2 Be Ɲoliɛ

2 Salomɔn i nuan toli sran mun naan be kplan sua kun naan Zoova i dunman’n tran su+ yɛ be kplan famiɛn sua kun.+ 2 Salomɔn fali junman difuɛ* akpiakpi ableso (70.000), nin yasua akpiakpi ablaɔcuɛ (80.000) naan be sɛ yɔbuɛ oka’m be su lɔ,+ ɔ nin sran akpi nsan ya nsiɛn (3.600) naan be nian be su.+ 3 Asa ekun’n, Salomɔn sunmannin sran naan be ko se Iramun+ m’ɔ ti Tir lɔ famiɛn’n kɛ: “A blɛli min si Davidi i sɛdri waka naan ɔ fa kplan sua* kun naan ɔ la nun. Like nga a yo mɛnnin i lɛ’n, yo i kunngba’n man min wie.+ 4 N su kplan sua kun naan min Ɲanmiɛn Zoova i dunman’n tran su. Min waan sua sɔ’n yo i liɛ klonglo. I liɛ’n, nglɛmun nin nnɔsua kwlakwla’n,+ nin Wunmiɛn-lolɛ-cɛn kwlaa nun’n,+ nin anglo le kun’n,+ nin kɛ bé dí cɛn+ nga e Ɲanmiɛn Zoova siesieli be’n, bé yrá ansan fanninfannin+ i ɲrun lɛ, yɛ bé fá kpanwun nga be tian be wiengu su’n*+ bé síe i ɲrun lɛ, yɛ bé yí tɛ nga kɛ bé yí’n be yra nnɛn’n i kɔlikɔli’n. Ɔ ti mmla, yɛ ɔ fata kɛ Izraɛlifuɛ’m be nanti su tititi. 5 Sua dan yɛ n su kplan-ɔn. Afin e Ɲanmiɛn’n ti dan tra ɲanmiɛn onga’m be kwlaa. 6 ?Yɛ wan yɛ ɔ kwla jaso se kɛ ɔ́ kplán sua kun mɛ́n i-ɔ? Afin ɔ sɔnman ɲanmiɛn m’ɔ la nglo lɔ plaii’n su.+ ?Ɔ maan olɛ nga n wo yɛ’n, n kplan sua kun n mɛn i-ɔ, ɔ yo ye? Lika kun mɔ be kwla yi tɛ lɛ naan sin wunsrɛn w’a fite i ɲrun’n, yɛ n kwla kplan-ɔn. 7 I sɔ’n ti’n, blɛ min ajuin difuɛ kun m’ɔ si sika ɔkwlɛ’n, nin sika’n, nin aaba’n,+ nin blalɛ’n, nin tannin ɔkwlɛ kankan’n, nin jese ɲanman ɔkwlɛ bioun’n, nin jese ɲanman ble’n be wun junman di kpa’n. Maan ɔ si ninnge’m be nzɔliɛ’m be yi. Ɔ nin ajuin difuɛ nga min si Davidi fa mannin min mɔ be si be junman’n i di kpa’n, bé dí junman Zida lɔ, nin Zerizalɛmun wa.+ 8 Asa ekun’n, blɛ min Liban lɔ sɛdri waka’n, nin zenevrie waka’n,+ nin algumimun waka’n+ wie. Afin n si jrɛiin kɛ ɔ sufuɛ’m be si Liban lɔ waka’m be kpɛ kpa.+ Min sufuɛ’m be nin ɔ sufuɛ’m bé dí junman likawlɛ.+ 9 Maan be kpɛ waka kpanngban kpa be blɛ min. Afin sua nga n su wa kplan’n, ɔ́ yó dan kpa, ɔ leman wunsu. 10 Nian, ń mán ɔ sufuɛ mun mɔ bé wá kpɛ́ waka’n be aliɛ.+ Ń mán be ble kɔɔ* akpiakpi ablaɔn (20.000), nin ɔɔzu kɔɔ akpiakpi ablaɔn (20.000), nin duvɛn bati* akpiakpi ablaɔn (20.000), ɔ nin ngo bati akpiakpi ablaɔn (20.000).”

11 Kɛ ɔ yoli sɔ’n, Iramun m’ɔ ti Tir famiɛn’n klɛli fluwa ko mannin Salomɔn. Ɔ seli i kɛ: “Klolɛ mɔ Zoova klo i nvle nunfuɛ mun’n, i ti yɛ ɔ sieli ɔ famiɛn naan a sie be-ɔ.” 12 Iramun seli ekun kɛ: “Maan be manman Zoova m’ɔ ti Izraɛli Ɲanmiɛn’n, m’ɔ yili nglo nin asiɛ’n. Afin ba ng’ɔ mannin Famiɛn Davidi’n ti ngwlɛlɛfuɛ,+ ɔ ti akunndanfuɛ, yɛ ɔ wun sa wlɛ dan.+ Ba sɔ’n wá kplán sua kun mán Zoova, yɛ ɔ́ kplán famiɛn sua kun. 13 I sɔ’n ti’n, ń blɛ́ wɔ ajuin difuɛ kun. Be flɛ i kɛ Iramun-Abi. Ɔ si i junman’n i di kpa, yɛ ɔ ti ngwlɛlɛfuɛ.+ 14 Yasua sɔ’n i nin’n fin Dan akpasua’n nun, sanngɛ i si’n fin Tir. Ɔ si sika ɔkwlɛ’n nin sika’n, nin aaba’n, nin blalɛ’n, nin yɔbuɛ’n, nin waka mun, nin tannin ɔkwlɛ kankan’n, nin jese ble’n, nin jese ɲanman plilili’n, nin jese ɲanman ɔkwlɛ bioun’n+ be wun junman di kpa. Ɔ si ninnge wafawafa kwlaa be nzɔliɛ yi. Ajuin dilɛ ninnge kwlaa nga be se i kɛ ɔ yo’n, ɔ́ yó.+ Ɔ nin ɔ bɔbɔ ɔ ajuin difuɛ nga be si junman di kpa’n, nin ɔ si Davidi m’ɔ ti min min’n i liɛ mun yɛ bé dí junman-ɔn. 15 I sɔ’n ti’n, min min, ble’n, nin ɔɔzu’n, nin ngo’n, nin duvɛn nga ɔ waan á fá mán ɔ sufuɛ mun’n, fa bla.+ 16 E kusu é wá kpɛ́ Liban lɔ waka’n+ i kpanngban kpa é blɛ́ wɔ. É kpɛ́ i lele saan w’a ju ɔ liɛ’n su. É cící be gúɛ i jenvie’n su, yɛ é kpálo be lele é fá jú Zope.+ Kpɛkun á fá kɔ́ Zerizalɛmun.”+

17 Salomɔn kali aofuɛ nga be tran Izraɛli nvle’n nun’n be nun yasua’m be kwlaa,+ kɛ nga i si Davidi fa yoli i laa’n sa.+ Aofuɛ sɔ’m be ti akpiakpi ya akpiakpi ablenun-nin-nsan ya nsiɛn (153.600). 18 Ɔ fali be nun sran akpiakpi ableso (70.000) naan be di junman,* yɛ sran akpiakpi ablaɔcuɛ (80.000) naan be sɛ yɔbuɛ+ oka’m be su, yɛ ɔ sieli be nun akpi nsan ya nsiɛn (3.600) kɛ be nian junman’n su naan be man sran’m be junman.+