Á yó sɛ naan w’a tu ɔ klun w’a srɛ Ɲanmiɛn kpa

1-2. (1) ?Ngue ti yɛ wie liɛ’n, kɛ ɔ yo naan e kan e klun ndɛ e kle Zoova’n, ɔ ti kekle-ɔ? (2) ?Ngue ti yɛ e si kɛ Zoova sie i su tie e srɛlɛ mun-ɔn?

?Ɔ JU wie’n, ɔ yo ɔ kɛ ndɛ kunngba’n yɛ a kan be ɔ srɛlɛ’m be nun sa titi-ɔ? ?Annzɛ kusu ɔ srɛlɛ’m be bo’n timan kploun? Sɛ ɔ ti sɔ’n, nán bu i kɛ ɔ ngunmin yɛ ɔ yo wɔ sɔ-ɔ. Kɛ mɔ e kwlakwla e ɲanman e ti’n ti’n, wie liɛ’n, kɛ é srɛ́’n e cɛman. Wie liɛ kusu’n, kɛ ɔ yo naan e kan e klun ndɛ e kle Zoova’n, ɔ ti kekle. Afin e bu i kɛ e nin i srɛlɛ fataman.

² Biblu’n kle kɛ, kɛ é srɛ́ Zoova’n, nán ndɛ mɔ e si i kan’n yɛ ɔ ti i cinnjin-ɔn. Sanngɛ Zoova kunndɛ kɛ, kɛ é srɛ́ i’n, e yo wun ase kanfuɛ yɛ maan ndɛ nga é kán’n ɔ fin e awlɛn’n nun. Biblu’n se kɛ ɔ tie “wɛtɛɛfuɛ’m be srɛlɛ’n.” (Jue. 10:17) Zoova sie i su tie ndɛ kwlaa nga e kan kle i’n, afin e ndɛ lo i dan.—Jue. 139:​1-3.

3. ?Kosan benin mun yɛ é wá tɛ́ be su like suanlɛ nga nun-ɔn?

³ E kwla usa e wun kɛ: ?Ngue ti yɛ kɛ é srɛ́ Zoova’n ɔ fataman kɛ e klun titi e-ɔ? ?É yó sɛ naan y’a tu e klun y’a srɛ Zoova? ?Sɛ e bu sran wie’m be srɛlɛ nga be o Biblu’n nun’n be su akunndan’n, wafa sɛ yɛ i sɔ’n kwla uka e-ɔ? ?Sɛ e wunman ndɛ trele nga é kán klé Zoova srɛlɛ’n nun’n, ngue yɛ e kwla yo-ɔ? Maan e tɛ kosan sɔ’m be su.

KƐ Á SRƐ́ ZOOVA’N Ɔ FATAMAN KƐ Ɔ KLUN TITI WƆ

4. ?Ngue yɛ sɛ e wun i wlɛ’n, i sɔ’n úka e naan y’a kan e klun ndɛ y’a kle Zoova-ɔ? (Jue Mun 119:145)

⁴ Sɛ e wun i wlɛ kɛ Zoova ti e janvuɛ kpa kun m’ɔ kunndɛ kɛ e liɛ yo ye’n, i sɔ’n úka e naan y’a kan e klun ndɛ y’a kle i. Yɛ kɛ é yó sɔ’n e klun su titiman e. I wie yɛle Ɲanmiɛn i sufuɛ ng’ɔ klɛli Jue Mun 119 i liɛ’n. Sa wie’m be tɔli i su. Yɛ sran wie’m be buɛli i su ato. (Jue. 119:​23, 69, 78) Asa’n i bɔbɔ i fɔnlɛ’m be ti’n, ɔ ju wie’n i sa sin bubuli i. (Jue. 119:5) Ɔ nin i sɔ ngba’n, kɛ ɔ́ kɛ́n i klun ndɛ klé Zoova’n i klun titimɛn i.—An kanngan Jue Mun 119:145 nun.

5. ?Sɛ e akunndan’n bu e fɔ’n, ngue ti yɛ ɔ fataman kɛ e yaci Zoova srɛlɛ-ɔ? An fa sunnzun ase kun yiyi nun.

⁵ Zoova klo kɛ be nga be yo sa tɛ dan bɔbɔ’n be srɛ i. (Eza. 55:​6, 7) I sɔ’n ti’n, nán maan e akunndan m’ɔ bu e fɔ’n ti’n, e se kɛ é yáci Zoova srɛlɛ. Wienun-ɔn, sran kun w’a mlin bo kun nun, yɛ ɔ wunmɛn i sin atin’n kun. Like ng’ɔ fata kɛ ɔ yo’n, yɛle kɛ ɔ kpan naan sɛ sran wie ti i ngan’n w’a kwla ukɛ i. ?Ɔ́ sé kɛ ɲannzuɛn kun i ti’n, annzɛ kusu ɔ fali ajalɛ tɛ ti’n, ɔ su kpanman naan sran wie w’a ti i wun ɲanman nun? Ɔ su yoman sɔ. I wafa kunngba’n, sɛ e yo sa tɛ’n annzɛ sɛ sa wie ti’n e akunndan sanngan’n, ɔ fata kɛ e srɛ Zoova naan ɔ uka e.—Jue. 119:​25, 176.

?Á YÓ SƐ NAAN W’A TU WƆ KLUN W’A SRƐ ZOOVA?

6-7. ?Ngue yɛ ɔ kwla uka e naan y’a kan e klun ndɛ weinwein y’a kle Zoova-ɔ? An fa sa kun yiyi nun. (An nian ja ngua lɔ ndɛ’n wie.)

⁶ Kɛ é srɛ́ Zoova mɔ e kan wafa nga e wun yo e’n, ɔ nin akunndan nga e bu’n be ndɛ kle i’n, i sɔ’n yo maan e nin e afiɛn mantan. ?Ngue yɛ ɔ kwla uka wɔ naan w’a kwla yo sɔ-ɔ?

⁷ Bu Zoova i nzuɛn’m be su akunndan.a Sɛ a bu Zoova i nzuɛn’m be su akunndan kpa’n, i sɔ’n úka ɔ naan w’a kan ɔ klun ndɛ weinwein w’a kle i. (Jue. 145:​8, 9, 18) I wie yɛle aniaan bla kun mɔ be flɛ i Klisitinin mɔ i si yoli i kpokokpoko’n i liɛ’n. Ɔ seli kɛ: “Kɛ ɔ yo naan n kan ndɛ n kle Zoova, kɛ ba kun su kan ndɛ kle i si sa’n, w’a yoman pɔpɔ w’a manman min. Asa’n ɔ yo min kɛ min fɔnlɛ’m be ti’n, Zoova kwlá kloman min.” ?Ngue yɛ ɔ ukɛli i-ɔ? Ɔ seli kɛ: “N buli Zoova i sran klolɛ dan’n i su akunndan kpa. Kɛ ɔ yoli sɔ’n, min wla guali ase. Afin n wunnin i wlɛ kɛ Zoova klo min. N si kɛ ɔ́ úka min titi. Sɛ n fɔn bɔbɔ’n, ɔ su yaciman min klolɛ yɛ ɔ́ súan min bo. I sɔ’n ti’n, sa nga be yo min fɛ dan’n, ɔ nin sa nga be bo min wla dan’n n sisiman min bo naan m’an kan be ndɛ m’an kle i.”

8-9. ?Kɛ e dun mmua bu ndɛ nga e waan é kán’n i sin ka naan y’a srɛ’n, i su ye benin yɛ e ɲɛn i-ɔ? An fa sa kun yiyi nun.

⁸ Bu ndɛ nga á wá kán’n i sin. Kwlaa naan w’a srɛ’n, a kwla usa ɔ wun kɛ: ‘?Sa kekle benin mun yɛ be o min su dɔ nga su-ɔ? ?Be yoli min sa wie m’ɔ fata kɛ n yaci cɛ-ɔ? ?Kɛ é sé yɛ’n, ɔ fata kɛ Zoova uka min sa wie mɔ w’a tɔ min su’n nun?’ (2 Fam. 19:​15-19) Asa ekun’n, e kwla bu wafa nga e kwla nian ajalɛ nga Zezi kleli e’n su’n i akunndan. Yɛle kɛ e kwla bu wafa nga e kwla fa Zoova i dunman’n, nin i Sielɛ’n, ɔ nin i klun sa’n e wlɛ i srɛlɛ’n nun’n i akunndan.—Mat. 6:​9, 10.

⁹ Be flɛ aniaan bla kun kɛ Aliska. Kɛ ɔ tili i kɛ i wun le kansɛli naan w’a yo kekle dan’n, Ɲanmiɛn srɛlɛ’n yoli kekle mɛnnin i. Ɔ seli kɛ: “Min wla boli min wun dan ti’n, kɛ min waan ń srɛ́’n n wunman ndɛ kun nga ń kán’n.” ?Ngue yɛ ɔ ukɛli i-ɔ? Ɔ seli kɛ: “N fali blɛ kan n buli ndɛ nga min waan ń kán klé Zoova’n i sin ka naan m’an srɛ i. N yoli sɔ naan min srɛlɛ’m be nun’n, m’an buman e nin min wun e ngunmin e akunndan. I sɔ mɔ n yoli’n ti’n, min wla guali ase, kpɛkun n kwla kannin sa fanunfanun ndɛ kleli Zoova.”

10. ?Ngue ti yɛ ɔ fata kɛ e fa blɛ lɔun kan e srɛ Ɲanmiɛn-ɔn? (An nian foto mun wie.)

¹⁰ Fa blɛ lɔun kan srɛ Ɲanmiɛn. Ɔ ti su kɛ sɛ e srɛ kpe kan bɔbɔ’n, e nin Ɲanmiɛn e afiɛn kwla mantan. Sanngɛ sɛ e fa blɛ lɔun kan e srɛ i’n, é kwlá kán e klun ndɛ kpa é klé i.b Aliska i wun mɔ be flɛ i Eliya’n, ɔ seli kɛ: “Aliɛ ba kwlaa nun’n, n mian min ɲin n srɛ Ɲanmiɛn kpɛ sunman. Sanngɛ kɛ n fa blɛ lɔun kan n srɛ Ɲanmiɛn’n, n wun kɛ e nin i e afiɛn mantan kpa tra laa’n. Zoova jranman min wun kɛ n srɛ i ndɛndɛ. I sɔ’n ti’n, n fa blɛ n srɛ i.” Yo nga nian: Kunndɛ blɛ nin lika diin kun naan srɛ Ɲanmiɛn. A kwla man ɔ nɛn’n su srɛ i. Yɛ maan ɔ srɛlɛ’n, ɔ cɛ kan.

BU SRAN WIE’M BE SRƐLƐ NGA BE O BIBLU’N NUN’N BE SU AKUNNDAN

11. ?Sɛ e bu srɛlɛ nga Ɲanmiɛn i sufuɛ wie’m be srɛli mɔ be klɛli be Biblu’n nun’n be su akunndan’n i su ye benin yɛ é ɲɛ́n i-ɔ? (An nian kuku nga be flɛ i kɛ “?A wun wafa nga be wun yoli be’n i wlɛ?” nun wie.)

¹¹ Sɛ a bu sran wie’m be klun ndɛ nga be kan kleli Ɲanmiɛn’n, ɔ nin jue nga be toli be fa mɛnmɛnnin i mɔ be klɛli be Biblu’n nun’n be su akunndan’n, á ɲán su ye. Sɛ a fa ɔ ɲin sie i wafa nga be kannin be klun ndɛ kleli Ɲanmiɛn’n su’n, i sɔ’n kwla uka ɔ naan ɔ kusu w’a kan ɔ klun ndɛ w’a kle i wie. Asa’n a kwla wun ndɛ wie mɔ be kannin be mɔ a kwla fa wla ɔ srɛlɛ’m be nun-ɔn. Asa ekun’n, a kwla wun be srɛlɛ wie mɔ be nin ɔ su sa’m be kɔ likawlɛ mɔ a kwla nian su wie-ɔ.

12. ?Kɛ é kánngan sran kun i srɛlɛ m’ɔ o Biblu’n nun’n i nun’n, kosan benin mun yɛ e kwla fa usa e wun-ɔn?

¹² Kɛ á kánngan sran kun i srɛlɛ m’ɔ o Biblu’n nun’n i nun’n, usa ɔ wun kɛ: ‘Wan yɛ ɔ srɛli-ɔ? ?Ngue ti yɛ ɔ srɛli-ɔ? ?Sa ng’ɔ o i su m’ɔ kɛnnin i ndɛ i srɛlɛ’n nun’n, i kunngba’n o min su? ?Afɔtuɛ benin yɛ i srɛlɛ’n man min-ɔn?’ Atrɛkpa’n á nían fluwa nga anuannzɛ’n yili be’n be nun naan w’a kwla wun kosan sɔ’m be su tɛlɛ’n. Sanngɛ sɛ a mian ɔ ɲin yo sɔ’n, á ɲán su ye dan. Maan e fa e ɲin e sie i srɛlɛ nga sran wie’m be srɛli m’ɔ o Biblu’n nun’n be nun nnan be su.

13. ?Ngue yɛ Anin i srɛlɛ’n kle e-ɔ? (1 Samiɛli 1:​10, 11) (An nian desɛn wie.)

¹³ An kanngan 1 Samiɛli 1:​10, 11 nun. Kɛ Anin kán ndɛ sɔ’n, nn sa kekle nɲɔn be o i su. Ɔ wuman ba, yɛ i wla yo i tɛtɛ. (1 Sam. 1:​4-7) ?Sɛ sa kekle wie o ɔ su naan ɔ wieman’n, wafa sɛ yɛ Anin i srɛlɛ’n kwla uka wɔ-ɔ? Ɔ fali blɛ lɔun kan kokoli sa ng’ɔ o i su’n kleli Zoova. Kɛ ɔ yoli sɔ’n, i wla guali ase. (1 Sam. 1:​12, 18) Ɔ kusu “to ɔ ti su trɔ’n yi i Zoova su.” Yɛle kɛ koko sa trele ng’ɔ o ɔ su’n, ɔ nin wafa nga ɔ wun yo wɔ’n kle Zoova. Sɛ a yo sɔ’n, ɔ wla gúa ase.—Jue. 55:22.

14. (1) ?Afɔtuɛ benin ekun yɛ Anin i su ndɛ’n man e-ɔ? (2) ?Ngue ti yɛ Biblu’n nun kannganlɛ’n nin i su akunndan bulɛ’n kwla uka e naan y’a si ndɛ nga é kɛ́n i e srɛlɛ’m be nun’n niɔn? (An nian ja ngua lɔ ndɛ’n.)

¹⁴ Kɛ Anin wuli Samiɛli mɔ afuɛ nɲɔn kun sinnin’n, ɔ fɛli i ko kleli Eli m’ɔ ti Ɲanmiɛn Ɲrun Jranfuɛ Dan’n. (1 Sam. 1:​24-28) Kpɛkun ɔ srɛli Zoova. I srɛlɛ sɔ’n nun’n, ɔ lali Zoova ase. Afin ɔ niɛn i sufuɛ nanwlɛfuɛ’m be lika yɛ ɔ sasa be.c (1 Sam. 2:​1, 8, 9) Sa nga be o i su awlo lɔ’n, b’a wieman. Sanngɛ wafa nga Zoova yrɛli i su’n, i su yɛ ɔ fɛli i ɲin sieli-ɔ. ?Afɔtuɛ benin yɛ i sɔ’n man e-ɔ? Sɛ e fa e ɲin e sie i wafa nga Zoova ukali e lele mɔ w’a fa ju andɛ’n su’n, é kwlá jrán sa nga be o e su’n be ɲrun kekle.

15. ?Ngue yɛ Ɲanmiɛn nuan ijɔfuɛ Zeremin i srɛlɛ’n kle e-ɔ? (Zeremin 12:1)

¹⁵ An kanngan Zeremin 12:1 nun. Kɛ Ɲanmiɛn nuan ijɔfuɛ Zeremin wunnin kɛ klunwifuɛ’m be liɛ yo ye’n, i sɔ’n sɛnngɛnnin i akunndan’n. Asa’n i wiengu Izraɛlifuɛ’m be yoli i finfin. I sɔ’n ti’n, i sa sin bubuli i. (Zer. 20:​7, 8) E kwla wun wafa nga Zeremin i wun yoli i’n i wlɛ. Afin e kusu’n e wiengu’m be yo e finfin. Yɛ e wun kɛ blɛ sunman’n be nga be yo sa tɛtɛ mun’n, be yɛ be liɛ yo ye mɛn’n nun-ɔn. Kannzɛ bɔbɔ Zeremin seli Zoova kɛ sa sɔ’m be yo i ya’n, sanngɛ w’a semɛn i le kɛ ɔ yoman sa i nuan su. Asa’n kɛ ɔ wunnin wafa nga Zoova tuli i nvle’n nunfuɛ’m be fɔ’n, kɔlɛ’n ɔ wa lafili su kpa kɛ ɔ yo sa i nuan su sakpa. (Zer. 32:19) E kusu kɛ e wun sa tɛtɛ nga sran’m be yo be’n, e kwla kɛn i ya m’ɔ yo e’n i ndɛ kle Zoova. Kɛ é yó sɔ kusu’n, maan e lafi su kɛ blɛ ng’ɔ ti su’n i nun’n, Zoova wá yó maan sa tɛtɛ kwlaa sɔ’m bé wíe.

16. ?Ngue yɛ Levifuɛ’n i srɛlɛ’n kle e-ɔ? (Jue Mun 42:​1-4) (An nian desɛn’n nin foto’n wie.)

¹⁶ An kanngan Jue Mun 42:​1-4 nun. Levifuɛ kun mɔ be trɛli i lomuɛn be ɔli m’ɔ nin i wiengu Izraɛlifuɛ’m be kwlá suman Ɲanmiɛn likawlɛ kun’n, yɛ ɔ klɛli jue sɔ’n niɔn. Jue sɔ’n nun’n, ɔ kannin wafa nga i wun yoli i’n i ndɛ. E kusu’n sɛ tukpacɛ ti’n e o e awlo lɔ sa trilili’n, annzɛ sɛ Zoova mɔ e su i’n ti’n be wlali e bisua’n, e wun kwla yo e kɛ Levifuɛ sɔ’n sa. Blɛ kɛ ngalɛ sa’m be nun’n, wafa nga e wun yo e’n ɔ kacikaci. Yɛle kɛ wie liɛ’n e wun kpaja e, yɛ wie liɛ kusu’n e wla bo e wun. Sanngɛ maan e kan wafa nga e wun yo e’n i ndɛ e kle Zoova. I sɔ’n kwla uka e naan y’a wun wafa nga e wun yo e’n i wlɛ kpa, naan kusu y’a bu like ng’ɔ fata kɛ ɔ yo e cinnjin’n i akunndan. Kɛ Levifuɛ’n yoli sɔ’n, ɔ wunnin kɛ ɔ kwla yo ninnge uflɛ wie mun fa manman Zoova. (Jue. 42:5) Asa ekun’n ɔ buli wafa nga Zoova te niɛn i lika’n i akunndan. (Jue. 42:8) Sɛ e tu e klun e srɛ Ɲanmiɛn’n, i sɔ’n kwla uka e naan y’a wun sa nga ti yɛ sa wie yo e ya’n i wlɛ. Asa’n i sɔ’n kwla uka e naan e wun w’a jɔ e fɔun, naan kusu y’a kwla jran sa sɔ’n i ɲrun kekle.

17. (1) ?Ngue yɛ Zonasi i srɛlɛ’n kle e-ɔ? (Zonasi 2:​1, 2) (2) ?Wafa sɛ yɛ Jue Mun fluwa’n i nun ndɛ wie’m be kwla uka e blɛ kekle nun-ɔn? (An nian ja ngua lɔ ndɛ’n.)

¹⁷ An kanngan Zonasi 2:​1, 2 nun. Kɛ Ɲanmiɛn nuan ijɔfuɛ Zonasi o jue dan kun i klun lɔ’n, yɛ ɔ kannin ndɛ sɔ’n kleli Ɲanmiɛn-ɔn. Kannzɛ bɔbɔ Zonasi kpɛli Ɲanmiɛn i atin srɛ’n, sanngɛ ɔ lafili su kɛ ɔ́ tíe i srɛlɛ’n. I srɛlɛ sɔ’n nun’n, ɔ boli ndɛ wie mɔ be o Jue Mun fluwa’n nun’n be su.d Kɔlɛ’n ɔ si ndɛ sɔ mun kpa. Kɛ i wla kpɛnnin ndɛ sɔ’m be su m’ɔ buli be su akunndan’n, ɔ lafili su kɛ Zoova úkɛ i. E kusu’n sɛ e fa Biblu’n nun ndɛ wie mun e sie e klun’n, blɛ kekle nun’n kɛ é srɛ́ Zoova’n, e wla kpɛ́n be su, kpɛkun bé wlá e fanngan.

FA Ɔ WUN MANTAN ZOOVA SRƐLƐ’N NUN TITI

18-19. ?Kɛ e wunman ndɛ trele nga é kán klé Zoova’n, wafa sɛ yɛ ndɛ ng’ɔ o Rɔmunfuɛ Mun 8:​26, 27 nun’n kwla fɔnvɔ e-ɔ? An fa sa kun yiyi nun.

¹⁸ An kanngan Rɔmunfuɛ Mun 8:​26, 27 nun. Ɔ jue wie’n, e wla m’ɔ bo e wun dan’n ti’n, e wunman ndɛ trele nga é kán klé Zoova-ɔ. Blɛ kɛ ngalɛ’n sa’m be nun’n, Ɲanmiɛn wawɛ’n bɔbɔ “srɛ” man e. ?Wafa sɛ? Zoova i wawɛ’n fanngan nun’n, be klɛli sran kpanngban be srɛlɛ mun sieli i Biblu’n nun. Kɛ e kwlá kanman e klun ndɛ’n i weinwein e kleman Zoova’n, sran sɔ’m be srɛlɛ sɔ’m be ti’n, ɔ kwla wun like nga e sa miɛn i wun’n i wlɛ. Kpɛkun ɔ kwla tɛ e su.

¹⁹ Ndɛ sɔ’n ukali Risi lɔ aniaan bla kun mɔ be flɛ i Yelena’n. Be waan w’a kanngan Biblu’n nun naan w’a srɛ Ɲanmiɛn ti’n, be wlɛli i bisua. Kɛ ɔ yoli sɔ’n, i wla m’ɔ boli i wun dan’n ti’n, Ɲanmiɛn srɛlɛ’n yoli kekle mɛnnin i. Ɔ seli kɛ: “Kɛ min wla bo min wun dan mɔ n wunman ndɛ trele nga ń kɛ́n i srɛlɛ’n nun’n, min wla kpɛn su kɛ Zoova jrán srɛlɛ nga i sufuɛ’m be srɛli i laa’n su naan w’a yo like nga n kunndɛ’n w’a man min. Blɛ kekle sɔ’n nun’n, i sɔ liɛ’n fɔnvɔli min kpa.”

20. ?Sɛ sa kekle wie ti’n e wla guaman ase’n, ngue yɛ ɔ kwla uka e naan y’a srɛ Ɲanmiɛn-ɔn?

²⁰ Sɛ sa kekle wie ti’n e wla guaman ase’n, kɛ ɔ yo naan e srɛ Ɲanmiɛn kpa sa’n ɔ kwla yo kekle. ?Sanngɛ ngue yɛ ɔ kwla uka e-ɔ? Yɛle kɛ e kwla man e nɛn’n su e kanngan Jue Mun fluwa’n i nun ndɛ wie’m be nun. Asa’n e kwla klɛ wafa nga e wun yo e’n fluwa su, kɛ nga famiɛn Davidi fa yoli’n sa. (Jue. 18, 34, 142; be su fitilɛ mun.) I yo, wafa nga e kwla buabua e wun naan y’a srɛ Ɲanmiɛn’n, i su ajalɛ trele sa nunman lɛ. (Jue. 141:2) Ajalɛ nga e bɔbɔ e wun kɛ ɔ ti kpa man e’n, yɛ ɔ fata kɛ e fa-ɔ.

21. ?Ngue ti yɛ e kwla tu e klun e srɛ Zoova-ɔ?

²¹ Kɛ e si kɛ ka naan y’a srɛ Zoova bɔbɔ’n, ɔ wun wafa nga e wun yo e’n i wlɛ’n, i sɔ’n gua e awlɛn su nzue dan. (Jue. 139:4) Sanngɛ ɔ kunndɛ kɛ e kan wafa nga e wun yo e’n, ɔ nin i su mɔ e lafi’n i ndɛ e kle i naan ɔ ti. I sɔ’n ti’n, nán sisi ɔ bo naan w’a srɛ ɔ Si Ɲanmiɛn. Nian wafa nga laa’n i sufuɛ’m be srɛli i m’ɔ o Biblu’n nun’n su. Tu ɔ klun srɛ i. Sɛ ɔ klun ti jɔwa-o, sɛ ɔ wla w’a bo ɔ wun-o, kɛn i ndɛ kle i. Zoova úka ɔ titi, afin a ti i janvuɛ kpa.