?E kwla si sran ng’ɔ klɛli Biblu’n sakpasakpa’n?

Ndɛ nga Biblu’n kan’n

Sran wie’m be waan e nun wie fi kwlá siman sran ng’ɔ klɛli Biblu’n i sakpasakpa’n. Sanngɛ Biblu’n i lika kaka nun’n, be boli be nga be klɛli Biblu’n be dunman. I wie yɛle kɛ Biblu’n i lika wie’m be nun’n be se kɛ “Neemin i ndɛ’n yɛ,” annzɛ ‘like nga Ezai wunnin i aolia nun’n yɛ,’ annzɛ kusu ‘ndɛ nga Zoova kan kleli Zoɛli’n yɛ.’—Neemin 1:1; Ezai 1:1; Zoɛli 1:1.

Biblu’n i klɛfuɛ sunman be dili i nanwlɛ kɛ ndɛ nga Zoova kan kleli be’n yɛ be klɛli-ɔ. Ɲanmiɛn nuan ijɔfuɛ nga be klɛli Ɲanmiɛn Ndɛ’n i bue ng’ɔ o Ebre nun laa’n, ka naan b’a ijɔ’n be se kɛ: “Ndɛ nga Zoova kan’n yɛ.” Be seli sɔ kpɛ 300 tra su. (Amɔsu 1:3; Mise 2:3; Naɔmun 1:12) Biblu’n i klɛfuɛ uflɛ wie’m be liɛ’n, anzi mun yɛ be kannin ndɛ kleli be yɛ be klɛli-ɔ.—Zakari 1:7, 9.

Be nga be klɛli Biblu’n be ti sran kɔe 40, yɛ i klɛlɛ’n dili afuɛ 1.600. Wie’m be klɛli Biblu’n nun fluwa kunngba. Sanngɛ wie’m be klɛli fluwa kaka. Biblu’n nun fluwa’m be ngba be ti 66. Fluwa 39 be wo Biblu’n i bue nga be klɛli i Ebre nun mɔ be flɛ i ekun kɛ Aenguɛ Laa’n i nun. Kpɛkun fluwa 27 be wo i bue nga be klɛli i Glɛki nun mɔ be flɛ i ekun kɛ Aenguɛ Uflɛ’n i nun.