?Amun si sɔ?

?Lalafuɛ nun’n, sran kun kwla gua awie ijre sran uflɛ i awie fie’n nun sakpa?

MATIE ndɛ tre 13 i mma 24 lele 26 nun’n, Zezi seli kɛ: “Nyanmiɛn sielɛ’n ɔ fa sran kun b’ɔ fa awie guɛli i fie’n su. Kɛ sran’m bé láfi’n, i kpɔfuɛ’n bali, ɔ wa guali awie’n nun awie ijre mma naan w’a wɔ. Kɛ awie’n fifili b’ɔ́ wlɔ́’n, be wunnin kɛ awie ijre sɔ’n wo nun.” Fluwa sifuɛ wie’m be lafiman su kɛ sran kun kwla yo sɔ sakpa. Sanngɛ, Rɔmufuɛ’m be mmla fluwa wie’m be kle kɛ i sɔ sa kwla ju sakpa.

Fluwa kun kan kɛ Rɔmufuɛ’m be mmla’n nun’n, sɛ sran kun ko gua ijre tɛ wie i mma i wiengu kun i fie’n nun fa tu i klunngbɔ’n, nn i sɔfuɛ’n w’a yo sa tɛ dan. Kɛ ɔ́ fá jú mɔ bé kpɛ́ i sɔ mmla’n, i sɔ’n kle kɛ sran wie’m be yo sɔ. Be flɛ laa fluwa sifuɛ kun kɛ Alastɛli Kɛr. Ɔ seli kɛ afuɛ 533 nun’n, Rɔmufuɛ’m be famiɛn nga be flɛ i kɛ Zistɛn’n, ɔ klɛli mmla fluwa kun. Rɔmufuɛ’m be mmla’n, ɔ nin ndɛ wie mɔ kɛ ɔ fɛ i afuɛ 100 lele afuɛ 250 nun be mmla klɛfuɛ’m be kannin’n, be o fluwa sɔ’n nun. Mmla klɛfuɛ sɔ’m be nun kun suan Ilpian. Ɔ kannin sa kun m’ɔ juli blɛ sɔ’n nun’n i ndɛ. Ɔ seli kɛ sran wie ko guali ijre tɛ wie i mma sran kun i fie’n nun. Ɔ maan, sran’n i fie’n sacili. Rɔmufuɛ’m be mmla fluwa’n kle like ng’ɔ fata kɛ fie difuɛ kun yo naan sran ng’ɔ sacili i fie’n w’a yi i ti sika w’a mɛn i’n.

I sɔ sa juli laa Rɔmun lɔ. I sɔ’n kle kɛ sa nga Zezi kɛnnin i ndɛ i ɲanndra’n nun’n, ɔ kwla ju sakpa.