran kun i akunndan m’ɔ yo nɲɔnnɲɔn’n, e sunnzun annganblalɛ. Sɛ annganblalɛ’n ta like wie wun naan be yaci i lɛ sa ngbɛn’n, ɔ kwla saci like sɔ’n. I wafa kunngba’n, sɛ e akunndan’n yo nɲɔnnɲɔn’n, i sɔ’n kwla yo maan e yaci Ɲanmiɛn sulafilɛ. Sɛ e kunndɛman kɛ i sɔ sa’n ju e su’n, ɔ fata kɛ e usa e wun kɛ: ‘?N lafi e ɲrun lɔ sa’m be su ndɛ nga Biblu’n kan’n su? Sɛ a lafiman su kpa’n, a kwla suan Ɲanmiɛn nuan ijɔfuɛ’m be ndɛ nga b’a dun mmua b’a kpɛn su’n be su like. ?Wafa sɛ yɛ a kwla yo sɔ-ɔ?

?WAFA SƐ YƐ Ɔ FATA KƐ E SUAN ƝANMIƐN NUAN IJƆFUƐ’M BE NDƐ NGA BE KANNIN’N I SU LIKE-Ɔ?

7. ?Ɲanmiɛn nuan ijɔfuɛ’m be ndɛ’m be su like suanlɛ’n i su ajalɛ benin yɛ Daniɛli kle e-ɔ? (Daniɛli 12:10) (An nian foto’n wie.)

⁷ Daniɛli kle e wafa nga e kwla suan Ɲanmiɛn nuan ijɔfuɛ’m be ndɛ’m be su like’n i su ajalɛ. Sa nga ti yɛ ɔ suannin ndɛ sɔ’m be su like’n yɛle kɛ i waan ɔ́ wún be wlɛ kpa. Asa’n, Daniɛli kleli kɛ ɔ ti wun ase kanfuɛ. Ɔ si kɛ be nga be si Zoova mɔ be nanti i nuan ndɛ’m be su’n yɛ ɔ uka be naan b’a wun i nuan ndɛ’m be wlɛ-ɔ. (Dan. 2:27, 28; an kanngan Daniɛli 12:10 nun.) Daniɛli lafili su kɛ Zoova yɛ ɔ kwla ukɛ i naan w’a wun i nuan Ndɛ’n i wlɛ-ɔ. I lɛ nun’n, ɔ kleli kɛ ɔ ti wun ase kanfuɛ sakpa. (Dan. 2:18) Asa’n, ɔ boli i ɲin ase suannin Ɲanmiɛn Ndɛ’n i nun like kpa. Ɔ suannin Ɲanmiɛn Ndɛ’n i bue nga be le be blɛ sɔ’n nun’n be nun like. (Zer. 25:11, 12; Dan. 9:2) ?Wafa sɛ yɛ e kwla nian Daniɛli i ajalɛ’n su-ɔ?

8. (1) ?Ngue ti yɛ sran wie’m be lafiman su kɛ Ɲanmiɛn nuan ijɔfuɛ’m be ndɛ’m be kpɛn su-ɔ? (2) ?Ngue yɛ ɔ fata kɛ e yo-ɔ?

⁸ Bu sa nga ti yɛ a fa ɔ ɲin sie i Ɲanmiɛn nuan ijɔfuɛ’m be ndɛ’m be su’n i akunndan. ?A kunndɛ kɛ á wún be wlɛ kpa ti yɛ a suan be su like-ɔ? Sɛ ɔ ti sɔ’n, Zoova úka wɔ naan w’a wun be wlɛ. (Zan 4:23, 24; 14:16, 17) Sran wie’m be suan Ɲanmiɛn nuan ijɔfuɛ’m be ndɛ’m be su like naan bé klé kɛ Biblu’n finman Ɲanmiɛn. I liɛ’n be su nantiman Ɲanmiɛn i mmla’m be su yɛ bé yó be klunklo ninnge mun. Sanngɛ nán ninnge sɔ’m be ti yɛ ɔ fata kɛ e suan Ɲanmiɛn nuan ijɔfuɛ’m be ndɛ’m be su like-ɔ. Sɛ e kunndɛ kɛ é wún Ɲanmiɛn nuan ijɔfuɛ’m be ndɛ’m be wlɛ’n, ɔ fata kɛ e fa nzuɛn cinnjin kpa kun.

9. ?Sɛ e kunndɛ kɛ é wún Ɲanmiɛn nuan ijɔfuɛ’m be ndɛ’m be wlɛ’n, nzuɛn benin yɛ ɔ fata kɛ e fa-ɔ? An yiyi nun.

⁹ Maan e yo wun ase kanfuɛ. Zoova seli kɛ ɔ́ úka wun ase kanfuɛ mun. (Zak. 4:6) I sɔ’n ti’n, ɔ fata kɛ e srɛ i kɛ ɔ uka e naan e wun i nuan ijɔfuɛ’m be ndɛ nga be kannin’n i wlɛ. Asa ekun’n, ɔ fata kɛ e kplin su kɛ be nga Zoova sin be lika man e aliɛ blɛ ng’ɔ nin i fata’n nun’n be uka e. (Lik. 12:42) Zoova timan Ɲanmiɛn m’ɔ klo like sukusuku yolɛ-ɔ. I sɔ’n ti’n, sɛ ɔ sin sran trele wie’m be lika uka e naan y’a wun i nuan ndɛ’n i wlɛ’n i sɔ’n boman e nuan.—1 Kor. 14:33; Efɛ. 4:4-6.

10. ?Ngue yɛ Ɛstɛɛ i su ndɛ’n kle-ɔ?

¹⁰ Maan e suan Ɲanmiɛn nuan ijɔfuɛ’m be ndɛ’m be su like kpa. Maan e fa e ɲin e sie i Ɲanmiɛn nuan ijɔfuɛ’m be ndɛ kun m’ɔ ti e cinnjin kpa’n i su yɛ e suan su like kpa. I sɔ yɛ aniaan bla kun mɔ be flɛ i kɛ Ɛstɛɛ’n ɔ yoli-ɔ. Ɔ kunndɛli kɛ ɔ́ wún ndɛ nga Ɲanmiɛn nuan ijɔfuɛ’m be kɛnnin i Mesi’n i balɛ’n su’n be wlɛ kpa. Ɔ seli kɛ: “Kɛ n ɲannin afuɛ 15 n suannin ninnge nga be kle kɛ Ɲanmiɛn nuan ijɔfuɛ’m be dun mmua kannin ndɛ sɔ mun ka naan Zezi w’a ba’n be su like.” Aniaan bla’n kanngannin fluwa ɲɔnɲɔnwa nga be wunnin be jenvie m’ɔ ti njin nzue klakla’n i wun lɛ’n be su ndɛ nga be kannin’n nun. I sɔ’n ti’n, ɔ lafili su kɛ Ɲanmiɛn nuan ijɔfuɛ’m be ndɛ’n ti nanwlɛ. Ɛstɛɛ seli kɛ: “Be klɛli fluwa sɔ’m be nun wie mun lele ka naan Klisi’n w’a ba. Ɔ maan Ɲanmiɛn nuan ijɔfuɛ’m be ndɛ nga be o fluwa sɔ’m be nun’n, ɔ fin Ɲanmiɛn sakpa.” Ɔ seli ekun kɛ: “ N kanngannin be nun kpɛ sunman ka naan m’an wun be wlɛ.” Kɛ aniaan bla’n miɛnnin i ɲin wunnin ndɛ sɔ’m be wlɛ’n, i sɔ’n yoli i fɛ kpa. Ɔ boli i ɲin ase suannin Ɲanmiɛn nuan ijɔfuɛ’m be ndɛ nga be kannin’n i su like kpa. Kɛ ɔ yoli sɔ’n, ɔ seli kɛ: “N wunnin i wlɛ weiin kɛ Biblu’n nun ndɛ’n ti nanwlɛ.”

11. ?Kɛ e mian e ɲin kpa naan y’a wun i wlɛ kɛ Biblu’n nun ndɛ’n ti nanwlɛ’n i su ye benin yɛ e ɲɛn i-ɔ?

¹¹ Kɛ e wun wafa nga Ɲanmiɛn nuan ijɔfuɛ’m be ndɛ nga be kannin’n be nun wie’m be kpɛnnin su’n, i sɔ’n yo maan e lafi Zoova su kpa yɛ e wun i wlɛ kɛ atin ng’ɔ kle e’n ti kpa. Asa’n, i sɔ’n yo maan kannzɛ sa nga be o e su’n be ti sɛ, ti sɛ’n e lafi su kɛ e ɲrun lɔ’n yó kpa. Maan e kan ndɛ nɲɔn mɔ Daniɛli kannin be mɔ be su kpɛn su’n be ndɛ kan. Sɛ e wun ndɛ sɔ’m be wlɛ’n, i sɔ’n yó maan é fá ajalɛ kpa.

?NGUE TI YƐ Ɔ FATA KƐ E SI WAKA SRAN’N I JA NGBASUA MƆ BE BUE TI BLALƐ YƐ BE BUE TI UFA’N BE SU NDƐ-Ɔ?

12. ?Waka sran mɔ “i ja ngbabua’m be bue ti blalɛ yɛ be bue ti ufa’n,” be ti ngue nzɔliɛ? (Daniɛli 2:41-43)

¹² An kanngan Daniɛli 2:41-43 nun. Laliɛ nga Famiɛn Nebikadnezaa cɛnnin mɔ Daniɛli tuli i bo’n i nun’n, waka sran nga famiɛn wunnin i’n “i ja ngbabua’m be bue ti blalɛ yɛ be bue ti ufa.” Kɛ e fa Ɲanmiɛn nuan ndɛ sɔ’n e sunnzun ndɛ uflɛ wie mɔ be o Daniɛli fluwa’n nin Sa Nglo Yilɛ fluwa’n be nun’n, e kwla se kɛ waka sran’n i ja ngbabua’m be ti Angle nin Amlɛnkɛn mɔ be bo wa yoli kun’n be nzɔliɛ. Andɛ’n, be yɛ be le kwlalɛ kpa mɛn wunmuan’n nun-ɔn. Kɛ Daniɛli kán famiɛn sɔ’m be ndɛ’n, ɔ seli kɛ: “Be bue kun ɲán wunmiɛn, yɛ be bue kun yó fakafaka.” ?Ngue ti yɛ be bue kun yó fakafaka-ɔ? Afin be nga famiɛn sɔ’m be sie be’n mɔ be nzɔliɛ yɛle ufa’n be yo maan be sielɛ’n kwlá yoman kekleke kɛ blalɛ sa.b

13. ?Waka sran’n i ja ngbabua’m be su ndɛ nga Daniɛli kannin’n ti’n, ndɛ cinnjin benin wie mun yɛ e wunnin be wlɛ-ɔ?

¹³ Waka sran nga Daniɛli wunnin i’n, i ja ngbabua’m be kle e like kpanngban. I klikli’n yɛle kɛ Angle nin Amlɛnkɛn’m be kle kɛ be le kwlalɛ dan. I wie yɛle kɛ nvle nga be kwlali be kpɔfuɛ mun Alɛ Dan Klikli’n nin Alɛ Dan Nɲɔn Su’n be nun’n, Angle nin Amlɛnkɛn’m be o be nun. Sanngɛ kɛ mɔ nvle sɔ’m be nunfuɛ’m be bubu be wun nun yɛ ɔ ju wie’n be jaso awa’n i wun’n ti’n, be kwlalɛ’n i su kpɛ. I nɲɔn su’n Angle nin Amlɛnkɛn mun yɛ bé ká lele naan Ɲanmiɛn Sielɛ’n w’a nunnun klɔ sran’m be sielɛ’n niɔn. Kannzɛ nvle wie’m be nin Angle nin Amlɛnkɛn’m be kpli mɛn’n, sanngɛ be su kwlá sinman be osu. Like nga ti yɛ e se sɔ’n, yɛle kɛ “yɔbuɛ kun” m’ɔ ti Ɲanmiɛn Sielɛ’n i nzɔliɛ’n ɔ wa finnin waka sran’n i ja ngbabua mɔ be ti Angle nin Amlɛnkɛn’m be nzɔliɛ’n kpɛkun ɔ fufuli be nun.—Dan. 2:34, 35, 44, 45.

14. ?Wafa sɛ yɛ waka sran’n i ja ngbabua’m be su ndɛ’n i wlɛ wunlɛ’n kwla uka e naan y’a fa ajalɛ kpa-ɔ?

¹⁴ ?A lafi su kɛ waka sran’n i ja ngbabua mɔ be bue ti blalɛ yɛ be bue ti ufa’n, i su ndɛ nga Daniɛli kannin’n ɔ ti nanwlɛ? Sɛ a lafi su sɔ’n, bé wún i sɔ liɛ’n ɔ ayeliɛ’n nun. Kɛ mɔ a wun i wlɛ kɛ ɔ ka kan’n, mɛn tɛ nga núnnún’n ti’n, a su seman kɛ á kúnndɛ sika kaka naan á trán pɔɔ nun. (Lik. 12:16-21; 1 Zan 2:15-17) Asa’n, i sɔ’n úka wɔ maan á wún i wlɛ kɛ jasin fɛ’n bolɛ’n nin sran’m be like klelɛ’n ti cinnjin kpa. (Mat. 6:33; 28:18-20) Siɛn mɔ y’a suan ndɛ sɔ’n i su like’n, usa ɔ wun kɛ: ‘?Ajalɛ nga n fa be’n, be kle kɛ n lafi su kɛ ɔ ka kan’n Ɲanmiɛn Sielɛ’n núnnún klɔ sran’m be sielɛ liɛ’n?

?WAFA SƐ YƐ “NGLO LƆ FAMIƐN’N” NIN “NGUA LƆ FAMIƐN’N” BE SU NDƐ’N KWLA UKE E-Ɔ?

15. ?Wan yɛle “nglo lɔ famiɛn’n” yɛ wan yɛle “ngua lɔ famiɛn’n”? (Daniɛli 11:40)

¹⁵ An kanngan Daniɛli 11:40 nun. Daniɛli ndɛ tre 11 nun’n, be kan famiɛn nɲɔn mɔ be su kpli mɛn’n be ndɛ. Kɛ e fa Ɲanmiɛn nuan ndɛ sɔ’n, e sunnzun ndɛ uflɛ wie mɔ be o Biblu’n nun’n, e wun i kɛ “nglo lɔ famiɛn’n” yɛle Risi nin be nga be suɛn i bo’n. Yɛ “ngua lɔ famiɛn’n” yɛle Angle nin Amlɛnkɛn mɔ be bo yo kun be sie mɛn’n.c

16. ?Ngue yɛ “nglo lɔ famiɛn’n” yo Ɲanmiɛn i sufuɛ mun-ɔn?

¹⁶ Be kle aniaan nga be tran “ngua lɔ famiɛn’n” i lika liɛ’n nun’n be yalɛ. Be boli aniaan sɔ’m be nun wie mun, yɛ be wlali wie’m be bisua. Ninnge nga “nglo lɔ famiɛn’n” yo be’n, be bubuman aniaan’m be sa sin. I kpa bɔbɔ’n, be lafi Zoova su kpa tra laa’n. Ɲanmiɛn i sufuɛ sɔ’m be si kɛ be yalɛ klelɛ sɔ’n ɔ ti ndɛ kun m’ɔ o Daniɛli fluwa’n nun’n i su kpɛnlɛ.d (Dan. 11:41) I sɔ’n kusu kwla uka e naan e ɲin w’a tran like nga e wla o su’n i su naan e nin Zoova y’a nanti klanman titi.

17. ?Sa benin mun yɛ be ju Zoova i sufuɛ nga be tran “ngua lɔ famiɛn’n” i lika nun’n be su-ɔ?

¹⁷ Laa’n, “ngua lɔ famiɛn’n” kleli Zoova i sufuɛ’m be yalɛ wie. I sɔ’n sa’n juli Alɛ Dan Klikli’n nin Alɛ Dan Nɲɔn Su’n be nun. Blɛ sɔ’n nun’n, politiki mɔ aniaan’m be waan be yoman ti’n, be wlali be nun kpanngban kpa be bisua. Asa’n, be fuannin aniaan wie’m be mma mun suklu’m be nun. Afuɛ nga be sinnin lɛ’n be nun’n sa wie’m be kleli kɛ be kleli Zoova i sufuɛ nga be tran ngua lɔ famiɛn’n i lika nun’n be yalɛ. Koko nun wa’n nglo lɔ famiɛn w’a kleman Zoova i sufuɛ’m be yalɛ trele sa. Sanngɛ ɔ yo ninnge wie mɔ be kwla yo maan Zoova i sufuɛ kun kpɔci Zoova-ɔ. I wie yɛle kɛ vote blɛ nun’n, sɛ Klisifuɛ kun w’a niɛnmɛn i wun su’n, ɔ kwla jran be nga be kpli famiɛn bia’n be nun kun sin. Kannzɛ ɔ su voteman’n, sanngɛ i awlɛn nun lɔ’n ɔ kwla jran sran kun sin. Nanwlɛ, ɔ ti cinnjin kɛ e ayeliɛ nin e awlɛn’n nun lɔ’n, e mian e ɲin naan y’a yoman politiki.—Zan 15:18, 19; 18:36.

18. ?Kɛ e wun kɛ “nglo lɔ famiɛn’n” nin “ngua lɔ famiɛn’n” be ɲin ci be wiengu’n, i sɔ’n yo e sɛ? (An nian foto’n wie.)

¹⁸ Be nga be lafiman Ɲanmiɛn nuan ijɔfuɛ’m be ndɛ nga be kannin’n su’n, kɛ be wun kɛ “ngua lɔ famiɛn’n” nin “nglo lɔ famiɛn’n” ‘be fa be wɛ’n be bo su’n’ be klun titi be. (Dan. 11:40) Bɔnbu nga famiɛn nɲɔn sɔ’m be le be’n be kwla saci asiɛ’n. Sanngɛ e si kɛ Zoova su kplinman su kɛ i sɔ sa liɛ’n ju. (Eza. 45:18) Kɛ e wun kɛ “nglo lɔ famiɛn’n” nin “ngua lɔ famiɛn’n” be ɲin ci be wiengu’n, e klun titiman e. I kpa bɔbɔ’n, i sɔ’n yo maan e lafi Ɲanmiɛn ndɛ’n su kpa. Afin i sɔ’n kle e kɛ mɛn’n su wa wie.

MAAN E FA E ƝIN E SIE I ƝANMIƐN NUAN IJƆFUƐ’M BE NDƐ NGA BE KANNIN’N I SU TITI

19. ?Ɲanmiɛn nuan ijɔfuɛ’m be ndɛ’m be su ndɛ benin yɛ ɔ fata kɛ e wun be wlɛ-ɔ?

¹⁹ E siman wafa nga Ɲanmiɛn nuan ijɔfuɛ’m be ndɛ’m be nun wie’m bé kpɛ́n su’n. Ɲanmiɛn nuan ijɔfuɛ Daniɛli bɔbɔ w’a wunman ndɛ ng’ɔ klɛli be’n be kwlaa be wlɛ. (Dan. 12:8, 9) Sɛ e wunman wafa nga Ɲanmiɛn nuan ijɔfuɛ’m be ndɛ kun kpɛ́n su’n i wlɛ’n, i sɔ’n kleman kɛ ndɛ sɔ’n su kpɛnman su. E kwla lafi su kɛ, kɛ nga Zoova fa yoli i laa’n sa’n blɛ ng’ɔ ti su’n nun’n, Zoova úka e naan y’a wun i nuan ndɛ’n i wlɛ.—Amɔ. 3:7.

20. (1) ?Ɲanmiɛn nuan ijɔfuɛ’m be ndɛ benin mun yɛ ɔ ka kan’n bé kpɛ́n su-ɔ? (2) ?Ngue yɛ ɔ fata kɛ e yo i titi-ɔ?

²⁰ Ɔ cɛ kan’n, sran’m bé wá sé kɛ: “E su di fɔundi, srɛ kunman e kun!” (1 Tes. 5:3) Asa’n, mɛn nun awa’m bé wá núnnún Ɲanmiɛn sulɛ wafa ng’ɔ timan su’n. (Ngl. 17:16, 17) Asa ekun’n, bé wá fá alɛ bé wlɛ́ i Ɲanmiɛn i sufuɛ’m be sin. (Eze. 38:18, 19) I sin yɛ Aamagedɔn alɛ’n bó i bo-ɔ. (Ngl. 16:14, 16) E kwla lafi su kɛ sa sɔ’m bé jú sakpa. Ka naan sa sɔ’m b’a ju’n, maan e kle kɛ e klo e Si m’ɔ o ɲanmiɛn su lɔ’n. Kpɛkun e fa e ɲin e sie i Ɲanmiɛn nuan ijɔfuɛ’m be ndɛ’m be su yɛ e uka e wiengu mun naan be yo sɔ wie.