Like nga amun kwla yo naan amun a siman kwla’n

Sɛ be nga b’a ja’n be lafiman be wiengu su’n be su diman aklunjɔɛ. ?Ɔ maan amún yó sɛ naan amun a siman kwla ngbɛnngbɛn?

Ndɛ nga nun’n

• ?Kwla silɛ’n i ngba ti tɛ?

• ?Ngue yɛ ɔ yo maan sran kun si kwla ngbɛnngbɛn-ɔn?

• ?Ngue yɛ ɔ kwla uka wɔ naan w’a siman kwla-ɔ?

• Sɛ ɔ yi annzɛ ɔ wun si kwla’n

• Like nga amun kwla yo’n

?Kwla silɛ’n i ngba ti tɛ?

Kɛ sran kun bu i kɛ sran uflɛ nin i wun annzɛ i yi be su tra ndalie’n annzɛ ɔ bu i kɛ i yi annzɛ i wun nin sran uflɛ be su tra ndalie’n kpɛkun ɔ su si kwla. Ɔ maan ɔ kwla bu i kɛ be aja’n su wa saci. Sɛ ɔ ti sɔ sakpa’n, naan sran’n si kwla’n ɔ ti su. Afin wafa nga aja’n yo maan sran nɲɔn be afiɛn fa mantan’n like fi juman nun. Yɛ kɛ be ko ja’n ɔ fata kɛ be mian be ɲin naan be aja’n w’a saciman.

Ndɛ nga Biblu’n kan’n: “Be timan sran nɲɔn kun, sanngɛ be ti sran wunmuan. […] like nga Ɲanmiɛn kan boli nun’n, nán maan sran fi ti nun.”—Matie 19:6.

“Sɛ yasua’n annzɛ bla’n bu i kɛ i aja’n su wa saci’n ɔ fata kɛ ɔ wun i wlɛ kɛ kwla silɛ’n ti kɛ sin wunsrɛn m’ɔ kle kɛ sin o lika kun nun sa’n. Yɛ i sɔ’n kle kɛ ɔ fata kɛ ɔ fa ajalɛ trele kun.”—Bɛnzamɛn

Kwla silɛ ngbɛnngbɛn’n i liɛ’n nán kɛ sran’n su yo like wie sakpa ti yɛ be si-ɔ. Sɛ yasua kun nin i yi be klo be wiengu sakpa’n i sɔ’n yó maan be su siman kwla ngbɛnngbɛn. (1 Korɛntifuɛ Mun 13:4, 7) Dɔɔtrɔ bian kun m’ɔ suan Robɛɛ Lii seli kɛ: “Sɛ sran kun si kwla ngbɛnngbɛn’n ɔ kwla saci like nga i waan ɔ́ sɛ́sɛ́ i’n bɔbɔ.”

?Ngue yɛ ɔ yo maan sran kun si kwla ngbɛnngbɛn-ɔn?

Atrɛkpa’n, like nga ti yɛ a si kwla’n yɛle kɛ ɔ wun annzɛ ɔ i yi laa’n kunndɛli bla annzɛ bian ɔ bo. Annzɛ kusu, ɔ si nin ɔ nin be aja liɛ nun’n be nun kun kunndɛli bian annzɛ bla i wiengu bo. Ɔ maan srɛ kun wɔ, afin a kunndɛman kɛ sa kunngba’n ju ɔ su.

“Min kaan nun’n min si kunndɛli bla min manmin bo. I ti’n sran su lafilɛ’n ti kekle man min. Andɛ nin andɛ’n i sɔ’n te kle min yalɛ, ɔ maan kɛ ɔ yo naan n lafi min wun’n i su’n ɔ timan pɔpɔ.”—Melisa

Like uflɛ ekun: Sɛ a lafiman ɔ wun su’n, kpɛ sunman’n a kwla bu i kɛ sran’m be kunndɛ kɛ ɔ aja’n saci. Asa’n, a kwla bu i kɛ sɛ ɔ wun annzɛ ɔ yi ɲɛn i wun atin’n ɔ́ yáci wɔ kó fá sran uflɛ.

“Kɛ min wun i janvuɛ kun já bla’n ɔ srɛli i kɛ ɔ ukɛ i. Sanngɛ blɛ sɔ nun’n ɔ nin bla uflɛ be kwla si able. I sɔ’n ti’n n seli i kɛ nán ɔ kplin su.”—Naomin

Kɛ sran nɲɔn be ja’n ninnge nga be o yo be lika kun nun’n ɔ nin lika uflɛ liɛ’n timan kunYɛ kusu ɔ fata kɛ Klisifuɛ’m be nanti ndɛ nga Biblu’n kan’n su. ?Like nga Naomin yoli’n ti su? Kɛ ɔ tran buli i akunndan’n, ɔ wunnin i wlɛ kɛ i sɔ mɔ yoli’n timan su. Ɔ seli kɛ: “Blɛ sɔ nun’n n lafiman sran su. N buli i kɛ nn min wun fa min sunnzun bla onga mun, kusu nn nɛ́n i sɔ kaan sa-ɔ.”

Kannzɛ like nga ti yɛ a si kwla’n ti sɛ ti sɛ’n, sanngɛ kwla silɛ ngbɛnngbɛn’n kwla yo maan a bu ɔ wun annzɛ ɔ yi wun akunndan tɛ. I kpa bɔbɔ’n, a kwla bu i kɛ ɔ wun annzɛ ɔ yi w’a kunndɛ bla annzɛ bian ɔ bo. I sɔ’n kwla yo maan ndɛ tɔ amun aja’n nun yɛ a kwla tɔ su tukpacɛ bɔbɔ.

Ndɛ nga Biblu’n kan’n: “Aɲinblɔɛ’n [kwla silɛ’n] ti kɛ tukpacɛ kun m’ɔ saci be owie mun sa.”—Ɲanndra Mun 14:30

?Ngue yɛ ɔ kwla uka wɔ naan w’a siman kwla-ɔ?

Suan sran su lafilɛ. Kɛ ɔ yo naan a kunndɛ ninnge wie mɔ be kle kɛ atrɛkpa’n ɔ wun annzɛ ɔ yi yoli like wie’n, bu ninnge nga be nun’n ɔ wun annzɛ ɔ yi kleli kɛ be kwla lafi i su’n be akunndan.

“N fa min ɲin sie i min wun i nzuɛn kpakpa’m be su. Sɛ ɔ fɛ i ɲin sie sran kun su’n nn i sɔ’n kle kɛ sran sɔ’n i ndɛ lo i ti-ɔ. Nán kɛ ɔ bu like uflɛ akunndan ti-ɔ. N se min wun titi kɛ nán kɛ min si nin min nin be aja’n w’a yoman kpa’n ti yɛ min liɛ’n su yoman ye wie-ɔ.”—Melisa

Ndɛ nga Biblu’n kan’n: “Sran ng’ɔ klo sran’n, […] ɔ bu like kwlaa nanwlɛ.”—1 Korɛntifuɛ Mun 13:4, 7.

Nán bu i kɛ kɛ a lafiman sran su’n ɔ ti su. Dɔɔtrɔ bian Lii mɔ e kɛnnin i ndɛ’n klɛli i kɛ: “Ɔ ju wie’n e bu i kɛ sɛ e bu like kun i akunndan’n nn like sɔ’n ti su. Kɛ mɔ e lafi su kɛ like kun ti su’n ti’n, e bu i kɛ ɔ ti sɔ sakpa. Sanngɛ nán kɛ e bu i kɛ like kun ti nanwlɛ’n i ti yɛ ɔ kle kɛ like sɔ’n ti nanwlɛ sakpa-ɔ.”

“Sɛ kɛ sa kun ju cɛ naan e tin nun lɔ’n e ka lɛ e bu i kɛ e wun annzɛ e yi yoli sa tɛ’n, ɔ cɛman naan y’a saci e aja’n.”—Nadinin

Amun koko like ng’ɔ kle amun yalɛ’n i su yalɛ. Kannzɛ like nga ti yɛ a si kwla’n ti sɛ ti sɛ’n, bo su kle ɔ wun annzɛ ɔ yi, i liɛ’n amún kwlá fá ajalɛ kun m’ɔ kwla yo amun sran nɲɔn’n amun ye-ɔ.

“Kɛ amún kókó i sɔ yalɛ’n ɔ fata kɛ a se ɔ wun kɛ ɔ wun annzɛ ɔ yi kunndɛman kɛ ɔ́ yó like wie m’ɔ yoman ɔ fɛ’n. Sanngɛ ɔ kunndɛ kɛ amun siesie ndɛ’n. Asa’n, amun lafi amun wiengu su. Atrɛkpa’n a fa ya ndɛndɛ annzɛ ninnge ng’ɔ kwlá yoman’n yɛ a waan ɔ yo-ɔ. Annzɛ kusu ɔ wun annzɛ ɔ yi sieli i nzɔliɛ kɛ ɔ fɛmɛn i ɲin sieman ɔ su kɛ nga a klo’n sa.”—Siara

Ndɛ nga Biblu’n kan’n: “Nán maan sran fi bu i bɔbɔ i wun akunndan, sanngɛ maan ɔ bu i wiengu akunndan titi.”—1 Korɛntifuɛ Mun 10:24.