AKPASUA 2

Nán amun kpɛ amun wiengu bo waka

“Like nga Ɲanmiɛn kan boli nun’n, nán maan sran fi ti nun.”—Marki 10:9.

Zoova kunndɛ kɛ e yo nanwlɛfuɛ. (Jue Mun 31:23) I sɔ’n ti cinnjin aja’n nun. Afin sɛ amun diman amun wun nanwlɛ’n, amun su lafiman amun wiengu su, yɛ amun su kloman amun wiengu.

Andɛ’n, nanwlɛ su nantilɛ’n timan pɔpɔ aja’n nun. Kɛ ɔ ko yo naan amun aja’n w’a saciman’n, ɔ fata kɛ amun fa ajalɛ cinnjin nɲɔn.

1 MAAN AMUN AJA’N YO AMUN CINNJIN KPA

NDƐ NGA BIBLU’N KAN’N: “Amun wun ninnge nga be ti cinnjin kpa’n be wlɛ.” (Filipufuɛ Mun 1:10) Ɔ fata kɛ amun aja’n yo amun cinnjin kpa liɛ su.

Zoova kunndɛ kɛ amun yi annzɛ amun wun i ndɛ lo amun kpa, naan amun “di aklunjɔɛ” likawlɛ. (Akunndanfuɛ’n 9:9) Ɔ kloman kɛ amun ɲin kpa amun wiengu su. Ɔ klo kɛ amun yo like kwlaa ng’ɔ kwla jɔ amun wiengu kun’n i klun’n. (1 Korɛntifuɛ Mun 10:24) Maan amun yo naan amun yi annzɛ amun wun ɔ wun i wlɛ kɛ i ndɛ lo amun naan amun klo i.

Bian kun su mɛn i yi’n i like kan naan ɔ nɔn. Bian kun w’a ba awlo yɛ ɔ wun kɛ i yi’n su tɔn like.

LIKE NGA AMUN KWLA YO’N:

Amun fa blɛ be yo ninnge mun likawlɛ titi, kpɛkun amun fa amun ɲin sie i amun wiengu su kpa.
Nán amun bu amun ngunmin amun wun akunndan, sanngɛ an bu amun wiengu kun’n i akunndan wie.

Bian kun nin i yi b’a ɔ lika wie be su koko yalɛ.

2 SASA Ɔ AWLƐN’N TRA LIKE KWLAA

NDƐ NGA BIBLU’N KAN’N: “Sran kwlaa ng’ɔ nian bla kun lele ɔ bu i kunndɛlɛ akunndan’n, nn w’a kunndɛ bla sɔ’n i yi bo i awlɛn’n nun lɔ.” (Matie 5:28) Sɛ sran kun bu bla nin bian kunndɛlɛ sukusuku’n i akunndan titi’n, ɔ ti kɛ nn ɔ su fɔn i wiengu kun’n i wun sa.

Zoova waan amun ‘sasa amun awlɛn’n tra like kwlaa.’ (Ɲanndra Mun 4:23; Zeremin 17:9) Sɛ amun waan amún yó sɔ’n, nán amun nian like ng’ɔ nin i fataman’n. (Matie 5:29, 30) Amun nian Zɔbu i ajalɛ’n su. Ɔ nin i ɲinma be trali aenguɛ. Ɔ tali nda kɛ ɔ su kpɛman bla wie kannglɛ naan w’a bu i kunndɛlɛ akunndan. (Zɔbu 31:1) Amun fua kɛ amun su nianman bian nin bla nna nga be fa fite nzra nun’n, naan kusu amun nin bla annzɛ bian uflɛ su traman ndalie.

Bian kun w’a fɛ i yi’n i foto’n w’a fa sie i tabli’n su i junman diwlɛ lɔ.

LIKE NGA AMUN KWLA YO’N:

Maan amun ayeliɛ’n kle kɛ amun le bla annzɛ bian.
Wafa nga amun yi annzɛ amun wun i wun fa yo i’n, maan ɔ yo amun cinnjin. Yɛ sɛ amun nin sran uflɛ be tra janvuɛ naan i ti’n amun wiengu kun’n wunmɛn i wun fɛ’n, amun nin amun janvuɛ sɔ’n be ti nun.