Ɲanmiɛn nuan ndɛ nga oze kannin’n, ɔ uka e maan e nin Ɲanmiɛn e nanti
‘Be nga be bo be sanndili’n, bé wá sú Zoova su.’—OZE 11:10.
1. ?Ɲanndra nun anɔ yilɛ mennin yɛ e wun i Oze fluwa’n nun ɔn?
?AMUN klo anɔ yilɛ mɔ i nun anɔ yifuɛ’m be yo abonuan like kpɔkun be cici sran’m be wun’n? Yoo, sɛ ɔ ti sɔ’n, Biblu’n nun fluwa nga Oze klɛli’n kan abonuan sa kekle kun i ndɛ.a Anɔ yilɛ sɔ’n kan sa ng’ɔ juli Ɲanmiɛn nuan ijɔfuɛ Oze i awlobo nun’n, i ndɛ. Ndɛ sɔ’n, be fa sunnzunnin aenguɛ nga Moizi Mmla’n maan Zoova nin Izraɛli nvle’n be trali’n.
2. ?Ngue ndɛ yɛ e si i Oze su ɔ?
2 Oze fluwa’n i ndɛ tre 1 nun’n, e wun lika nga be yili anɔ sɔ’n. Atrɛkpa’n, Oze trannin Izraɛli akpasua blu m’ɔ o nglo lɔ lika nun’n, i nun. (Blɛ sunman nun’n, Efraimu akpasua m’ɔ ti be nun dan’n, yɛ be fa flɛ nglo lɔ famiɛn diwlɛ sɔ’n niɔn.) Izraɛli famiɛn nso kasiɛn mun, ɔ nin Oziasi, nin Zɔtamu, nin Akazi, ɔ nin Ezekiasi mɔ be kwlaa be yoli Zida famiɛn’n be blɛ su yɛ Oze dili Ɲanmiɛn nuan ijɔfuɛ junman’n niɔn. (Oze 1:1) I sɔ’n ti’n, blɛ nga ɔ ijɔli Ɲanmiɛn nuan’n, sɛ be waan w’a sɔnman’n, yɛle afuɛ 59. Kannzɛ bɔbɔ be wieli Oze i fluwa’n i klɛ afuɛ 745 nun ka naan Zezi i blɛ w’a ju’n, sanngɛ i nun ndɛ’n ti cinnjin kpa man e andɛ. Afin sran akpinngbin be fa ndɛ ng’ɔ o yɛ’n su. Ndɛ sɔ’n waan: ‘Be nga be bo be sanndili’n, bé wá sú Anannganman su.’—Oze 11:10.
Like nga Oze fluwa’n yi i nglo’n
3, 4. Ndɛ ng’ɔ o Oze fluwa’n i ndɛ tre 1 lele m’ɔ́ fá jú 5 nun’n, amun yiyi nun kpe kan.
3 Kɛ e fa Oze fluwa’n i ndɛ tre 1 lele 5 su’n, i bue sɔ’n wla e fanngan maan e jran su kpa kɛ e nin Ɲanmiɛn é nánti, yɛ é láfi i su wie. Kpɔkun e jran su kɛ é yó Ɲanmiɛn klun sa’n. Izraɛli nvle’n fɔnnin Ɲanmiɛn wun. Yɛle kɛ sɛ é kwlá sé’n, ɔ nin bian uflɛ be lali. Sanngɛ sɛ be yaci be sa tɛ’n, Ɲanmiɛn kusu wá yáci be wun sa tɛ’n cɛ́ be. I sɔ’n yɛ sa ng’ɔ juli Oze nin i yi Gɔmɛli su’n, ɔ yi i nglo ɔ. Yɛle kɛ, kɛ ɔ wuli ba kun mannin Oze’n, kpɔkun atrɛkpa’n, ɔ ko wuli gua su ba uflɛ nɲɔn. Sanngɛ kɛ nga Zoova seli Oze kɛ ɔ yo sa’n, i yi sɔ m’ɔ nin bian uflɛ be lali’n, ɔ fɛli i ekun. I sɔ’n kle kɛ sɛ Izraɛlifuɛ’m be yaci be sa tɛ’n, Zoova kusu ɔ́ sɔ́ be nun ekun.—Oze 1:1–3:5.
4 Sɛ Zoova waan ɔ nin Izraɛli nvle’n be le i’n, i su ɔ. Afin, be wunman sran nanwlɛfuɛ nin aklunyefuɛ kun nvle’n nun. Kpɔkun nvle nunfuɛ’m be wie fi be siman Ɲanmiɛn kun. Amuɛn nga Izraɛli nvle’n sɔ be mun, ɔ nin sa sukusuku ngunmin nga Zida nvle’n yo be’n ti’n, Zoova wá úsa be sa. Sanngɛ kɛ ‘ɲrɛnnɛn’n ko tɔ Ɲanmiɛn i nvle’n su’n,’ kpɔkun be su kunndɛ Zoova sin atin.—Oze 4:1–5:15.
Anɔ yilɛ’n i bo tulɛ
5, 6. (a) ?Wafa sɛ yɛ tekle silɛ’n, ɔ truli Izraɛli nvle akpasua blu’n nun ɔn? (b) ?Ngue ti yɛ ndɛ nga be kan kleli laa Izraɛli’n ti e liɛ wie andɛ ɔ?
5 Ɲanmiɛn seli Oze kɛ: ‘Ko ja tekle bla kun naan a nin i be wu wlaka ba. Afin min sran nga be o min mɛn’n nun’n, tekle’n yɛ be si ɔ. Sa ti mɔ n se kɛ be si tekle’n yɛle kɛ, be kacili be sin be sili min, kpɔkun amuɛn mun yɛ be sɔ be ɔ.’ (Oze 1:2) ?Wafa sɛ yɛ tekle silɛ’n truli Izraɛli nvle’n nun ɔn? E kɛnngɛn i kɛ: ‘[Izraɛli nvle akpasua blu’n] be wlaka bolɛ sɔ’n ti be nin min e afiɛn’n tili nun. Amun mma mmla’m be si tekle, yɛ amun sewi’m be kunndɛ be wiengu’m be wun mun. Amun yasua’m be bɔbɔ yɛ amun cuɛn mmla’m be kɔ klɛ nun, yɛ ninnge nga amun fa man amuɛn mun’n yɛ amun nin tekle nga be o sua’m be nun’n be di ɔ.’—Oze 4:12-14.
6 Tekle silɛ’n, ɔ truli Izraɛli nvle nun kpa. Yɛle kɛ be ɲin jrɛiin su sa’n, be si tekle, yɛ sɛ é kwlá sé’n, Ɲanmiɛn ninnge’m be nun’n, be si tekle wie. Ɔ maan, ɔ nin i fatali kɛ Zoova ‘kle Izraɛlifuɛ’m be nun.’ (Oze 1:4; 4:9) Ndɛ sɔ’n ti e liɛ wie. Afin, be nga be yo sa sukusuku’n, mɔ be suman Zoova kɛ ɔ nin i fata’n sa’n, Zoova nin be le i. Sanngɛ be nga be nin Ɲanmiɛn be nanti mɔ be fɛ i mmla’n su naan b’a su i kpa’n, be si kɛ ‘sran nga be ti bla nin bian kunndɛfuɛ’m be su tranman be nga Klist nin Ɲanmiɛn síe be’n be nun wie.’—Efɛzfuɛ Mun 5:5; Zak 1:27.
7. ?Like mennin i nzɔliɛ yɛle Oze nin i yi Gɔmɛli be aja’n?
7 I nun mɔ Oze já Gɔmɛli’n, nn ɔ nin a siman bian. Ɔ yoli bla kpa lele naan w’a ‘wu i wa yasua’n.’ (Oze 1:3) Kɛ nga e fa wun i anɔ yilɛ nga m’ɔ ti nzɔliɛ like yɛ nun’n sa’n, kɛ Izraɛlifuɛ’m be fin lomuɛn nun Ezipti lɔ fiteli afuɛ 1513 nun ka naan Zezi blɛ’n w’a ju’n, Ɲanmiɛn nin Izraɛli nvle’n be trali aenguɛ wafa kun kɛ nga sa. Aenguɛ sɔ maan sɛ é kwlá sé’n, be wluli aja weiin kun nun. Izraɛlifuɛ’m be kusu be kplinnin aenguɛ sɔ’n su. Ɔ ti kɛ nn be seli Zoova kɛ ‘ɔ ti be wun,’ naan be su kunndɛman bian i bo le. (Ezai 54:5) Nanwlɛ, Oze nin i yi Gɔmɛli be aja klanman sɔ’n yɛ ɔ ti Ɲanmiɛn nin Izraɛli nvle’n be ɲanndra nun aja sɔ’n, i nzɔliɛ’n niɔn. Sanngɛ ninnge’m be wa kacili!
8. ?Wafa sɛ yɛ be takali Izraɛli nvle akpasua blu’n niɔn? ?Yɛ ngue ndɛ yɛ e kwla kɛn i be Ɲanmiɛn sulɛ’n su ɔ?
8 Oze i yi ‘Gɔmɛli wunnzɛli ekun, ɔ wuli ba bla kun.’ Ba bla sɔ’n, ɔ nin ba uflɛ nga Oze i yi’n wá wú i’n, atrɛkpa’n, bé yó gua su ba. Ɔ kunndɛli bian Oze bo yɛ ɔ wuli be ɔ. (Oze 1:6, 8) Kɛ mɔ Gɔmɛli ti Izraɛli nvle’n i nzɔliɛ’n e kwla usa e wun kɛ: ‘?Wafa sɛ yɛ Izraɛli bɔbɔ boli wlaka ɔ?’ Afuɛ 997 nun ka naan Zezi i blɛ’n w’a ju’n, Izraɛli akpasua blu’n be kpɔcili Zida akpasua’n ɔ nin Bɛnzamɛn akpasua’n, kpɔkun be takali nglo lɔ famiɛn diwlɛ kun. Be kpɛli sika ɔkwlɛ nannin ba sɔlɛ’n i ba Izraɛli nvle’n i akpasua blu ng’ɔ o nglo lika lɔ’n, i nun. Be yoli sɔ naan nvlefuɛ’m b’a ɔman Zoova sulɛ Zida lɔ Ɲanmiɛn i sua nun kun. Asa ekun’n, Baali sɔlɛ mɔ be yo sa sukusuku nun’n, ɔ truli Izraɛli nvle’n nun kpokpaa.
9. ?Kɛ nga Oze 1:6 fa kannin’n sa’n, ngue sa yɛ ɔ ɲannin Izraɛli ɔ?
9 Kɛ Gɔmɛli wuli i gua su ba nɲɔn su’n, Zoova seli Oze kɛ: ‘Flɛ i kɛ Lo-Rouhama [I bo’n yɛle kɛ “N siman be aunnvuɛ”], yɛle kɛ n su siman Izraɛlifuɛ’m be aunnvuɛ kun, n su yaciman be wun sa n cɛman be kun.’ (Oze 1:6) Zoova w’a ‘yaciman be wun sa w’a cɛman be kun,’ yɛle kɛ afuɛ 740 nun ka naan Zezi i blɛ’n w’a ju’n, Asirifuɛ’m be fali Izraɛlifuɛ mun ɔli lomuɛn. Sanngɛ Ɲanmiɛn sili Zidafuɛ’m be aunnvuɛ. Yɛ ɔ deli be. Nán ta nin tokofi, nin alɛ kunlɛ, nin nnɛn kpanngɔ mun, ɔ nin nnɛn kpanngɔ su fufuɛ mun yɛ ɔ fa deli be ɔ. (Oze 1:7) Afuɛ 732 nun ka naan Zezi i blɛ liɛ’n w’a ju’n, Zoova sunmannin i anzi kun, kɔnguɛ kunngba’n nun’n ɔ kunnin Asiri sonja 185.000. Sonja sɔ mun yɛ be wlanwlannin Zida akpasua’n i klɔ’m be bo bia mɔ yɛle Zerizalɛmu’n, i nunfuɛ mun ɔn.—2 Famiɛn Mun 19:35.
Zoova nin Izraɛli be le i
10. ?Ngue yɛ Gɔmɛli i tekle silɛ’n, ɔ yi i nglo ɔ?
10 Gɔmɛli jasoli Oze bo, yɛ ɔ kacili ‘tekle bla.’ Afin, ɔ nin bian uflɛ yɛ be tran ɔn. I sɔ’n kle wafa nga Izraɛli nvle’n nin nvle uflɛ nga be sɔ amuɛn’n be trali aenguɛ’n. Kpɔkun i sin’n, nvle sɔ’m be sieli be. Ninnge kpakpa nga Izraɛlifuɛ’m be ɲannin be’n, b’a buman kɛ Zoova yɛ ɔ fa mannin be ɔ. Be buli i kɛ nvle uflɛ’m be amuɛn’m be ti yɛ be ɲannin be ɔ. Yɛle kɛ be sɔli amuɛn mun. Amuɛn sɔlɛ sɔ’m be ti’n, sɛ é kwlá sé’n, be nin Zoova be aja’n sacili. Ɔ maan ajalɛ tɛ sɔ mɔ nvle sɔ’n fali’n ti’n, saan be nin Zoova bé kán!—Oze 1:2; 2:4, 14, 15.
11. ?Kɛ Zoova kplinnin su maan be trali Izraɛlifuɛ nin Zidafuɛ mun ɔli lomuɛn’n, be yoli Mmla nga Zoova nin Izraɛlifuɛ nin Zidafuɛ’m be jrannin su be trali aenguɛ’n, i sɛ?
11 ?Kɛ mɔ Izraɛli akpasua blu’n jasoli i wun bo’n ti’n, sa mennin yɛ i ayeliɛ sɔ’n ti’n ɔ́ ɲɛ́n i ɔ? Ɲanmiɛn kplinnin su maan nvle’n ɔli Babilɔni i ‘aawlɛ flɛnnɛn’n nun lɔ.’ Babilɔni nvle’n yɛ ɔ kwlali Asirifuɛ mun ɔn. Asirifuɛ sɔ mun yɛ be fali Izraɛlifuɛ mun ɔli lomuɛn afuɛ 740 nun ka naan Zezi blɛ’n w’a ju’n niɔn. (Oze 2:16) Kɛ Zoova yoli maan Izraɛli akpasua blu’n tɔli’n, w’a saciman i bo bolɛ nun aja nga ɔ nin Izraɛli akpasua 12 be trali’n. Afuɛ 607 nun ka naan Zezi i blɛ’n w’a ju’n, Zoova kplinnin su maan Babilɔnifuɛ’m be sacili Zerizalɛmu. Kpɔkun be fali Zidafuɛ mun ɔli lomuɛn. Sanngɛ w’a saciman Moizi Mmla blu mɔ i su yɛ Zoova nin Izraɛli nvle 12 be jrannin be trali aenguɛ’n, annzɛ kusu sɛ é kwlá sé’n be jali’n. Kɛ afuɛ 33 nun, Zuifu kpɛnngbɛn’m b’a sɔman Zezi nun mɔ be kunnin i’n, i blɛ sɔ’n nun yɛ Zoova nin Izraɛlifuɛ’m be aenguɛ sɔ’n sacili mlɔnmlɔn ɔn.—Kolɔsfuɛ Mun 2:14.
Zoova tu Izraɛli fɔ
12, 13. ?Like cinnjin mennin yɛ ɔ o Oze 2:8-10 nun ɔn? ?Yɛ wafa sɛ yɛ ndɛ sɔ’m be wɔ Izraɛli ɔ?
12 Ɲanmiɛn tu Izraɛlifuɛ’m be fɔ kɛ ‘nzɔliɛ ng’ɔ o i ɲrun mɔ maan be si kɛ ɔ si tekle’n, maan ɔ yi.’ Sanngɛ Izraɛli kunndɛ kɛ ɔ́ kɔ́ i soman’m be sin. (Oze 2:5, 7) I sɔ’n ti’n, ajalɛ nga Zoova fali’n yɛ: I waan: ‘I sɔ’n ti m bɔbɔ min Anannganman, kɛ ɔ yo naan w’a kwlá wunman atin’n ti ń sí i wun talɛ, ń fá owie ń tánnin i. Ɔ su i soman’m be su ɔ, ɔ su toman be. Ɔ́ kúnndɛ be lele ngbɛn, ɔ su wunman be. Kpɔkun ɔ́ wá sé kɛ: “Sɛ ɔ ti sɔ’n, ń sá min sin min wun kliklifuɛ’n i wun lɔ, afin lɔ liɛ’n, n klun jɔ́ trá siɛn’n.” W’a wunmɛn i wlɛ kɛ min yɛ m mɛnnin i aliɛ ng’ɔ di’n, nin nzan lɔflɛ ng’ɔ nɔn’n, ɔ nin ngo ng’ɔ kpakpa’n niɔn. Yɛ w’a wunmɛn i wlɛ kɛ min yɛ m mɛnnin i jɛtɛ ufue nin sika ɔkwlɛ ng’ɔ fa yi sraka mannin amuɛn nga be flɛ i Baali’n niɔn.’—Oze 2:8-10.
13 Kannzɛ bɔbɔ Izraɛlifuɛ’m be kunndɛli ukalɛ nvle nga mɔ sɛ é kwlá sé’n be ti kɛ i ‘soman mun’ sa be sa nun’n, sanngɛ be nun wie fi w’a kwlá ukɛmɛn i. Wafa nga Asirifuɛ’m be bo sin yiali Izraɛli nvle’n, ɔ ti kɛ nn talɛ wie yɛ b’a si i nvle’n i wun sa. Ɔ maan nvle uflɛ fi kwlá baman be ukalɛ. Kɛ Asirifuɛ’m be bo sin yiali Izraɛli nvle’n mɔ afuɛ nsan sinnin’n, afuɛ 740 nun ka naan Zezi i blɛ’n w’a ju’n, be utuli Izraɛli i klɔ’m be bo bia mɔ yɛle Samari’n. Ɔ maan Izraɛli akpasua blu’n, b’a kwlá yoman kpa kun sa le. Sran akpasua kaan sa yɛ be wunnin i wlɛ kɛ kannzu kɛ laa be si’m be suli Zoova’n, lika’n yoli kpa dan ɔn. Be akpasua kaan sɔ’n, be wa yili Baali sɔlɛ’n i blo yɛ be wa kunndɛli Zoova sin atin ekun naan bé dí anuannzɛ’n i ekun.
Anɔ yilɛ sɔ’n i wlɛ wunlɛ wafa uflɛ
14. ?Ngue ti yɛ Oze nin i yi Gɔmɛli be wa trannin likawlɛ ekun ɔn?
14 Sɛ e waan é wún i kɛ Oze i aja ndɛ’n ti Izraɛli nin Zoova be aenguɛ nga be trali’n i nzɔliɛ kpa’n, maan e fa e ɲin sie i ndɛ nga su: ‘Zoova seli min kɛ: “Kɔ naan bla nga m’ɔ le bian, mɔ sanngɛ bian cɛ yɛ ɔ kunndɛ i wun bo’n, a nin i be ko la ekun.”’ (Oze 3:1) Oze niannin ndɛ sɔ’n su. Yɛle kɛ Oze ko fali i yi Gɔmɛli bian nga ɔ nin i be tran’n i bo lɔ bali. I sin’n, Oze wlali i yi’n i su nun kpa kɛ: ‘Cɛ min wun wa, nán si tekle kun, nán a nin yasua uflɛ be san nun kun. Min kusu ń trán sɔ wie ɔ dunman nun.’ (Oze 3:2, 3) Fɔ mɔ Oze tuli Gɔmɛli’n, Gɔmɛli fali su, yɛ Oze nin i be trannin kɛ sran kun nin i yi sa ekun ɔn. ?Wafa sɛ yɛ e kwla fɛ i sɔ liɛ’n e kan wafa nga Zoova nin Izraɛli nin Zida be trannin’n i ndɛ ɔ?
15, 16. (a) ?Ngue yɛ Ɲanmiɛn i nvle m’ɔ tuli i fɔ’n kwla yo naan Ɲanmiɛn w’a si i aunnvuɛ ɔ? (b) ?Wafa sɛ yɛ Oze 2:20 kpɛnnin su ɔ?
15 Kɛ Izraɛli nin Zidafuɛ’m be o lomuɛn nun Babilɔni lɔ’n, Zoova maan i nuan ijɔfuɛ’m be ‘kannin Izraɛli nin Zidafuɛ’m be awlɛn su ndɛ.’ Sɛ be kunndɛ kɛ Ɲanmiɛn si be aunnvuɛ’n, ɔ fata kɛ be yaci be sa tɛ’m be yolɛ, yɛ be sa be sin Zoova m’ɔ ti be wun’n i sin ekun kɛ nga Gɔmɛli sɛli i sin Oze wun lɔ’n sa. Sɛ be yo sɔ’n, sɛ é kwlá sé’n, Zoova wá fɛ́ i nvle’n m’ɔ ti kɛ i yi sa’n, Babilɔni ‘aawlɛ flɛnnɛn’ nun lɔ fíte. Kpɔkun bé sá be sin Zida nin Zerizalɛmu ekun. (Oze 2:16, 17) Zoova kplinnin su maan i sɔ ndɛ liɛ’n kpɛnnin su afuɛ 537 nun ka naan Zezi i blɛ’n w’a ju’n.
16 Ɲanmiɛn yoli maan nda ng’ɔ tɛli i yɛ’n, ɔ kpɛnnin su. Ɔ seli kɛ: ‘Ń yó maan min sran mun be nin nnɛn mun, nin anunman mun, ɔ nin nnɛn nga be cuɛn be wun ase’n bé dí anuansɛ. Ń sáci mɛn’n nun ta nin tokofi’m be kwlaa, afin alɛ kunlɛ’n wíe. Kpɔkun min sran’m be kwlaa bé wún tɔ́ be fɔuun.’ (Oze 2:20) Zuifu akpasua nga be kali’n, be sali be sin be asiɛ’n su yɛ be trannin fɔuun nun. Nnɛn’m be bɔbɔ b’a kunman be srɛ. Afuɛ 1919 nun’n ndɛ kunngba’n kpɛnnin su ekun. Yɛle kɛ Ɲanmiɛn i Izraɛli’n i onga nunfuɛ’m be tuli ‘Babilɔni klɔ dan’n’ mɔ yɛle mɛn wunmuan nun Ɲanmiɛn sulɛ wafa nga be ti tɛ’n, i nun. Siɛn’n be nin be niaan nga be liɛ be lafi su kɛ bé trán asiɛ’n su wa’n, be o Ɲanmiɛn ninnge’m be nun mɛn klanman’n nun. Ayeliɛ nga sɛ é kwlá sé be ti kɛ nnɛn ayeliɛ sa’n, be nunman Klistfuɛ kpa sɔ’m be afiɛn.—Sa Nglo Yilɛ 14:8; Ezai 11:6-9; Galasifuɛ Mun 6:16.
E fa e ɲin e sie i afɔtuɛ’m be su
17-19. (a) ?Ɲanmiɛn i nzuɛn mennin mun yɛ ɔ ti cinnjin kɛ e sɔnnzɔn be ɔ? (b) ?Wafa sɛ yɛ Zoova i aunnvuɛ silɛ nin i sa yaci cɛlɛ’n kwla yo e ɔ?
17 Ɲanmiɛn si aunnvuɛ yɛ ɔ yaci sa cɛ. I sɔ’n yɛ ɔ fata kɛ e yo ɔ. Afɔtuɛ klikli nga Oze fluwa’n i ndɛ tre klikli’m be kle e’n yɛle ngalɛ’n. (Oze 1:6, 7; 2:25) Zoova kloli kɛ ɔ́ sí Izraɛlifuɛ nga be kacili be sa’n, be aunnvuɛ. I sɔ ayeliɛ’n nin ndɛ nga Ɲanndra nga kan’n be kɔ likawlɛ. Ɲanndra sɔ’n waan: ‘Sran ng’ɔ fia sa tɛtɛ ng’ɔ yo be’n be su’n, ɔ yoman kpa. Sanngɛ sran ng’ɔ kɛn i sɔ sa liɛ mun’n, m’ɔ yaci be yolɛ’n, Ɲanmiɛn’n yaci i wun sa’n cɛ i.’ (Nyanndra Mun 28:13) Kusu’n, be nga be yoli sa tɛ’n, jue tofuɛ’n i ndɛ ng’ɔ o yɛ’n wla be fanngan. I waan: ‘Sraka nga Ɲanmiɛn kunndɛ’n yɛle be wun ase kanlɛ mɔ maan be di sa nga be yoli’n i nanwlɛ’n. Ee Ɲanmiɛn, sran ng’ɔ yo sɔ’n, i wun yo wɔ fɛ.’—Jue Mun 51:19.
18 Ɲanmiɛn nga e su i’n, i aunnvuɛ silɛ nin i sa yaci cɛlɛ’n, Oze i fluwa’n fa e ɲin sie su kpa. Sɛ bɔbɔ sran wie’m be fɔnnin’n, sanngɛ be kwla kaci be sa kpɔkun be sa be sin Ɲanmiɛn wun ekun. Sɛ be yo i sɔ’n, Zoova sɔ́ be nun klanman ekun. Izraɛli nvle mɔ sɛ é kwlá sé’n Zoova nin i jali’n, i nunfuɛ nga be yacili sa tɛ yolɛ’n, Zoova sili be aunnvuɛ. Kannzɛ bɔbɔ b’a nantiman Zoova i mmla’n su kpɔkun ‘be klɔklɔli i m’ɔ ti Izraɛli Ɲanmiɛn’n, sanngɛ i liɛ’n, ɔ sili be aunnvuɛ. Ɔ si kɛ be ti klɔ sran.’ (Jue Mun 78:38-41) Ɔ nin i fata kɛ aunnvuɛ silɛ sɔ’n su e bo naan e nin Ɲanmiɛn Zoova m’ɔ yaci sa cɛ’n, e nanti titi.
19 Kannzɛ bɔbɔ sɛ sa tɛ kɛ sran kunlɛ, ɔ nin awie wualɛ, nin sran i yi annzɛ i wun bo bian kunndɛlɛ yɛ ɔ truli Izraɛli lɔ’n, sanngɛ Zoova ‘kannin Izraɛlifuɛ’m be awlɛn su ndɛ.’ (Oze 2:16; 4:2) Maan e bɔbɔ’n e awlɛn’n su e bo, yɛ maan e Zoova klolɛ’n wla e fanngan naan e yi i nglo kɛ Zoova si aunnvuɛ naan ɔ yaci sa cɛ. I sɔ’n ti’n, maan e usa e wun kɛ: ‘?Wafa sɛ yɛ min nin min wiengu’m be tranlɛ’n nun’n, n kwla nian Zoova i aunnvuɛ silɛ nin i sa yaci cɛlɛ’n i su ɔ? ?Sɛ min niaan Klistfuɛ kun wɔ min safle naan ɔ kpata min’n, n sɔ i ngbata nun kɛ Ɲanmiɛn fa yo’n sa?’—Jue Mun 86:5.
20. Amun fa sunnzun ase kun naan amun kle kɛ e ɲrun lɔ ninnge nga Ɲanmiɛn sunnzunnin kɛ ɔ́ fá mán e’n, saan ɔ́ kpɛ́n su.
20 Ɲanmiɛn maan e lafi e ɲrun lɔ like kpa su. I wie yɛle kɛ ɔ tali nda kɛ: ‘Ń fɛ́ i Ɲrɛnnɛn kongo’n káci i wla ase gualɛ lika.’ (Oze 2:17) Zoova i nvle laa’n lafili su kɛ saan ɔ́ sɛ́ i sin i asiɛ’n m’ɔ o ‘Ɲrɛnnɛn kongo’n’ lika nun lɔ’n, i nun. Nda sɔ’n kpɛnnin su afuɛ 537 nun ka naan Zezi blɛ’n w’a ju’n, i su. I sɔ’n ti’n, e kusu e lafi su kpa kɛ like nga Zoova fa sieli e ɲrun lɔ’n é ɲɛ́n i sɔ liɛ’n.
21. ?E nin Ɲanmiɛn e nantilɛ’n nun’n, ngue yɛ Ɲanmiɛn i silɛ’n ɔ yo ɔ?
21 Sɛ e waan e nin Ɲanmiɛn é nánti titi’n, ɔ nin i fata kɛ e suɛn i su like naan e nanti su e ninnge’m be yolɛ nun. Zoova i su like suanlɛ’n mlinnin Izraɛlifuɛ’m be afiɛn mlɔnmlɔn. (Oze 4:1, 6) Sanngɛ Izraɛlifuɛ’m be nun wie’m be buli Ɲanmiɛn i ndɛ’n i suanlɛ’n i like dan, yɛ be nantili su. Kpɔkun be ɲannin su mmlusuɛ dan kpa. Be sɔfuɛ’m be nun kun yɛle Oze. Kpɔkun Eli blɛ su’n, sran 7.000 nga b’a kotoman Baali ɲrun be kusu be kleli kɛ be fali Ɲanmiɛn i mmla’n su kpa. (1 Famiɛn Mun 19:18; Rɔmfuɛ Mun 11:1-4) Ɲanmiɛn i ninnge ng’ɔ kle e’n, i su ye silɛ’n, ɔ́ kwlá úka e maan e nin Ɲanmiɛn é nánti titi.—Jue Mun 119:66; Ezai 30:20, 21.
22. ?Wafa sɛ yɛ ɔ fata kɛ e bu Ɲanmiɛn wun sacilɛ angunndan’n niɔn?
22 Zoova kunndɛ sran mun naan be jrɛn i nvle nunfuɛ’m be ɲrun naan be kpalo ninnge nga be nga be saci Ɲanmiɛn wun’n, be yo’n. Sanngɛ, Oze 5:1 se kɛ: ‘Ɲanmiɛn ɲrun jranfuɛ mun, amun sie amun su be tie ndɛ nga kpa! Izraɛlifuɛ mun, amun sie amun su kpa! Famiɛn i awlofuɛ mun, an sie amun su! Ndɛ nga ti amun liɛ, yɛle kɛ Mizpa lɔ’n, amun kacili kɛ aya sa min sran’m be bo, amun kacili kɛ tɛ mɔ b’a guɛ i Tabɔr oka’n su’n sa.’ Ɛɛn, be nga be saci Ɲanmiɛn wun’n be kpɛnngbɛn’m be yoli Izraɛlifuɛ’m be liɛ kɛ aya sa. Be suli Izraɛlifuɛ’m be bo maan be sɔli amuɛn mun. Be yoli kɛ tɛ mɔ be gua’n sa. Tabɔr oka’n nin lika nga be flɛ i kɛ Mizpa’n be ti amuɛn sɔlɛ lika mun.
23. ?Wafa sɛ yɛ Oze fluwa’n i ndɛ tre 1 lele m’ɔ́ fá jú 5 uka e ɔ?
23 E wun i weiin kɛ Oze nuan ndɛ’n kleli e kɛ Zoova ti Ɲanmiɛn m’ɔ si aunnvuɛ ɔ. Kpɔkun ɔ kleli e kɛ Ɲanmiɛn sie e ɲrun lɔ like kpa yɛ ɔ yra be nga be nanti i mmla’m be su mɔ be kpalo Ɲanmiɛn i wun sacilɛ angunndan mun’n. Kɛ nga laa Izraɛlifuɛ’m be yacili be sa tɛ mun sa’n, maan e kusu e kunndɛ Zoova yɛ cɛn kwlaa’n e mian e ɲin naan i klun jɔ e wun. (Oze 5:15) Sɛ e yo sɔ’n, é ɲán like ng’ɔ ti kpa’n. Kpɔkun aklunjuɛ nin fɔuun nun tranlɛ nga be nga be nin Ɲanmiɛn be nanti kpa’n bé ɲɛ́n i’n, é ɲán wie.—Jue Mun 100:2; Filipfuɛ Mun 4:6, 7.
[Ja ngua lɛ ndɛ’n]
a Anɔ yilɛ wafa kun kɛ nga sa o Galasifuɛ Mun 4:21-26 nun wie. Sɛ amun waan amún wún i wlɛ’n, amun nian fluwa Étude perspicace des Écritures Volume 2, bue 677-8 i nun. Zoova i Lalofuɛ mun yɛ be yili ɔ.
?Wafa sɛ yɛ amún tɛ́ kosan’m be su ɔ?
• ?Like mennin i nzɔliɛ yɛle Oze i aja’n?
• ?Ngue ti yɛ Zoova nin Izraɛli be le i ɔ?
• ?Oze i fluwa’n i ndɛ tre 1 lele m’ɔ́ fá jú 5 su’n, i nun ndɛ mennin yɛ ɔ yoli amun fɛ ɔ?