Zonatan ti yakpafuɛ yɛ ɔ ti janvuɛ kpa

Be flɛ Famiɛn Saili i wa kpɛn’n kɛ Zonatan. Ɔ ti alɛ kunfuɛ dan kpa. Davidi seli kɛ Zonatan i wun kpɛ tra anunman ɲin, yɛ ɔ le wunmiɛn tra asɔmɔli. Cɛn kun’n, Zonatan wunnin Filistifuɛ’m be sonja ablaɔn (20) kpɔlɛ kun su. Kpɛkun ɔ seli i gbanflɛn ng’ɔ suɛ i alɛ ninnge mun’n kɛ: ‘Sɛ Zoova kle e nzɔliɛ kun’n, e nin be é kó kún. Yɛle kɛ sɛ Filistifuɛ’m be bɔbɔ be se e kɛ e fu e to be lɔ’n, nn e si kɛ Zoova klo kɛ e nin be e kun.’ Filistifuɛ mun be kpan seli kɛ: ‘An fu wa maan e kun!’ Ɔ maan be fuli lɔ, kpɛkun be kunnin be.

Zonatan yɛ ɔ fata kɛ ɔ sin Saili i osu di famiɛn-ɔn. Afin ɔ ti i wa kpɛn. Sanngɛ ɔ si kɛ Davidi yɛ Zoova fɛli i kɛ ɔ yo Izraɛli famiɛn’n niɔn. Ɔ nin i sɔ ngba’n, i ɲin w’a ciman Davidi. Zonatan nin Davidi be trali janvuɛ. Be seli kɛ bé kplí be wiengu ti, yɛ bé sásá be wiengu titi. Zonatan fɛli i tralɛ dan’n nin i tokofi’n nin i ta’n, ɔ nin i bo kplo’n fa mannin Davidi. Ɔ yoli sɔ fa kleli kɛ be ti janvuɛ.

Kɛ Davidi wánndi Saili i ɲrun’n, Zonatan ɔli i wun lɔ ko seli i kɛ: ‘Tra ɔ awlɛn, jran kekle. Zoova fali wɔ kɛ a yo famiɛn. Min si bɔbɔ si sɔ.’ ?A kunndɛ kɛ á ɲán janvuɛ kun m’ɔ ti kpa kɛ Zonatan sa-ɔ?

Blɛ sunman’n, Zonatan fɛli i nguan’n sieli wie nuan naan b’a kunman Davidi. Ɔ si kɛ Famiɛn Saili m’ɔ ti i si’n, ɔ kunndɛ kɛ ɔ́ kún Davidi. I sɔ’n ti’n, ɔ seli i kɛ: ‘Sɛ a kun Davidi’n, nn w’a yo sa tɛ. Davidi w’a yoman like fi.’ Saili fali ya dan kpa Zonatan wun. Kɛ ɔ cɛli kan’n, Saili nin Zonatan be ɔli alɛ kunlɛ, kpɛkun be kunnin be.

Kɛ Zonatan wuli’n, Davidi ko kunndɛli Zonatan i wa Mefibosɛti. Kɛ Davidi wunnin Mefibosɛti’n, ɔ seli i kɛ: ‘E nin ɔ si e ti janvuɛ kpa. I sɔ’n ti’n, ń má nían ɔ lika lele ɔ wie cɛn. Á wá trán min awlo wa, yɛ min nin wɔ é dí like likawlɛ.’ Davidi i wla w’a fimɛn i janvuɛ Zonatan i su le.