Aniaan nɲɔn b’a uka Anuannzɛ’n i Ɲrun Dinfuɛ’m be su

AFUƐ 2024 Ɔktɔblu i le 5 su’n Anuannzɛ’n i afuɛ nuan aɲia’n i bo’n, be boli jasin fɛ kun. Be seli kɛ aniaan bian Jodi Jedele nin Zakɔbu Runfu b’a kaci Anuannzɛ’n i Ɲrun Dinfuɛ wie. Aniaan nɲɔn sɔ’m be su Zoova w’a di afuɛ kpanngban.

Be wuli aniaan bian Jedele Etazinin i asa nga be flɛ i Misuri’n su. I si nin i nin be su Zoova. Lika nga be tran lɛ’n, aniaan’m be taman lɔ jasin fɛ’n i bo. I sɔ’n ti’n, aniaan kpanngban mɔ be fin Etazinin i lika fanunfanun nun’n, be kɔ lɔ be ko uka be naan b’a bo jasin fɛ’n. Ɔ wunnin kɛ aniaan sɔ’m be klo sran yɛ be bo ti kun. I sɔ’n yoli i ɲɛnmɛn dan. Be yoli i batɛmun afuɛ 1983 Ɔktɔblu i le 15. Kɛ ɔ́ yó sɔ’n nn ɔ te yo gbanflɛn kan. Ɔ kloli jasin fɛ’n i bolɛ kpa. Yɛ kɛ ɔ ɲɛnnin i baki’n, ɔ kacili titi atin bofuɛ afuɛ 1989 Sɛptanblu nun.

I nun mɔ Jedele te yo gbanflɛn’n, ɔ ju wie’n i si nin i nin be fɛ i nin i niaan bla’n be ko niannian Betɛli lɔ. I sɔ’n ti’n, ɔ nin i niaan bla be sunnzunnin kɛ bé kó dí junman Betɛli lɔ. I sɔ kusu yɛ be yoli-ɔ. Afuɛ 1990 Sɛptanblu nun’n, aniaan bian Jedele boli Betɛli lɔ junman’n i dilɛ bo Wɔlkili lɔ. I klikli nun’n ɔ nin aniaan nga be yo lika’n nun yɛinyɛin’n yɛ be dili junman-ɔn. I sin’n, ɔ nin aniaan nga be uka aniaan mun naan b’a yo be wun ayre’n be dili junman.

Blɛ sɔ’n nun’n nn asɔnun nga be yo aɲia mun Ɛsipaɲɔlu nun’n be su sɔn kpa. Yɛ be mian aniaan bian’m be wun kpa. I sɔ’n ti’n, aniaan bian Jedele ɔli asɔnun sɔ’m be nun kun nun kpɛkun ɔ suannin Ɛsipaɲɔlu’n. Kɛ ɔ cɛli kan’n ɔ wunnin aniaan bla kun m’ɔ ti titi atin bofuɛ be akpasua’n su lɔ’n. Be flɛ i Damarisi. Kɛ ɔ́ kɔ́ i ɲrun’n be jali. Kpɛkun Damarisi ko dili junman Betɛli lɔ wie.

Afuɛ 2005 nun’n, be yacili Betɛli lɔ junman dilɛ naan b’a kwla nian be si nin be nin be lika. Blɛ sɔ’n nun’n, be kacili titi atin bofuɛ. Aniaan bian Jedele kleli like Atin bofuɛ’m be suklu’n i bo. Asa’n ɔ yoli be asa’n su lɔ Komite ng’ɔ nin Dɔɔtrɔfuɛ’m be di junman’n i nunfuɛ. Kpɛkun ɔ nin aniaan nga be kplan Ɲanmiɛn sulɛ sua’m be asa’n su lɔ’n be dili junman.

Afuɛ 2013 nun’n, be seli aniaan bian Jedele nin i yi kɛ be sa be sin Betɛli naan be ko uka aniaan nga be su kplan Betɛli ng’ɔ o Wɔɔwiki lɔ’n. I sin’n be ko dili junman Patɛɛsɔnun nin Wɔlkili lɔ wie. Aniaan bian dili junman biolo ng’ɔ nian e Ɲanmiɛn sulɛ sua’m be kplanlɛ’n su’n, ɔ nin biolo ng’ɔ uka aniaan’m be wun ayre yolɛ’n nun’n be nun. Afuɛ 2023 Marsi nun’n, ɔ kacili Komite ng’ɔ nian jasin fɛ bolɛ junman’n su’n be ukafuɛ. Kɛ ɔ buli junman fanunfanun sɔ m’ɔ dili be’n be akunndan’n, ɔ seli kɛ: “Kɛ be man ɔ junman uflɛ’n, a kwla bu i kɛ a su kwlá dimɛn i le. Sanngɛ ɔ fata kɛ a fa ɔ wla’n guɛ i Zoova su. Afin i yɛ ɔ kwla uka ɔ naan w’a di junman kwlaa ng’ɔ fa man wɔ’n niɔn.”

Aniaan bian Runfu liɛ’n, be wuli i Etazinin i asa nga be flɛ i Kalifɔɔnin’n su. I bakan nun’n, i nin yacili jasin fɛ bolɛ nin aɲia’m be bo tranlɛ. Sanngɛ i nin miɛnnin i ɲin kleli i Biblu’n nun like. Asa’n afuɛ kwlakwla’n ɔ kɔ i nannan bla m’ɔ su Zoova kpa’n i wun lɔ. I nannan sɔ’n yoli maan ɔ kunndɛli kpa kɛ ɔ́ sí Biblu’n nun ndɛ’n. Ɔ maan kɛ ɔ ɲannin afuɛ 13, ɔ kunndɛli kɛ be kle i Biblu’n nun like. Afuɛ 1992 Sɛptanblu i le 27 su’n, be yoli i batɛmun. Kɛ ɔ́ yó sɔ’n nn ɔ te yo gbanflɛn kan. I nin kusu wa suli Ɲanmiɛn kpa ekun. I sin’n i awlofuɛ’m be kwlaa be ɔli be ɲrun Ɲanmiɛn sulɛ’n nun, kpɛkun be yoli be batɛmun.

I nun mɔ aniaan bian Runfu te yo gbanflɛn’n, ɔ sieli i nzɔliɛ kɛ atin bofuɛ’m be di aklunjɔɛ kpa. Ɔ maan kɛ ɔ ɲɛnnin i baki’n, ɔ kacili titi atin bofuɛ afuɛ 1995 Sɛptanblu nun. Afuɛ 2000 nun’n, ɔ ko trannin Ekuatɛɛ. Afin be mian jasin bofuɛ’m be wun lɔ. Kɛ ɔ juli lɔ’n, ɔ wunnin aniaan bla kun m’ɔ ti titi atin bofuɛ’n. Be flɛ i Inga yɛ ɔ fin Kanada. Kɛ ɔ́ kɔ́ i ɲrun’n be jali. Kpɛkun be ɔli klɔ kun mɔ jasin bofuɛ’m b’a sɔnman lɔ’n su. Andɛ’n b’a kaci asɔnun bo dan kun.

I sin’n, aniaan bian Runfu nin i yi be kacili ngunmin atin bofuɛ. Kɛ ɔ́ kɔ́ i ɲrun’n, be dili akpasua su nianlɛ junman’n. Afuɛ 2011 nun’n, be yiali be kɛ be ko di Galaadi suklu’n i kpɛ 132 su’n. Kɛ be wieli suklu’n i di’n, be fa be ɔli nvle sunman nun. Be dili junman Betɛli lɔ, be yoli ngaliɛ difuɛ, be dili akpasua su nianlɛ junman’n ɔ nin junman uflɛ wie mun ekun. Asa’n aniaan bian’n kleli like Ɲanmiɛn Sielɛ’n i Jasin Bofuɛ’m be Suklu’n i bo.

Koronavirisi blɛ’n nun’n, aniaan bian’n nin i yi’n be sali be sin Etazinin. Be seli be kɛ be ko di junman Betɛli ng’ɔ o Wɔlkili’n nun. Lɔ’n be kleli aniaan bian Runfu i like naan ɔ nin aniaan nga be nian jasin fɛ bolɛ junman’n su’n, b’a di junman likawlɛ. I sin’n be fa be ɔli Ekuatɛɛ lɔ Betɛli’n nun. Yɛ anuannzɛ’n sieli aniaan bian Runfu Ekuatɛɛ lɔ Betɛli komite’n i nunfuɛ. Afuɛ 2023 nun’n, be fa be ɔli Wɔɔwiki. Afuɛ 2024 Zanvie nun’n, be sieli aniaan bian’n Komite ng’ɔ nian jasin fɛ bolɛ junman’n su’n be ukafuɛ. Kɛ ɔ buli lika fanunfanun nga be fa be ɔli’n be akunndan’n, ɔ seli kɛ: “Sran nga e nin be e di junman’n be ti yɛ junman nga e di’n ti i liɛ ngunmin-ɔn, nán lika nga be fa e kɔ’n niɔn.”

Nanwlɛ, aniaan sɔ’m be tu be klun be di junman. Yɛ e “bu sran kɛ ngalɛ sa’m be sran titi.”—Fip. 2:29.