?Sɛ e wla o like su’n, i sɔ’n kwla uka e?

BE FLƐ ba yasua kun kɛ Daniɛli. Ɔ le afuɛ blu cɛ. Sanngɛ tukpacɛ tɛ nga be flɛ i kɛ kansɛli’n wo i wun yɛ w’a di afuɛ kun. Dɔɔtrɔfuɛ’m be waan ɔ su yoman kpa kun. I osufuɛ’m be kusu be bu i sɔ wie. Sanngɛ Daniɛli liɛ’n, ɔ se i wun kɛ ɔ́ yó juejue. Ɔ lafi su kɛ kɛ ɔ́ wá ɲín’n, ɔ́ wá úka dɔɔtrɔfuɛ mun naan be ɲan tukpacɛ sɔ’n i ayre. Kɛ ɔ tili i kɛ dɔɔtrɔfuɛ kun m’ɔ si tukpacɛ sɔ’n i su like kaka’n su ba’n, i sɔ’n yoli i fɛ kpa. Sanngɛ kɛ cɛn nga bian’n kleli’n juli’n, sa wie ti’n w’a kwlá baman. I sɔ’n bubuli Daniɛli i sa sin dan. Kɛ tukpacɛ’n yoli i’n, kpɛ klikli nga i sa sin búbú i’n yɛle ngalɛ’n. Kɛ ɔ yoli sɔ’n, i cɛn ba nɲɔn su yɛ ɔ wuli-ɔ.

Dɔɔtrɔfuɛ kun yɛ ɔ boli Daniɛli i ndɛ sɔ’n su-ɔ. Sɛ sa o e su naan e fa e wla e guɛ i like su annzɛ e sa sin bubu e’n, dɔɔtrɔfuɛ sɔ’n suannin wafa nga i bo kwla gua’n i su like. Atrɛkpa’n w’a ti Daniɛli i su ndɛ’n i wunsu wie le. Wie liɛ’n, sran kpɛnngbɛn kun m’ɔ si kɛ ɔ su wa wu’n, ɔ kunndɛ kɛ be yo ninnge wie mɔ i ɲin o be sin w’a cɛ kpa’n be mɛn i. I wie yɛle kɛ ɔ kwla se kɛ i awlɛn su sran wie wa niɛn i osu. Kɛ be ko yo i sɔ like’n be ko mɛn i’n, ɔ cɛman kpɛkun w’a wu. ?Ngue yɛ sa sɔ’m be kle e-ɔ? Sran wie’m be waan sɛ sa o sran kun su naan ɔ fɛ i wla guɛ i like su’n, i sɔ’n mɛn i wunmiɛn. ?Be ndɛ sɔ’n ti nanwlɛ?

Dɔɔtrɔfuɛ sunman be waan sɛ sa o sran kun su naan ɔ fɛ i wla guɛ i like su’n, i sɔ’n mɛn i wunmiɛn kpɛkun i wun kpɛjɛ i. Sanngɛ be ngba be nuan sɛman ndɛ sɔ’n su. Wie’m be waan bewanbewan ndɛ-ɔ. Asa ekun’n, be waan sɛ sran kun i wunnɛn yo i ya’n nɛ́n i wla m’ɔ fa guɛ i like su’n yɛ ɔ́ yó i juejue-ɔ.

Nán andɛ sa yɛ sran’m be waan be wla mɔ be fa guɛ i like su’n, ɔ ti ngbɛn-ɔn. I afuɛ akpi tra su yɛ, kɛ Glɛki lɔ fluwa sifuɛ kun m’ɔ suan Aristɔti’n kán be wla mɔ be fa guɛ i like su’n i ndɛ’n, ɔ seli kɛ: “Be nga be yo sɔ’n, ɔ ti kɛ be lafi klenzua kplɔwa su sa.” Amlɛnkɛn’m be mɛn siefuɛ kun m’ɔ suan Bɛnzamɛn Flanklɛn’n, i liɛ’n ɔ seli kɛ: “Sran ng’ɔ fɛ i wla guɛ i like su’n, i yako. Afin be ɲanman nun like fi.”

?Be sran akpasua nɲɔn sɔ mun’n, be nun onin yɛ i ndɛ yo fɛ-ɔ? ?Sɛ sran kun fɛ i wla guɛ i like kun su’n, i sɔ’n yo i wun sa ye annzɛ ɔ ti i wun yalɛ klelɛ ngbɛn?