Ɲanmiɛn yili nglo nin asiɛ’n

Ɲanmiɛn Zoova yɛ ɔ ti e Yifuɛ’n niɔn. Ninnge nga e kwla wun be’n nin nga e kwlá wunman be’n, i yɛ ɔ yili be kwlaa-ɔ. Ka naan w’a yi ninnge nga e kwla wun be’n, ɔ dun mmua yili anzi kpanngban kpa. ?A si wafa nga anzi’m be fa ti’n? Be ti kɛ Zoova sa. E kwlá wunman be. Anzi klikli nga Zoova yili’n, ɔ yoli Zoova i ukafuɛ. Ɔ ukali Zoova be yili nzraama mun, ɔ nin ninnge onga mun. Ninnge sɔ’m be nun kun yɛle asiɛ m’ɔ ti e tranwlɛ’n. Zoova yili i klanman kpa.

Ɔ siesieli asiɛ’n naan nnɛn nin klɔ sran’m be kwla tran su. Ɔ yoli maan wia’n boli asiɛ’n su. Yɛ ɔ yili oka mun nin nzue ba mun, ɔ nin jenvie’n.

?I sin’n, a si like nga Zoova yoli’n? Ɔ seli kɛ: ‘Ń má yí ijre nin waka mun.’ Kɛ ɔ yoli sɔ’n, waka nga be su mma’n, ɔ nin flɛli mun be fifili kpanngban kpa. I sin’n, ɔ yili nnɛn mun. Be nun wie mun be tu, wie mun be o nzue nun, wie mun be nanti, yɛ wie’m be kusu be cuɛn be wun ase. Be nun wie’m be ti kanngan. Be nun kun yɛle gbekle. Yɛ wie’m be ti dandan. Be nun kun yɛle sui. ?Nnɛn nga a klo i kpa’n yɛle benin?

I sin’n, Zoova seli anzi klikli’n kɛ: “E yi sran.” Ɲanmiɛn w’a yiman klɔ sran kɛ nnɛn’m be sa. Sran’m be kwla ijɔ, be kwla yi like, be kwla sri, yɛ be kwla srɛ Ɲanmiɛn. Ɲanmiɛn seli be kɛ be nian asiɛ’n nin nnɛn’m be lika. ?A si sran klikli nga Ɲanmiɛn yili’n? É wá kɛ́n i ndɛ.