Sran mɔcuɛ be fiteli nun

Nowe nin i awlofuɛ mun, ɔ nin nnɛn mun be wluli mmeli’n nun. Kɛ Zoova ɲinnin mmeli’n i anuan’n, yɛ nzue’n boli tɔlɛ bo-ɔ. Nzue’n tɔli dan kpa. Ɔ dili asiɛ wunmuan’n. Ɔ maan ɔ mannin mmeli’n su. Be kwlaa nga b’a wluman mmeli’n nun’n, be wuli. Sanngɛ Nowe nin i awlofuɛ mɔ be o mmeli’n nun’n, b’a wuman. Nanwlɛ, be ɲin m’ɔ yili Zoova’n ti’n, be klun jɔli dan.

Nzue’n tɔli cɛn ba ablanan (40) kɔnguɛ nin wia nun naan w’a kpɛ. Blɛblɛblɛ nzue ng’ɔ jrannin asiɛ’n su’n, ɔ wa kannin ase. Kpɛkun mmeli’n ko takali oka kun su. Blɛ sɔ nun’n nn nzue’n i wie te o asiɛ’n su. Ɔ maan Nowe nin i awlofuɛ’m be kwlá fiteman.

Kɛ ɔ́ kɔ́ i ɲrun’n, asiɛ’n wa wuli kee. Nowe nin i awlofuɛ mun be kali mmeli’n nun lele afuɛ kun tra su. I sin’n Zoova seli be kɛ be kwla fin mmeli’n nun fite. Kɛ be fiteli’n, ɔ yoli be kɛ be o mɛn uflɛ nun sa. Kɛ Zoova yoli maan be ɲannin be ti’n, ɔ yoli be fɛ kpa. I sɔ’n ti’n, be yili tɛ be mɛnnin i.

Zoova i klun jɔli like nga be fa mɛnnin i’n su. Ɔ seli kɛ ɔ su faman nzue fa nunnunman asiɛ’n su ninnge mun kun. Kɛ ɔ ko yo naan b’a kwla lafi ndɛ sɔ’n su’n, ɔ yoli maan ɲanngondin fiteli ɲanmiɛn su lɔ. Kpɛ klikli nga ɲanngondin fíte’n, yɛ ɔ o lɛ-ɔ. ?W’a wun ɲanngondin le?

I sin’n, Zoova seli Nowe nin i awlofuɛ mun kɛ be wu ba naan be trɛ asiɛ’n su.