Ɲanmiɛn tali nda kɛ ɔ́ mán e asiɛ uflɛ
BIBLU’N m’ɔ ti Ɲanmiɛn Ndɛ’n wla e fanngan kɛ: ‘Ɲanmiɛn seli kɛ ɔ́ mán e ɲanmiɛn su lɔ nin asiɛ uflɛ, lɔ yɛ be nga be yo sa kpa’n bé trán ɔn. I yɛ e su minndɛ i ɔ.’—2 Piɛr 3:13.
?Ngue yɛle “ɲanmiɛn su lɔ uflɛ’n”? Biblu’n nun’n ɲanmiɛn su lɔ’n nin sielɛ’n be kɔ likawlɛ (Sa Nga Be Yoli’n 7:49). Ɔ maan “ɲanmiɛn su lɔ uflɛ’n” ti awa uflɛ kun m’ɔ́ wá síe asiɛ’n niɔn. Ɔ ti uflɛ, afin ɔ́ wá káci mɛn nun siefuɛ nga e wun be yɛ’n. I sɔ’n kusu ti ajalɛ uflɛ mɔ Ɲanmiɛn fali naan i klun sa’n w’a kpɛn su ɔ. Sielɛ Blɛ sɔ’n i ti yɛ Zezi kleli i sɔnnzɔnfuɛ mun kɛ be srɛ Ɲanmiɛn’n niɔn (Matie 6:10). Kɛ mɔ Ɲanmiɛn yɛ ɔ takali Sielɛ Blɛ sɔ’n ɲanmiɛn su lɔ’n, i ti yɛ be flɛ i kɛ ‘Ɲanmiɛn Sielɛ Blɛ’n’ niɔn.—Matie 10:7.
?Ngue yɛle “asiɛ uflɛ’n”? Nán kɛ asiɛ nga e o su yɛ’n, yɛ bé fá uflɛ síe i o su ɔ. Afin Biblu’n yiyi nun weiin kɛ klɔ sran’m be su wieman asiɛ nga su le. “Asiɛ uflɛ’n” yɛle be nga be nzuɛn’n yó uflɛ’n. Ɔ́ yó asiɛ uflɛ afin, bé tú klunwifuɛ’m be bo (Nyanndra Mun 2:21, 22). Kɛ ɔ fɛ i lɛ’n, be kwlaa nga bé ká nguan nun’n, yɛle be nga be ɲin yi like Yifuɛ’n, mɔ be nanti i mmla’n su’n (Jue Mun 22:28). Kɛ é sé yɛ’n, be su yia mɛn nunfuɛ’m be kwlaa naan be suan Ɲanmiɛn mmla’n, naan be nanti su. ?Amun yo i sɔ wie?
Ɲanmiɛn i mɛn uflɛ’n nun’n, sran kwlaa kplín su kɛ Sielɛ sɔ’n sie i. ?Ɲanmiɛn i klolɛ’n ti’n, amun fɛ i ndɛ’n su (1 Zan 5:3)? ?Amun awlo lɔ annzɛ suklu lɔ’n, annzɛ amun mɛn dilɛ nun’n, be wun weiin kɛ amun fɛ i ndɛ’n su?
Asiɛ uflɛ sɔ’n su’n, sran’m be kwlaa bé bó yó kun bé sú Ɲanmiɛn nanwlɛfuɛ’n. ?Amun su nglo nin asiɛ’n be Yifuɛ’n? ?Amun Ɲanmiɛn sulɛ’n yo maan amun nin amun niaan nga be o nvlenvle kwlaa nun’n, mɔ be ti sran wafawafa’n mɔ be kan aniɛn wafawafa’n, amun bo ti kun?—Jue Mun 86:9, 10; Ezai 2:2-4; Sofoni 3:9.
[Kuku, bue 17]
Ɲanmiɛn m’ɔ ta nda kɛ ɔ́ yó ninnge sɔ mun’n
Ɲanmiɛn m’ɔ ta nda kɛ ɔ́ yó ninnge sɔ mun’n, yɛ ɔ ti nglo nin asiɛ nga e wun be yɛ’n, be Yifuɛ’n niɔn. Ɲanmiɛn sɔ’n yɛ Zezi seli kɛ ‘i kunngba cɛ yɛ ɔ ti Ɲanmiɛn’n’ niɔn.—Zan 17:3.
Sran sunman lika be sɔ amuɛn. Sran akpinngbin’m be koto waka sran’m be bo. Wie mun kusu’n, be fa be wla’n kwlaa guɛ i mɛn nun anuannzɛ mun, ɔ nin klɔ sran’m be angunndan’m be su. Annzɛ be bɔbɔ be klunklo like kunngba cɛ yɛ ɔ lo be ɔ. Be nga be se kɛ be nanti Biblu’n nun ndɛ’n su’n, nán be kwlaa yɛ be yo maan Ɲanmiɛn mɔ i ‘kunngba cɛ yɛ ɔ ti Ɲanmiɛn’n’ i dunman’n fu ɔ.—Mmla’n 4:35.
Like Yifuɛ’n bɔbɔ se kɛ: “N ti Anannganman [Zoova, NW], min dunman’n yɛ o lɛ ɔ.” (Ezai 42:5, 8). I nun mɔ bé klɛ́ Biblu’n, dunman Zoova sɔ’n ɔ o nun kpɛ ko ju 7.000. Zezi Klist kleli i sɔnnzɔnfuɛ’m be Ɲanmiɛn srɛlɛ. Ɔ seli kɛ: ‘E Si mɔ a o ɲanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Ɲanmiɛn’n niɔn, annzɛ be bo ɔ dunman fɛ.’—Matie 6:9.
?Sran’n i wafa mennin yɛle Ɲanmiɛn Kpli? I bɔbɔ seli kɛ ‘n ti Ɲanmiɛn aklunyefuɛ, nin aunnvuɛ sifuɛ, n faman ya ndɛndɛ. Min aklunye’n ti dan, yɛ sa nga n kan kɛ ń yó be’n, ń yó be.’ Sanngɛ sran nga i ɲinfu yo sa tɛ’n, Ɲanmiɛn seman kɛ w’a yoman like fi (Ezipt Lɔ Tulɛ 34:6, 7). Wafa nga ɔ nin sran’m be trannin’n, ɔ kle kɛ i wafa nga ɔ fa ti’n mɔ be yiyi nun’n, ɔ ti nanwlɛ.
Ɔ fata kɛ i dunman’n, nin be nga dunman sɔ’n o be su’n, be yo saun. Kɛ mɔ i yɛ ɔ ti like Yifuɛ’n, mɔ i kunngba cɛ yɛ kwlalɛ’n o i sa nun ti’n, ɔ fata kɛ e ɲin yi i, naan e su i. ?Amun yo i sɔ?
[Kuku/Foto, bue 18]
?Ngue yɛ “ɲanmiɛn su lɔ uflɛ nin asiɛ uflɛ’n” bé wá mán e ɔ?
Asiɛ’n káci mɛn klanman Lik 23:43
Sran nga be fin nvlenvle kwlaa’n, Zan 13:35;
mɔ be ti sran wafawafa’n, mɔ be Sa Nglo Yilɛ 7:9, 10
kan aniɛn wafawafa’n, be kwlaa
be bo yó kun bé kló be wun
Asiɛ wunmuan’n su sran’m bé Jue Mun 37:10, 11;
trán fɔun nun Mise 4:3, 4
Junman nga sran’m bé dí’n, ɔ́ jɔ́ Ezai 25:6; 65:17, 21-23
be klun Kpɔkun aliɛ’n sɔ́n kpa
Tukpaciɛ, ɔ nin awlaboɛ’n, Ezai 25:8;
ɔ nin wie’n, bé wíe mlɔnmlɔnmlɔn Sa Nglo Yilɛ 21:1, 4
[Kuku/Foto mun, bue 19]
?Amún wá dí su wie?
Ɲanmiɛn buaman ato!—Tit 1:2.
Zoova se kɛ: ‘Ndɛ m’ɔ fin min nuan fite’n sɛ ɔ ti kɛ ɔ ti sran’n, nn ń sé kɛ ɔ sɛmɛn i sin min wun wa sa ngbɛn, saan ɔ́ yó min klun sa, saan ɔ́ yó nga mɔ i ti yɛ n sunmɛnnin i’n.’—Ezai 55:11.
Zoova w’a dun mmua yi “ɲanmiɛn su lɔ uflɛ nin asiɛ uflɛ’n.” Ɔ maan kɛ é sé yɛ’n, ɲanmiɛn su lɔ awa’n, ɔ di junman. B’a dun mmua wla “asiɛ uflɛ’n” i bo ase.
Like nga ‘ɲanmiɛn su lɔ uflɛ nin asiɛ uflɛ’n,’ bé wá mán klɔ sran’m be nun wie mun’n, kɛ Sa Nglo Yilɛ fluwa’n ɔ boli be su wieli’n, Zoova bɔbɔ mɔ kwlalɛ’n o i sa nun’n, ɔ seli fluwa sɔ’n nun kɛ: “Nian, m’an kaci like’n kwlaa uflɛ.” Yɛ ɔ seli ekun kɛ: “Klɛ ndɛ nga, afin min ndɛ’n ti nanwlɛ, be kwla fa su.”—Sa Nglo Yilɛ 21:1, 5.
Kosan cinnjin kpa nga ɔ o lɛ’n, yɛ: ?Ajalɛ nga sɛ n fa ɔ, n kwla tran be nga bé trán “asiɛ uflɛ’n” mɔ ‘ɲanmiɛn su lɔ uflɛ’n’ síe be’n be nun wie’n, yɛ n fa ɔ?