Lafi su kɛ Zoova klo wɔ sakpa

1. ?Ngue ti yɛ a fali ɔ wun mannin Zoova-ɔ? (An nian foto’n wie.)

?Ɔ WLA te kpɛn cɛn nga a fali ɔ wun mannin Zoova mɔ be yoli ɔ batɛmun’n su? Kɛ mɔ a sili i mɔ kusu a kloli i’n, i ti yɛ a fali ajalɛ sɔ’n niɔn. A tɛli i nda kɛ i sulɛ’n yó ɔ́ cinnjin trá like kwlaa, naan á fá ɔ awlɛn’n kwlaa, nin ɔ nguan’n kwlaa, nin ɔ akunndan’n kwlaa, ɔ nin ɔ wunmiɛn’n kwlaa kló i titi. (Mar. 12:30) Kɛ ɔ fɛli i lɛ’n, kɛ afuɛ’m bé sín’n nn á kló i kpa trá laa’n. Ɔ maan sɛ sran kun usa ɔ kɛ “a klo Zoova sakpa’n,” ɔ ja nun lɛ’n, á tɛ́ i su kɛ: “Wafa nga n klo Zoova’n, like fi tomɛn i.”

2-3. (1) ?Ngue yɛ Zoova kunndɛ kɛ e wun i wlɛ weiin-ɔn? (2) ?Kosan benin mun yɛ é wá tɛ́ be su like suanlɛ nga nun-ɔn? (Zeremin 31:3)

² ?Sanngɛ yo, sɛ sran kun usa ɔ kɛ “a lafi su kɛ Zoova klo wɔ’n,” á tɛ́ su sɛ? ?Á sísí ɔ bo naan w’a tɛ su? Sɛ ɔ ti sɔ’n nn atrɛkpa’n, a se ɔ wun kɛ Zoova kwlá kloman ɔ ti-ɔ. I wie yɛle aniaan bla kun m’ɔ wunnin ɲrɛnnɛn i bakan nun’n i liɛ’n. Ɔ seli kɛ: “N si kɛ n klo Zoova. Min akunndan’n timan nɲɔnnɲɔn i sɔ liɛ’n su kaan sa. Sanngɛ blɛ sunman’n, n lafiman su kɛ Zoova klo min sakpa.” ?Sɛ Zoova klo ɔ sakpa annzɛ ɔ kloman wɔ’n, á yó sɛ naan w’a wun i wlɛ?

³ Zoova kunndɛ kɛ a wun i wlɛ weiin kɛ ɔ klo ɔ sakpa. (An kanngan Zeremin 31:3 nun.) Zoova yɛ ɔ cuɛnnin wɔ bɛli i wun-ɔn. Yɛ kɛ a fali ɔ wun mɛnnin i mɔ be yoli ɔ batɛmun’n, a ɲannin like cinnjin kpa kun. Like sɔ’n yɛle klolɛ dan m’ɔ klo wɔ’n. Yɛ klolɛ m’ɔ klo wɔ dan’n ti’n, ɔ su kpɔciman wɔ le. Klolɛ dan mɔ Zoova klo i sufuɛ nanwlɛfuɛ mun’n ti’n, ɔ fa be yo i “awlɛn su like.” (Mal. 3:17) Ɔ maan a ti Zoova i awlɛn su sran. Zoova kunndɛ kɛ a lafi su kpa kɛ ɔ klo wɔ, kɛ nga akoto Pɔlu fa lafili su’n sa. Kɛ mɔ Pɔlu lafili su kpa kɛ Zoova klo i’n ti’n, ɔ seli kɛ: “N lafi su kpa kɛ wie’n, annzɛ nguan’n, annzɛ anzi mun, annzɛ awa mun, annzɛ andɛ sa mun, annzɛ ainman sa mun, annzɛ be nga be le tinmin’n, annzɛ nglo lɔ like, annzɛ asiɛ’n bo lɔ like, annzɛ like uflɛ fi su kwlá yoman naan Ɲanmiɛn w’a kloman e kun.” (Rɔm. 8:38, 39) ?Ngue ti yɛ ɔ ti cinnjin kɛ e lafi su kpa kɛ Zoova klo e sakpa-ɔ? ?Yɛ ngue yɛ e kwla yo naan y’a lafi i sɔ liɛ’n su kpa-ɔ? Like suanlɛ nga nun’n, é wá tɛ́ kosan sɔ’m be su.

?NGUE TI YƐ Ɔ TI CINNJIN KƐ E LAFI SU KƐ ZOOVA KLO E SAKPA-Ɔ?

4. ?Ngue yɛ e kwla yo naan Satan w’a lakaman e-ɔ?

⁴ Satan yo ‘ninnge mun gblɛ nun fa laka sran mun.’ Ɔ maan sɛ e lafi su kɛ Zoova klo e sakpa’n, ɔ su kwlá lakaman e. (Efɛ. 6:11) Satan yo like kwlaa ng’ɔ kwla yo naan y’a suman Zoova’n. Like kun m’ɔ yo’n, yɛle kɛ ɔ yo naan e bu i kɛ Zoova kloman e. Sanngɛ i sɔ’n ti ato. Biblu’n se kɛ Satan ti kɛ asɔmɔli sa. (1 Piɛ. 5:8, 9) Blɛ sunman’n nnɛn nga be ti fakafaka annzɛ be leman wunmiɛn’n, be yɛ asɔmɔli’m be klo be tralɛ-ɔ. I sɔ yɛ Satan yo-ɔ. Ɔ ju wie’n, sa nga be tɔli e su laa’n, annzɛ sa nga be o e su dɔ nga su’n, annzɛ e ɲrun lɔ liɛ’n ti’n, e koko dan yɛ e wla bo e wun. Kɛ Satan wun i sɔ’n, kpɛkun w’a fɛ i ɲin w’a wɔ e. Satan se i wun kɛ sɛ ɔ bubu e sa sin lele’n, é yáci Zoova sulɛ. (Ɲan. 24:10) I sɔ’n ti’n, maan e yo like kwlaa ng’ɔ fata kɛ e yo naan y’a lafi su kpa kɛ Zoova klo e sakpa’n. I liɛ’n, é kwlá ‘jrán Suɛn Tɔnfuɛ’n i ɲrun kekle,’ yɛ ɔ su kwlá lakaman e.—Zak. 4:7.

5. ?Ngue ti yɛ ɔ ti cinnjin kɛ e wun i wlɛ weiin kɛ Zoova klo e naan e ndɛ lo i dan-ɔn?

⁵ Sɛ e lafi su kpa kɛ Zoova klo e sakpa’n, e kwla fa e wun e mɛntɛn i kpa. ?Ngue ti yɛ e se sɔ-ɔ? Wafa nga Zoova yili e’n ti’n, ɔ ti cinnjin kɛ e kle kɛ e klo e wiengu mun. Yɛ ɔ ti cinnjin kɛ e wun kɛ e wiengu’m be klo e wie. Kɛ sran kun kle kɛ ɔ klo e’n, i sɔ’n su e bo maan e klo i wie. I sɔ’n kle kɛ sɛ e wun i wlɛ weiin kɛ Zoova klo e naan e ndɛ lo i dan’n, e kusu é kló i kpa wie. (1 Zan 4:19) Yɛ kɛ é kló i kpa é kɔ́ e ɲrun’n, nn i kusu kló e kpa wie. Biblu’n se kɛ: “An fa amun wun mantan Ɲanmiɛn, yɛ ɔ́ fɛ́ i wun mántan amun.” (Zak. 4:8) ?Sanngɛ ngue yɛ e kwla yo naan y’a lafi su kpa kɛ Zoova klo e sakpa-ɔ?

?NGUE YƐ E KWLA YO NAAN Y’A LAFI SU KƐ ZOOVA KLO E SAKPA-Ɔ?

6. ?Sɛ a lafiman su kɛ Zoova klo wɔ sakpa’n, ngue yɛ a kwla yo-ɔ?

⁶ Srɛ Zoova tankaan kpa naan ɔ uka ɔ naan a wun i wlɛ kɛ ɔ klo wɔ. (Lik. 18:1; Rɔm. 12:12) Ɔ wun akunndan nga Zoova bu’n, srɛ i kɛ ɔ uka wɔ naan a bu akunndan kunngba sɔ’n wie. Sɛ ɔ nin i fata’n, aliɛ ba kwlaa nun’n, fa wlɛ i srɛlɛ’n nun kpɛ sunman. Atrɛkpa’n ɔ akunndan m’ɔ bu ɔ fɔ’n ti’n, kɛ ɔ yo naan a lafi su kɛ Zoova klo wɔ’n, ɔ ti kekle. Sanngɛ maan ɔ wla kpɛn su kɛ Ɲanmiɛn ti dan tra ɔ klun akunndan’n. (1 Zan 3:19, 20) Ɔ nzuɛn kpa nga atrɛkpa’n ɔ bɔbɔ a siemɛn i nzɔliɛ’n, Zoova liɛ’n ɔ wun i. (1 Sam. 16:7; 2 Ɲol. 6:30) I sɔ’n ti’n, ndɛ kwlaa ng’ɔ o ɔ awlɛn’n nun’n, nán sisi ɔ bo naan ‘w’a kan w’a kle’ i. Yɛ srɛ i kɛ ɔ uka wɔ naan a lafi su kɛ ɔ klo wɔ sakpa. (Jue. 62:8) Kɛ a ko srɛ i’n, ɔ ti cinnjin kɛ a nanti afɔtuɛ nga’m be su.

7-8. ?Wafa sɛ yɛ ndɛ ng’ɔ o Jue Mun fluwa’n nun’n, ɔ kle kɛ Zoova klo e-ɔ?

⁷ Lafi ndɛ nga Zoova kan’n su. Ɔ fɛli i wawɛ’n mannin be nga be klɛli Biblu’n naan be kan sran wafa ng’ɔ ti’n i ndɛ weinwein. Maan e fa e ɲin e sie i Zoova i su ndɛ wie mɔ Davidi kannin’n be su. Ɔ seli kɛ: “Zoova mantan be nga be awlɛn w’a kpɔtɔ be klun’n, ɔ de be nga be sa sin w’a bubu be’n.” (Jue. 34:18, jnd.) Kɛ ɔ wla bo ɔ wun’n, ɔ kwla yo wɔ kɛ w’a ka ɔ liɛ ngunmin sa. Sanngɛ Zoova se kɛ blɛ kɛ ngalɛ sa’m be nun’n, ɔ si kɛ a mian ukalɛ wun dan, yɛ ɔ kunndɛ kpa kɛ ɔ́ úka wɔ. Davidi seli ekun kɛ: “Fa ɔ nzue kplo’n sɔ min ɲinmuɛn nzue’n.” (Jue. 56:8) Zoova wun fɛfɛlɛ nga a fɛfɛ’n. Ɔ ndɛ lo i dan. Ɔ maan kɛ sa o ɔ su’n, i sɔ’n kpɔtɔ i awlɛn’n. Ɔ ɲinmuɛn nzue ng’ɔ gua’n, ɔ bu i like dan, kɛ sran kun m’ɔ o aawlɛ flɛnnɛn’n nun’n i nzue m’ɔ o nzue kplo’n nun’n sa. Asa’n Davidi seli Zoova kɛ: “A si sa kwlaa nga n yo’n.” (Jue. 139:3) Zoova si sa kwlaa nga a yo’n, sanngɛ sa nga a yo m’ɔ ti kpa’n, i su yɛ ɔ fɛ i ɲin sie-ɔ. (Ebr. 6:10) Afin ɔ bu ɔ ɲin mɔ a mian naan w’a yo i klun sa’n i like dan.a

⁸ Biblu’n nun ndɛ kɛ ngalɛ sa’m be gua e awlɛn su nzue dan. Afin be kle e kɛ e ndɛ lo Zoova naan ɔ klo e dan. Sanngɛ kɛ nga e fa wunnin i’n sa’n, Satan kunndɛ kɛ ɔ́ láka wɔ naan a bu i kɛ Zoova kloman wɔ. I sɔ’n ti’n, sɛ ɔ ju wie’n, a lafiman su kɛ Zoova klo wɔ sakpa’n, jran kan naan usa ɔ wun kɛ: ‘?Satan m’ɔ ti “ato buafuɛ’m be si’n” i ndɛ liɛ’n su yɛ ń fá, annzɛ “Ɲanmiɛn m’ɔ di nanwlɛ’n” i liɛ’n su yɛ ń fá-ɔ?’—Zan 8:44; Jue. 31:5.

9. ?Ngue ndɛ yɛ Zoova kannin m’ɔ gua be nga be klo i’n be awlɛn su nzue-ɔ? (Ezipti Lɔ Tulɛ 20:5, 6)

⁹ Kɛ sran kun klo Zoova’n, wafa nga i sɔ’n yo i’n, bu i akunndan nian. I lɛ nun’n, maan e fa e ɲin e sie i ndɛ nga Zoova kan kleli Moizi nin Izraɛlifuɛ mun’n su. (An kanngan Ezipti Lɔ Tulɛ 20:5, 6 nun.) Zoova seli kɛ ɔ́ kló be nga be kle kɛ be klo i’n be titi. Ɔ maan sɛ sran kun kle kɛ ɔ klo i’n, saan klolɛ cɛ yɛ ɔ́ kló i wie. (Nee. 1:5) I sɔ’n ti’n, sɛ ɔ ju wie naan ɔ yo ɔ kɛ Zoova kloman wɔ’n, usa ɔ wun kɛ: ‘?N klo Zoova sakpasakpa?’ Sɛ a klo i sakpasakpa naan a mian ɔ ɲin yo sa nga be jɔ i klun’n, lafi su kɛ i kusu klo ɔ dan. (Dan. 9:4; 1 Kor. 8:3) ?I yo, sɛ a nian ɔ klun lɔ siin naan a klo Zoova’n, ngue ti yɛ a lafiman su kɛ ɔ klo wɔ wie-ɔ? Nanwlɛ, a kwla lafi su kɛ ɔ́ kló wɔ titi naan ɔ su yiman ɔ ase le.

10-11. ?Wafa sɛ yɛ Zoova kunndɛ kɛ a bu e ti kpɔlɛ tɛ’n niɔn? (Galasifuɛ Mun 2:20)

¹⁰ Bu e ti kpɔlɛ tɛ’n i su akunndan kpa. Like dan kpafuɛ ng’ɔ leman wunsu mɔ Zoova fa cɛli klɔ sran mun’n, yɛle e ti tɛ m’ɔ fɛli i Wa Zezi Klisi yili’n. (Zan 3:16) Ɔ bɔbɔ ɔ dunman nun wie ti yɛ ɔ yili tɛ sɔ’n niɔn. Nán ɔ wla fi akoto Pɔlu i su ndɛ’n su. Kwlaa naan w’a kaci Klisifuɛ’n, ɔ yoli sa tɛ dan. Kɛ ɔ wa kacili Kisifuɛ bɔbɔ’n, ɔ miɛnnin i ɲin titi naan w’a kwla wlɛ i ayeliɛ wie mɔ be timan kpa’n be ase. (Rɔm. 7:24, 25; 1 Tim. 1:12-14) Sanngɛ ɔ lafili su kpa kɛ i bɔbɔ i dunman nun wie ti yɛ Zoova fɛli i Wa’n yili e ti tɛ’n niɔn. (An kanngan Galasifuɛ Mun 2:20 nun.) Nán ɔ wla fi su kɛ Zoova yɛ ɔ fɛli i wawɛ’n mannin Pɔlu naan ɔ klɛ ndɛ sɔ mun-ɔn. E like klelɛ ti yɛ ɔ yoli maan Pɔlu klɛ ndɛ sɔ mun-ɔn. (Rɔm. 15:4) Zoova kunndɛ kɛ a wun i wlɛ weiin kɛ ɔ bɔbɔ ɔ dunman nun wie ti yɛ ɔ fɛli i Wa’n yili tɛ’n niɔn. Sɛ a wun i sɔ liɛ’n i wlɛ weiin’n, i sɔ’n úka ɔ naan w’a lafi su kpa kɛ Zoova klo wɔ sakpa.

¹¹ É lá Zoova i ase, afin ɔ sunmannin Zezi kɛ ɔ bla asiɛ’n su naan ɔ wa wu e dunman nun. Sanngɛ ɔ sunmɛnnin i kɛ ɔ wa kle sran’m be like naan be si i su ndɛ nanwlɛ’n wie. (Zan 18:37) Ndɛ nanwlɛ sɔ’n i kun yɛle klolɛ mɔ Zoova klo i mma mun’n.

WAFA NGA ZEZI UKA E NAAN Y’A LAFI SU KƐ ZOOVA KLO E SAKPA’N

12. ?Ngue ti yɛ e kwla lafi Zoova i su ndɛ nga Zezi kannin’n su-ɔ?

¹² I nun mɔ Zezi o asiɛ’n su’n, ɔ kannin sran wafa nga Zoova ti’n i ndɛ weinwein kleli sran mun. (Lik. 10:22) Zoova i su ndɛ nga Zezi kannin’n, e kwla lafi su. Afin ɔ nin Zoova be trannin ɲanmiɛn su lɔ afuɛ miliaa kpanngban kpa ka naan w’a ba asiɛ’n su wa. (Kol. 1:15) Ɔ wunnin kɛ Zoova klo i dan. Asa’n ɔ wunnin kɛ Zoova klo anzi nin klɔ sran nga be nin i nanti klanman’n be dan. ?Wafa sɛ yɛ Zezi uka e naan y’a lafi su kɛ Zoova klo e sakpa-ɔ?

13. ?Ngue yɛ Zezi kunndɛ kɛ e wun i wlɛ-ɔ?

¹³ Zezi kunndɛ kɛ e wun e wun akunndan nga Zoova bu’n i wlɛ. Ndɛ nga Matie nin Marki nin Liki nin Zan be klɛli’n nun’n, Zezi flɛli Zoova kɛ “Siɛ,” annzɛ “e Si” kpɛ 160 tra su. Kɛ ɔ́ kán ndɛ klé i sɔnnzɔnfuɛ mun’n, blɛ sunman’n ɔ se kɛ “amun Si,” annzɛ “amun Si m’ɔ o ɲanmiɛn su lɔ’n.” (Mat. 5:16; 6:26) Kwlaa naan Zezi w’a ba asiɛ’n su wa’n, Zoova i sufuɛ’m be flɛli Zoova kɛ “Ɲanmiɛn m’ɔ Kwla Like Kwlaa Yo’n,” annzɛ “Ɲanmiɛn m’ɔ o Like Kwlaa Ti Su’n,” annzɛ e “Yifuɛ Dan’n.” Sanngɛ Zezi liɛ’n, blɛ sunman’n ɔ flɛli Zoova kɛ e “Si.” I sɔ’n kle kɛ Zoova kunndɛ kɛ i sufuɛ’m be fa be wun be mɛntɛn i, kɛ nga siɛ kpa kun nin i mma’m be afiɛn’n fa mantan’n sa. Nanwlɛ, Zezi kunndɛ kɛ e wun i wlɛ kɛ Zoova klo e dan, kɛ siɛ kpa kun fa klo i mma mun’n sa. Maan e fa e ɲin e sie i ndɛ nga Zezi kannin be’n be nun nɲɔn be su. Ndɛ sɔ’m be nun’n, ɔ flɛli Zoova kɛ e “Si” annzɛ “Siɛ.”

14. ?Wafa sɛ yɛ Zezi kleli kɛ e tinuntinun’n e ndɛ lo e Si Ɲanmiɛn dan-ɔn? (Matie 10:29-31) (An nian desɛn’n wie.)

¹⁴ Maan e dun mmua e fa e ɲin e sie i ndɛ nga Zezi kannin m’ɔ o Matie 10:29-31 nun’n su. (An kanngan nun.) Ndrofia’n ti anunman kaan kun. Ndrofia’m be kwlá kloman Zoova le naan se kɛ bé sú i. Sanngɛ Zezi seli kɛ sɛ anunman kanngan sɔ’m be nun kun sa tɔ’n, e Si Ɲanmiɛn si nun. Sɛ Zoova i ɲin kpaman anunman sɔ’m be nun kun sa su’n, nán e mɔ e klo i kpɛkun e su i’n, yɛ ɔ su buman e wie-ɔ. Asa’n Zezi seli kɛ e timuɛn bɔbɔ’n, e Si Ɲanmiɛn si i nuan. Kɛ mɔ Zoova i ɲin kpaman e wunnɛn’n su ninnge kanngan mun bɔbɔ’n be su’n ti’n, e kwla lafi su kpa kɛ ɔ klo e dan. Nanwlɛ, Zezi kunndɛ kɛ e wun i wlɛ weiin kɛ e tinuntinun e ndɛ lo e Si Ɲanmiɛn dan.

15. ?Ngue yɛ e Si Ɲanmiɛn i su ndɛ nga Zezi kannin m’ɔ o Zan 6:44 nun’n, ɔ kle wɔ-ɔ?

¹⁵ Zezi i ndɛ kun ekun nun’n, kɛ ɔ́ kán Zoova i ndɛ’n ɔ seli kɛ “Siɛ.” (An kanngan Zan 6:44 nun.) Ɔ Si Ɲanmiɛn bɔbɔ yɛ ɔ ukali wɔ naan w’a si i naan w’a klo i-ɔ. ?Ngue ti yɛ ɔ yoli sɔ-ɔ? Ɔ niannin ɔ awlɛn’n nun, yɛ ɔ wunnin kɛ a ti sran kpa ti-ɔ. (Yol. 13:48) Kɛ Zezi kán ndɛ ng’ɔ o Zan 6:44 nun’n, atrɛkpa’n ndɛ nga Zoova kannin m’ɔ o Zeremin 31:3 nun mɔ e like suanlɛ nga taka su’n, i akunndan yɛ ɔ buli-ɔ. Ndɛ mma sɔ’n nun’n, Zoova seli kɛ: “Klolɛ mɔ n klo wɔ dan’n ti yɛ n cuɛnnin wɔ n bali min wun-ɔn [annzɛ, n kleli titi kɛ n klo wɔ naan n su kpɔciman wɔ le.]” (Zer. 31:3; jnd.; an nian Oze 11:4.) Bu ndɛ sɔ’n i akunndan nian. Ɔ nzuɛn kpa nga ɔ bɔbɔ a siemɛn i nzɔliɛ’n, e Si Ɲanmiɛn liɛ’n ɔ wun i.

16. (1) ?Ngue yɛ Zezi kunndɛ kɛ a wun i wlɛ-ɔ? (2) ?Yɛ ngue ti yɛ ɔ fata kɛ a lafi i ndɛ’n su-ɔ? (3) ?Ngue yɛ a kwla yo naan w’a lafi su kɛ e Si Zoova leman wunsu-ɔ? (Nian kuku nga be flɛ i “Siɛ nga sran kwlakwla kunndɛ’n” nun.)

¹⁶ Kɛ Zezi kán Zoova i ndɛ m’ɔ se kɛ ɔ ti e Si’n, ɔ kunndɛ kɛ a wun i wlɛ kɛ, Zoova timɛn i ngunmin i Si, naan ɔ ti ɔ bɔbɔ ɔ Si wie. Zezi kunndɛ kɛ a wun i wlɛ kɛ Zoova klo wɔ naan ɔ ndɛ lo i dan. Ɔ maan sɛ cɛn kunngun’n, ɔ yo wɔ kɛ Zoova kloman wɔ’n, maan ɔ wla kpɛn ndɛ nga Zezi kannin’n su. Kpɛkun usa ɔ wun kɛ: ‘?Zezi m’ɔ di nanwlɛ titi mɔ kusu ɔ si Siɛ’n i kpa tra sran kwlaa’n, ɔ fataman kɛ n lafi i ndɛ’n su?’—1 Piɛ. 2:22.

YO LIKE KWLAA NGA A KWLA YO NAAN W’A LAFI SU KPA TITI KƐ ZOOVA KLO WƆ’N

17. ?Ngue ti yɛ ɔ ti cinnjin kɛ e yo like kwlaa nga e kwla yo naan y’a lafi su kpa titi kɛ Zoova klo e-ɔ?

¹⁷ Maan e yo like kwlaa nga e kwla yo naan y’a lafi su kpa titi kɛ Zoova klo e’n. Afin kɛ nga e fa wunnin i’n sa’n, Satan yo like kwlaa ng’ɔ kwla yo naan e sa sin w’a bubu e naan y’a yaci Zoova i sulɛ’n. Ɔ kunndɛ kɛ ɔ́ láka e naan e bu i kɛ Zoova kloman e. Nán e lo e wun e man Satan naan ɔ laka e.—Zɔb. 27:5.

18. ?Ngue yɛ a kwla yo naan w’a lafi su kpa titi kɛ Zoova klo wɔ-ɔ?

¹⁸ Kɛ ɔ ko yo naan w’a lafi su kpa titi kɛ Zoova klo wɔ’n, srɛ i kɛ ɔ uka ɔ naan ɔ wun akunndan ng’ɔ bu’n a wun i wlɛ. Biblu’n nun ndɛ nga be kle kɛ Zoova klo be nga be klo i’n, bu be su akunndan kpa. Maan ɔ tran ɔ klun titi kɛ, sɛ sran kun klo Zoova’n, saan Zoova kló i wie. Nán maan ɔ wla fi su kɛ ɔ bɔbɔ ɔ dunman nun wie ti yɛ ɔ fɛli i Wa’n yili e ti tɛ-ɔ. Asa’n lafi su kɛ Zoova ti ɔ Si, kɛ nga Zezi fa kannin’n sa. I liɛ’n, sɛ sran wie usa ɔ kɛ “a lafi su kɛ Zoova klo wɔ’n,” a su sisiman ɔ bo, á tɛ́ i su kɛ: “Ɛɛn-ɛn! N lafi su kɛ ɔ klo min. Min kusu n mian min ɲin cɛn kwlakwla naan ń klé i kɛ n klo i wie.”