?Amun si sɔ?
?Kɛ Filipu kó tó Etiopi bian’n, kakaklolo wafa benin nun yɛ Etiopi bian’n wo-ɔ?
GLƐKI nun ndɛ mma nga be kacili i Mɛn Uflɛ Biblu’n nun kɛ “kakaklolo’n,” be kwla fa kan kakaklolo wafawafa wie’m be ndɛ. (Yol. 8:28, 29, 38) Sanngɛ e kwla se kɛ kakaklolo nga Etiopi bian’n fuli nun’n, ɔ ti dan tra alɛ kunlɛ kakaklolo mun nin kakaklolo nga be fa si wanndilɛ’n nun akplowa’n. Maan e fa e ɲin e sie i sa nga ti yɛ e kan sɔ’n be nun wie’m be su.
Etiopi bian’n ti sran dan yɛ ɔ fin lika mmuammua kpa. Ɔ ti “Etiopi famiɛn bla mɔ be flɛ i Kandasi’n, i awlo lɔ sran dan kun. I yɛ ɔ niɛn i ninnge kpakpa’m be su-ɔ.” (Yol. 8:27) Laa Etiopi mɛn’n fɛ i lika nga andɛ’n be flɛ i Sudan’n lele fa ju Ezipti nvle m’ɔ o le andɛ’n i gua lɔ lika’n nun. Atrɛkpa’n nán kakaklolo kunngba’n nun yɛ ɔ fuli lele juli lɔ-ɔ. Sanngɛ kɛ mɔ atin’n ti tɛnndɛn’n ti’n, e si kɛ ɔ fali trɔ kpanngban. Klisifuɛ klikli’m be blɛ su’n, kakaklolo nga lika kɔfuɛ’m be fu nun’n, i wie o lɛ’n i ja’n ti nnan yɛ i su ti katawa. Fluwa kun se kɛ: “Be kwla fa trɔ kpanngban be wlɛ i kakaklolo wafa sɔ’n nun. Yɛ i nun tranlɛ yo fɛ. Atrɛkpa’n be kwla fa kɔ lika mmua kpa.”
Kɛ Filipu tó Etiopi bian’n, nn ɔ o lɛ kánngan fluwa nun. Biblu’n se kɛ: “Filipu wanndili naan w’a mantan kakaklolo’n. Ɔ wunnin kɛ bian’n su kanngan Ɲanmiɛn nuan ijɔfuɛ Ezai i fluwa’n nun. Ɔ mɛn i nɛn’n su yɛ ɔ kanngan nun-ɔn.” (Yol. 8:30) Wafa nga be yili kakaklolo nga be fa tu ajalɛ’n ti’n, be kɔman ndɛndɛ. Kɛ mɔ kakaklolo sɔ’m be kɔ blɛblɛblɛ’n ti’n, Etiopi bian’n kwla kɛnngɛn i fluwa’n nun. Yɛ Filipu kusu kwla wanndi to i.
Etiopi bian’n “srɛli Filipu kɛ ɔ fu naan ɔ trɛn i wun lɛ.” (Yol. 8:31) Be nga be cisan kakaklolo nga be fa si wanndilɛ’n nun akplowa’n nun’n, be jran nglo. Sanngɛ kakaklolo nga be fa kɔ lika’n i liɛ’n, ase tranwlɛ o nun. Ɔ maan Etiopi bian’n nin Filipu be kwla tran ase.
Ndɛ ng’ɔ o Sa Nga Be Yoli’n ndɛ tre 8 nun’n, ɔ nin lalafuɛ nun ndɛ wie’m be ti’n, kɛ koko nun wa’n bé yí kakaklolo nga Etiopi bian’n ti nun’n i desɛn e fluwa’m be nun’n, e wun kɛ i kakaklolo sɔ’n ti dan. Ɔ ti dan tra kakaklolo nga be fa kun alɛ’n ɔ nin kakaklolo nga be fa si wanndilɛ’n nun akplowa’n.