Ezekiɛli
46 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Cɛn ba nsiɛn nga be fa di junman’n+ be nun’n, maan be ɲin awlo klun kaan’n i anuan m’ɔ kaci wia afiliɛ+ bue liɛ’n su lɔ’n,+ sanngɛ Wunmiɛn-lolɛ-cɛn’n nun’n, ɔ nin anglo le kun cɛn’n nun’n maan be tike. 2 Siefuɛ’n ɔ́ fɛ́ i awlo klun dan’n nun lɔ, ɔ́ sín lika fleiin nga be sin i bo’n i nun lɛ,+ kpɛkun ɔ́ jrán anuan’n i kadri’n i wun lɛ. Ɲanmiɛn ɲrun jranfuɛ’m bé yí siefuɛ’n i tɛ nga kɛ bé yí’n be yra nnɛn’n i kɔlikɔli’n, ɔ nin i bo kun yolɛ tɛ mun, kpɛkun ɔ́ kóto anuan’n i ɲrun lɛ. I sin’n ɔ́ fíte. Sanngɛ ɔ fataman kɛ be ɲin anuan’n, saan nnɔsua. 3 Asa ekun’n, Wunmiɛn-lolɛ-cɛn’m be nun’n ɔ nin anglo le kun’m be nun’n, nvlefuɛ’m bé kóto Zoova ɲrun,+ anuan’n i ɲrun lɛ.
4 “‘Wunmiɛn-lolɛ-cɛn’n nun’n, siefuɛ’n fá bua ba yasua nsiɛn mɔ lɛ nunman be wun’n, ɔ nin bua ɲin kun mɔ lɛ nunmɛn i wun’n, ɔ́ fá kɔ́ Zoova ɲrun naan be fa yi tɛ nga kɛ bé yí’n be yra nnɛn’n i kɔlikɔli’n.+ 5 Ble annzɛ i wunsu like nga ɔ́ fá síe i bua ɲin’n su’n maan ɔ yo efa kun,* ɔ nin like kwlaa ng’ɔ kwla fa sie i bua ba yasua’m be su’n. Maan ɔ sie efa kwlaa su ngo inin* kun.+ 6 Anglo le kun kwlaa nun’n, maan ɔ fa nnɛn’m be nun nannin gbanflɛn kun mɔ lɛ nunmɛn i wun’n, ɔ nin bua ba yasua nsiɛn, ɔ nin bua ɲin kun ɔ fa man. Maan be kwlaa be yo nnɛn mɔ lɛ nunman be wun-ɔn.+ 7 Maan ɔ fa ble annzɛ i wunsu like efa kun ɔ fa sie i nannin gbanflɛn’n su, maan ɔ fa efa kun fa sie i bua ɲin’n i su, ɔ nin like kwlaa nga i sa ju su m’ɔ kwla fa uka bua ba yasua’m be su’n. Maan ɔ sie efa kwlaa su ngo inin kun.
8 “‘Kɛ siefuɛ’n ɔ́ wlú’n, maan ɔ sin anuan’n i ɲrun lɛ lika fleiin nga be sin i bo’n i nun lɛ, yɛ kɛ ɔ́ fíte’n maan ɔ sin lika kunngba’n nun.+ 9 Yɛ cɛn dilɛ’m be nun’n,+ kɛ nvle’n nunfuɛ’m be ba Zoova i ɲrun’n, maan be nga be sinnin nglo lɔ anuan’n+ nun be bali Ɲanmiɛn sulɛ’n, be sin ngua lɔ anuan’n+ nun be fite. Maan be nga be sinnin ngua lɔ anuan’n nun be bali’n be sin nglo lɔ anuan’n nun be fite. Anuan nga sran kun sinnin nun bali’n, ɔ fataman kɛ ɔ sin nun fite. Ɔ fata kɛ sran kun sin anuan ng’ɔ o i ɲrun ndɛnman su’n nun fite. 10 Siefuɛ ng’ɔ o be afiɛn’n, kɛ bé wlú’n yɛ ɔ́ wlú-ɔ, kɛ bé fíte’n yɛ ɔ́ fíte-ɔ. 11 Cɛn dilɛ’m be nun’n ɔ nin cɛn dilɛ blɛ’m be nun’n, maan ɔ fa ble annzɛ i wunsu like efa kun fa sie i nannin gbanflɛn’n su, maan ɔ fa efa kun fa sie i bua ɲin’n su, ɔ nin like kwlaa ng’ɔ kwla fa uka bua ba yasua’m be su’n. Maan ɔ sie efa kwlaa su ngo inin kun.+
12 “‘Sɛ siefuɛ’n fa nnɛn nga be fa yi tɛ nga kɛ bé yí’n be yra nnɛn’n i kɔlikɔli’n,+ annzɛ bo kun yolɛ tɛ mun ɔ man’n, sɛ i klunklo like yɛ ɔ su fa man Zoova’n, maan be tike anuan nga i ɲin kaci wia afiliɛ bue liɛ’n su lɔ’n be mɛn i. Ɔ́ fá nnɛn ng’ɔ́ fá yí tɛ nga kɛ bé yí’n be yra nnɛn’n i kɔlikɔli’n, ɔ nin nnɛn ng’ɔ́ fá yí bo kun yolɛ tɛ mun ɔ́ mán, kɛ nga ɔ fa yo i Wunmiɛn-lolɛ-cɛn’n+ nun’n sa. Kɛ ɔ ko fite’n, maan be ɲin anuan’n.+
13 “‘Cɛn kwlakwla’n, ɔ fata kɛ a fa bua ba yasua kun mɔ lɛ nunmɛn i wun’n m’ɔ nin-a traman afuɛ kun’n a fa yi tɛ nga kɛ bé yí’n be yra nnɛn’n i kɔlikɔli’n a man Zoova.+ Ɔ fata kɛ a yo i sɔ nglɛmun kwlaa. 14 Asa ekun’n, nglɛmun kwlaa’n fa sanmlɛn efa kun mɔ be bubuli nun nsiɛn’n i bue kun man, ɔ ti ble annzɛ i wunsu like mɔ be fa man Ɲanmiɛn’n, ɔ nin ngo inin kun mɔ be bubuli nun nsan’n i bue kun mɔ bé fá kpɛ́ntɛnkpɛ́ntɛn i sanmlɛn mlɛnnɛnnɛn’n su’n, ɔ ti ble annzɛ i wunsu like mɔ be fa man Zoova titi’n. Ɔ ti mmla kun m’ɔ́ ká lɛ tititi-ɔ. 15 Ɔ fata kɛ be fa bua ba yasua, ɔ nin ble annzɛ i wunsu like, ɔ nin ngo be man nglɛmun kwlaa, ɔ ti tɛ nga kɛ bé yí’n be yra nnɛn’n i kɔlikɔli’n mɔ be yi i titi’n.’
16 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Sɛ siefuɛ kun cɛcɛ i mma yasua’m be tinuntinun be like naan ɔ yo be aja like’n, ɔ́ káci i mma yasua’m be liɛ. Ɔ ti be aja like. 17 Sanngɛ sɛ ɔ fɛ i aja like’n wie mɛn i sufuɛ’m be nun kun’n, ɔ́ yó i liɛ lele saan be ti ɲanlɛ afuɛ’n w’a ju.+ I sin’n, ɔ́ káci siefuɛ’n i liɛ ekun. I mma’m be aja like’n yɛ ɔ́ yó be liɛ tititi-ɔ. 18 Ɔ fataman kɛ siefuɛ’n ɔ fa nvlefuɛ’m be aja like’n wie fi. Ɔ fataman kɛ ɔ mian nvlefuɛ mun kɛ be tu be asiɛ’n su. I bɔbɔ i like liɛ’n yɛ ɔ fata kɛ ɔ fa mɛn i mma yasua mun naan ɔ yo be aja like-ɔ. I liɛ’n, min nvle’n nunfuɛ’m be nun wie fi i asiɛ’n su fimɛn i sa.’”
19 I sin’n, ɔ fali min sinnin sinwlɛ kun nun.+ Ɔ o anuan nga be sin nun be kɔ Ɲanmiɛn ɲrun jranfuɛ’m be like diwlɛ m’ɔ ti Ɲanmiɛn liɛ klonglo’n* nun lɔ’n i wun lɛ. Like diwlɛ sɔ’m be ɲin kpɛ nglo lɔ lika’n nun.+ Lɛ’n n wunnin lika kun siɛn lɔ, wia atɔliɛ bue liɛ’n su lɔ. 20 Ɔ seli min kɛ: “Lika nga nun wa yɛ Ɲanmiɛn ɲrun jranfuɛ’m bé tɔ́n nnɛn nga be fa yi sa tɛ’n i ti kpatalɛ tɛ’n ɔ nin sa tɛ’n i ti tɛ’n niɔn. Yɛ lɛ yɛ bé tɔ́n ble annzɛ i wunsu like mɔ be fa man Ɲanmiɛn’n niɔn.+ I liɛ’n be su faman like fi be fiteman awlo klun dan’n nun lɔ naan sanwun mɔ be ti’n w’a saman nvle’n nunfuɛ mun.”*+
21 Ɔ fa min fiteli awlo klun dan’n nun lɔ. Ɔ fa min sinnin awlo klun’n i cɔnjɔ nnan’m be su, yɛ n wunnin awlo klun kun awlo klun dan’n i cɔnjɔ’m be kwlaa be su. 22 Awlo klun’n i cɔnjɔ nnan’m be su’n, awlo klun kanngan wie’m be o lɛ. Be tɛnndɛn nun’n ti kude ablanan (40)* yɛ be tɛtrɛ nun’n ti kude ablasan (30). Be nnan’m be kwlaa be sɛ.* 23 Be nnan’m be le nuan su tɛɛn sin yia nun. Be nuan su’m be bo lɛ’n, be kplannin sua wie mun, lɛ yɛ be tɔn ninnge nga be fa man Ɲanmiɛn’n niɔn. 24 I sin’n, ɔ seli min kɛ: “Sua nga’m be nun yɛ be nga be di junman Ɲanmiɛn sua’n nun’n be tɔn ninnge nga nvlefuɛ’m be fa yi tɛ’n niɔn.”+