Ɲanmiɛn wawɛ’n jrali Zezi i sɔnnzɔnfuɛ’m be su

Kɛ Zezi ɔli ɲanmiɛn su mɔ cɛn blu sinnin’n, Ɲanmiɛn wawɛ’n jrɛli i sɔnnzɔnfuɛ’m be su. Afuɛ 33 nun yɛ sa sɔ’n juli-ɔ. Kɛ ɔ́ yó sɔ’n, nn sran kpanngban kpa b’a ba Pantekɔtu’n i dilɛ Zerizalɛmun lɛ. Cɛn sɔ’n nun’n, Zezi i sɔnnzɔnfuɛ ya kun ablaɔn (120) be yiali nglo sua ba kun nun. Kpɛkun abonuan sa kun juli. Like kun m’ɔ ti kɛ sin taaman sa’n, ɔ wa trantrannin be tinuntinun be ti su. Kpɛkun be kannin aniɛn wafawafa mun. Be tili like kun tɛlɛ sua’n nun. Ɔ kpla kɛ aunmuan dan wie sa.

Be nga be fin nvle uflɛ nun be bali Zerizalɛmun lɛ’n, be tili like sɔ’n i tɛlɛ. Ɔ maan be wanndi ɔli sua’n i wun lɔ naan bé kó nían. Kɛ be juli lɔ’n, be wunnin kɛ Zezi i sɔnnzɔnfuɛ’m be su kan ndɛ sran’m be aniɛn’m be nun. I sɔ’n boli be nuan. Be seli kɛ: ‘?Nán Galilefuɛ mun-ɔn? ?Ɔ yo sɛ yɛ be kwla kan ndɛ e aniɛn’m be nun-ɔn?’

Kɛ ɔ yoli sɔ’n, Piɛli nin akoto onga’m be jaso jrannin sran’m be ɲrun lɛ. Piɛli kannin Zezi i wulɛ’n i ndɛ. Kpɛkun ɔ seli kɛ Zoova cɛnnin i nguan. I sin’n ɔ seli kɛ: ‘Siɛn’n, Zezi o ɲanmiɛn su lɔ. Ɔ o Ɲanmiɛn i sa fama su. Ɲanmiɛn wawɛ m’ɔ seli kɛ ɔ́ fá mán e’n, yɛ w’a fa man e yɛ. I sɔ’n ti yɛ amun wun abonuan sa nga mun, mɔ amun ti ndɛ nga mun-ɔn.’

Ndɛ nga Piɛli kannin’n, ɔ wluwluli sran’m be wun kpa. I sɔ’n ti’n, be usali kɛ: “?Ngue yɛ ɔ fata kɛ e yo-ɔ?” Piɛli tɛli be su kɛ: ‘Amun yaci sa tɛ’n i yolɛ, yɛ maan be yo amun batɛmun Zezi dunman nun. Yɛ Ɲanmiɛn fɛ́ i wawɛ’n mán amun.’ Cɛn sɔ’n nun’n, be yoli sran kɔe akpi nsan (3.000) be batɛmun. Kɛ ɔ fɛ i lɛ’n, Zezi i sɔnnzɔnfuɛ’m be su wa ukali ndɛndɛ kpa Zerizalɛmun lɔ. Ɲanmiɛn wawɛ’n ukali akoto mun, ɔ maan be takali asɔnun kpanngban. Be yoli sɔ naan b’a kwla fa like kwlaa nga Zezi seli be kɛ be yo’n, b’a kle be nga b’a kaci Zezi i sɔnnzɔnfuɛ’n.