?Á yó sɛ naan w’a ɲan bla kpa annzɛ bian kpa kun w’a jɛ i?

1-2. ?Kwlaa naan aniaan kun w’a se kɛ ɔ nin aniaan wie bé sán nun’n, ngue yɛ ɔ fata kɛ ɔ dun mmua bu i akunndan-ɔn?

KANNZƐ sran kun w’a ja bla annzɛ bian annzɛ w’a yoman sɔ-o, ɔ kwla di aklunjɔɛ. Sanngɛ aniaan kpanngban, i gbanflɛn-o, i talua-o, i kpɛnngbɛn-o, be kunndɛ kɛ bé já bla annzɛ bian. I yo, sɛ a kunndɛ kɛ a nin sran kun bé sán nun naan á jɛ́ i’n, ɔ fata kɛ a nin Zoova amun afiɛn mantan kpa, ɔ fata kɛ a si ɔ bɔbɔ ɔ wun kpa. Yɛ ɔ fata kɛ ɔ sa nun yo fɛ kan.a (1 Kor. 7:36) I liɛ’n, sɛ a ja bla annzɛ bian’n, amun aja’n kwla yo ye.

² Sanngɛ kɛ ɔ ko yo naan aniaan kun w’a ɲan bla kpa annzɛ bian kpa’n, nán blɛ kwlaa nun yɛ ɔ ti pɔpɔ-ɔ. (Ɲan. 31:10) Sɛ e wun aniaan kun m’ɔ ti e liɛ’n su’n, kɛ ɔ ko yo naan e nin i y’a san nun’n, wie liɛ’n ɔ timan pɔpɔ. Like suanlɛ nga nun’n, é wá kán like ng’ɔ kwla uka Klisifuɛ kun naan w’a ɲan bla kpa annzɛ bian kpa naan ɔ nin i b’a san nun’n i ndɛ. Asa’n, é wá wún wafa nga asɔnun’n nunfuɛ’m be kwla uka aniaan nga be kunndɛ kɛ bé já bla annzɛ bian’n.

LIKE NG’Ɔ KWLA UKA ANIAAN KUN NAAN W’A ƝAN BLA ANNZƐ BIAN KPA’N

3. ?Sɛ aniaan kun kunndɛ kɛ ɔ́ já bla annzɛ bian’n, ngue yɛ ɔ fata kɛ ɔ bu i akunndan-ɔn?

³ Sɛ a kunndɛ kɛ á já bla annzɛ bian’n, ɔ fata kɛ a dun mmua bu nzuɛn nga a klo be’n, mɔ a kunndɛ kɛ á wún i sran sɔ’n i lika’n i akunndan. Sɛ w’a yoman sɔ’n, ɔ cɛman naan ɔ ɲin w’a kpa aniaan wie m’ɔ kwla yo bla kpa annzɛ bian kpa’n i su. Annzɛ kusu ɔ cɛman naan sran nga a nin i bé sán nun’n, w’a yoman ɔ liɛ’n su. I yo, sran nga á jɛ́ i’n, ɔ fata kɛ ɔ yo Klisifuɛ kun mɔ b’a yo i batɛmun’n. (1 Kor. 7:39) Sanngɛ nán batɛmun mɔ b’a yo sran kun’n, yɛ ɔ kle kɛ ɔ kwla yo bla kpa annzɛ bian kpa-ɔ. Ɔ maan, a kwla usa ɔ wun kɛ: ‘?Ninnge benin mun yɛ n sunnzun kɛ ń yó be-ɔ? ?Nzuɛn benin yɛ n kunndɛ kɛ ń wún i sran nga ń jɛ́ i’n i lika-ɔ? ?Bla annzɛ bian wafa nga n klo kɛ ń jɛ́ i’n, ɔ kle kɛ min like yolɛ yo ya?’

4. ?Ndɛ benin yɛ aniaan wie mɔ be kunndɛ kɛ bé já bla annzɛ bian’n, be fa wlɛli i srɛlɛ’n nun-ɔn?

⁴ Sɛ a kunndɛ kɛ á já bla annzɛ bian’n, e lafi su kɛ a fa wlɛli i srɛlɛ’n nun. (Fip. 4:6) I yo, Zoova w’a seman kɛ ɔ́ mán e bla annzɛ bian. Sanngɛ e ndɛ lo Zoova. Ɔ maan sɛ a su kunndɛ aniaan bla annzɛ aniaan bian kun naan a nin i bé sán nun’n, ɔ kwla uka wɔ. I sɔ’n ti’n, kan ɔ klun ndɛ kle i titi. (Jue. 62:8) Srɛ Zoova kɛ ɔ man ɔ ngwlɛlɛ, yɛ ɔ yo maan a tra ɔ awlɛn. (Zak. 1:5) Be flɛ aniaan bian kun kɛ Jɔnun,b ɔ tran Etazinin lɔ. Ndɛ nga kɛ ɔ́ srɛ́ Zoova’n ɔ kan’n, ɔ boli su. Ɔ seli kɛ: “Nzuɛn nga n kunndɛ kɛ ń wún i bla nga ń jɛ́ i’n i lika’n, n bo su n kle Zoova. N srɛ i kɛ ɔ yo naan e nin i sɔ bla liɛ’n e yia nun. Asa ekun’n, n se Zoova kɛ ɔ uka min naan n fa nzuɛn nga be kwla uka min naan m’an yo bian kpa’n.” Be flɛ aniaan bla kun kɛ Taya. Ɔ tran Srilanka. Ɔ seli kɛ: “Kɛ ń kúnndɛ aniaan kun mɔ e nin i e kwla san nun’n, n srɛ Zoova kɛ ɔ uka min naan n nanti seiin, naan min klun jɔ titi.” Kannzɛ bɔbɔ dɔ nga su’n, a ɲanman aniaan kun naan a nin i b’a san nun’n, Zoova tali nda kɛ ɔ́ nían ɔ lika. Yɛle kɛ ɔ́ yó maan á ɲán like nga ɔ sa miɛn i wun’n. Yɛ ɔ́ klé wɔ kɛ ɔ klo wɔ.—Jue. 55:22.

5. ?Ngue yɛ ɔ kwla uka aniaan kun m’ɔ nin-a jaman bla annzɛ bian’n naan ɔ nin aniaan kun m’ɔ klo Zoova’n, b’a yia nun-ɔn? (1 Korɛntifuɛ Mun 15:58) (An nian foto’n wie.)

⁵ Biblu’n wla e fanngan kɛ e “di e Min’n i junman’n i kpa titi.” (An kanngan 1 Korɛntifuɛ Mun 15:58 nun.) Sɛ a tu ɔ klun di Zoova i junman’n, yɛ sɛ a nin aniaan fanunfanun be yo ninnge wie mun likawlɛ’n, á dí aklunjɔɛ. Asa’n, á kwlá wún aniaan wie mɔ be nin-a jaman bla annzɛ bian kɛ wɔ sa’n, mɔ Zoova i sulɛ’n ti be cinnjin kpa’n. Sɛ a mian ɔ ɲin yo ninnge nga be jɔ Zoova i klun’n, á kwlá dí aklunjɔɛ’n i kpafuɛ’n.

6. ?Sɛ Klisifuɛ kun kunndɛ kɛ ɔ́ já bla annzɛ bian’n, ngue yɛ ɔ fataman kɛ i wla fi su-ɔ?

⁶ Sanngɛ nán maan bla annzɛ bian mɔ a kunndɛ kɛ á já’n, ɔ yo ɔ cinnjin tra like kwlaa. (Fip. 1:10) Sɛ sran kun le bla annzɛ bian annzɛ ɔ leman wie’n, nɛ́n i sɔ’n yɛ ɔ́ mɛ́n i aklunjɔɛ’n i kpafuɛ’n niɔn. Wafa nga sran kun nin Zoova be afiɛn fa mantan’n, yɛ ɔ man aklunjɔɛ’n i kpafuɛ’n niɔn. (Mat. 5:3) Blɛ mɔ a leman bla annzɛ bian’n, a kwla ɲan blɛ kpanngban bo jasin fɛ’n. (1 Kor. 7:​32, 33) Ɔ maan, nán saci blɛ sɔ’n. Be flɛ aniaan bla kun kɛ Jesika. Ɔ tran Etazinin lɔ. Kɛ ɔ́ já bian’n, nn ɔ su wa ɲan afuɛ 40. Ɔ seli kɛ: “N tuli min klun n boli jasin fɛ’n. I sɔ’n yoli maan kannzɛ n kunndɛli kɛ ń já bian’n, sanngɛ n dili aklunjɔɛ titi.”

FA BLƐ KAN NIAN SRAN’N I AYELIƐ’N

7. ?Ngue ti yɛ kwlaa naan w’a se sran kun kɛ a nin i bé sán nun’n, ɔ fata kɛ a fa blɛ kan niɛn i ayeliɛ’n niɔn? (Ɲanndra Mun 13:16)

⁷ ?Yɛ sɛ a wunnin sran kun, naan ɔ yo wɔ kɛ sran sɔ’n ɔ kwla yo bla kpa annzɛ bian kpa’n nin? ?Ɔ fata kɛ a ka lɛ ko se sran’n kɛ a kunndɛ kɛ a nin i bé sán nun? Biblu’n se kɛ sran ng’ɔ ti ngwlɛlɛfuɛ’n, ɔ dun mmua si sa kun nun kpa ka naan w’a fa ajalɛ. (An kanngan Ɲanndra Mun 13:16 nun.) I sɔ’n ti’n, kwlaa naan w’a se i kɛ a kunndɛ kɛ a nin i bé sán nun’n, sɛ a fa blɛ kan niɛn i ayeliɛ’n ɔ ti kpa. Sanngɛ nán maan ɔ sie i nzɔliɛ. Be flɛ aniaan bian kun kɛ Asunin, ɔ tran Peiba. Ɔ seli kɛ: “A kwla klo sran kun andɛ, kpɛkun ainman’n klolɛ sɔ’n w’a wie. Ɔ maan, sɛ a fa blɛ kan nian sran’n i ayeliɛ’n, a su kpliman seman sran kun kɛ a nin i bé sán nun, naan i sin’n w’a yo ɔ nsisɔ.” Asa’n sɛ a fa blɛ nian sran’n i ayeliɛ’n, a kwla sie i nzɔliɛ kɛ ɔ timan ɔ liɛ’n su.

8. ?Wafa sɛ yɛ aniaan kun m’ɔ nin-a jaman bla annzɛ bian’n, ɔ kwla nian aniaan wie m’ɔ kunndɛ kɛ ɔ nin i bé sán nun’n, i ayeliɛ’n niɔn? (An nian foto’n wie.)

⁸ ?Wafa sɛ yɛ a kwla nian sran kun i ayeliɛ’n naan w’a siemɛn i nzɔliɛ-ɔ? Kɛ a tran aɲia’m be bo’n, annzɛ kɛ a nin aniaan’m bé yó ninnge wie mun likawlɛ’n, a kwla fa ɔ ɲin sie i wafa nga sran sɔ’n su Zoova’n, ɔ nin i ayeliɛ’n be su. A kwla usa ɔ wun kɛ: ‘?Wan mun yɛ be ti i janvuɛ-ɔ? ?Yɛ ndɛ benin yɛ ɔ tɛ i kan-ɔn? (Lik. 6:45) ?Ninnge ng’ɔ sunnzun kɛ ɔ́ yó be’n, be nin min liɛ’m be kɔ likawlɛ?’ A kwla usa asɔnun kpɛnngbɛn mun, annzɛ aniaan uflɛ wie mɔ b’a tin Ɲanmiɛn sulɛ’n nun mɔ be si i kpa’n, be ngwlɛlɛ afɛ. (Ɲan. 20:18) A kwla usa be sa naan be kan aniaan sɔ’n i ndɛ kle wɔ. Sɛ i nzuɛn’n ti kpa naan be bo i dunman kpa-o. (Rit. 2:11) Kɛ á yó sɔ’n, kle kɛ a bu i sran. Nán se kɛ á sú i su lika kwlaa ng’ɔ́ kɔ́’n, annzɛ á sí i su ndɛ’n kwlaa.

9. ?Kwlaa naan w’a ko wun aniaan kun wun naan w’a se i kɛ a kunndɛ kɛ a nin i bé sán nun’n, ngue yɛ ɔ fata kɛ a wun i wlɛ-ɔ?

⁹ ?Lemɔcuɛ nɲɛ annzɛ anglo nɲɛ yɛ ɔ fata kɛ a nian sran kun i ayeliɛ’n kwlaa naan w’a se i kɛ a kunndɛ kɛ a nin i bé sán nun-ɔn? Sɛ a ko wun i wun ndɛndɛ’n, ɔ kwla bu i kɛ a ti sran m’ɔ fa ajalɛ kplukplu su-ɔ. (Ɲan. 29:20) Sanngɛ kusu, sɛ sran’n w’a dun mmua w’a sie i nzɔliɛ kɛ a kunndɛ kɛ a nin i bé sán nun naan a minndɛ dan’n, ɔ kwla bu i kɛ a ti sran m’ɔ cuɛncuɛn i ja ase naan w’a fa ajalɛ-ɔ. (Aku. 11:4) Nán se kɛ á wún i wlɛ kpa kɛ sran sɔ’n yɛ á jɛ́ i-ɔ, kwlaa naan w’a ko wun i wun. Sanngɛ kusu’n, kwlaa naan w’a ko wun aniaan kun wun kɛ a nin i bé sán nun’n, ɔ fata kɛ ɔ bɔbɔ a yo sran mɔ w’a ju bla annzɛ bian jalɛ-ɔ. Yɛ ɔ fata kɛ a lafi su kpa kɛ sran sɔ’n ti ɔ liɛ’n su, naan ɔ kwla yo bla kpa annzɛ bian kpa.

10. ?Sɛ a sie i nzɔliɛ kɛ aniaan wie kunndɛ kɛ ɔ nin wɔ bé sán nun naan a klomɛn i wie’n, ngue yɛ ɔ fata kɛ a yo-ɔ?

¹⁰ ?Yɛ sɛ a sie i nzɔliɛ kɛ aniaan wie kunndɛ kɛ ɔ nin wɔ bé sán nun’n nin? ?Ngue yɛ ɔ fata kɛ a yo-ɔ? Sɛ a klomɛn i’n, kle i sɔ ɔ ayeliɛ’n nun. Afin sɛ a klomɛn i naan a yo kɛ ɔ kusu a kunndɛ kɛ a nin i bé sán nun wie sa’n, i sɔ’n timan kpa.—1 Kor. 10:24; Efɛ. 4:25.

11. ?Sɛ be se ɔ kɛ a kunndɛ sran kun m’ɔ nin ɔ osufuɛ annzɛ ɔ janvuɛ kun be kwla san nun’n, ngue yɛ ɔ fata kɛ ɔ tran ɔ klun-ɔn?

¹¹ Lika wie’m be nun’n, siɛ nin niɛn mun annzɛ sran kaklaka uflɛ yɛ be kunndɛ bla annzɛ bian be man be osufuɛ mun-ɔn. Lika uflɛ wie’m be nun’n, sran kun i osufuɛ mun annzɛ i janvuɛ mun yɛ be kunndɛ bla annzɛ bian be mɛn i-ɔ. Yɛ kɛ be ko wun sran kun mɔ be klo i sa’n, be fa ajalɛ wie mun naan be nɲɔn’n b’a kwla yia naan b’a nian sɛ be kwla san nun-o. I lɛ nun’n, sɛ be se ɔ kɛ a kunndɛ bian annzɛ bla man sran kun’n, kɛ á yó sɔ’n, nán like nga ɔ osufuɛ’n annzɛ ɔ janvuɛ’n ɔ klo i’n annzɛ ɔ ti i cinnjin’n, i ngunmin i akunndan yɛ ɔ fata kɛ a bu-ɔ. Sanngɛ bu like ng’ɔ kwla yo bla’n annzɛ yasua nga á wá fá ɔ ɲin á síe i su’n i ye’n, i akunndan wie. Kɛ a ko wun sran kun mɔ a bu i kɛ ɔ kwla yo bla kpa annzɛ bian kpa mɛn i’n, ɔ fata kɛ a si i kpa. Yɛle kɛ a si sran sɔ’n i nzuɛn’n, yɛ a nian sɛ ɔ su Zoova kpa-o. Sɛ sran kun nin Zoova be afiɛn mantan kpa’n, ɔ flunman tra kɛ ɔ le sika annzɛ ɔ dili suklu dan annzɛ ɔ le ɲrun’n. Sanngɛ nán ɔ wla fi su kɛ, sɛ bé já sakpa annzɛ be su yoman sɔ’n, aniaan sɔ’m be bɔbɔ yɛ ɔ fata kɛ be fɛ i sɔ ajalɛ’n niɔn.—Gal. 6:5.

WAFA NGA A KWLA BO I BO’N

12. ?Sɛ a klo sran kun naan a kunndɛ kɛ a nin i bé sán nun’n, á yó sɛ naan w’a kan w’a kle i?

¹² ?Sɛ a klo aniaan kun naan a kunndɛ kɛ a nin i bé sán nun’n, á yó sɛ naan w’a kan w’a kle i?c A kwla bo su kle i lika wie mɔ sran’m be ɲin kwla ta amun’n nun, annzɛ a kwla flɛ i telefɔnun nun kan kle i. Kan ɔ klun ndɛ’n i weinwein kle i. (1 Kor. 14:9) Sɛ ɔ nin i fata’n, mɛn i blɛ naan ɔ ko bu i sin ka naan w’a tɛ ɔ su. (Ɲan. 15:28) Yɛ sɛ sran’n se ɔ kɛ ɔ kunndɛman kɛ ɔ nin wɔ bé sán nun’n, nán fɛ i sɔ ndɛ’n tintin i wun.

13. ?Sɛ sran kun se ɔ kɛ ɔ klo wɔ naan ɔ kunndɛ kɛ ɔ nin wɔ bé sán nun’n, ngue yɛ a kwla yo-ɔ? (Kolɔsufuɛ Mun 4:6)

¹³ ?Yɛ sɛ sran kun wa se ɔ kɛ ɔ klo wɔ naan ɔ kunndɛ kɛ ɔ nin wɔ bé sán nun’n nin? Kɛ sran kun tú i ja wá kɛ́n i sɔ ndɛ’n klé wɔ’n, ɔ timan pɔpɔ. I sɔ’n ti’n, maan wafa nga á tɛ́ i su’n, ɔ kle kɛ a bu i sran. (An kanngan Kolɔsufuɛ Mun 4:6 nun.) Sɛ a kunndɛ kɛ ɔ man wɔ blɛ naan w’a bu i akunndan’n, kan kle i. Sanngɛ nán cɛ ngboko naan w’a tɛ i su. (Ɲan. 13:12) Sɛ a kunndɛman kɛ a nin i bé sán nun’n, di i nanwlɛ weiin kle i, yɛ kɛn i amanniɛn su. Be flɛ aniaan bian kun kɛ Ansi, ɔ tran Ɔstrali. Kɛ aniaan bla kun wa seli i kɛ ɔ klo i naan ɔ kunndɛ kɛ ɔ nin i bé sán nun’n, wafa ng’ɔ tɛli i su’n, ɔ kɛnnin i ndɛ. Ɔ seli kɛ: “N tɛli i su amanniɛn su. Sanngɛ n dili i nanwlɛ weiin n kleli i. M’an sisiman min bo naan m’an tɛ i su, kɛ ɔ ko yo naan w’a fɛmɛn i wla w’a guaman min su ngbɛn’n ti. I sɔ’n ti’n kɛ ɔ yoli sɔ’n, m’an yoman like wie m’ɔ maan ɔ́ bú i kɛ m’an kaci akunndan’n.” Sanngɛ sɛ a kunndɛ wie kɛ a nin i bé sán nun’n, kan kle i. I sin’n, ajalɛ nga amún fá naan amun a kwla nian amun wiengu nzuɛn’n, amun koko su yalɛ. Atrɛkpa’n, wafa nga be tali amun’n ti’n, yɛ sa uflɛ wie mun ekun be ti’n, like nga amun sunnzun kɛ amún yó’n, ɔ su yoman kun.

LIKE NGA ANIAAN ONGA’M BE KWLA YO’N

14. ?Wafa sɛ yɛ e kwla wla aniaan nga be leman bla annzɛ bian’n be fanngan-ɔn?

¹⁴ ?Wafa sɛ yɛ e tinuntinun e kwla uka aniaan nga be kunndɛ kɛ bé já bla annzɛ bian’n niɔn? I kun yɛle kɛ maan e nian ndɛ nga e kan’n su. (Efɛ. 4:29) Maan e tinuntinun e usa e wun kɛ: ‘?Kɛ n wun be nga be kunndɛ kɛ bé já bla annzɛ bian’n, n fa be n yiyi min ɲin su? ?Kɛ n wun aniaan bian kun nin aniaan bla kun mɔ be su koko yalɛ’n, n ka lɛ n se min wun kɛ klolɛ o be afiɛn?’ (1 Tes. 5:13) Nán maan wafa nga e nin be nga be leman bla annzɛ bian’n e tran’n, ɔ yo be kɛ be nunman sran nun sa. Ansi mɔ e dun mmua e kɛnnin i ndɛ’n, ɔ seli kɛ: “Aniaan bian wie’m be se min kɛ: ‘?Lalaa ngalɛ’n ngue ti yɛ a nin-a jaman bla-ɔ? Nán bakan yɛle wɔ kun.’ Ndɛ kɛ ngalɛ’n sa’m be kwla yo maan aniaan nga be leman bla annzɛ bian’n be su buman be wun sran. Asa ekun’n, i sɔ’n kwla yo maan be kpli be ja bla annzɛ bian.” I sɔ’n ti’n, sa kpa nga be yo’n i su yɛ ɔ fata kɛ e fa e ɲin e sie-ɔ, yɛ e yo be mo.—1 Tes. 5:11.

15. (1) ?Sɛ e waan é úka aniaan kun m’ɔ kunndɛ kɛ ɔ́ já bla annzɛ bian’n, kɛ nga Rɔmunfuɛ Mun 15:2 fa kan’n sa’n, ngue yɛ ɔ fata kɛ e bu i akunndan-ɔn? (An nian foto’n wie.) (2) ?Afɔtuɛ benin yɛ video’n man e-ɔ?

¹⁵ ?Yɛ sɛ e bu i kɛ sɛ aniaan bian kun nin aniaan bla kun be ja’n, ɔ́ yó kpa dan’n nin? Biblu’n se e kɛ maan like nga e wiengu’m be klo i’n, ɔ yo e cinnjin. (An kanngan Rɔmunfuɛ Mun 15:2 nun.) Aniaan kpanngban mɔ be leman bla annzɛ bian’n be kloman kɛ sran uflɛ kunndɛ bla annzɛ bian man be. I lɛ nun’n, maan e kle kɛ e bu be sran. (2 Tes. 3:11) Aniaan wie’m be kwla klo kɛ e uka be. Sanngɛ sɛ b’a kɛnmɛn i sɔ trele b’a kleman e’n, ɔ fataman kɛ e yo sɔ.d (Ɲan. 3:27) Wie’m be liɛ kusu’n, kɛ ajalɛ nga e fa’n ɔ timan trele’n, i sɔ’n yɛ be klo i-ɔ. Be flɛ aniaan bla kun kɛ Lidia, ɔ fin Alemaɲin. Ɔ seli kɛ: “A kwla yia aniaan kpanngban lika kun nun. Kpɛkun yaci i onga’n be sa nun.”

16. ?Ngue yɛ ɔ fataman kɛ aniaan nga be nin-a jaman bla annzɛ bian’n be wla fi su-ɔ?

¹⁶ Sɛ a le bla annzɛ bian-o, annzɛ kusu a leman wie-o, a kwla di aklunjɔɛ. (Jue. 128:1) Ɔ maan, sɛ a kunndɛ kɛ á já bla annzɛ bian naan a nin-a kwlá yoman sɔ’n, maan ɔ ɲin tran Zoova i sulɛ’n su titi. Be flɛ aniaan bla kun kɛ Sinyi, ɔ tran Makao. Ɔ seli kɛ: “Kɛ a bu blɛ nga a nin ɔ yi annzɛ ɔ wun bé wá dí i Mɛn Klanman’n nun lɔ’n i akunndan’n, a wun kɛ blɛ nga a o nun yɛ mɔ a leman bla annzɛ bian’n, ɔ timan like fi. Ɔ maan blɛ mɔ a leman bla annzɛ bian’n, nán saci blɛ sɔ’n.” ?Yɛ sɛ dɔ nga su’n, w’a ɲan aniaan bla kun annzɛ aniaan bian kun naan amun su nian amun wiengu nzuɛn’n nin? ?Ngue yɛ ɔ fata kɛ amun yo-ɔ? Like suanlɛ ng’ɔ́ bá lɛ’n nun’n, é wá tɛ́ kosan sɔ’n su.