?Biblu’n dun mmua kannin andɛ sran’m be ayeliɛ’n i ndɛ?

Ndɛ nga Biblu’n kan’n

Ɛɛn, Biblu’n seli kɛ e blɛ liɛ nga nun’n, sran sunman be ayeliɛ’n yó tɛ kɔ́ i ɲrun. Ɔ seli kɛ sran’m be klun akunndan’n yó tɛ kpa naan be su kunndɛman kɛ bé yó sa kpa’n.a (2 Timote 3:1-5) Sanngɛ kusu Biblu’n seli ekun kɛ nán sran ngba yɛ bé yó sɔ-ɔ. Yɛle kɛ Ɲanmiɛn fanngan nun’n, sran wie’m bé wlá ayeliɛ tɛtɛ’m be ase yɛ bé yó ninnge nga Ɲanmiɛn klo be’n.—Ezai 2:2, 3.

Ndɛ nga be yiyili nun’n:

?E blɛ su sran’m be ayeliɛ’n i su ndɛ benin yɛ Biblu’n dun mmua kannin-ɔn?

Biblu’n kannin ayeliɛ tɛtɛ wie mɔ sran’m bé yí be nglo andɛ’n be ndɛ. Ayeliɛ sɔ’m be fin be bɔbɔ be wun akunndan mɔ be bu’n. Ɔ seli kɛ sran’m “be su siman be wun su nian,” “bé bú be bɔbɔ be wun akunndan,” yɛ “be su kloman Ɲanmiɛn, fɛ dilɛ’n yɛ bé kló i-ɔ.”—2 Timote 3:2-4.

Ndɛ sɔ mɔ Biblu’n kannin’n, ɔ kpɛn su. Afin andɛ’n, sran’m be bu be bɔbɔ be wun akunndan. Like ng’ɔ ko yo be ye’n yɛ ɔ lo be-ɔ. Kɛ mɔ sran’m be bu be bɔbɔ be wun akunndan dan ti’n, ‘be kloman like ng’ɔ ti kpa’n.’ Ɔ maan be kloman be nga be nzuɛn’n ti kpa’n wie. ‘Be siman ye’ kaan sa kpɛkun be ɲin yiman like nga be le i’n.—2 Timote 3:2, 3.

Sran’m be bɔbɔ be wun akunndan mɔ be bu’n ti’n, be yi nzuɛn tɛtɛ wie mun ekun be nglo. Biblu’n seli kɛ i sɔ yɛ e blɛ su sran’m bé wá yó-ɔ:

Be ti aɲinkplifuɛ. Sran kpanngban ‘be klo sika.’ Be bu i kɛ sika annzɛ ninnge nga be le i’n, yɛ ɔ kle kɛ be liɛ w’a yo ye-ɔ.—2 Timote 3:2.
Be tu be wun. Sran kaka ‘be di be nuan, be tu be wun,’ yɛ “be di tutre.” (2 Timote 3:2, 4) Be blɔ ninnge nga be le be’n ɔ nin ninnge nga be si be yo’n.
Be saci sran wun. “Be nga be saci Ɲanmiɛn nin sran wun’n” be o lika kwlaa. (2 Timote 3:2, 3) Be nga be kpɛ Ɲanmiɛn annzɛ be wiengu’m be nzowa’n annzɛ be bua be su ato’n, be o sran sɔ’m be nun wie.
Be ɲin su ti kekle. Sran’m “be nin be wiengu’m be nantiman klanman.” “Be kunndɛman kɛ be nin be wiengu’m bé tí be wun aniɛn,” “be kpɛ be wiengu bo waka” yɛ “be yo ɲin kekle.” (2 Timote 3:2-4) Nzuɛn sɔ’m be ɲin fite ninnge nga be yo be’n be nun. Yɛle kɛ be like yolɛ yo ya kpa, be kunndɛman kɛ be nin be wiengu’m be bo yo kun be siesie ndɛ. Yɛ be diman ndɛ nga be kan’n su.
Be yo sa kekleke mun. Andɛ’n sran kaka ‘be yo wlɛ,’ yɛ be fa ya ndɛndɛ. Ɔ maan ɔ ju wie’n be yo be wiengu’m be like yaya.—2 Timote 3:3.
Be diman mmla’n su. Zezi seli kɛ e blɛ liɛ nga nun’n, sran sunman ‘be su diman mmla’n su.’ (Matie 24:12) Ɔ seli ekun kɛ “sa sukusuku’m” bé trú.—Liki 21:9.
Be kloman be osufuɛ mun. Kɛ mɔ sran kpanngban ‘be ɲin yiman be si nin be nin mun’ mɔ ‘be kloman be osufuɛ mun’n’ ti’n, be nianman be osufuɛ’m be lika, be yo be tɛtɛ yɛ be yo be kpokokpoko.—2 Timote 3:2, 3.
Be yo kɛ be su Ɲanmiɛn sa. Be nga be yo “be wun kɛ be ti Ɲanmiɛn sufuɛ sa’n,” b’a sɔn. (2 Timote 3:5) Kɛ ɔ yo naan be yo Ɲanmiɛn klun sa’n, ndɛ nga be asɔnun’m be su kpɛn’m be kan’n yɛ be yo-ɔ. Afin ndɛ ng’ɔ yo be fɛ’n yɛ be kunndɛ kɛ bé tíe-ɔ.—2 Timote 4:3, 4.

?Kɛ sran wie’m be yo ninnge tɛtɛ mun’n, i sɔ’n yo be wiengu’m be sɛ?

Kɛ mɔ sran’m be bu be bɔbɔ be wun akunndan’n ti’n, sran kaka be akunndan sanngan yɛ be wla bo be wun. (Akunndanfuɛ’n 7:7) I wie yɛle kɛ be nga be klo sika’n, be bu be wiengu’m be lufle. Be nga be kloman be osufuɛ mun kusu’n, be yo be tɛtɛ. I sɔ’n ti’n, be osufuɛ sɔ’m be ti nun kwla sanngan annzɛ be kwla kunndɛ kɛ bé kún be wun. Yɛ be nga be kpɛ be wiengu’m be bo waka kusu’n, be dunman nun ti’n be wiengu’m be wun be ɲrun.

?Ngue ti yɛ sran sunman be ayeliɛ’n yo tɛ kɔ i ɲrun-ɔn?

Biblu’n kan sa nga ti yɛ sran’m be ayeliɛ’n yo tɛ kɔ i ɲrun’n i ndɛ.

Sran kpanngban be kloman Ɲanmiɛn nin sran kun. (Matie 24:12) I ti’n, be ngunmin be wun akunndan yɛ be bu-ɔ.
Be fuannin Satan m’ɔ ti Suɛn Tɔnfuɛ’n ɲanmiɛn su lɔ be to i yili i asiɛ’n su wa. (Sa Nglo Yilɛ 12:9, 12) Kɛ ɔ fɛ i lɛ’n, ɔ wlawla sran mun naan be bu be ngunmin be wun akunndan.—1 Zan 5:19.

?Kɛ mɔ sran’m be ayeliɛ’n w’a yo tɛ’n ti’n, ngue yɛ ɔ fata kɛ e yo-ɔ?

Ɲanmiɛn Ndɛ’n se kɛ: “Nán fa ɔ wun mantan sran sɔ mun.” (2 Timote 3:5) I sɔ’n kleman kɛ ɔ fata kɛ e tran e liɛ ngunmin. Sanngɛ i bo’n yɛle kɛ ɔ fataman kɛ e tra be nga be bu be ngunmin be wun akunndan annzɛ be nantiman Ɲanmiɛn i mmla’m be su’n be janvuɛ.—Zaki 4:4.

?Sran’m be kwlaa be ayeliɛ’n yó tɛ?

Cɛcɛ. Biblu’n seli kɛ e blɛ liɛ nga nun’n ‘tete ninnge nga sran’m be yo be’n ti’n sran wie’m bé fɛ́fɛ́ yɛ bé kplín.’ (Ezekiɛli 9:4) Be liɛ’n be su buman be ngunmin be wun akunndan yɛ bé nánti Ɲanmiɛn i mmla’m be su. Be nuan nun ndɛ’n nin be ayeliɛ’n bé klé kɛ be timan kɛ be wiengu’m be sa. (Malasi 3:16, 18) I wie yɛle kɛ bé mían be ɲin naan be nin sran’m be nuan sɛ. Asa’n be su kunman alɛ yɛ be su yoman nzaje sa mun.—Mise 4:3.

?Sran’m be ayeliɛ mɔ w’a yo tɛ’n ti’n, mɛn’n sáci mlɔnmlɔn?

Cɛcɛ, mɛn’n su saciman mlɔnmlɔn. I kpa bɔbɔ’n, Ɲanmiɛn wá núnnún be nga be nantimɛn i mmla’m be su’n. (Jue Mun 37:38) Kpɛkun ɔ́ táka “asiɛ uflɛuflɛ kun.” Yɛle kɛ ɔ́ yó maan sran kpa’m be ngunmin bé trán fɔun asiɛ’n su tititi. (2 Piɛli 3:13; Jue Mun 37:11, 29) Ndɛ sɔ’n timan lafilɛ nun ndɛ. Dɔ nga su bɔbɔ’n, Biblu’n uka sran mun maan be kaci yɛ be nanti Ɲanmiɛn i mmla’m be su.—Efɛzifuɛ Mun 4:23, 24.

a Ndɛ nga Biblu’n kan’n ɔ nin sa nga be ju mɛn’n nun’n be kle kɛ e o “mɛn’n i awieliɛ blɛ’n” nun. I ti yɛ ‘lika’n w’a yo kekle’n’ niɔn. (2 Timote 3:1) Sɛ ɔ waan á sí nun kpa ekun’n, nian ndɛ nga “?Nzɔliɛ onin yɛ ɔ kle kɛ e o “mɛn i awieliɛ blɛ’n” nun-ɔn?” i nun.