Ɔ ti cinnjin kɛ e srɛ man e wiengu mun

1. ?Ngue ti yɛ e si kɛ srɛlɛ mɔ e srɛ Zoova’n, ɔ ti i cinnjin-ɔn?

SRƐLƐ mɔ e kwla srɛ Ɲanmiɛn’n ɔ ti e cenjele like. Amun bu i akunndan kan be nian: Zoova mannin anzi’m be junman wie mun naan be di. (Jue. 91:11) Asa’n ɔ mɛnnin i Wa’n i junman cinnjin wie mun. (Mat. 28:18) ?Sanngɛ e srɛlɛ’m be tielɛ’n, w’a manman sran fi i atin kɛ ɔ tie be. I ngunmin yɛ ɔ tie be-ɔ. Zoova ‘m’ɔ tie e srɛlɛ’n,’ i bɔbɔ sie i su e nuan bo.—Jue. 65:2.

2. ?Kɛ be se kɛ e srɛ e man e wiengu mun’n, ajalɛ kpa benin yɛ Pɔlu kle e-ɔ?

² Kannzɛ ɔ ti cinnjin kɛ e koko sa nga be o e su’n e kle Zoova’n, sanngɛ ɔ fata kɛ e srɛ man e wiengu mun wie. I sɔ yɛ akoto Pɔlu yoli-ɔ. I wie yɛle kɛ, kɛ ɔ́ klɛ́ Efɛzi lɔ asɔnun’n i nunfuɛ’m be fluwa’n, ɔ seli be kɛ: “Kɛ ń srɛ́ Ɲanmiɛn’n, n bo amun dunman titi.” (Efɛ. 1:16) Pɔlu srɛ mannin i niaan’m be tinuntinun wie. I wie yɛle kɛ ɔ seli Timote kɛ: “Ń lá Ɲanmiɛn i ase. […] Kɛ ń srɛ́ i kɔnguɛ nin wia nun’n, min wla fiman ɔ su.” (2 Tim. 1:3) Sa nga be o Pɔlu su m’ɔ fata kɛ ɔ koko kle Ɲanmiɛn’n, be diman be yalɛ. (2 Kor. 11:23; 12:​7, 8) Ɔ nin i sɔ ngba’n, ɔ srɛ mɛnnin i wiengu mun wie.

3. ?Ngue ti yɛ wie liɛ’n, e wla fi su kɛ ɔ fata kɛ e srɛ man e wiengu mun-ɔn?

³ Ɔ jue wie’n, e wla fi su kɛ ɔ fata kɛ e srɛ man e wiengu mun. ?Ngue ti-ɔ? Aniaan bla kun mɔ be flɛ i Sabrina’n,a ɔ seli kɛ: “E su sa’m be sɔnnin dan. Kɛ mɔ e koko sa nga be o e su’n be ti dan’n ti’n, be ngunmin yɛ e kan be ndɛ e srɛlɛ’m be nun-ɔn.” ?Kɛ ɔ yo wɔ sɔ wie-ɔ? Sɛ ɔ ti sɔ’n, like suanlɛ nga kwla uka ɔ kpa. Ɔ́ klé wɔ like nga ti yɛ ɔ ti cinnjin kɛ a srɛ man ɔ wiengu mun’n, ɔ nin wafa nga a kwla yo sɔ’n.

?NGUE TI YƐ Ɔ TI CINNJIN KƐ E SRƐ MAN E WIENGU MUN-ƆN?

4-5. ?Wafa sɛ yɛ srɛlɛ nga e srɛ man e wiengu mun’n, ɔ ‘le ta, yɛ ɔ yo sa ye-ɔ’? (Zaki 5:16)

⁴ Srɛlɛ nga e srɛ man e wiengu mun’n, ɔ “le ta, yɛ ɔ yo sa ye kpa.” (An kanngan Zaki 5:16 nun.) ?Kɛ e srɛ man e wiengu mun’n, be kwla ɲan su ye sakpa? Ɛɛn-ɛn. Zezi m’ɔ si kɛ akoto Piɛli wá sé kɛ ɔ simɛn i’n, ɔ seli Piɛli kɛ: “N srɛli Ɲanmiɛn tankaan kpa n mannin wɔ naan w’a kpɔnzɔman.” (Lik. 22:32) Pɔlu kusu si kɛ srɛlɛ nga e srɛ man e wiengu mun’n, ɔ yo sa ye. Kɛ be wlɛli i bisua Rɔmun lɔ’n, ɔ klɛli Filemɔn i fluwa. Ɔ seli i kɛ: “Ɲanmiɛn mɔ amun srɛ i be man min’n ti’n, atrɛkpa’n bé yáci min nun naan m’an kwla ko nian amun osu.” (Flm. 22) Be yacili i nun sakpa, kpɛkun ɔ kwla ko boli jasin fɛ’n ekun.

⁵ Kɛ e srɛ Zoova’n, nán kɛ e su miɛn i kɛ ɔ yo like nga e kunndɛ kɛ ɔ yo man e’n niɔn. Sanngɛ Zoova fɛ i ɲin sie i sa nga e koko kle i’n su. Kpɛkun blɛ ng’ɔ ti su’n i nun’n, ɔ tɛ e srɛlɛ’n su. Sɛ e wun i sɔ liɛ’n i wlɛ’n, i sɔ’n kwla uka e naan y’a koko e su sa’n y’a kle Zoova naan kusu y’a lafi su kɛ ɔ́ síesíe sa sɔ’n mán e.—Jue. 37:5; 2 Kor. 1:11.

6. ?Kɛ e srɛ man e wiengu mun’n, nzuɛn benin yɛ i sɔ’n uka e naan y’a yi i nglo-ɔ? (1 Piɛli 3:8)

⁶ Kɛ e srɛ man e wiengu mun’n, i sɔ’n yo maan e ‘si be aunnvɔɛ.’ (An kanngan 1 Piɛli 3:8 nun.) Sran ng’ɔ si aunnvɔɛ’n, ɔ fɛ i ɲin sie i sa ng’ɔ o i wiengu’m be su’n su, kpɛkun ɔ kunndɛ kɛ ɔ́ úka be. (Mar. 1:​40, 41) Asɔnun kpɛnngbɛn kun m’ɔ suan Maikɔlu’n seli kɛ: “Kɛ n koko sa ng’ɔ o min wiengu’m be su’n n kle Ɲanmiɛn’n, n wun be su sa’n i wlɛ kpa. Yɛ i sɔ’n yo maan n klo be kpa n tra laa’n. Kannzɛ be siman sɔ bɔbɔ’n, sanngɛ be ndɛ lo min kpa.” Asɔnun kpɛnngbɛn kun mɔ be flɛ i kɛ Risaa’n, ɔ kannin srɛlɛ sɔ’n i su ye kun ekun i ndɛ. Ɔ seli kɛ: “Kɛ e srɛ man sran kun’n, i sɔ’n su e bo maan e kunndɛ kɛ é yó like wie fá úkɛ i.” Ɔ seli ekun kɛ: “Kɛ e srɛ man sran kun mɔ e yo like wie e fa ti i wun ɲanman nun’n, ɔ ti kɛ e su uka Ɲanmiɛn naan ɔ tɛ e srɛlɛ sɔ’n su sa.”

7. ?Wafa sɛ yɛ srɛlɛ mɔ e srɛ man e wiengu mun’n, ɔ uka e naan y’a kokoman e su sa liɛ’m be ti dan-ɔn? (Filipufuɛ Mun 2:​3, 4) (An nian foto mun wie.)

⁷ Kɛ e srɛ man e wiengu mun’n, e kokoman e su sa liɛ’m be ti dan. (An kanngan Filipufuɛ Mun 2:​3, 4 nun.) Sa o e kwlaa e su, afin Satan yɛ ɔ sie mɛn nga-ɔ. (1 Zan 5:19; Ngl. 12:12) Kɛ e srɛ man e wiengu mun titi’n, e wla kpɛn su kɛ ‘ɲrɛnnɛn kunngba ng’ɔ o e su’n, ɔ o e niaan’m be kwlaa be su wie.’ (1 Piɛ. 5:9) Atin bofuɛ kun mɔ be flɛ i kɛ Katerinin’n, ɔ seli kɛ: “Kɛ n srɛ man min wiengu mun’n, i sɔ’n yo maan min wla kpɛn su kɛ sa o be su wie. Kɛ ɔ yo sɔ’n, n kokoman min su sa liɛ’m be ti dan.”

BE MIAN E SRƐLƐ’N WUN

8. ?Wan mun yɛ e kwla srɛ man be-ɔ?

⁸ ?Wan mun yɛ e kwla srɛ e man be-ɔ? E kwla srɛ man sran akpasua wie mun. Be wie yɛle tukpacifuɛ mun, nin gbanflɛn nin talua nga be yo be finfin’n nin nga be wiengu suklu ba’m be kle be yalɛ’n, ɔ nin be nga b’a yo oke’n. E niaan wie’m be liɛ’n, awa annzɛ be osufuɛ’m be kle be yalɛ. (Mat. 10:​18, 36; Yol. 12:5) E niaan wie’m be tuli be awlo’n nun be ɔli lika uflɛ, alɛ’n ti. Wie mun ekun be liɛ’n, sanvuɛsa’m be ti’n, be o ɲrɛnnɛn’n nun. Atrɛkpa’n e siman e niaan sɔ mun. Sanngɛ kɛ e srɛ man be’n, e kle kɛ e di mmla nga Zezi mannin e’n su. Ɔ seli kɛ: “Amun klo amun wiengu.”—Zan 13:34.

9. ?Ngue ti yɛ ɔ fata kɛ e srɛ man e niaan nga be dun e ɲrun mmua anuannzɛ’n nun’n nin be yi mun-ɔn?

⁹ E kwla srɛ man e niaan nga be dun e ɲrun mmua anuannzɛ’n nun’n be wie. Be wie yɛle Anuannzɛ’n i Ɲrun Dinfuɛ mun nin be ukafuɛ mun, nin Betɛli komite’n i nunfuɛ mun, nin aniaan nga be nian junman’m be su Betɛli’m be nun’n, nin akpasua sunianfuɛ mun, nin asɔnun kpɛnngbɛn mun, ɔ nin asɔnunfuɛ’m be ukafuɛ mun. Sa wie’m be ti’n, aniaan sɔ’m be nun sunman be koko. Ɔ nin i sɔ ngba’n, be tu be klun be uka e. (2 Kor. 12:15) Akpasua sunianfuɛ kun mɔ be flɛ i kɛ Marki’n, ɔ seli kɛ: “Sa kun m’ɔ ti kekle kpa man min’n, yɛle kɛ min si nin min nin mɔ b’a yo oke’n, be nunman min wun koko. Asa’n be ti tukpacifuɛ. Min niaan bla nin i wun be nian be lika. Sanngɛ kɛ mɔ n kwlá ukaman be kɛ nga n fa klo’n sa’n ti’n, n koko.” Sɛ e si sa ng’ɔ o aniaan sɔ mɔ be di junman kekle’n be su-o, annzɛ e siman nun-o, sanngɛ maan e srɛ Ɲanmiɛn e man be. (1 Tes. 5:​12, 13) E kwla srɛ man be yi mun wie. Afin be yi’m be suan be bo ti yɛ be kwla di be junman mun-ɔn.

10-11. ?Srɛlɛ nga e srɛ man e niaan’m be kwlaa’n, Zoova i klun jɔ su? An yiyi nun.

¹⁰ Kɛ nga e fa wunnin i’n sa’n, e srɛ man sran akpasua wie mun. I wie yɛle kɛ, kannzɛ bɔbɔ e buman sran trele kun i akunndan’n, sanngɛ e kwla srɛ Zoova kɛ ɔ suan e niaan nga be o bisua’n be bo, annzɛ ɔ fɔnvɔ e niaan nga be sran wuli’n. Asɔnun kpɛnngbɛn kun mɔ be flɛ i Donali’n, ɔ seli kɛ: “Sa kekle’m be o aniaan kpanngban be su. Ɔ maan wie liɛ’n kɛ é srɛ́’n, e boman sa trele kun su, kɛ ɔ ko yo naan ndɛ nga e kɛn i srɛlɛ’n nun’n w’a yo be kwlaa nga afɛ o be su’n be liɛ’n ti.”

¹¹ ?Zoova i klun jɔ srɛlɛ kɛ ngalɛ’n sa’m be su? Ɛɛn-ɛn, i klun jɔ su. E siman like trele nga e niaan’m be sa miɛn i wun’n. Ɔ maan sɛ ndɛ nga e kɛn i srɛlɛ’n nun’n, ɔ ti i bla-o i yasua-o, be kwlaa be liɛ’n, ɔ ti kpa. (Zan 17:20; Efɛ. 6:18) Srɛlɛ kɛ ngalɛ’n sa’m be kle weiin kɛ ‘e klo aniaan’m be kwlaa.’—1 Piɛ. 2:17.

SƐ E WAAN É SRƐ́ MÁN SRAN TRELE KUN’N

12. ?Sɛ e fa e ɲin e sie i ninnge wie’m be su’n, wafa sɛ yɛ i sɔ’n úka e naan y’a srɛ y’a man aniaan trele kun-ɔn?

¹² Maan e fa e ɲin sie i ninnge wie’m be su. Ɔ ti cinnjin kɛ e srɛ man e niaan’m be tinuntinun wie. Kɛ é yó sɔ’n, maan e bo be dunman. Atrɛkpa’n tukpacɛ wie kle aniaan kun m’ɔ o e asɔnun’n nun’n i yalɛ w’a cɛ kpa. Atrɛkpa kusu’n aniaan kun m’ɔ kɔ suklu’n i sa sin w’a bubu i, afin i wiengu’m be kle i yalɛ. Annzɛ kusu kɛ ɔ yo naan siɛ annzɛ niɛn kun ‘nian Zoova i mmla’n nin i afɔtuɛ’m be su tɛ’ i wa kun’n, ɔ timan pɔpɔ mɛnmɛn i. (Efɛ. 6:4) Sɛ e fa e ɲin e sie i aniaan’m be su kpa’n, é sí be aunnvɔɛ. Ɔ maan é kúnndɛ kpa kɛ é srɛ́ Ɲanmiɛn mán be.b—Rɔm. 12:15.

13. ?É yó sɛ naan y’a srɛ y’a man aniaan nga e siman be’n?

¹³ Maan e bo be dunman. Be nga e siman be bɔbɔ’n, kɛ é srɛ́’n e kwla bo be dunman. I wie yɛle aniaan nga be wlali be bisua Krime, nin Eritre, nin Risi ɔ nin Sɛngapuu’n. Sɛ e kɔ jw.org su’n, é wún aniaan nga be o bisua’n be dunman mun.c Akpasua sunianfuɛ kun mɔ be flɛ i kɛ Brayanin’n, ɔ seli kɛ: “Kɛ n klɛ aniaan kun m’ɔ o bisua’n i dunman’n, mɔ n man min nɛn’n su n bo dunman sɔ’n, kɛ ń srɛ́’n, min wla kpɛn i su. Kpɛkun n bo i dunman.”

14-15. ?É yó sɛ naan y’a srɛ y’a man aniaan trele kun?

¹⁴ Maan e srɛ ninnge trele wie’m be ti. Aniaan bian Maikɔlu mɔ e kɛnnin i ndɛ’n, ɔ seli kɛ: “Kɛ ń kánngan aniaan nga be o bisua’n be su ndɛ’n nun jw.org su’n, n bu wafa nga sɛ min yɛ sa sɔ’n o min su’n, min wun yó min’n i akunndan. N si kɛ ń kókó min yi ti. Yɛ ń kúnndɛ kɛ ɔ ɲan ninnge nga i sa mian be wun’n. I sɔ’n uka min naan kɛ ń srɛ́ mán e niaan nga be le bla mɔ be o bisua’n, m’an kan ninnge trele wie’m be ndɛ.”—Ebr. 13:​3, jnd.

¹⁵ Sɛ e bu afɛ ng’ɔ o e niaan nga be o bisua’n be su’n i akunndan’n, i sɔ’n kwla uka e naan y’a wun ndɛ trele wie mun ekun mɔ é kán be e srɛlɛ’n nun’n. I wie yɛle kɛ e kwla srɛ kɛ maan bisua sunianfuɛ’m be si be aunnvɔɛ, annzɛ maan be nga be le kwlalɛ’n be man be atin naan be su Ɲanmiɛn. (1 Tim. 2:​1, 2) E kwla srɛ kɛ maan e niaan sɔ mɔ be nin Ɲanmiɛn be nanti klanman’n, be ajalɛ’n wla aniaan nga be o be asa’n su lɔ’n be fanngan. Yɛ e kwla srɛ naan be nga be suman Zoova’n, be fa be ɲin sie i be nzuɛn kpa’n su naan i sɔ’n su be bo naan be sie be su be tie jasin fɛ’n. (1 Piɛ. 2:12) Kɛ é srɛ́ mán aniaan nga sa uflɛ o be su’n, e kwla nian ajalɛ kunngba sɔ’n su. Sɛ e fa e ɲin e sie i sa ng’ɔ o e niaan’m be su’n su’n, naan e srɛlɛ’n nun’n e bo be dunman’n yɛ e kan ninnge trele wie’m be ndɛ’n, é klé kɛ e ‘klo e wiengu kpa.’—1 Tes. 3:12.

LIKE NG’Ɔ FATAMAN KƐ E ƝIN KPA SU’N

16. ?Ngue yɛ ɔ fata kɛ e wun i wlɛ? (Matie 6:8)

¹⁶ Kɛ nga e fa wunnin i’n sa’n, e srɛlɛ’n kwla yo sran wie ye. Sanngɛ maan e wun i wlɛ kɛ, kɛ é srɛ́ Zoova’n, nán kɛ e su kan sa wie m’ɔ simɛn i’n i ndɛ kle i-ɔ. Yɛ ɔ minndɛman kɛ e kle i ajalɛ naan w’a kwla siesie sa kun. Zoova si like nga i sufuɛ kun i sa miɛn i wun’n, kwlaa naan i sufuɛ sɔ’n annzɛ e bɔbɔ y’a si nun. (An kanngan Matie 6:8 nun.) ?Yɛ nn ngue ti yɛ ɔ fata kɛ e srɛ man e wiengu mun-ɔn? E dun mmua kannin sa nga ti yɛ ɔ fata kɛ e yo sɔ’n, be nun wie’m be ndɛ. Sanngɛ sa kun ekun mɔ i ti yɛ e yo sɔ’n, yɛle kɛ, kɛ e srɛ man e wiengu mun’n e kle kɛ be ndɛ lo e dan. Ɔ maan klolɛ mɔ e klo e wiengu’n, i ti yɛ e yo sɔ-ɔ. Kɛ Zoova kusu wun kɛ i sufuɛ’m be yi klolɛ’n i nglo kɛ i sa’n, i sɔ’n yo i fɛ.

17-18. Sa nga ti yɛ ɔ fata kɛ e srɛ man e niaan mun’n, an fa sa kun yiyi nun.

¹⁷ Kannzɛ e srɛ mannin aniaan kun naan i su sa’n w’a kaciman’n, nán e bu i kɛ e srɛli ngbɛn. Afin kɛ e srɛ man e niaan mun’n e kle kɛ e klo be. I sɔ’n kusu ti Zoova i cinnjin kpa. Maan e fa sa kun e yiyi nun. Maan e se kɛ siɛ kun le ba kanngan nɲɔn, yasua kun nin bla kun. Yasua’n w’a tɔ tukpacɛ. Yɛ ba bla’n se be baba kɛ: “Baba, nian, min niaan bian i wunnɛn’n yo i ya dan! Yaci, ukɛ i.” Siɛ’n w’a dun mmua w’a fa ajalɛ wie mun naan i wa’n w’a yo juejue. Afin ɔ klo i yɛ ɔ niɛn i lika kpa. Sanngɛ kɛ siɛ’n wun kɛ i wa bla kan’n su kpɛtɛ i naan ɔ niɛn i niaan bian’n i lika’n, i sɔ’n yó i fɛ dan. Afin i wa bla’n kle kɛ i niaan bian’n i ndɛ lo i.

¹⁸ I sɔ yɛ Zoova wla e fanngan kɛ e yo-ɔ. Yɛle kɛ e nian e wiengu lika yɛ e srɛ man e wiengu. Kɛ e srɛ man e niaan mun’n, e kle kɛ e buman e ngunmin e wun akunndan, naan e niaan’m be ndɛ lo e dan. Zoova kusu fɛ i ɲin sie i sɔ liɛ’n su kpa. (2 Tes. 1:3; Ebr. 6:10) Asa’n, kɛ nga e fa wunnin i’n sa’n, wie liɛ’n e srɛlɛ’n yo aniaan’m be ye. I sɔ’n ti’n, maan e tu e klun e srɛ man e wiengu mun titi.