Izraɛlifuɛ’m be famiɛn klikli’n

Zoova fali jɔlɛ difuɛ mun sieli Izraɛlifuɛ’m be su naan be kle be atin. Sanngɛ Izraɛlifuɛ’m be kunndɛli kɛ be man be famiɛn kun. Be seli Samiɛli kɛ: ‘Nvle nga be o e wun wa’n be kwlaa be le be famiɛn mun. E kunndɛ kɛ é ɲán e famiɛn liɛ.’ Samiɛli wunnin kɛ i sɔ’n timan kpa. Ɔ boli su kleli Zoova. Zoova seli i kɛ: ‘Nán wɔ yɛ be su yi wɔ blo-ɔ. Min yɛ be su yi min blo-ɔ. Se be kɛ bé wá ɲán famiɛn kun. Sanngɛ famiɛn sɔ’n wá mían be kɛ be yo ninnge kpanngban be mɛn i.’ Be seli Samiɛli kɛ: ‘E ndɛ nunman nun, man e famiɛn kun!’

Zoova seli Samiɛli kɛ bian kun mɔ be flɛ i Saili’n, yɛ ɔ́ wá yó famiɛn klikli’n niɔn. Kɛ Saili ɔli Samiɛli i wun wunlɛ Rama lɔ’n, Samiɛli guɛli i ti su ngo naan ɔ yo famiɛn.

Kɛ ɔ cɛli kan’n, Samiɛli yiali Izraɛlifuɛ mun naan ɔ́ fá be famiɛn’n klé be. Sanngɛ be kunndɛ Saili-ɔ, be wunmɛn i. ?A si sa ti’n? Ɔ ko fiali trɔ’m be afiɛn. Kɛ be wunnin i’n, be fɛ i jrannin be afiɛn lɛ. Be wunnin kɛ Saili ti tɛnndɛn tra be kwlaa, kpɛkun ɔ ti gbanflɛn klanman. Samiɛli seli be kɛ: ‘Amun nian, sran nga Zoova fɛli i’n yɛ!’ Sran’m be kpan seli kɛ: ‘Maan wie’n wla fi famiɛn’n!’

I bo bolɛ nun’n, Saili fa ndɛ nga Samiɛli kan’n su, yɛ i ɲin yi Zoova. Sanngɛ ɔ wa kacili. I wie yɛle kɛ cɛn kun’n, Samiɛli seli i kɛ ɔ minndɛ i naan ɔ́ wá yí tɛ mán Ɲanmiɛn. Sanngɛ kɛ mɔ Samiɛli cɛli lɔ’n ti’n, Saili bɔbɔ yili tɛ’n. Kusu nn nán famiɛn’n yɛ ɔ fata kɛ ɔ yi tɛ’n niɔn. ?Ngue yɛ Samiɛli yoli-ɔ? Ɔ seli i kɛ: ‘Sa nga a yoli’n, w’a yoman kpa. Ɔ ɲin w’a yiman Zoova.’ ?Saili fali sa sɔ’n tuli i wun fɔ?

I sin’n, Saili nin Amalɛkifuɛ mun be ɔli alɛ kunlɛ. Samiɛli seli Saili kɛ nán ɔ yaci be nun wie fi nguan nun. Sanngɛ Saili w’a kunman Famiɛn Agagi. I sɔ’n ti’n, Zoova seli Samiɛli kɛ: ‘Saili w’a kaci i sin w’a si min. W’a diman ndɛ nga n kan kleli i’n su.’ Samiɛli i wla boli i wun dan. Ɔ seli Saili kɛ: ‘Kɛ mɔ ɔ ɲin yiman Zoova kun’n ti’n, ɔ́ wá síe sran uflɛ famiɛn.’ Kɛ Samiɛli kpɛ́ i wun kɔ́’n, Saili trɛli i tralɛ’n i nuan su’n, kpɛkun tralɛ’n tili. Samiɛli seli Saili kɛ: ‘Zoova w’a de famiɛn bia’n ɔ sa nun.’ Zoova wá fá famiɛn bia’n mán sran uflɛ. Sran sɔ’n ɔ́ kló Zoova, yɛ i ɲin yí i.