?Nzɔliɛ onin yɛ ɔ kle kɛ e o “mɛn i awieliɛ blɛ’n” nun-ɔn?

Ndɛ nga Biblu’n kan’n

Biblu’n kle kɛ sa nga be ju mɛn’n nun’n ɔ nin sran’m be ayeliɛ’n be ti nzɔliɛ wie mɔ be kle kɛ e o “mɛn’n i awieliɛ blɛ’n” nun-ɔn. (Matie 24:3) Biblu’n flɛ blɛ nga e o nun yɛ’n kɛ “mɛn’n i awieliɛ blɛ” annzɛ “blɛ kasiɛn.”—2 Timote 3:1; Daniɛli 8:19.

?“Mɛn’n i awieliɛ blɛ’n” i su ndɛ benin wie mun yɛ Biblu’n kannin-ɔn?

Biblu’n seli kɛ sa kpanngban bé wá jú blɛ kunngba nun. Bé yó “nzɔliɛ” kun m’ɔ́ klé kɛ mɛn i awieliɛ blɛ’n w’a ju-ɔ. (Liki 21:7) Sa sɔ’m be nun wie mun yɛ:

Alɛ m’ɔ tɔ mɛn wunmuan’n nun’n. Zezi seli kɛ: “Nvle kun wá jáso nvle uflɛ wun. Yɛ famiɛn kun wá jáso famiɛn uflɛ wun.” (Matie 24:7) Asa’n, Sa Nglo Yilɛ 6:4 kannin sran kun m’ɔ ti nnɛn kpanngɔ kun su’n i ndɛ. Sran sɔ’n ti alɛ i nzɔliɛ, yɛ ɔ yo maan “fɔundi’n tu asiɛ’n su.”

Awe m’ɔ kpɛn’n. Zezi seli kɛ: “Awe’n wá kpɛ́n.” (Matie 24:7) Sa Nglo Yilɛ fluwa’n kan sran kun ekun m’ɔ ti nnɛn kpanngɔ su’n i ndɛ. Yɛ sran sɔ’n fa awe’n ba mɛn wunmuan’n nun.—Sa Nglo Yilɛ 6:5, 6.

Asiɛ m’ɔ keje’n. Zezi seli kɛ “asiɛ’n wá kéje dan kpa lika fanunfanun nun.” (Matie 24:7; Liki 21:11) Asiɛ m’ɔ́ wá kéje dan mɛn wunmuan’n nun ti’n, sran’m bé wún ɲrun dan yɛ sran kaka kpa bé wú bé trá laa’n.

Tukpacɛ. Zezi seli ekun kɛ “tukpacɛ bɔ sa ndɛndɛ’n ɔ́ wá sɔ́n.”—Liki 21:11, Nyanmiɛn Ndɛ’n.

Sran kunlɛ. Kannzɛ bɔbɔ nán andɛ sa yɛ sran’m be kun be wiengu’n, sanngɛ Zezi seli kɛ mɛn’n i awieliɛ blɛ’n nun’n, ‘sran sunman be su diman mmla’n su.’—Matie 24:12.

Asiɛ mɔ sran’m be saci’n. Sa Nglo Yilɛ 11:18 nun’n be seli kɛ sran wie’m ‘bé sáci asiɛ’n.’ Wafa nga sran sɔ’m be saci asiɛ’n, ɔ sɔnnin. I wie yɛle kɛ be yo sa keklekle mun nin sa tɛtɛ mun. Asa’n, be saci ninnge nga Ɲanmiɛn yili be’n wie.

Sran’m be ayeliɛ mɔ w’a yo tɛ’n. Kɛ nga 2 Timote 3:1-4 fa kle sa’n, sran’m be dan lika “be su siman ye, be nin be wiengu’m be su nantiman klanman, […] be su kunndɛman kɛ be nin be wiengu’m bé tí be wun aniɛn, bé sáci sran wun, be su siman be wun su nian, bé yó wlɛ, be su kloman like ng’ɔ ti kpa’n, bé kpɛ́ be wiengu’m be bo waka, bé yó ɲin kekle, bé dí tutre.” Sran’m be ayeliɛ’n yó tɛ dan ti’n, “lika’n wá yó kekle kpa.”

Sran’m be kloman be osufuɛ mun kun. Kɛ nga 2 Timote 3:2, 3 fa kan’n sa’n, sran’m “be su kloman” be osufuɛ mun yɛ ba kanngan’m “be ɲin su yiman be si nin be nin mun.”

Sran’m be kloman Ɲanmiɛn kun. Zezi seli kɛ: “Sran kpanngban be su kloman be wiengu kɛ laa’n sa kun.” (Matie 24:12) Zezi seli kɛ sa nga ti yɛ ɔ ti sɔ’n yɛle kɛ sran’m be su kloman Ɲanmiɛn kun. Ndɛ kunngba’n yɛ 2 Timote 3:4 kannin-ɔn. Ɔ seli kɛ mɛn’n i awieliɛ blɛ’n nun’n, sran’m “be su kloman Ɲanmiɛn, fɛ dilɛ’n yɛ bé kló i-ɔ.”

Sran’m be yo kɛ be su Ɲanmiɛn sa. Kɛ nga 2 Timote 3:5 fa kan’n sa’n, sran kaka bé yó kɛ be su Ɲanmiɛn sa, sanngɛ be su nantimɛn i mmla’m be su.

Be wun Biblu’n nun ndɛ’n i wlɛ kpa tra laa’n. Daniɛli fluwa nun’n, be seli kɛ ‘mɛn’n i awieliɛ blɛ’n’ nun’n, sran kaka bé wún Biblu’n nun ndɛ nanwlɛ’n i wlɛ kpa trá laa’n.—Daniɛli 12:4.

Be bo jasin fɛ mɛn wunmuan’n nun. Zezi seli kɛ: “Bé wá bó Ɲanmiɛn Sielɛ’n i jasin fɛ nga asiɛ wunmuan’n su”—Matie 24:14.

Sran kaka be ndɛ nunman Ɲanmiɛn ndɛ nun yɛ be yo i finfin. Zezi seli kɛ sran kpanngban be su faman be ɲin siemɛn i ninnge nga be kle kɛ mɛn’n su wa wie’n be su. (Matie 24:37-39) I kpa bɔbɔ’n, kɛ nga 2 Piɛli 3:3, 4 fa kan’n sa’n, sran wie’m bé yó mɛn’n i awieliɛ ndɛ sɔ’n i finfin.

Sa nga Ɲanmiɛn kannin be ndɛ’n be kwlaa be kpɛn su. Zezi seli kɛ mɛn’n i awieliɛ blɛ’n nun’n, sa nga Ɲanmiɛn kannin be ndɛ’n be kwlaa bé kpɛ́n su blɛ kunngba’n nun.—Matie 24:33.

?E o “mɛn’n i awieliɛ blɛ’n” nun?

Ɛɛn. Sa nga be ju mɛn’n nun’n ɔ nin ndɛ nga Biblu’n kannin’n be kle kɛ, kɛ ɔ fɛ i afuɛ 1914 nun mɔ Alɛ Dan Klikli’n tɔli’n, e o mɛn’n i awieliɛ blɛ’n nun. Sɛ ɔ waan á sí like nga ti yɛ e se kɛ sa nga be ju mɛn’n nun’n be kle kɛ e o mɛn’n i awieliɛ blɛ’n nun’n, nian video nga:

Afuɛ 1914 nun yɛ Ɲanmiɛn tɛkɛli i Sielɛ’n ɲanmiɛn su lɔ-ɔ. Yɛ like klikli ng’ɔ yoli’n be nun kun yɛle kɛ ɔ fuannin Satan m’ɔ ti Suɛn Tɔnfuɛ’n ɔ nin i mmusu mun ɲanmiɛn su lɔ guali be asiɛ’n su wa. (Sa Nglo Yilɛ 12:7-12) Kɛ ɔ fɛ i lɛ’n, Satan wlawla sran mun naan be yo sa tɛtɛ mun. I ti yɛ mɛn’n i awieliɛ blɛ nga nun’n, ‘lika’n w’a yo kekle’ kɛ nga sa’n niɔn.—2 Timote 3:1.

Lika’n i kekle mɔ w’a yo’n ti’n, sran kpanngban be wun be ɲrun. Asa’n, srɛ kun be afin sran’m be dan lika b’a yo tɛ. I sɔ’n ti’n be waan e ɲrun lɔ’n su yoman kpa mlɔnmlɔn.

Sanngɛ kusu sran wie mɔ mɛn’n nun sa’m be ti’n be fɛ wie’n, be liɛ’n be bu i kɛ e ɲrun lɔ’n yó kpa. Be lafi su kɛ Ɲanmiɛn Sielɛ’n wá núnnún sa kwlaa nga be o mɛn’n nun’n. (Daniɛli 2:44; Sa Nglo Yilɛ 21:3, 4) Be su minndɛ kpa kɛ Ɲanmiɛn yia nda ng’ɔ tali be’n be nuan. Ndɛ kun mɔ Zezi kannin’n wla be fanngan. Ɔ seli kɛ: “Sran ng’ɔ jran kekle lele ju i awieliɛ’n, ɔ́ fíte nun.”—Matie 24:13; Mise 7:7.