Like nga sran kpanngban be jran su be se kɛ sa kun ti kpa annzɛ ɔ ti tɛ’n

Ninnge wie’m be o lɛ’n, sran’m be dan lika be nuan sɛ su kɛ be ti kpa, annzɛ be ti tɛ. I wie yɛle kɛ sran sunman be wun i wlɛ kɛ, sran kunlɛ’n nin sran gblu tɔlɛ’n ɔ nin ba kanngan’m be kunndɛlɛ’n, be ti tɛ. Yɛ sran sunman si kɛ sa nuan su sɛsɛ yolɛ’n, ɔ nin klun ufue yolɛ’n, ɔ nin sran aunnvɔɛ silɛ’n be ti kpa. Sanngɛ ninnge wie’m be nun’n, sran’m be waan ajalɛ nga sran kun fá’n ɔ ti kɛ i bɔbɔ sa, naan ɔ lemɛn i kpa annzɛ i tɛ. I wie yɛle bla nin bian nna’n nin ba talɛ’n ɔ nin nanwlɛ dilɛ’n be su ndɛ’n. Blɛ sunman’n, wafa nga sran kun i bɔbɔ fa bu ninnge mun’n i su yɛ ɔ nian yo ninnge mun-ɔn. Annzɛ kusu ndɛ nga i wiengu’m be kan’n i su yɛ ɔ jran fa ajalɛ-ɔ.

WAFA NGA SRAN KUN FA BU NINNGE MUN’N

E klun akunndan’n kwla kle e kɛ like kun ti kpa, annzɛ ɔ ti tɛ. Ɔ maan blɛ sunman’n i su yɛ e nian e fa ajalɛ-ɔ. (Rɔmunfuɛ Mun 2:​14, 15) Ba kanngan mun bɔbɔ’n, sɛ sran kun yo like naan ɔ ti kpa annzɛ ɔ timan kpa’n be kwla wun i wlɛ. I kpa bɔbɔ’n, sɛ ɔ ju wie naan be yo sa tɛ’n ɔ kwla yo be nsisɔ. Sanngɛ kɛ é ɲín é kɔ́’n, akunndan nga e osufuɛ mun nin e janvuɛ’m be bu’n ɔ kwla ɲan ta e su. Asa’n e suklu klefuɛ mun, ɔ nin e Ɲanmiɛn sulɛ wafa’n be kwla ɲan ta e su wie. Ɔ maan kɛ e fa ajalɛ kun’n e klun akunndan’n kwla bu e fɔ, annzɛ ɔ kwla kle e kɛ e fali ajalɛ kpa.

Kɛ e si kɛ ninnge wie’m be ti kpa yɛ wie’m be ti tɛ’n, i sɔ’n yo maan e kwla si sran aunnvɔɛ, e si ye, e yo sa i nuan su, yɛ e kwla uka e wiengu mun. I sɔ’n ti’n e su yoman ninnge wie mɔ be kwla yo maan be nga be ndɛ lo e’n bé wún be ɲrun’n. Annzɛ kusu e su yoman ninnge wie mɔ maan é wún ɲannzuɛn, annzɛ e akunndan’n bú e fɔ’n.

?Kɛ e jran wafa nga e bɔbɔ e fa bu ninnge mun’n i su e fa ajalɛ’n, ɔ kwla yo e ye blɛ kwlaa nun? Be flɛ gbanflɛn kun kɛ Gari. Ɔ seli kɛ i nun m’ɔ ti gbanflɛn’n ‘like nga i bɔbɔ klo kɛ ɔ́ yó’n yɛ ɔ yo-ɔ.’ Sanngɛ ɔ wunnin i wlɛ kɛ, i bo’n w’a guaman kpa w’a mɛnmɛn i. Afin ɔ kan guali su kɛ w’a diman aklunjɔɛ, yɛle kɛ ‘bla kunndɛlɛ sukusuku’n ɔ nin drɔgi nin nzan nɔnlɛ’n, ɔ nin sa tɛtɛ’m be yolɛ’n yɛ ɔ kacili i junman-ɔn.’

NDƐ NGA SRAN’M BE KAN’N

Blɛ sunman’n, nán wafa nga e bɔbɔ e fa bu ninnge mun’n i ngunmin su yɛ e nian e fa ajalɛ-ɔ. Sanngɛ ndɛ nga e wiengu’m be kan’n ɔ o nun wie. Ndɛ nga be kan’n ɔ kwla uka e kpa. Asa’n kɛ e yo ninnge nga be jɔ e osufuɛ mun, nin e janvuɛ mun, ɔ nin e tranfuɛ’m be klun’n, be bu e sran.

?Sɛ ndɛ nga sran’m be kan’n i su yɛ e nian e fa ajalɛ’n, ɔ kwla yo e ye blɛ kwlaa nun? Be flɛ talua kun kɛ Plisila. Ninnge nga i wiengu’m be yo’n yɛ i waan ɔ́ yó wie-ɔ. Ɔ maan kannzɛ bɔbɔ ɔ nin-a jaman bian’n sanngɛ ɔ nin bian be lali. Ɔ wunnin i wlɛ kɛ i wiengu’m be su sulɛ’n w’a mɛnmɛn i aklunjɔɛ. Ɔ seli kɛ: “Kɛ n yoli ninnge nga min wiengu’m be yo’n wie’n m’an diman aklunjɔɛ. Ninnge nga n yoli be’n m’an buman be sin.”

?NGUE YƐ Ɔ KWLA UKA E NAAN Y’A FA AJALƐ KPA-Ɔ?

Wafa nga e bɔbɔ e fa bu ninnge mun’n ɔ nin ndɛ nga e wiengu’m be kan’n be ti cinnjin sɔ. Sanngɛ sɛ ninnge sɔ’m be ngunmin su yɛ e jran e fa ajalɛ’n, ɔ ju wie’n e su faman ajalɛ kpa. Wie liɛ’n e siman wafa nga ajalɛ nga é fá’n i bo’n gúa’n. Ɔ maan e kwla fa ajalɛ wie m’ɔ kwla yo e bɔbɔ annzɛ e wiengu’m be tɛ-ɔ. (Ɲanndra Mun 14:12) Kannzɛ e bɔbɔ annzɛ e wiengu mun be bu i kɛ ajalɛ wie ti kpa’n, sanngɛ ajalɛ sɔ’n i bo’n kwla gua tɛ. Asa’n like nga e bɔbɔ annzɛ e wiengu mun e bu i kɛ ɔ ti kpa andɛ’n, ainman’n e kwla se kɛ ɔ ti tɛ. Ninnge wie mɔ sran’m be bu i laa kɛ ɔ ti tɛ’n, dɔ nga su’n be waan ɔ ti kpa. Yɛ ninnge wie mɔ laa sran’m be bu i like kpa’n, siɛn’n sran’m be bumɛn i sɔ kun.

?Like kpa kun o lɛ m’ɔ kwla uka e naan y’a si like ng’ɔ ti kpa’n annzɛ ng’ɔ ti tɛ’n niɔn? ?Like kun o lɛ mɔ e kwla fa e wla e gua su mɔ e si kɛ ɔ su kaciman le-ɔ?

Fluwa kun o lɛ’n i nun ndɛ’n kaciman, yɛ ɔ kwla uka sran wafawafa kwlaa naan b’a fa ajalɛ kpa. Ndɛ akpasua ng’ɔ́ bá lɛ’n nun’n, é wá kán fluwa sɔ m’ɔ kwla uka sran mun naan b’a si sa tɛ’n nin sa kpa’n i ndɛ.