Zoova sasali Zezi

Nvle kun m’ɔ o Izraɛli nvle’n i wia afiliɛ lɔ’n nun’n, sran wie’m be lafi su kɛ nzraama’m be kwla kle be atin. Cɛn kun kɔnguɛ’n, sran wie’m mɔ be fin lika sɔ’n nun lɔ’n be wunnin like kun nglo lɔ. Like sɔ’n ti kɛ nzraama sa, yɛ ɔ kpaja kpa. Ɔ dunnin be ɲrun mmua lele ɔ fa be ɔli Zerizalɛmun. Kɛ be juli lɔ’n be usali sran mun kɛ: ‘?Ba nga ɔ́ wá yó Zifu’m be famiɛn’n, ɔ o nin? E bɛli i ayɛ yilɛ.’

Kɛ Erɔdu m’ɔ ti Zerizalɛmun famiɛn’n tili i kɛ sran uflɛ su wa kaci famiɛn’n, i akunndan’n sanngannin. Ɔ usali Ɲanmiɛn ɲrun jranfuɛ’m be su kpɛn’m kɛ: ‘?Nin yɛ be seli kɛ bé wú famiɛn sɔ’n niɔn?’ Be tɛli i su kɛ: ‘Ɲanmiɛn nuan ijɔfuɛ’m be seli kɛ Bɛtleɛmun lɔ yɛ bé wú i-ɔ.’ Ɔ maan Erɔdu flɛli be nga be fin wia afiliɛ lɔ’n, kpɛkun ɔ seli be kɛ: ‘Amun wɔ Bɛtleɛmun naan amun ko kunndɛ ba sɔ’n. I sin’n, amun wa kle min lika ng’ɔ o’n. N kunndɛ kɛ ń kó yí i ayɛ wie.’ Sanngɛ lakalɛ yɛ ɔ su laka be-ɔ.

Like m’ɔ ti kɛ nzraama sa’n ɔ tuli i bo ekun. Ɔ fali be ɔli Bɛtleɛmun. Ɔ ko jrannin sua kun ti su nglo. Yɛ be wluli sua sɔ’n nun lɔ-ɔ. Be toli Zezi nin i nin Mari lɔ. Be kotoli Zezi bo, yɛ be mɛnnin i sika ɔkwlɛ nin ansan ufue, ɔ nin miri. ?Zoova yɛ ɔ sunmannin sran sɔ mun kɛ be ko kunndɛ Zezi-ɔ? Cɛcɛ.

Kɔnguɛ’n Zoova seli Zozɛfu laliɛ nun kɛ: ‘Erɔdu kunndɛ kɛ ɔ́ kún Zezi. Fa ɔ yi nin ɔ wa’n naan amun wanndi be wɔ Ezipti. Amun ka lɔ lele saan m’an se amun kɛ amun sa amun sin.’ Kɛ Zoova kannin sɔ cɛ’n, Zozɛfu nin i awlofuɛ’m be ɔli Ezipti.

Zoova seli sran mɔ be fin wia afiliɛ lɔ’n be kɛ nán be sa be sin Erɔdu wun lɔ. Kɛ Erɔdu wunnin kɛ b’a saman be sin’n, ɔ fali ya dan kpa. I sɔ’n ti’n, ɔ seli kɛ maan be kun Bɛtleɛmun lɔ ba nɔnman kwlaa nga be nin Zezi be afuɛ ti kun’n. Sanngɛ kɛ ɔ́ yó sɔ’n nn b’a fa Zezi b’a wɔ Ezipti lalaa.

Kɛ ɔ́ kɔ́ i ɲrun’n Erɔdu wuli. Zoova seli Zozɛfu kɛ: ‘Siɛn’n, amun kwla sa amun sin.’ Zozɛfu nin Mari yɛ Zezi be sali be sin Izraɛli lɔ. Be ko trannin klɔ kun mɔ be flɛ i Nazarɛti’n su.