Maan e bu Zoova i sran klolɛ dan’n i su akunndan
“M bu sa nga a yoli’n be kwlaa be akunndan.”—JUE. 77:13.
JUE: 18, 61
?WAFA SƐ YƐ AMÚN TƐ́ SU Ɔ?
?Ngue yɛ ɔ kle e kɛ Zoova klo i sufuɛ mun ɔn?
?Wafa sɛ yɛ Zoova kleli kɛ ɔ klo sran mun dan ɔn?
?Wafa sɛ yɛ e kwla kle kɛ e klo Ɲanmiɛn wie ɔ?
1, 2. (a) ?Ngue ti yɛ a wun i wlɛ kɛ Zoova klo i sufuɛ mun ɔn? (b) ?Wafa nga Ɲanmiɛn yili e’n ti’n, ngue yɛ sran kwlakwla kunndɛ ɔ?
?NGUE yɛ ɔ kle ɔ kɛ Zoova klo i sufuɛ mun ɔn? Maan e fa sa wie mun e nian. I liɛ’n, a kwla tɛ kosan sɔ’n su kpa. Be flɛ aniaan bla kun kɛ Telɛni. Aniaan’m be wlɛli i fanngan afuɛ kpanngban kpa kɛ like ng’ɔ kwlá yoman’n, nán maan ɔ se kɛ ɔ́ yó i kekle nun. Aniaan bla’n waan: “Sɛ Zoova kloman min’n, nn b’a manman min afɔtuɛ lele kɛ ngalɛ’n sa.” Be flɛ bla kun ekun kɛ Bliziti. I wun’n wuli. Ɔ maan, i kunngba yɛ ɔ tɛ i wa nɲɔn mun ɔn. Bliziti se kɛ: “Ba’m be talɛ Satan i mɛn nga nun’n, ɔ ti kekle. I li kɛ sran kunngba yɛ ɔ tɛ i mma mun’n, yɛ ɔ ti kekle dan ɔn. Sanngɛ, n wun i wlɛ kɛ Zoova klo min. Afin blɛ mɔ min wla boli min wun mɔ ń sún’n, ɔ suannin min bo. W’a kplinman su kɛ sa ng’ɔ sɔnman min nun’n, ɔ tɔ min su.” (1 Kor. 10:13) Be flɛ aniaan bla kun kɛ Sandra. Ɔ ti tukpacifuɛ. I tukpacɛ sɔ’n leman ayre, yɛ ɔ kle i yalɛ dan. Aɲia dan kun bo’n, aniaan bla kun fɛli i wun mantannin Sandra. Sandra i wun’n seli kɛ: “E simɛn i, sanngɛ wafa ng’ɔ kleli kɛ e ndɛ lo i’n, ɔ yoli e fɛ dan. Ninnge kannganngan bɔbɔ nga aniaan’m be yo man e’n, ɔ kle min kɛ Zoova klo e.”
2 Kɛ e klo sran mɔ e wun kɛ be klo e wie’n, ɔ yo e fɛ. Ɲanmiɛn yili e sɔ. Ɔ maan, kɛ e tɔ tukpacɛ’n, annzɛ e leman sika’n, annzɛ jasin nga e bo’n baman nvlɛ’n, e sa sin kwla bubu e. Afin, e kwla bu i kɛ e leman klolɛ. Sɛ i sɔ sa’n ju’n, nán e bu i kɛ Zoova kloman e. Sanngɛ, maan e wla kpɛn su kɛ e ndɛ lo i. Yɛ sɛ é kwlá sé’n, ɔ ‘sɔ e sa’ naan ɔ́ úka e. Sɛ e nin Zoova e nanti klanman titi’n, i wla su fiman e su le.—Eza. 41:13; 49:15.
3. ?Ngue yɛ sɛ e yo’n, é wún i wlɛ kɛ Zoova klo e dan ɔn?
3 Aniaan nga y’a kan be ndɛ lɛ’n, be wunnin kɛ blɛ kekle nun’n, Ɲanmiɛn jrannin be sin. E kusu e kwla wun i wlɛ kɛ Ɲanmiɛn jin e sin wie. (Jue. 118:6, 7) Like suanlɛ nga wá fá e ɲin síe i ninnge nnan mɔ be kle kɛ Zoova klo e sakpasakpa’n be su. Be yɛle (1) ninnge ng’ɔ yili be’n, (2) Ɲanmiɛn Ndɛ’n, (3) srɛlɛ mɔ e kwla srɛ i’n, yɛ (4) e ti kpɔlɛ tɛ’n. Sɛ e bu ninnge kpakpa nga Zoova yoli be’n be su akunndan’n, é wún i wlɛ kɛ Zoova klo e dan. Ɔ maan e kusu, é kló i kpa ekun.—An kanngan Jue Mun 77:12, 13 nun.
MAAN E BU NINNGE NGA ZOOVA YILI BE’N BE SU AKUNNDAN
4. ?Kɛ e nian ninnge nga Zoova yili be’n, ngue yɛ e wun i wlɛ ɔ?
4 Kɛ e nian ninnge nga Zoova yili be’n, e wun i wlɛ kɛ Zoova klo e dan. (Rɔm. 1:20) Ninnge sɔ’m be nun kun yɛle asiɛ’n. Wafa nga Ɲanmiɛn yili asiɛ’n ti’n, e kwla tran su. E ɲan like e di. I kpa bɔbɔ’n, ninnge nga e kwla di be’n, be ti fanunfanun. Kpɛkun be kwlaa be yo fɛ kpan. (Aku. 9:7) Be flɛ aniaan bla kun kɛ Katerini. Yɛ ɔ fin Kanada. Kɛ ɔ fɛ i Avrili anglo’n nun’n, lika’n yo i klanman dan. Ɔ maan, ɔ seli kɛ: “Kɛ blɛ sɔ’n nun’n a wun ijre nɔnman’n, ɔ nin anunman nga be tu ɔli nvle uflɛ nun mɔ b’a sa be sin’n, ɔ nuan bo ɔ wun. Srika’m be w’a didi ninnge mun min gbo’n i fenɛtri’n i bo. Klolɛ mɔ Zoova klo e ti’n, ɔ yoli ninnge ɲɛnmɛnɲɛnmɛn mun.” E Si Ɲanmiɛn di ninnge ng’ɔ yili be’n be su aklunjuɛ. Ɔ kunndɛ kɛ e di be su aklunjuɛ wie.—Yol. 14:16, 17.
5. ?Ngue yɛ ɔ kle kɛ Zoova klo e ɔ?
5 Zoova yili e naan e di junman naan e di i nuan like nga e ɲɛn i’n, i su aklunjuɛ. (Aku. 2:24) Kɛ ɔ yili Adam nin Ɛvu’n, ɔ seli be kɛ be wu ba naan be sɔn kpa, be di asiɛ’n su junman, yɛ be sie jue mun, ɔ nin anunman mun, ɔ nin asiɛ’n su nnɛn’m be kwlakwla. (Bob. 1:26-28) Asa ekun’n, kɛ mɔ Ɲanmiɛn yili e kɛ i bɔbɔ sa’n ti’n, e kwla fɛ i nzuɛn’n.—Efɛ. 5:1.
MAAN E BU ƝANMIƐN NDƐ’N I LIKE CINNJIN
6. ?Ngue ti yɛ ɔ fata kɛ Ɲanmiɛn Ndɛ’n yo e cinnjin ɔn?
6 Like kun ekun ng’ɔ kle kɛ Ɲanmiɛn klo e’n, yɛle i nuan ndɛ mɔ sran’m be klɛli’n. Ɲanmiɛn Ndɛ’n nun’n, e kwla si Ɲanmiɛn bɔbɔ ɔ nin wafa ng’ɔ nin sran’m be tran’n. I wie yɛle wafa ng’ɔ nin Izraɛlifuɛ mɔ be yoli ɲin kekle i su’n, be trannin’n. Jue Mun 78:38 se kɛ: “Ɔ si be aunnvuɛ, ɔ yaci be fɔnlɛ’n cɛ be, ɔ se-man kɛ ɔ́ núnnún be kun. Kpalɛ sunman ɔ trɛli i anwlɛn, ɔ guɛli i ya’n i ase, ɔ yacili ya’n.” Sɛ e bu wafa nga Zoova nin Izraɛlifuɛ’m be trannin kɛ ngalɛ sa’n i akunndan’n, é wún kɛ ɔ klo e naan ɔ yiman e ase. Nanwlɛ, maan e wun i wlɛ kɛ e ndɛ lo Ɲanmiɛn dan.—An kanngan 1 Piɛr 5:6, 7 nun.
7. ?Ngue ti yɛ ɔ fata kɛ e bu Ɲanmiɛn Ndɛ’n i like nanndoliɛ ɔ?
7 Kɛ siɛ annzɛ niɛn kun ɔ nin i wa’n be kan be klun ndɛ kle be wiengu’n, be afiɛn’n mantan kpa. Yɛ be klo be wiengu. I wafa kunngba’n, Ɲanmiɛn Zoova m’ɔ klo e’n, ɔ kɛn i klun ndɛ’n kle e. I klun ndɛ’n o Biblu’n nun. Ɔ maan, kannzɛ e wunman Ɲanmiɛn, annzɛ ɔ nin e ijɔman trele’n, sanngɛ sɛ é kwlá sé’n, e ti i aniɛn. (Eza. 30:20, 21) Ɲanmiɛn kle e atin ng’ɔ fata kɛ e fa’n, kpɛkun ɔ sasa e. Sɛ e kanngan Biblu’n nun’n, é sí Ɲanmiɛn. Kpɛkun, é fá e wla’n é guɛ́ i su.—An kanngan Jue Mun 19:8-12, ɔ nin Nyanndra Mun 1:33 be nun.
8, 9. ?Ngue yɛ Zoova kunndɛ kɛ e wun i wlɛ ɔ? An fa sa kun mɔ Biblu’n kɛn i ndɛ’n yiyi nun.
8 Zoova kunndɛ kɛ e wun i wlɛ kɛ ɔ klo e. Ɔ fɛmɛn i ɲin sieman e fɔnlɛ’m be su. Sanngɛ, like nga e yo m’ɔ ti kpa’n i su yɛ ɔ fɛ i ɲin sie ɔ. (2 Nyo. 16:9) I wie yɛle Zida famiɛn nga be flɛ i Zozafati’n i liɛ’n. Cɛn kun’n, Zozafati w’a yoman sa kpa. Yɛle kɛ, ɔ nin famiɛn Akabu be ɔli Galaadi mɛn’n nun lɔ klɔ kun mɔ be flɛ i Ramɔtu’n su naan be nin Sirifuɛ’m bé kó kún. Wunnzue yifuɛ 400 be seli Akabu kɛ sɛ be kɔ’n, bé kwlá Sirifuɛ mun. Sanngɛ, Mise m’ɔ ti Zoova i nuan ijɔfuɛ’n seli Zozafati kɛ be su kwlaman Sirifuɛ mun. Kɛ be ɔli’n, be kunnin Akabu. Ɔ ka kan naan b’a kun Zozafati wie. Kɛ Zozafati sɛli i sin Zerizalɛmu’n, Ɲanmiɛn nuan ijɔfuɛ Zei ko seli i kɛ Akabu i su m’ɔ suli’n ti’n, ɔ dili sinnzin. Sanngɛ, ɔ seli i ekun kɛ: “A buli sa kpa wie’m be akunndan yɛ a yoli be.”—2 Nyo. 18:4, 5, 18-22, 33, 34; 19:1-3.
9 Kɛ Zozafati boli i famiɛn dilɛ’n i bo’n, ɔ sunmannin i awlo lɔ sran dandan mun, nin Levifuɛ mun, nin Ɲanmiɛn nuan ijɔfuɛ mun Zida klɔ’m be su. I waan be ko kle be Zoova i mmla’n. Sran nga Zozafati sunmannin be’n, be niannin be junman’n nun be dili. Ɔ maan, nvle nga be mantan Zida lɛ’n, be sroli Zoova. (2 Nyo. 17:3-10) Ajalɛ nga cɛn kun Zozafati fali’n, w’a yoman kpa. Sanngɛ, Zoova i wla w’a fiman sa kpa ng’ɔ yoli be laa’n be su. Zozafati i wun ndɛ sɔ’n gua e awlɛn su nzue. Afin ɔ ju wie’n, e fɔn. Sanngɛ, sɛ e tu e klun e su Zoova’n, ɔ su yiman e ase. Nanwlɛ, Zoova i wla su fiman sa kpa nga e yo be’n be su le.
MAAN E BU ƝANMIƐN SRƐLƐ’N I LIKE CINNJIN KPA
10, 11. (a) ?Ngue ti yɛ e kwla se kɛ Ɲanmiɛn srɛlɛ’n ti like kpa dan ɔn? (b) ?Kɛ e srɛ Ɲanmiɛn’n, wafa sɛ yɛ ɔ kwla tɛ e su ɔ? (An nian foto ng’ɔ o kan like suanlɛ’n bo i bo lɛ’n.)
10 Siɛ ng’ɔ ti kpa’n, kɛ i wa’n klo kɛ ɔ́ kán ndɛ klé i’n, ɔ sie i su tie. Afin, ɔ kunndɛ kɛ ɔ́ sí like ng’ɔ miɛn i wa’n i sa’n naan ɔ́ níɛn i lika. I sɔ wie yɛ e Si Ɲanmiɛn Zoova yo ɔ. Kɛ e srɛ i’n, ɔ sie i su e nuan bo. I sɔ’n ti’n, maan e bu Ɲanmiɛn srɛlɛ’n i like cinnjin.
11 E kwla srɛ Ɲanmiɛn blɛ kwlaa nun. Sɛ e srɛ i kpɛ blu’n, ɔ́ síe i su kpɛ blu, afin ɔ ti e janvuɛ. Telɛni mɔ ndɛ kpɔlɛ klikli’n kɛnnin i ndɛ’n, ɔ seli kɛ: “E kwla kan ndɛ kwlaa e kle i.” Kɛ e kan e klun ndɛ e kle Ɲanmiɛn’n, ɔ tɛ e su i nuan ndɛ’n nun. Wie liɛ’n, ɔ tɛ e su fluwa nga anuannzɛ’n yi be’n be nun. Wie liɛ kusu’n, ɔ kwla fa e niaan Klistfuɛ kun wla e fanngan. Sa nga be o e su mɔ sran’m be wunman be wlɛ’n, Zoova liɛ’n, ɔ wun be wlɛ. Yɛ kɛ e srɛ i’n, ɔ sie i su e nuan bo. Wafa nga Zoova tɛ e srɛlɛ’m be su’n, ɔ kle kɛ ɔ klo e sakpa.
12. ?Ngue ti yɛ ɔ fata kɛ e bu laa Ɲanmiɛn i sufuɛ’m be srɛlɛ’n, i su akunndan ɔn? An fa be Ɲanmiɛn srɛlɛ sɔ’m be nun kun yiyi nun.
12 Ɲanmiɛn maan be klɛli i sufuɛ wie’m be srɛlɛ’n i nuan ndɛ’n nun. Sran sɔ’m be srɛlɛ’n kwla kle e like kpanngban kpa. Kɛ é sú Ɲanmiɛn awlo lɔ’n, maan cɛn kunngun e suan ndɛ nga sran sɔ’m be kan kleli Ɲanmiɛn’n i su like. Yɛ maan e bu su akunndan. Sɛ e yo sɔ’n, é sí Ɲanmiɛn srɛ́ kpa. Sran sɔ’m be nun kun yɛle Zonasi. Kɛ ɔ o jue’n i klun lɔ’n, ɔ srɛli Ɲanmiɛn aunnvuɛ su. (Zon. 2:1-11) Salomɔn kusu, kɛ ɔ́ yí Ɲanmiɛn i sua m’ɔ kplannin’n i nglo’n, ɔ srɛli Ɲanmiɛn. E kwla kanngan ndɛ ng’ɔ kannin’n nun e nian. (1 Fam. 8:22-53) Asa ekun’n, Zezi kleli i sɔnnzɔnfuɛ’m be Ɲanmiɛn srɛlɛ. Maan e bu ndɛ ng’ɔ kannin be’n, be su akunndan. (Mat. 6:9-13) I kwlaa m’ɔ yoli o, Ɲanmiɛn Ndɛ’n waan: “Like kwlaa ng’ɔ mian amun’n, an kan kle Nyanmiɛn. [...] Yɛ ɔ maan amun wun jɔ́ amun fɔuun, amun su wun-man sa ti bɔ amun wun jɔ amun fɔuun sɔ’n i bo mlɔnmlɔn.” Nanwlɛ, sɛ e srɛ Ɲanmiɛn titi’n, é kló i kpa wie titi.—Fil. 4:6, 7.
MAAN E SI E TI KPƆLƐ TƐ’N I SU YE
13. ?E ti kpɔlɛ tɛ’n i su mmlusuɛ benin yɛ sran’m be kwla ɲɛn i ɔ?
13 Ɲanmiɛn yili e ti kpɔlɛ tɛ naan “e nyan nguan.” (1 Zan 4:9) I sɔ’n kle kɛ Ɲanmiɛn klo sran dan. I sɔ’n ti, akoto Pɔlu seli kɛ: “Be nga be sro-mɛn i’n be ti Krist wuli. Kɛ sran kun wu sran kpa kun ti’n, i sɔfuɛ’n i nyanlɛ ti kekle, sanngɛ wienun-ɔn sran wie trɛ́ i anwlɛn wú sran klun-ufuefuɛ kun ti. Sanngɛ Nyanmiɛn kle ye kɛ ɔ klo e, afin kɛ e ti sa tɛ yofuɛ’n, e ti ɔ maan Krist wuli.” (Rɔm. 5:6-8) E ti kpɔlɛ tɛ mɔ Ɲanmiɛn maan Klist fɛli i wun yili’n, ɔ kle kɛ Ɲanmiɛn klo sran mun sakpa. Afin tɛ sɔ’n ti’n, sran’m be kwla fa be wun mantan Ɲanmiɛn.
14, 15. (a) ?E ti kpɔlɛ tɛ’n i su mmlusuɛ benin yɛ Klistfuɛ nga Ɲanmiɛn kpali be sieli be ngunmin’n, be ɲɛn i ɔ? (b) ?E ti kpɔlɛ tɛ’n i su mmlusuɛ benin yɛ be nga bé trán asiɛ’n su wa’n, bé ɲɛ́n i ɔ?
14 E ti kpɔlɛ tɛ’n ti’n, Ɲanmiɛn fali Klistfuɛ akpasua kaan kun yoli i liɛ. (Zan 1:12, 13; 3:5-7) Yɛle kɛ Ɲanmiɛn fɛli i wawɛ’n kpali be sieli be ngunmin. Ɔ maan, be kaci kɛ Ɲanmiɛn i “klun ba” mun sa. (Rɔm. 8:15, 16) Kɛ Pɔlu kán Klistfuɛ sɔ’m be ndɛ’n, ɔ seli kɛ ‘sran wunmuan mɔ be nin Klist Zezi be ti’n ti, Ɲanmiɛn maan be nin i be cɛnnin, yɛ ɔ́ yó maan be nin i bé trán ɲanmiɛn su lɔ.’ (Efɛ. 2:6) Kɛ mɔ Ɲanmiɛn fɛli i wawɛ’n mannin be’n ti’n, be lafi su kɛ bé ɲán anannganman nguan ɲanmiɛn su lɔ.—Efɛ. 1:13, 14; Kol. 1:5.
15 Be nga be kɔman ɲanmiɛn su mɔ sanngɛ be lafi e ti kpɔlɛ tɛ’n su’n, Ɲanmiɛn fa be yo i janvuɛ. Be kwla lafi su kɛ Ɲanmiɛn fá be káci kɛ i klun ba mun sa wie. Yɛ bé ɲán anannganman nguan asiɛ’n su. Nanwlɛ, e ti kpɔlɛ tɛ’n kle kɛ Ɲanmiɛn klo sran mun. (Zan 3:16) Sɛ e nin Ɲanmiɛn e nanti klanman titi’n, e kwla lafi su kɛ é ɲán nguan kpafuɛ’n mɛn uflɛ’n nun lɔ. E ti kpɔlɛ tɛ’n yɛ ɔ kle kpa kɛ Ɲanmiɛn klo sran mun ɔn. I sɔ’n ti, maan e bu i like nanndoliɛ.
MAAN E SI E TI KPƆLƐ TƐ’N I SU YE
16. ?Sɛ e bu ninnge kpanngban nga Zoova yo man e’n be su akunndan’n, ngue yɛ é yó ɔ?
16 Ninnge kpakpa nga Zoova yo mannin e mɔ be kle kɛ ɔ klo e’n, e siman be nuan. Famiɛn Davidi seli kɛ: “Ee Nyanmiɛn, wɔ akunndan’m be bo ti kploun o! Be sɔnnin kpanngban o! Sɛ be kan aunnyan ngba kwlaa bo nun’n, i nɔnnin tra be ngba.” (Jue. 139:17, 18) Maan e bu ninnge kpanngban nga Zoova yo man e’n be su akunndan. I liɛ’n, é kló i kpa wie. Kpɛkun, é tú e klun é sú i.
17, 18. ?Wafa sɛ yɛ e kwla kle kɛ e klo Zoova ɔ?
17 E kwla yo ninnge fanunfanun e fa kle kɛ e klo Zoova. I wie yɛle kɛ, e kwla tu e klun e kan Ɲanmiɛn Sielɛ’n i jasin fɛ’n i ndɛ. (Mat. 24:14; 28:19, 20) Kɛ sa’m be tɔ e su mɔ e tra e awlɛn’n, e kle kɛ e klo Zoova. (An kanngan Jue Mun 84:12, ɔ nin Zak 1:2-5 be nun.) Sa nga be jran e su kekle kpa bɔbɔ’n, e kwla lafi su kɛ Zoova wun be, naan ɔ́ súan e bo. Afin e ndɛ lo i dan.—Jue. 56:9.
18 ?Wafa sɛ yɛ e kwla kle kɛ e klo Zoova ɔ? Maan e bu ninnge ɲɛnmɛnɲɛnmɛn nga Zoova yili be’n be su akunndan. Maan e suan Ɲanmiɛn Ndɛ’n nun like e fa kle kɛ ɔ ti e like cinnjin. Yɛ maan e srɛ Zoova titi naan e nin i e afiɛn’n mantan. Asa ekun’n, maan e bu e ti kpɔlɛ tɛ’n i su akunndan naan e si su ye. (1 Zan 2:1, 2) Nanwlɛ, ninnge nga e kwla yo e kle kɛ e klo Zoova naan e si ye’n, be nun wie yɛ ɔ o lɛ ɔ.