LIKE SUANLƐ 55
Suan asɔnun’n i bo
Asiɛ wunmuan’n su’n, asɔnun sua akpi kpanngban nun’n, sran miliɔn kpanngban be su Zoova aklunjɔɛ’n su. Be klun jɔ like nga be kle be’n su. Yɛ be tu be klun be yo ninnge kpanngban be fa suan asɔnun’n i bo. ?A di aklunjɔɛ asɔnun’n nun wie? ?A kunndɛ kpa kɛ á súan asɔnun’n i bo?
1. ?Ngue yɛ a kwla yo fa suan asɔnun’n i bo-ɔ?
E kwlakwla e kwla yo like e suan asɔnun’n i bo. I wie yɛle kɛ sɛ ɔ asɔnun’n nun’n aniaan wie’m be ti oke annzɛ be kwlaman nun’n, a kwla uka be naan b’a wɔ aɲia’m be bo. Annzɛ kusu’n, a kwla di be gua’n man be, annzɛ a kwla uka be naan b’a di be awlo lɔ junman wie mun. (Kanngan Zaki 1:27 nun.) Asa’n, e kwla yo asɔnun sua’n i nun yɛinyɛin, annzɛ e di i nun junman wie mun. Sran fi mianman e kɛ e yo i sɔ ninnge mun. Klolɛ mɔ e klo Ɲanmiɛn nin e niaan mun’n ti’n, ‘e klun klo su e fa e wun e man.’—Jue Mun 110:3.
Aniaan nga b’a yo be batɛmun’n, be kwla yo ninnge uflɛ wie mun ekun be fa suan asɔnun’n i bo. Aniaan yasua nga be ɲin w’a tin Ɲanmiɛn sulɛ nun’n, be kwla kaci asɔnunfuɛ’m be lika nianfuɛ, yɛ kɛ ɔ́ kɔ́ i ɲrun’n, be kwla kaci asɔnun kpɛnngbɛn. Aniaan’m be kwlakwla, i yasua-o, i bla-o be kwla uka junman nga be di i jasin fɛ bolɛ nun’n su. I wie yɛle kɛ be kwla kaci atin bofuɛ. Aniaan wie’m be kwla fa ajalɛ kɛ bé úka be nga be kplan Ɲanmiɛn sulɛ sua mun’n. Annzɛ be kwla kɔ asɔnun nga be mian jasin bofuɛ’m be wun’n be nun.
2. ?Wafa sɛ yɛ e kwla fa like nga e le i’n e suan asɔnun’n i bo-ɔ?
E kwla fa ‘e ninnge kpakpa mun e manman Zoova.’ (Ɲanndra Mun 3:9) Kɛ e fa e sa nun ninnge mun e suan asɔnun’n nin jasin fɛ bolɛ junman nga be di i mɛn wunmuan’n nun’n i bo’n, i sɔ’n yo e fɛ dan! (Kanngan 2 Korɛntifuɛ Mun 9:7 nun.) Asa’n, be fa sika nga e man’n i wie uka aniaan nga sanvuɛsa ɲan be’n. Sran wie’m be liɛ’n, ‘be fa like nga be waan bé fá mán’n be sie’ naan b’a kwla fa man. (Kanngan 1 Korɛntifuɛ Mun 16:2 nun.) Sika nga e waan é fá mán’n, e kwla fa guɛ i e asɔnun’m be nun sika guawlɛ’m be nun. Annzɛ kusu e kwla fa sin e ɛntɛnɛti adrɛsi donate.jw.org su. Kɛ e fa e sa nun ninnge mun e suan asɔnun’n i bo’n, e kle kɛ e klo Zoova.
SI NDƐ’N NUN KPA EKUN
É wá kán wafa nga e kwla suan asɔnun’n i bo’n i ndɛ.
3. E kwla fa e sa nun ninnge mun e suan asɔnun’n i bo
Zoova nin Zezi be klo be nga be man like aklunjɔɛ su’n. I wie yɛle kɛ cɛn kun’n, kɛ angbeti bla kun m’ɔ ti yalɛfuɛ’n ɔ miɛnnin i ɲin mannin Zoova like’n, Zezi fɛli i ɲin sieli su. An kanngan Liki 21:1-4 nun, i sin’n an koko kosan yɛ’m be su yalɛ:
?Kɛ e man like kpanngban’n yɛ Zoova i klun jɔ su-ɔ?
?Kɛ e klun klo su e man like’n, wafa sɛ yɛ i sɔ’n yo Zoova nin Zezi-ɔ?
Sɛ a kunndɛ kɛ á sí like nga be fa sika nga e man’n be yo’n, an bo VIDEO’N. I sin’n, an koko kosan yɛ’n i su yalɛ.
?Wafa sɛ yɛ sika nga e man’n, ɔ suan asɔnun’m be bo mɛn wunmuan’n nun-ɔn?
4. E kwla di asɔnun’n nun junman wie mun
Laa’n, Zoova i sufuɛ mun be tu be klun be di junman Ɲanmiɛn i sulɛ sua’m be nun naan b’a kwla ka sanwun titi. Nán sika ngunmin yɛ be man-ɔn. An kanngan 2 Be Ɲoliɛ 34:9-11 nun, i sin’n an koko kosan yɛ’n i su yalɛ:
?Ngue yɛ Izraɛlifuɛ’m be kwlaa be yoli naan b’a kwla nian Zoova i sua’n i lika-ɔ?
Sɛ a kunndɛ kɛ á sí wafa nga Zoova i Lalofuɛ mun be nian Izraɛlifuɛ sɔ’m be ajalɛ’n su andɛ’n, an bo VIDEO’N. I sin’n, an koko kosan yɛ’m be su yalɛ.
?Ngue ti yɛ ɔ ti cinnjin kɛ e nian Ɲanmiɛn Sielɛ Sua’m be lika naan be ka sanwun titi-ɔ?
?Wafa sɛ yɛ a kwla suan junman sɔ’n i bo wie-ɔ?
5. Yasua’m be kwla mian be ɲin naan b’a di junman wie mun asɔnun’n nun
Biblu’n wla Klisifuɛ nga be ti yasua’n be fanngan kɛ be mian be ɲin naan b’a kwla di junman wie mun asɔnun’n nun. Sɛ a kunndɛ kɛ á sí wafa nga be kwla yo i sɔ’n, an bo VIDEO’N. I sin’n, an koko kosan yɛ’n i su yalɛ.
?Video’n nun’n, ngue yɛ Rayanin yoli naan w’a suan asɔnun’n i bo kpa w’a tra laa-ɔ?
Biblu’n kan like ng’ɔ fata kɛ aniaan yasua kun yo naan w’a kwla kaci asɔnunfuɛ’m be ukafuɛ, annzɛ asɔnun kpɛnngbɛn’n i ndɛ. An kanngan 1 Timote 3:1-13 nun, i sin’n an koko kosan yɛ’m be su yalɛ:
?Ngue yɛ ɔ fata kɛ aniaan kun yo naan b’a kwla sie i asɔnunfuɛ’m be ukafuɛ, annzɛ asɔnun kpɛnngbɛn-ɔn?
?Ngue yɛ ɔ fata kɛ i awlofuɛ’m be yo-ɔ? —Nian ndɛ mma 4 nin 11 nun.
?Kɛ aniaan kun miɛn i ɲin m’ɔ kaci asɔnunfuɛ’m be ukafuɛ, annzɛ asɔnun kpɛnngbɛn’n, i su ye benin yɛ asɔnun’n nunfuɛ mun be ɲɛn i-ɔ?
SRAN KUN KWLA USA Ɔ KƐ: “?Nin yɛ sika nga Zoova i Lalofuɛ’m be ɲan sika be fa di be junman’n ɔ fin-ɔn?”
?Wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Kɛ e fa e blɛ’n nin e wunmiɛn’n, ɔ nin e sa nun ninnge mun e suan asɔnun’n i bo’n, i sɔ’n yo Zoova i fɛ kpa.
Ndɛ’n i nun flanlɛ
?Wafa sɛ yɛ e kwla fa e blɛ’n nin e wunmiɛn’n e suan asɔnun’n i bo-ɔ?
?Wafa sɛ yɛ e kwla fa e sa nun ninnge mun e suan asɔnun’n i bo-ɔ?
?Ngue yɛ a kunndɛ kɛ á yó naan w’a suan asɔnun’n i bo-ɔ?
NDƐ WIE MUN EKUN
Like nga ti yɛ Ɲanmiɛn i sufuɛ’m be yiman blusu’n kun’n.
“Blusu’n i manlɛ’n i su ndɛ nga Biblu’n kan’n” (jw.org su ndɛ)
Biblu’n man yasua nga b’a yo be batɛmun’n be junman wie mun. ?Yɛ sɛ ɔ fata kɛ bla kun mɔ be yoli i batɛmun’n di i sɔ junman’n nin?
Aniaan wie mɔ be mian be ɲin be fa fluwa ko man be niaan Klisifuɛ wie mun’n.
Like nga e yo naan y’a ɲan sika y’a di e junman’n, ɔ nin asɔnun onga’m be liɛ’n timan kun.
“?Zoova i Lalofuɛ’m be ɲan sika’n nin yɛ be fa di be junman’n niɔn?” (jw.org su ndɛ)