Ezekiɛli
35 Zoova kannin ndɛ kleli min ekun. Ɔ seli kɛ: 2 “Sran wa, kpɛ ɔ ɲin nian Seii lɔ okaoka lika’n+ naan kan sa ng’ɔ́ wá jú i su’n i ndɛ.+ 3 Se i kɛ ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ee, Seii lɔ okaoka lika, e nin wɔ e le i. Ń má tínngɛ min sa’n ɔ wun yɛ á wá tɔ́ srolo.+ 4 Ń má sáci ɔ klɔ mun yɛ á wá tɔ́ srolo,+ kpɛkun á wá sí jrɛiin kɛ n ti Zoova. 5 Afin ɔ sran kpɔlɛ’n yoli dan,+ yɛ Izraɛlifuɛ’m be ɲrɛnnɛn blɛ nun’n, ɔ nin be fɔ tulɛ kasiɛn’n i blɛ nun’n a fali be mannin tokofi’n.”’+
6 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘N wo lɛ sakpa, ń má síe ɔ lɛ naan be gua ɔ mmoja’n i ase, yɛ wie’n* sú ɔ su.+ Kɛ mɔ mmoja’n yɛ a kpɔ i’n ti’n, wie’n sú ɔ su.+ 7 Ń má yó maan Seii lɔ okaoka lika’n ɔ́ tɔ́ srolo,+ yɛ ń kún be kwlaa nga be sin lɔ’n, ɔ nin be kwlaa nga be sa be sin lɔ’n. 8 Ń má yó maan be nga be kunnin be’n bé trú i oka’m be su. Yɛ be nga be fali tokofi kunnin be’n bé tɔ́ ɔ kpɔlɛ’m be su, nin ɔ kongo’m be nun, ɔ nin ɔ nzue ba’m be kwlaa be nun. 9 Ń má yó maan á tɔ́ srolo titi, yɛ be su tranman ɔ klɔ’m be su kun,+ kpɛkun á wá sí jrɛiin kɛ n ti Zoova.’
10 “Afin a seli kɛ: ‘Nvle nɲɔn nga mun ɔ nin mɛn nɲɔn nga mun bé yó min liɛ, é wá fá be nɲɔn’n.’+ Kusu nn Zoova bɔbɔ o lɛ. 11 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘N wo lɛ sakpa, kpɔlɛ nga a kpɔli be mɔ i ti’n a fali ya yɛ a sili kwla’n, i su yɛ ń nían ń yó ɔ like-ɔ.+ Kɛ ń má dí ɔ jɔlɛ’n, ń má yí min wun nglo be afiɛn. 12 Kpɛkun á wá sí jrɛiin kɛ Izraɛli oka’m be wun ndɛ tɛtɛ nga a kan seli kɛ: “Be tɔli srolo, be fali be mannin e kɛ e nunnun be’n,”* n bɔbɔ min Zoova n tili i kwlaa.” 13 Amun tuli amun wun yɛ amun kannin min wun ndɛ tɛtɛ. Amun kannin min wun ndɛ kpanngban.+ N tili i kwlaa.’
14 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Kɛ ń má yó maan á tɔ́ srolo’n, asiɛ wunmuan’n ɔ́ dí aklunjɔɛ. 15 Kɛ Izraɛli nvle’n nunfuɛ’m be aja like’n tɔli srolo’n, a dili aklunjɔɛ. I kunngba’n yɛ ń má fá yó wɔ-ɔ.+ Ee, Seii lɔ okaoka lika, ɛɛn-ɛn, Edɔmun mɛn wunmuan’n, á wá sáci mlɔnmlɔn, be su tranman ɔ nun kun,+ kpɛkun bé wá si jrɛiin kɛ n ti Zoova.’”