E su kpɛn mɔ i sa o junman’n su andɛ’n
“Ɔ ɔli yasua su kɛ ɔ nin i kpɔfuɛ mun be ko kun naan ɔ́ kwlá be.”—NGL. 6:2.
1, 2. (a) ?Klist i famiɛn dilɛ’n nun’n, junman ng’ɔ dili i afuɛ nga be flɛ i 1914 nun lele andɛ’n, wafa sɛ yɛ Biblu’n kɛn i ndɛ ɔ? (b) ?Kɛ be sieli Klist i famiɛn lele andɛ’n ajalɛ benin yɛ w’a fa be ɔ?
AFUƐ nga be flɛ i 1914 nun’n, be fali Klist sieli i Famiɛn Sielɛ mɔ Zoova i Mɛsi’n yɛ ɔ fata kɛ ɔ yo i su famiɛn’n i su. ?Dɔ nga su’n kɛ e niɛn i sa’n, Klist ti sran wafa sɛ? ?Ɔ ti famiɛn kun m’ɔ ti i famiɛn bia’n su mɔ cɛn wie’n, ɔ kpɛ i ɲin asiɛ’n su wa kan nian wafa nga i asɔnun’n su yo’n? Sɛ i sɔ yɛ amun bu i’n, ɔ fata kɛ amun kaci amun akunndan’n. Jue Mun fluwa’n nin Sa Nglo Yilɛ fluwa’n be waan ɔ ti famiɛn juejuefuɛ kun m’ɔ ti i nnɛn kpanngɔ’n su ɔ. Naan ɔ kɔ kɛ “ɔ nin i kpɔfuɛ mun be ko kun naan ɔ́ kwlá be,” yɛ ɔ́ yó sɔ lele saan w’a yo “kwlafuɛ” mlɔnmlɔn.—Ngl. 6:2; Jue. 2:6-9; 45:2-5.
2 Kɛ be sieli Klist i famiɛn’n, ajalɛ klikli ng’ɔ fali’n yɛle “dragɔn nin i anz mun” be kwlalɛ. I yɛ ɔ ti anzi’m be su kpɛn ng’ɔ suan Mikaɛli’n niɔn. Mikaɛli nin i anzi sɔ’m be fuannin Satan nin i mmusu mun ɲanmiɛn su lɔ. Be fali be guɛli i asiɛ’n i bue liɛ’n su wa. (Ngl. 12:7-9) I sin ‘aenguɛ nga [Zoova] nin [sran mun] be trali’n, i nuan ijɔfuɛ’n,’ mɔ yɛle Zezi’n, ɔ nin i Si be bali kɛ bé wá nían Ɲanmiɛn sulɛ kpa’n i su ninnge nga Ɲanmiɛn siesieli’n. (Mal. 3:1) Ɔ dili be nga be tɔn be wun suɛn kɛ be ti Klistfuɛ’n mɔ ti “Babilɔni klɔ dan’n” i bue ng’ɔ ti tɛ kpa’n, i jɔlɛ. Yɛ ɔ buli i fɔ afin ɔ guali sran’m be mmoja ase. Kpɛkun ɔ nin mɛn nga i nun politiki anuannzɛ’m be sannin nun.—Ngl. 18:2, 3, 24.
Klist yo i sufuɛ m’ɔ o asiɛ’n su wa’n i sanwun
3, 4. (a) ?Ngue junman yɛ Klist m’ɔ ti Zoova i “ndolo bofuɛ’n” ɔ dili ɔ? (b) ?Kɛ Zoova nin Klist be wa niannin Ɲanmiɛn sulɛ kpafuɛ’n i su ninnge nga Ɲanmiɛn siesieli’n, ngue yɛ be wunnin i ɔ? ?Yɛ ajalɛ benin yɛ Zezi m’ɔ ti asɔnun’n i su Kpɛn’n ɔ fali ɔ?
3 Kɛ Zoova nin i “ndolo bofuɛ’n” be wa nianniannin Ɲanmiɛn sulɛ kpafuɛ’n i su ninnge nga Ɲanmiɛn siesieli’n nun’n, be wunnin kɛ sran akpasua kun o lɛ’n, i nunfuɛ’m be ti Klistfuɛ kpa. Be liɛ’n, be nunman be nga be tɔn be wun suɛn kɛ be ti Klistfuɛ’n be asɔnun’m be nun wie. Sanngɛ Klistfuɛ sɔ mɔ be kpali be sieli be ngunmin mɔ be flɛ be kɛ “Levi i osu’n,” ɔ fata kɛ be yo be sanwun. Ɔ yoli kɛ nga Ɲanmiɛn nuan ijɔfuɛ Malasi fa kɛnnin i yɛ’n sa. I waan: “[Zoova] ɔ́ trán ase, ɔ́ tɔ́n sika’n, ɔ́ yí i nun fiɛn’n, ɔ́ yó Levi i osu’n nun Nyanmiɛn nyrun jranfuɛ’m be saun kɛ be fa yo sika ɔkwlɛ ɔ nin jɛtɛ ufue’m be saun’n sa. Kpɛkuun siɛn’n, sɛ bé wá mán Anannganman i like’n, bé nánti i mmla’n su yɛ bé mɛ́n i-ɔ.” (Mal. 3:3) Zoova fali ‘aenguɛ ng’ɔ nin [sran mun] be trali’n, i nuan ijɔfuɛ’n,’ mɔ yɛle Klist Zezi yoli Izraɛlifuɛ sɔ mɔ be ti Ɲanmiɛn liɛ klonglo’n be sanwun.
4 Sanngɛ kusu kɛ Klist bali’n, ɔ wunnin kɛ Klistfuɛ sɔ mɔ be kpali be sieli be ngunmin’n, be su mian be ɲin bé mán be nga be lafi Ɲanmiɛn su mɔ be ti kɛ awlobo kun sa’n, be aliɛ blɛ ng’ɔ ti i nuan su’n i nun. Kɛ ɔ fɛ i afuɛ nga be flɛ i 1879 nun’n, maan lika’n yo kekle sɛ sanngɛ be yili fluwa nga titi. Yɛ Ɲanmiɛn Sielɛ’n i su ndɛ nanwlɛ’n, be kɛnnin i ndɛ nun. Zezi dun mmua kannin kɛ ‘mɛn’n i awieliɛ’ blɛ’n nun kɛ “ɔ́ bá” wá níɛn i sran mun’n, ɔ́ wá wún kɛ junman difuɛ kun su ‘man be aliɛ blɛ ng’ɔ ti i nuan su’n i su.’ Yɛ ɔ́ sé kɛ junman difuɛ sɔ’n i liɛ su ti ye. Kpɛkun “ɔ́ wá fɛ́ i ninnge’n kwlaa [nga be o asiɛ’n su wa’n] wlɛ́ i sa nun.” (Mat. 24:3, 45-47) Kɛ mɔ Klist ti Klistfuɛ asɔnun’n i su Kpɛn’n ti’n, ɔ sieli “sran kpa nanwlɛfuɛ b’ɔ si ngwlɛlɛ’n” naan ɔ niɛn i Sielɛ’n i ninnge nga be o asiɛ’n su wa’n be su. Ɔ kleli e Ɲrun dinfuɛ’m be anuannzɛ’n i atin naan be fa kle ‘i sran mun’ nin be wiengu nga be flɛ be ‘bua’m be wie mun’n.’—Zan 10:16.
Asiɛ’n su awie’n i kpɛlɛ
5. ?Aolia nun’n, ngue yɛ akoto Zan wunnin kɛ Mɛsi mɔ be sieli i famiɛn’n su yo ɔ?
5 “E Min’n i cɛn’n nun” kɛ afuɛ nga be flɛ i 1914 ko sin mɔ be ko sie Mɛsi’n i Famiɛn’n, ɔ́ wá yó like uflɛ kun ekun. Like sɔ’n akoto Zan wunnin i aolia nun. Zan klɛli i kɛ: “Kɛ n toli min nyin’n, n wunnin nyanmiɛn ufue wie, like kun ti su, like sɔ’n ti kɛ sran sa. Sika kle wo i ti, wlɔsɔ nnana kpa kun wo i sa nun.” (Ngl. 1:10; 14:14) Zan tili anzi kun m’ɔ fin Zoova i wun lɔ’n, i nɛn’n. Anzi sɔ’n seli Awie Kpɛfuɛ sɔ’n i kɛ ɔ fɛ i wlɔsɔ’n kpɛ awie’n “afin asiɛ’n su awie’n w’a blo.”—Ngl. 14:15, 16.
6. ?Ka naan awie’n i kpɛlɛ blɛ’n w’a ju’n, ngue sa yɛ ɔ́ jú awie fie’n nun ɔn?
6 “Asiɛ’n su awie’n” i kpɛlɛ ndɛ’n, ɔ yo maan e wla kpɛn ɲanndra nga Zezi buli i awie nin awie ijre’n su’n i su. Zezi fɛli i bɔbɔ sunnzunnin bian kun m’ɔ fali awie guɛli i fie’n nun’n. Ɔ lafi su kɛ ɔ́ kpɛ́ awie kpa. Awie sɔ’n ti “Nyanmiɛn mma” mɔ be yɛle Klistfuɛ kpa nga be kpali be kɛ be nin i ko di famiɛn i Sielɛ’n nun’n, be nzɔliɛ. Sanngɛ kɔnguɛ’n, bian’n i kpɔfuɛ’n mɔ yɛle “mmusu’m be si Satan” fali awie ijre m’ɔ ti “Klunwifuɛ’n i mma mun” be nzɔliɛ’n, ɔ luali bian i fie’n nun. Awie’n i guafuɛ’n seli i junman difuɛ’m be kɛ be yaci awie’n nin awie ijre’n be lɛ naan be ɲin likawlɛ lele maan awie’n i kpɛlɛ blɛ’n ju. I kpɛlɛ blɛ sɔ’n yɛle “mɛn’n i awieliɛ.” Kɛ blɛ sɔ’n ko ju’n, ɔ́ súnmɛn i anzi mun naan be siesie awie’n nin awie ijre’n be ngunminngunmin.—Mat. 13:24-30, 36-41.
7. ?Wafa sɛ yɛ Klist su nian “asiɛ’n su awie’n” i kpɛlɛ’n su ɔ?
7 Aolia nun like nga Zan wunnin i’n su kpɛn su. Yɛle kɛ asiɛ wunmuan’n su awie mɔ be su kpɛ’n, Zezi yɛ ɔ nian su ɔ. Like nga be fa bo “asiɛ’n su awie’n” i kpɛlɛ bo’n, yɛle “Nyanmiɛn mma” 144.000 be onga mɔ Zezi i ɲanndra’n nun’n be yɛle “awie’n,” be nuan yialɛ. Kɛ alɛ dan klikli’n wieli’n, ngbaciɛ ng’ɔ o Klistfuɛ kpa nin tɛ’m be afiɛn’n i ɲin wa fiteli kpa liɛ su. I ɲin m’ɔ fiteli sɔ’n ti’n maan be wa kpɛli “asiɛ’n su awie’n” i akpasua nɲɔn su’n. I akpasua sɔ’n yɛle be nga be flɛ be bua’m be wie mun’n. Be yɛ be su yia be nuan ɔn. Be liɛ’n be nunman “Nyanmiɛn mma” mun be nun wie. Sanngɛ be o “sran kpanngban kpa” mɔ be klunklo su be lo be wun man Ɲanmiɛn Sielɛ’n naan ɔ sie be’n be nun. Be fa be “nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n” be nun. Be lo be wun be man Mɛsi’n i Sielɛ’n. Be nga bé dí famiɛn Sielɛ sɔ’n nun’n, be yɛle Klist Zezi nin ‘Nyanmiɛn i nvle’n nunfuɛ’ sran 144.000 mɔ be nin i bé trán ɲanmiɛn su lɔ awa sɔ’n nun’n.—Ngl. 7:9, 10; Dan. 7:13, 14, 18.
Asɔnun’m be atin klelɛ
8, 9. (a) ?Ngue yɛ ɔ kle kɛ Klist wun asɔnun wunmuan’n i aeliɛ’n nin aeliɛ nga Klistfuɛ’m be tinuntinun be yi i nglo’n niɔn? (b) ?Kɛ e fa wun i foto ng’ɔ o fluwa nga i bue 29 su sa’n, ‘Satan i bo ndɛ’ benin yɛ ɔ fata kɛ e kpalo be ɔ?
8 Like suanlɛ ng’ɔ sinnin lɔ’n nun’n, e wunnin i kɛ Klistfuɛ klikli’m be blɛ su’n, Klist fɛli i ɲin sieli i wafa sran nga be o asɔnun’m be nun’n, be tinuntinun be nin Ɲanmiɛn be nanti’n su. E blɛ liɛ nga nun’n, Klist su di Famiɛn. Ɔ “sie nyanmiɛn su lɔ nin asiɛ’n su ninnge’n kwlaa.” I yɛ ɔ sie asɔnun nga be o mɛn wunmuan’n nun nin be sunianfuɛ mun ɔn. (Mat. 28:18; Kol. 1:18) Zoova maan “ɔ sie like’n kwlaa yɛ ɔ fɛ i sieli [be nga be kpali be sieli be ngunmin’n be] Asɔnun’n su kpɛn.” (Efɛ. 1:22) Kɛ m’ɔ ti sɔ’n ti’n, sa ng’ɔ ju Zoova i Lalofuɛ’m be asɔnun 100.000 tra su be tinuntinun be su’n, ɔ wun i kwlaa kpan.
9 Zezi kannin ndɛ yɛ’n kleli asɔnun ng’ɔ o laa klɔ nga be flɛ i Tiatiri’n. I waan: “M bɔ n ti Nyanmiɛn Wa’n, bɔ min nyinma’m be sɔ kɛ sin sa’n, [...] n se kɛ yoo: N si amun nyoliɛ’n.” (Ngl. 2:18, 19) Asɔnun sɔ’n i nunfuɛ’m be tekle bolɛ’n nin pɔɔ nun tranlɛ mɔ be kunndɛ’n ti’n, ɔ buli be fɔ kɛ: “Min yɛ n si sran’m be akunndan’n nin sa ng’ɔ o be klun lɔ nin-ɔn. Like nga an yoli’n, ń fá sran kun liɛ ng’ɔ yoli’n i nuan like ń mɛ́n i.” (Ngl. 2:23) I sɔ ndɛ’n kle kɛ Klist wun aeliɛ nga asɔnun wunmuan’n yi i nglo’n. Sanngɛ nɛ́n i ngba ɔ. Ɔ kle ekun kɛ ɔ wun asɔnun’n nunfuɛ’m be tinuntinun be aeliɛ’n wie. Kusu’n, Tiatiri lɔ Klistfuɛ nga b’a “si-man like nga sran wie’m be flɛ i Satan’n i bo ndɛ’n,” Zezi yoli be mo. (Ngl. 2:24) I kunngba’n, be nga be kunndɛman “Satan i bo ndɛ’n” ɛntɛnɛti su annzɛ video nun ngowa kanlɛ nga nzaje sa’m be o nun’n be nun’n, nun annzɛ sa tɛ mɔ be bumɛn i fɔ’n nun’n, andɛ’n i klun jɔ be wun wie. Maan be yo gbanflɛn annzɛ kpɛnngbɛn i klun jɔ be wun. Andɛ Klistfuɛ kpanngban be yo like kwlaa nga be kwla yo’n naan b’a fa atin ng’ɔ kle be’n su be mɛn dilɛ’n nun. Kɛ ɔ wun be ɲin nga be mian’n, nanwlɛ ɔ yo i fɛ!
10. ?Be fali atin nga Klist kle asɔnun kpɛnngbɛn mun’n sunnzunnin ngue? ?Sanngɛ ngue yɛ ɔ fata kɛ be wun i wlɛ ɔ?
10 Klist sin asɔnun kpɛnngbɛn’m be ja nun niɛn i asɔnun nga be o asiɛ’n su wa’n be lika klolɛ su. (Efɛ. 4:8, 11, 12) Klistfuɛ klikli’m be blɛ su’n, Ɲanmiɛn wawɛ’n wo asɔnun sunianfuɛ’m be kwlaa su. Sa Nglo Yilɛ fluwa’n nun’n, be waan be yɛle nzraama mɔ be o Klist i sa fama’n nun’n. (Ngl. 1:16, 20) Andɛ’n, asɔnun kpɛnngbɛn’m be sunman lika be ti be nga be flɛ be bua’m be wie mun’n be nunfuɛ. Ka naan b’a sie be asɔnun kpɛnngbɛn’n, be dun mmua srɛ Ɲanmiɛn yɛ Ɲanmiɛn wawɛ’n kle atin. Ɔ maan e kwla se kɛ be kusu Klist sie be wie naan i sa o be su. (Yol. 20:28) Sanngɛ kusu be wun i wlɛ kɛ Klist fa Klistfuɛ nga be kpali be sieli be ngunmin’n be nun kaan sa kɛ be yo e Ɲrun dinfuɛ. Naan be kle i sɔnnzɔnfuɛ nga be o asiɛ’n su’n be atin.—An kanngan Sa Nga Be Yoli’n 15:6, 28-30 nun.
“E Min Jésus, bla!”
11. ?Ngue ti yɛ e kunndɛ kpa kɛ e Atin Klefuɛ’n bla icra’n niɔn?
11 Aolia nun like nga akoto Zan wunnin i nun’n, kpɛ sunman Zezi seli kɛ ɔ su ba icra’n. (Ngl. 2:16; 3:11; 22:7, 20) Balɛ nga ɔ́ bá wá tú Babilɔni klɔ dan’n nin Satan i mɛn tɛ’n be fɔ’n, i ndɛ yɛ ɔ su kan ɔn. (2 Tɛs. 1:7, 8) I nun mɔ akoto Zan yoli kpɛnngbɛn’n, sa ɲɛnmɛn sɔ mɔ kunndɛli kpa kɛ ɔ kpɛn su ndɛndɛ’n ti’n, ɔ seli kɛ: “Maan ɔ yo sɔ! E min Jésus, bla!” E mɔ e o mɛn tɛ yɛ’n i awieliɛ blɛ’n nun’n kusu, ɔ ka e ngunmin koko e Atin Klefuɛ’n m’ɔ ti e famiɛn’n w’a ba. E kunndɛ kpa kɛ ɔ bla kɛ famiɛn sa, ɔ wa yo i Si i dunman’n i sanwun naan ɔ wa kle kɛ i Si yɛ ɔ le atin sie mɛn wunmuan’n niɔn.
12. ?Ka naan b’a yaci aunmuan m’ɔ fata kɛ ɔ nunnun mɛn’n i nun’n, ngue junman yɛ ɔ fata kɛ Klist guɛguɛ i bo ɔ?
12 Ka naan Zezi w’a ba Satan i ninnge ng’ɔ siesieli be mɔ be o asiɛ’n su wa’n be nunnunlɛ’n, bé dún mmua síe sran 144.000 mɔ be ti Izraɛlifuɛ nga be ti Ɲanmiɛn liɛ klonglo’n be nun kasiɛn’n i nzɔliɛ. Biblu’n kɛn i weiin kɛ sɛ be nin a wieman sran 144.000 be nzɔliɛ sie’n, be nin a yaciman aunmuan m’ɔ fata kɛ ɔ nunnun Satan i mɛn’n i nun.—Ngl. 7:1-4.
13. ?‘Nyrɛnnɛn dan’n’ i bue klikli’n nun’n, wafa sɛ yɛ Klist yí i nglo kɛ w’a ba ɔ?
13 Afuɛ nga be flɛ i 1914 nun yɛ Klist ‘bali’ ɔ. Lele nin andɛ’n, asiɛ’n sufuɛ’m be sunman lika b’a siemɛn i sɔ’n i nzɔliɛ. (2 Piɛ. 3:3, 4) Sanngɛ ɔ cɛ kaan sa’n, ɔ́ wá yó maan sran kwlaa sí kɛ w’a ba. Yɛle kɛ jɔlɛ nga Zoova dili Satan i ninnge fanunfanun ng’ɔ siesieli’n, ɔ́ yó i nuan su like. “Bian b’ɔ di-man mmla’n su’n” mɔ yɛle be nga be waan be ti Klistfuɛ’n be su kpɛn mun’n, be nunnunlɛ’n ɔ́ klé weiin kɛ w’a ‘ba.’ (An kanngan 2 Tɛsalonikfuɛ Mun 2:3, 8 nun.) I sɔ’n klé weiin kɛ Klist su di jɔlɛ difuɛ junman nga Zoova sieli i kɛ ɔ di’n. (An kanngan 2 Timote 4:1 nun.) Be nga be tɔn be wun suɛn kɛ be ti Klistfuɛ mɔ be yɛ be ti Babilɔni klɔ dan’n i akpasua ng’ɔ ti tɛ kpa’n, be nunnunlɛ’n ɔ́ wlá Ɲanmiɛn sulɛ wafa ng’ɔ timan su sɔ’n i wunmuan’n i nunnunlɛ’n, i bo ase. Zoova yó maan politiki kpɛnngbɛn’m bé núnkun tekle bla’n sɔ’n mlɔnmlɔn. (Ngl. 17:15-18) I sɔ liɛ’n yɛ ɔ́ yó ‘nyrɛnnɛn dan’n’ i bue klikli’n niɔn.—Mat. 24:21.
14. (a) ?Ngue ti yɛ bé kpɛ́ ɲrɛnnɛn dan’n i bue klikli’n i sin ɔn? (b) ?‘Nzɔliɛ ng’ɔ kle kɛ i bɔ ɔ kacili Sran’n ɔ su ba’n,’ i fitelɛ’n klé Zoova i sufuɛ’m be sɛ?
14 Zezi waan “be b’ɔ fali be’n” mɔ be yɛle Klistfuɛ nga be kpali be sieli be ngunmin’n, be onga nga be te o asiɛ’n su wa’n ‘be ti’n,’ Ɲanmiɛn kpɛ́ ɲrɛnnɛn dan’n i cɛn’n su. (Mat. 24:22) Zoova su kplinman su kɛ, kɛ bé núnnún Ɲanmiɛn sulɛ wafa ng’ɔ timan su’n, be nunnun Klistfuɛ nga be kpali be sieli be ngunmin nin be wiengu nga be flɛ be bua’m be wie mun’n. Zezi kan guali su kɛ, “kɛ cɛn sɔ’n nun nyrɛnnɛn liɛ’n ko sin cɛ’n,” bé wá wún ninnge wie mun wia’n nin anglo’n, ɔ nin nzraama’m be su. “Yɛ nzɔliɛ’n ng’ɔ kle kɛ m bɔ n kacili Sran’n n su ba’n, ɔ́ fíte nyanmiɛn su lɔ.” I sɔ’n yó maan asiɛ’n su nvlenvle’m “bé bó awuyomo.” Be nga be kpali be sieli be ngunmin mɔ be wla o su kɛ bé kɔ́ ɲanmiɛn su’n, be su yoman sɔ wie. Yɛ be wiengu nga be wla o su kɛ bé ká asiɛ’n su wa kusu be su yoman sɔ wie. Bé ‘jáo jrán, bé mán be ti’n su, [afin] kɛ ɔ́ yó sɔ’n, wuun be su wa nyan be ti.’—Mat. 24:29, 30; Lik 21:25-28.
15. ?Kɛ Klist ko ba’n, ngue junman yɛ ɔ́ dí ɔ?
15 Ka naan i m’ɔ kacili sran’n wa guɛguɛ i kwlalɛ’n i bo’n, ɔ́ wá bá wafa uflɛ ekun. Ɔ dun mmua seli kɛ: “M bɔ n kacili Sran’n bɔ min nyrun ti nyannyan ɔ yo sro’n, kɛ min nin min anz’m be kwlaa é bá’n, ń yí n famiɛn’n nglo ń trán m bia’n su. Nvle-nvle’m be kwlaa bé yía min nyrun lɛ, ḿ bú be nun kɛ nnɛn tafuɛ’n bu i bua mun nin i boli’m be nun gua be ngunmin-ngunmin’n sa. Ń gúa bua mun n sa fama su, yɛ ń gúa boli mun n sa bɛ su.” (Mat. 25:31-33) I sɔ ndɛ liɛ’n wɔ balɛ nga Klist bá kɛ Jɔlɛ difuɛ sa’n. Ɔ́ bá naan ɔ́ wá búbú “nvle-nvle’m be kwlaa” be nun akpasua nɲɔn. Akpasua kun yɛle be nga be suɛnnin i niaan (Klistfuɛ nga be kpali be sieli be ngunmin’n be onga nga be te o asiɛ’n su wa’n) be bo’n. Be yɛ be flɛ be ‘bua mun’n’ niɔn. Kpɛkun akpasua kun yɛle be nga “be fa-man e Min Jésus i jasin fɛ’n su’n” mɔ be yɛle ‘boli mun’n.’ (2 Tɛs. 1:7, 8) Be nga be ti kɛ bua mun sa mɔ be waan be ti ‘nanwlɛfuɛ annzɛ sɛsɛfuɛ’n’ bé ɲán “anannganman nguan” asiɛ’n su wa. Sanngɛ be nga be ti kɛ boli sa’n, “bé kɔ́ lika bɔ lɔ nyrɛnnɛn’n wie-man’n” nun. Yɛle kɛ bé núnnún be.—Mat. 25:34, 40, 41, 45, 46.
Zezi kwlá
16. ?Wafa sɛ yɛ Klist m’ɔ ti e su Kpɛn’n, ɔ́ kwlɛ́ i kpɔfuɛ mun ɔn?
16 Kɛ be nga be nin Zezi bé dí famiɛn nin Ɲanmiɛn nuan ijɔfuɛ junman’n be nuan ko yia m’ɔ ko fa be nga be ti kɛ bua sa’n ko sie i fama su kɛ be ɲan be ti’n, kpɛkun siɛn’n, Klist “nin i kpɔfuɛ mun be [su] ko kun naan ɔ́ kwlá be.” (Ngl. 5:9, 10; 6:2) Ɔ́ dún anzi nga be ti sonja mɔ be le kwlalɛ kpa’n, ɔ nin i niaan mɔ be cɛnnin be’n be ɲrun mmua. Kpɛkun bé núnnún Satan i politiki anuannzɛ nin i sonja mun yɛ i aata dilɛ ninnge ng’ɔ siesieli be’n. (Ngl. 2:26, 27; 19:11-21) Kɛ Klist ko nunnun Satan i mɛn tɛ’n mlɔnmlɔn’n nn w’a kwlɛ i kpɔfuɛ mun. I sin ɔ́ tó Satan nin i mmusu mun yí i kunman dan’n nun. Bé ká lɔ lele afuɛ akpi.—Ngl. 20:1-3.
17. ?Klist i afuɛ akpi famiɛn dilɛ blɛ’n nun’n, atin benin yɛ ɔ́ klé bua’m be wie mun ɔn? ?Yɛ nda benin yɛ ɔ fata kɛ e ta ɔ?
17 Akoto Zan kannin “sran kpanngban kpa” mɔ be o be nga be flɛ be bua’m be wie’m be nun mɔ bé fín ɲrɛnnɛn dan’n nun fíte’n be ndɛ. Ɔ seli kɛ: “Bua Gbanflɛn’n b’ɔ o bia’n i afiɛn lɛ’n, ɔ́ tá be, ɔ́ fá be kɔ́ nzue ti mun bɔ be man nguan’n be nuan.” (Ngl. 7:9, 17) Klist i afuɛ akpi famiɛn dilɛ blɛ’n nun’n, ɔ́ klé bua’m be wie mun mɔ be tieli i aniɛn’n sakpa’n be atin. Ɔ́ klé be anannganman nguan’n i atin. (An kanngan Zan 10:16, 26-28 nun.) Ɔ maan ɔ fata kɛ e ta nda kɛ é sú e famiɛn m’ɔ ti e Atin Klefuɛ’n su andɛ. Naan mɛn uflɛ nga Zoova waan ɔ́ fá mán e nun’n, é sú i su tititi!
I nun flanlɛ
• ?Kɛ be sieli Klist i famiɛn’n, ajalɛ benin yɛ ɔ fali ɔ?
• ?Asiɛ’n su wa’n, wan mun yɛ Klist fa be tinngɛ asɔnun mun ɔn?
• ?Wafa sɛ yɛ Klist m’ɔ ti e Atin Klefuɛ’n wá bá ɔ?
• ?Mɛn uflɛ’n nun lɔ’n, wafa sɛ yɛ Klist klé e atin ekun ɔn?
[Foto, bue 32]
Satan i mɛn tɛ’n i nunnunlɛ’n yó maan sran’m bé wún i kɛ Klist w’a ba.